Potutusi
Faaaliga

“Faaaliga,” Autu ma Fesili (2023)

Ata
teineitiiti o loo tatalo i fafo

Taiala mo le Suesueina o le Talalelei

Faaaliga

Taitaiga faaletagata lava ia i aso taitasi mai se Tama Faalelagi alofa

O fesili ma le le mautonu o ni vaega masani o le olaga. O ai e te liliu atu i ai mo tali ma faamautinoaga e matuai taua lava. O le mea e lelei ai, o loo i ai iina le Atua e fesoasoani i lau sailiga mo tali ma le malamalama. E mafai ona e faalagolago i le folafolaga e faapea “afai … ua leai se poto [ia te oe],” e mafai ona e ole atu ia te Ia mo se fesoasoani ma “ona foaiina mai ai lea ia te [oe]” (Iakopo 1:5).

E fetalai mai le Atua i Ana fanau taitoatasi i faaaliga patino e ala i le Agaga Paia. Ua Ia saunia perofeta ma isi tagata ma punaoa e taiala ai i tatou i luitau ma aafiaga o lenei olaga. O se tasi o tulaga sili ona taua o le fesootaiga folafolaina lea e mafai ona oo mai ia i tatou mai le Atua e ala i le Agaga Paia.

O Le A Le Faaaliga?

O faaaliga o le taitaiga faalelagi ma fesootaiga e tuuina mai e lo tatou Tama Faalelagi alofa i Ana fanau. E masani ona oo mai o ni lagona po o ni mafaufauga ua faamatalaina o le “leo filemu ma le itiiti” o le Agaga Paia (Mataupu Faavae ma Feagaiga 85:6). Tatou te faateleina lo tatou tomai e maua ai ma iloa faaaliga patino pe a tatou liliu atu i le Atua i le tatalo, suesue i tusitusiga paia, ma saili ia usiusitai i poloaiga a le Atua. E taitai e le Alii Lana Ekalesia e ala i faaaliga Na te tuuina mai i Ana auauna faatagaina. E le gata i lea, e mafai e i tatou taitoatasi ona maua faaaliga patino e fesoasoani ia i tatou i manaoga faapitoa, tiutetauave, ma fesili.

Vaaiga aoao i autu: Faaaliga

O taiala fesootai mo le suesueina o le talalelei: Meaalofa o le Agaga Paia, Tatalo, Tusitusiga Paia, Sailia o le Upumoni ma le Aloese Mai le Taufaasese

Vaega 1

E Mafai e le Atua ona Fesootai ma Oe e ala i Faaaliga Faaletagata Lava Ia

Ata
Teineitiiti o loo tootuli i le moega e tatalo

E alofa le Atua ia te oe ma silafia atoatoa luitau ma tofotofoga o loo feagai ma oe; Na te lei tuua lava na o oe (tagai i le Ioane 14:18). E mafai ona e faia ni laasaga taua e saunia ai oe lava ia maua ma iloa faaaliga faaletagata lava ia. O sauniuniga faaleagaga e aofia ai le suesueina o tusitusiga paia, tapuai i le aso Sapati ma i le maota o le Alii, salamo i aso taitasi, anapogi, ma tatalo faamaoni. Ua folafola mai e le Alii o le a Ia taialaina oe pe afai e te saili e faalatalata atu ia te Ia (tagai i le Mataupu Faavae ma Feagaiga 88:63).

Na aoao mai Peresitene Russell M. Nelson:

“Saili se nofoaga filemu e mafai ona e alu soo i ai. Ia faamaualaloina oe lava ia i luma o le Atua. Sasaa atu lou loto i lou Tama Faalelagi. Liliu atu ia te Ia mo ni tali ma le faamafanafanaga .

“Tatalo atu i le suafa o Iesu Keriso e uiga i ou atugaluga, ou popolega, ou vaivaiga—ioe, o faanaunauga lava o lou loto. Ona faalogo lea! Tusi i lalo manatu e oo mai i lou mafaufau. Tusifaamaumau i lalo ou lagona ma tulitatao i faatinoga e uunaia oe e fai. …

“E leai se mea na te tatalaina le lagi e pei o le tuufaatasiga o le mama a’ia’i faateleina, usiusitai sa’olele, sailiga ma le naunautai, taumafa i aso taitasi i afioga a Keriso i le Tusi a Mamona, ma taimi faisoo e tuuto atu i le galuega o malumalu ma talafaasolopito o aiga.”1

Mea e mafaufau i ai

Gaoioiga mo le aoao faatasi ma isi

  • I se tusiga i le Liahona o Ianuari 2021 ua faaulutalaina “Tuputupu A’e i Totonu o Mataupu Faavae o Faaaliga,” ua talanoaina ai e Peresitene Russell M. Nelson le ala e mafai ai ona tatou malamalama atili i le ala e valaaulia ai le taitaiga a le Tama Faalelagi i o tatou olaga. Valaaulia tagata o lau vaega e suesue ni vaega o le tusiga. Talanoa faatasi e uiga i fesili nei: O a mataupu faavae ua faamamafa mai e Peresitene Nelson? O le a se mea ua musuia oe ia ese se auala e fai ai i le uma ai ona faitauina o nei savali?

Aoao atili

Vaega 2

O Faaaliga Faaletagata Lava Ia e Masani Ona Oo Mai o ni Uunaiga, Mafaufauga, ma Lagona

Ata
alii o loo mafaufau

Pe ua e aoaoina ea ni fasifuaitau i se gagana fou? Faatasi ai ma le suesue ma le faataitai, e mafai ona e amata iloa ai na upu pe a talanoaina e isi i se talanoaga. I se auala talitutusa faapena, atonu e te le iloaina i taimi uma le siufofoga o le Agaga i le taimi muamua, ae o le aoaoina o mataupu faavae taua e mafai ona saunia ai oe ia malamalama atili i fesootaiga faalelagi. Mo se faataitaiga, sa molimauina e le perofeta o le Feagaiga Tuai o Elia se matagi malosi, se mafuie, ma se afi, ae sa matau e Elia “e lei i ai Ieova” i na mea. Ona ia faalogoina lea “o se leo itiiti ma le filemu” ma sa ia iloaina o le siufofoga lea o le Alii (tagai 1 Tupu 19:11–13). E fetalai mai le Atua ia i tatou i se “leo filemu ma le itiiti” (tagai i le Helamana 5:28–30) ma lagona e pei o le filemu, mafanafana, ma le olioli (tagai i le Kalatia 5:22–23).

O le isi mataupu faavae o faaaliga e faapea o le Atua e “tuu atu i le fanauga a tagata lea fuaitau i luga o lea fuaitau, ma lea amataupu i luga o lea mataupu, o sina mea itiiti i i ma sina mea itiiti i o” (2 Nifae 28:30). O lona uiga e le tuuina mai e le Atua ia i tatou mea uma i le taimi e tasi. Ae, e mafai ona tatala mai faaaliga faaletagata lava ia i le aluga o taimi.

Sa faamamafaina mai ‎e Elder David A. Bednar lenei manatu: “O i tatou o tagata o le Ekalesia e foliga e faamamafaina tele faaaliga faaleagaga ofoofogia ma le matautia, tatou te ono le patipatia ai ma oo ai lava ina le amanaiaina le mamanu masani e faataunuuina ai e le Agaga Paia Lana galuega. O le ‘faatauvaa o le ala’ (1 Nifae17:41) o le mauaina o uunaiga laiti auauai, lea a mavae se taimi ma i lona aotelega e maua ai se tali sa mananao ai po o le taitaiga tatou te manaomia, e ono afua ai ona tatou vaavaai i ona ‘tala atu o le faailoga’ (Iakopo 4:14.”2

Mea e mafaufau i ai

  • I lana saunoaga i le konafesi aoao ia Aperila 2020 “Faalogo ia te Ia,” na saunoa ai Peresitene Nelson, “E lei sili atu lava ona taua le iloa o le ala e talanoa mai ai le Agaga ia te oe nai lo le taimi nei. … “Ou te toe faafou atu la’u aioiga mo outou ia fai po o le a lava le mea e faateleina ai lo outou gafatia faaleagaga e maua ai faaaliga faaletagata lava ia.”3 O a ni auala ua e maua ai se aafiaga o faaaliga faaletagata lava ia?

Gaoioiga mo le aoao faatasi ma isi

  • I le faasologa o vitio e tolu vaega oPatterns of Light, o loo talanoaina ai e Elder David A. Bednar auala e mafai ai ona tatou malamalama atili i faaaliga faaletagata lava ia. Matamata faatasi o se vaega i se vitio se tasi pe sili atu. Valaaulia tagata o le vaega e faasoa mai pe faapefea ona fesoasoani nei savali ia i latou e vaai atu ai i faaaliga faaletagata lava ia ma se manino sili atu. Atonu foi e te manao e toe faamanatu le saunoaga a Elder Bednar i le konafesi aoao ia Aperila 2011 “O Le Agaga o Faaaliga.”

Aoao atili

Vaega 3

E Taitaia e le Alii Lana Ekalesia e ala i Faaaliga

Ata
Korama a Aposetolo e Toasefululua

O le agaga o faaaliga e mafai ona taialaina i tatou taitoatasi, ae a finagalo le Alii e taitai Lana Ekalesia, e fetalai mai o Ia e ala i le perofeta soifua o loo auauna atu o le Peresitene o le Ekalesia (tagai i le Mataupu Faavae ma Feagaiga 107:91–92). Na aoao mai Elder Dale G. Renlund: “E na o le perofeta lava e mauaina faaaliga mo le Ekalesia. O le a ‘feteenai ma le tamaoaiga o le Atua’ mo isi le mauaina o ia faaaliga. … O faaaliga faaletagata lava ia e ā tagata taitoatasi ia. Mo se faataitaiga, e mafai ona e mauaina faaaliga, e uiga i le mea e te nofo ai, o le a le ala faalematātā e te mulimuli ai, pe o ai foi e te faaipoipo i ai. E mafai e taitai o le Ekalesia ona aoao atu aoaoga faavae ma faasoa atu fautuaga musuia, ae o le tiutetauave mo nei faaiuga e taoto lea ia te oe lava ia. O lau faaaliga lena ia maua.”4

Mea e mafaufau i ai

  • E lei leva ona uma ona faatulagaina le Ekalesia, ae faamanino mai mo le Ekalesia le matafaioi taua a Iosefa Samita o se perofeta. Faitau le Mataupu Faavae ma Feagaiga 43:1–7. E mafai faapefea e le mataupu faavae o loo faamatalaina i lenei fuaitau ona puipuia oe mai le faaseseina e faaaliga e le mai le Atua?

Gaoioiga mo le aoao faatasi ma isi

  • Faatasi ai ma lau vaega, faitau le savali a Peresitene M. Russell Ballard “O Le Faaaliga o le Togiolaina o E ua Maliliu,”5 ma vaavaai pe na faapefea ona saunia e le Alii ia Peresitene Iosefa F. Samita ina ia maua se faaaliga taua tele mo le Ekalesia. Na faapefea e aafiaga o le soifuaga o Peresitene Samita ona saunia o ia mo le faaaliga vaaia na ia mauaina? E tusa ai ma le Mataupu Faavae ma Feagaiga 138:1–11, o le a le mea na faia e Peresitene Samita na saunia ai o ia ina ia aoaoina mai le lagi? E faapefea ona fesoasoani lenei faataitaiga tatou te malamalama ai i le taua o le saunia e iloa le agaga o faaaliga?

Aoao atili

Lolomi