Tuputupu ae i le Mataupu Faavae o Faaaliga
Saunia e Peresitene Russell M. Nelson
Peresitene O Le Ekalesia a Iesu Keriso o le Au Paia o Aso e Gata Ai.
Ou te uunaia outou e faaaoga laasaga e manaomia e faalogo lelei atili ai i le Alii, ina ia mafai ai ona outou maua le malamalama e finagalo o Ia e tuuina atu ia te outou.
At pue mai le Getty Images
I le aso 30 o Setema, 2017, i le maea ai o le sauniga o le aoauli o le konafesi aoao, sa ou afe ai i le falemai e siaki lo’u uso pele o le Korama o Elder Robert D. Hales. Sa faataotolia o ia talu mai lona mafatia i lona ma’i fatu na oso i ni nai aso na muamua atu.
Sa ma maua se asiasiga matagofie, ma sa foliga mai sa faasolosolo lelei. Sa manava foi o ia e aunoa ma se masini, o se faailoga lelei.
Ae peitai, i lena afiafi, sa fetalai mai le Agaga i lou loto ma lou mafaufau e tatau ona ou toe foi i le falemai i le Aso Sa. I le taimi o le sauniga o le taeao o le Aso Sa o le konafesi aoao, na toe foi mai ai se uunaiga malosi. Sa ou lagona e tatau ona ou faamisi le malologa ae ou faanatinati i le moega o Elder Hales i le taimi lava na faaiuina ai le sauniga i le taeao, lea sa ou faia.
Ina ua ou taunuu atu, sa mafai ona ou iloa ua matua tele le suiga faaletonu ua i ai Elder Hales. O le mea e faanoanoa ai, na maliu o ia i le 10 minute talu ona ou taunuu, ae ou te faafetai ona sa ou i ai faatasi ma lona toalua pele, o Maria, ma le la fanau tama e toalua ina ua ia tuua lenei olaga.
Ou te matuai faafetai lava ona sa uunaia au e musumusuga a le Agaga Paia e fai se mea semanu ou te le ono faia lava. Ma e maeu lou faafetai mo le moni o faaaliga ma ua toe tatalaina le lagi.
O le tausaga lenei o le a tatou taulai atu i suesuega faaletagata lava ia ma le potuaoga, o le Mataupu Faavae ma Feagaiga. O nei “faaaliga paia ma tautinoga musuia” e mafai ona faamanuiaina ai i latou uma o e suesue ma galulue i o latou faatonuga paia. Latou te valaaulia “tagata uma i soo se mea ia faalogo i le siufofoga o le Alii o Iesu Keriso,”1 aua e moni lava “o le siufofoga o le Alii ua mo tagata uma” (Mataupu Faavae ma Feagaiga 1:2).
Matautia, Pogisa, Taufaasese
O afa faaletino ma faaleagaga o se vaega o le olaga i le lalolagi, e pei ona faamanatu mai e le faama’i o le COVID-19 ia i tatou. O le taimi a o lumanai ai Lona Afio Mai Faalua, na valoia ai e le Faaola aso o le puapuaga tele. Na fetalai o Ia, “E i ai oge, ma faamai, ma mafuie, i nofoaga eseese” (Iosefa Samita — Mataio 1:29).
O le tuufaatasia o ia ituaiga faigata o le faateleina lea o le pogisa ma le taufaasese lea o loo siomia ai i tatou. E pei ona tau atu e Iesu i Ona soo, “o le a faateteleina le amioletonu” a o lei toe foi mai ( Iosefa Samita — Mataio 1:30).
Ua taitaiina e Satani ana au ma ua le fiafia i le galuega a le Alii ma i tatou o loo punouai ai. Ona o le faateleina o le matautia o loo tatou feagai ai, o lo tatou manaomia o le taitaiga faalelagi e lei sili atu lava, ma o a tatou taumafaiga e faalogo atu i le siufofoga o Iesu Keriso—lo tatou puluvaga, Faaola, ma le Togiola—e lei sili atu lava le faanatinati.
E pei ona ou fai atu ao lei leva ona valaauina au e avea ma Peresitene o le Ekalesia, ua saunia le Alii e faaali mai lona finagalo ia i tatou. O se tasi lena o Ana faamanuiaga silisili mo i tatou.2
I o tatou aso, na Ia folafola mai ai, “Afai e te ole mai, o le a e maua lea faaaliga ma lea faaaliga, o lea poto ma lea poto” (Mataupu Faavae ma Feagaiga 42:61).
Ou te iloa o le a tali mai o ia i a tatou aioiga.
E Faapefea ona E “Faalogo ia te Ia”?
O le iloa o le ala e musumusu mai ai le Agaga i aso nei e taua. Ina ia maua faaaliga faaletagata lava ia, ia maua tali, ma ia maua le puipuiga ma le taitaiga, tatou te manatua ai le mamanu na faatuina e le perofeta o Iosefa Samita mo i tatou.
Muamua, tuu atoa i tatou i tusitusiga paia. O le faia faapea e tatalaina ai o tatou mafaufau ma loto i aoaoga ma upumoni a le Faaola. O afioga a Keriso e “tau mai ai ia i [tatou] mea uma e mafai [e] i tatou ona fai” (2 Nifae 32:3), ae maise lava i aso nei o le le mautonu ma se toatuga.
O le mea e soso’o o le tatou tatalo. O le tatalo e manaomia ai taumafaiga taulamua, o lea tatou te faalotomaualaloina ai i tatou lava i luma o le Atua, saili se nofoaga filemu e mafai ona tatou o atu soo ai, ma sasaa atu o tatou loto ia te Ia.
Na fetalai mai le Alii “Ia faalatalata mai ia te a’u, ona ou faalatalata atu ai lea ia te outou; ia saili ia te au ma le filifiliga, ona outou maua ai lea o a’u; ole mai, ona outou maua ai lea; ia tuitui mai, ona toina ai lea ia te outou” (Mataupu Faavae ma Feagaiga 88:63).
O le faalatalata atu i le Alii e aumaia ai le faamafanafanaga ma le faamalosiauga, faamoemoe ma le faamalologa. O lea la, tatou te tatalo ai i Lona suafa e uiga i o tatou popolega ma o tatou vaivaiga, o tatou faanaunauga ma e pele ia i tatou, o o tatou valaauga ma a tatou fesili.
Ona tatou faalogo lea.
Afai tatou te tumau i o tatou tulivae mo sina taimi pe a uma ona faamaea a tatou tatalo, o le a oo mai ni mafaufauga, lagona, ma ni faatonuga i o tatou mafaufau. O le faamaumauina o na uunaiga o le a fesoasoani ia i tatou e manatua ai gaoioiga e finagalo le Alii tatou te faia.
A o tatou toe faia lenei faagasologa, o le a tatou i ai, i upu a le Perofeta o Iosefa Samita, “e tuputupu ae i le mataupu faavae o faaaliga.”3
Agavaa e Maua Faaaliga
Faamama lo tatou mafaia e iloa ai musumusuga a le Agaga Paia ma le faateleina o lo tatou malosi e maua ai faaaliga e manaomia ai le agavaa. O le agavaa e le manaomia ai le atoatoa, ae e manaomia ai lo tatou taumafai ia faateleina le mama.
E faamoemoe le Alii i taumafaiga i aso uma, faaleleia o aso uma, salamo i aso taitasi. O le agavaa e aumaia ai le mama, ma e agavaa ai i tatou i le mama a’ia’i mo le Agaga Paia. A o tatou ave “le Agaga Paia mo [lo tatou] taiala” (Mataupu Faavae ma Feagaiga 45:57), ua tatou agavaa mo faaaliga faaletagata lava ia.
Afai o loo taofia e se mea i tatou mai le tatalaina o le faitotoa i le taitaiga faalelagi, atonu e manaomia ona tatou salamo. O le salamo e mafai ai ona tatou tatalaina le faitotoa ina ia mafai ona tatou faalogo atili i le siufofoga o le Alii i le tele o taimi ma le manino.
“Ua manino lava le tulaga faatonuina,” o le aoao mai lea a Elder David A. Bednar o le Korama a Aposetolo e Toasefululua. “Afai o se mea tatou te mafaufau i ai, vaai i ai, faalogo i ai, pe fai foi tatou te taumamao ai mai le Agaga Paia, o lona uiga ua tatau loa ona taofia le mafaufau i ai, vaai i ai, faalogologo i ai, po o le faia o lena mea. Mo se faataitaiga afai o le mea o loo faamoemoe e faafiafia ai, e vavaeese mai ai tatou mai le Agaga Paia, ua manino mai ai o na ituaiga o faafiafiaga e le mo i tatou. Talu ai e le mafai ona mafuta le Agaga ma mea faatufanua, o mea pa’a’a, pe le tausaafia foi, o lona uiga e manino lava e le mo i tatou foi na mea.”4
A o faateleina e se ulugalii le mama ma le usiusitai i le anapogi, saili ma le filiga, suesue i tusitusiga paia ma upu a perofeta soifua, ma galuega o le malumalu ma talafaasolopito o aiga, o le a matala le lagi. O le a faataunuu e le Alii Lana folafolaga: “o le a Ou faaali atu ia te oe ‘ai lo’u Agaga, lea o le a faapupula ai lou mafaufau” (Mataupu Faavae ma Feagaiga 11:13).
Atonu tatou te manaomia le onosai, ae o le a fetalai mai le Atua ia i tatou i Lana lava ala ma i Lana lava taimi.
O Se Agaga o le Malamalama
Na tautino mai e Iopu, “O i ai lava e le agaga i totonu o le tagata: o le mānava foi a Lē e ona le malosi uma lava e faapopotoina ai i latou” (Iopu 32:8). I lenei tausaga fou, ou te uunaia outou ina ia faia laasaga e tatau ai ina ia faalogo lelei atili ai i le Alii, ina ia mafai ai ona outou maua le malamalamaaga e finagalo o Ia e tuuina atu ia te oe.
A o lei maliu Elder Hales i lena aso o Oketopa i le 2017, sa ia saunia se lauga puupuu mo le konafesi aoao e le’i mafai ona ia tuuina atu. I lena lauga, sa ia tusia ai, “e saunia e lo tatou faatuatua i tatou ia i ai i le afioaga o le Alii.”5
A tatou maua faaaliga, o le a tatou faaaluina le taimi i le afioaga o le Atua a o Ia faaali mai Lona mafaufau, loto, ma le siufofoga ia i tatou (tagai Mataupu Faavae ma Feagaiga 68:4). Tau ina ia tatou faagaioi lo tatou faatuatua, ma valaau atu ia te Ia, i le ola agavaa i Ana musumusuga folafolaina, ma faatino le taitaiga tatou te maua.