Potutusi
Tatalo

“Tatalo,” Autu ma Fesili (2023)

aiga o loo tatalo

Taiala mo le Suesueina o le Talalelei

Tatalo

Fesootaiga faamaoni ma le loto atoa ma le Tama Faalelagi

Atonu e mafai ona e mafaufau i ni taimi i lou olaga e te manaomia ai se fesoasoani faalelagi po o se taitaiga. Atonu na leiloa se mea ia te oe, na i ai sau fesili taua, pe na e aafia foi i se manaoga faanatinati mo se laveai. Ma o nisi taimi atonu sa na ona e saili mo le malosi po o le lototele tau ina agai ai pea i luma. O le tatalo o le faatinoga lea o le liliu atu i le Atua ma le faamaoni ma faasoa atu ia te Ia ou lagona, mafaufauga, ma manaoga. O le vavega o le tatalo o le afai e te aapa atu lea i le Tama Faalelagi, Na te faafofogaina oe (tagai Ieremia 29:12–13). Po o ai lava oe, e tusa lava po o a au mea sese po o le le atoatoa, e finagalo le Tama Faalelagi ia e fesootai ma Ia e ala i le tatalo. O le alofa atoatoa o le Atua e faamautinoa ai e mafai ona e ta’u atu ia te Ia soo se mea, ma o le a Ia faafofoga mai.

O Le a Le Tatalo?

O le tatalo o se fesootaiga faamaoni, ma le loto atoa ma le Tama Faalelagi. O se tasi lea o faamanuiaga silisili ua tuuina mai e le Atua i Ana fanau e saili ai Lana taitaiga faalelagi i aso taitasi. Na aoao mai Iesu, “O le mea lea e tatau ai ona outou tatalo e le aunoa i le Tama i lo’u igoa” (3 Nifae 18:19).

Vaaiga aoao i autu: Tatalo

O taiala fesootai mo le suesueina o le talalelei: O le Atua le Tama, Tapua’i i le Atua le Tamā, Faaaliga Faaletagata Lava Ia, Anapogi, Ola i le Talalelei a Iesu Keriso

Vaega 1

Ua Valaaulia e le Atua Ana Fanau e Tatalo e le Aunoa

alii o loo aveina le taavale

Na aoao atu e Iesu Keriso i Ona soo e tatalo i le Atua le Tama (tagai Mataio 6:5–13; 3 Nifae 17:11–20). Ua poloaiina i tatou e le Tama Faalelagi ia “tatalo e le aunoa” (Mataupu Faavae ma Feagaiga 19:38), aua e alofa o Ia ia i tatou ma finagalo e faamanuia i tatou. E finagalo o Ia ia tatou faia se mamanu o le liliu atu ia te Ia i aso taitasi i le tatalo. E finagalo foi o Ia ia tatou tatalo pea i o tatou loto i le aso atoa (tagai Mosaea 24:11–12; 3 Nifae 20:1). Pe a tatou tatalo atu i le Tama Faalelagi i le suafa o Iesu Keriso (tagai 3 Nifae 18:19; 19:6), tatou te faaalia lo tatou faatuatua i lo tatou Faaola ma lo tatou naunau e mulimuli ia te Ia. O le mea lea, tatou te tautala atu ai ma le migao i le suafa o le Alii a o tatou faaiuina se tatalo, ma faapea atu “i le suafa o Iesu Keriso, amene.”

Ona o le tatalo o le ala lea tatou te faalatalata atu ai i le Atua le Tama, tatou te taumafai ai e faaaoga upu e faaalia ai le faamaoni ma le migao. Na faamalamalama mai e Peresitene Dallin H. Oaks: “Na saunoa mai le Perofeta o Iosefa Samita, ‘O se mea maoae le ole atu i aao o le Atua, po o le sau i Lona afioaga.’ … O le gagana faapitoa o le tatalo e faamanatu mai ai ia i tatou le maoae o lena avanoa.”1 Ma le paia o le tatalo i le mafaufau, e tatau ona tatou faaaogaina ia suinauna o tusitusiga paia pe a tatou ta’ua le Atua—Lau Afio, ma le Lou Afio, nai lo o le suinauna masani o le oe, o lau, ma le o lou” e talafeagai ai.2

Mea e mafaufau i ai

  • Ua poloai mai le Faaola ia Iosefa Samita, “Tatalo e lē aunoa, ina ia mafai ona e sau ai o lē ua manumalo; ioe, ina ia mafai ona e manumalo ia Satani, ma ina ia e sao ese mai lima o auauna a Satani ua sapasapaia lana galuega” (Mataupu Faavae ma Feagaiga 10:5). O le a le uiga o le tatalo e le aunoa? O a nisi o mafuaaga e manaomia ai e i tatou taitoatasi le puipuiga faaleagaga a le Tama Faalelagi?

Gaoioiga mo le aoao faatasi ma isi

  • O loo i ai i tusitusiga paia le tele o faataitaiga o le tatalo. Faitau faatasi le 2 Nifae 4:30–35 ma le Alema 34:17–27 ma vaavaai mo le taitaiga e uiga i le taimi e tatau ai ona tatou tatalo ma mo mea e tatau ona tatou tatalo atu ai. E mafai faapefea e le mamanu o le tatalo o loo maua i nei fuaitau ona aafia ai le ala tatou te filifili ai e tatalo?

Aoao atili

Vaega 2

O Le Tatalo Faamaoni o le a Faalatalata Atili Atu ai Oe i le Tama Faalelagi ma Iesu Keriso

o se tamā o loo sii se pepe meamea

E i ai taimi pe a tatou tatalo, atonu tatou te faaaogaina pea lava pea ia upu po o fuaitau e tasi. E mafai ona e vaai faalemafaufau i le faaaogaina o gagana masani pe leai se uiga i taimi uma e te asiasi ai i uo po o tagata o le aiga? O a tatou taumafaiga e fesootai atu ma le faamaoni ma isi tagata e tatau ona faamanatu mai ai ia i tatou le ala e talanoa atu ai i le Tama Faalelagi i le tatalo. E finagalo le Atua ia faamaoni a tatou tatalo. I le Tusi a Mamona, o le perofeta o Enosa “sa sasaa atu [lona] agaga atoa i le Atua” i le tatalo e saili faamanuiaga (Enosa 1:9). I se auala foi faapena, tatou te liliu atu ai i le Atua mo faamanuiaga patino mo i tatou lava faapea ma isi.

I le avea ai ma se ituaiga o tapuaiga, ua i ai i le tatalo le mana e faalatalata atu ai i tatou i le Tama Faalelagi (tagai i le Mataupu Faavae ma Feagaiga 88:62–64). Pe a tuufaatasia le tatalo faamaoni ma le anapogi, e mafai ona tatou maua le agaga o faaaliga ma o tatou loto e mafai ona faamamaina ma faapaiaina (tagai i le Alema 17:3; Helamana 3:35).

Mea e mafaufau i ai

  • Na aoao atu e le Aposetolo o Paulo le Au Paia ia “tatalo e le aunoa” ma “ia outou faafetai i mea uma lava” (1 Tesalonia 5:17–18). O le a le uiga ia te oe o le tatalo e le aunoa? Aisea e avea ai ma vaega taua o le tatalo le faailoa atu o le faafetai? O le a se mea e mafai ona e faia e avea ai le tatalo faamaoni o se vaega tele o au taumafaiga e faalatalata atili atu ai i le Tama Faalelagi?

  • E faafofoga ma tali mai le Tama Faalelagi i tatalo faamaoni uma lava. O nisi tatalo e le leoa; o isi e tautala ma le leo. Faitau faataitaiga nei o le tatalo tautala: Mataio 26:39–44; Ioane 17:1; 2 Nifae 4:24; Enosa 1:4; Iosefa Samita—Talafaasolopito 1:14. O le a sou aafiaga i le tatalo ma le leo? O le a se mea ua e maua e fesoasoani e uiga i le tatalo leotele?

Gaoioiga mo le aoao faatasi ma isi

  • Faitau pe matamata i le “O Le Manaoga Faamaoni o le Agaga” na saunia e Sister Carol F. McConkie. I lenei savali, sa saunoa ai Sister McConkie, “Tatou te tatalo i le faatuatua, tatou te faalogo, ma tatou te usiusitai ina ia tatou aoao ia tasi ma le Tama ma le Alo.”3 Talanoa i mea na aoaoina e tagata uma mai lenei savali. E mafai faapefea ona manatulia le tatalo o se taimi e faaalu faatasi ma le Tama Faalelagi?

Aoao atili

Vaega 3

E Faafofoga ma Tali Mai le Tama Faalelagi i Au tatalo.

teineitiiti o loo tatalo i le taimi o le meaai

Pe na i ai se taimi na e mafaufau ai pe o faafofogaina e le Atua au tatalo? E masani lava ona faafofogaina ma tali mai le Tama Faalelagi i a tatou tatalo faamaoni: “Ia outou ole atu, ona foaiina mai ai lea ia te outou; ia outou saili, ona outou maua ai lea; ia outou tuitui atu, ona toina ai lea ia te outou” (Mataio 7:7). Ae e tali mai le Alii ia tatou tatalo e tusa ai ma Lona finagalo ma [Lana] taimi (tagai Mosaea 7:33; Mataupu Faavae ma Feagaiga 64:31–32).

“O le tatalo o le faatinoga lea e feutagai ai le finagalo o le Tama ma le manao o le tamaitiiti. O le faamoemoega o le tatalo, e le ina ia suia ai le finagalo o le Atua, ae ia faamautu ai mo i tatou lava ma isi ia faamanuiaga ua naunau i ai le Atua e to mai, ae e faalagolago i lo tatou ole atu i ai.”4

Mea e mafaufau i ai

  • O a naunauga silisili o lou loto? E mafai faapefea e le saili e faaogatusa lou loto ma le finagalo o le Atua ona mamanu ai ou manaoga ma tatalo?

  • E masani ona tali le Tama Faalelagi i a tatou tatalo e ala mai i le Agaga Paia. O nisi taimi e tali mai ai a tatou tatalo pe a tatou faitau ma suesue i tusitusiga paia. E galue foi le Atua e ala mai i isi tagata e tuuina atu le fesoasoani po o tali tatou te sailia. Faitau fuaitau o mau nei e mafaufau ai i nisi o auala e mafai ona oo mai ai fesootaiga mai le Atua ia te oe e ala i le Agaga Paia: 1 Tupu 19:12; Mataupu Faavae ma Feagaiga 8:2–3; 11:11–14. O anafea na e iloa ai na faafofogaina e le Atua au tatalo?

Gaoioiga mo le aoao faatasi ma isi

  • Faatasi ma lau vaega, lisi nisi o auala e mafai ai ona tatou faaaoga tekinolosi e fesootai ai ma isi. Talanoaina le fesili “Aisea tatou te faigata ai i nisi taimi ona fesootai lelei ma lo tatou Tama Faalelagi?” Faitau faatasi le 3 Nifae 14:7–11 . O le a se mea na aoao mai e Iesu Keriso e uiga i le naunau o le Tama Faalelagi e tali a tatou tatalo?

Aoao atili

Faamatalaga

  1. Dallin H. Oaks, “O Le Gagana o le Tatalo,” Ensign, Me 1993, 18.

  2. Autu o le Talalelei, “Tatalo,” Potutusi o le Talalelei.

  3. Carol F. McConkie, “O Le Manao Faamaoni o le Agaga,” Liahona, Nov. 2016, 25.

  4. Bible Dictionary, “Prayer.”