O Le Taula o Lo’u Olaga ma le Faatuatua
O le tele o lou faitauina o le Tusi a Mamona, o le tele foi lena o lou talitonu o le afioga a le Atua.
Faatusa o le Tusi a Mamona na saunia e le tusitala; o isi ata mai le Getty Images
Ou te lei fiafia i taimi uma a’o avea a’u o se tamaitiiti, ae na suia mea ina ua tuitui mai ni alii Amerika se toalua i lo matou faitotoa.
I le avea ai ma se 14 tausaga le matua, sa ou fia iloa ai nei tagata Amerika e toalua o e na tautatala i le faaIapani ma faailoa atu i laua lava o ni faifeautalai. Ina ua latou tuua, sa tuuina mai e lou tama se tusi na faatoa uma ona la tuuina atu ia te ia e faaigoa o le Tusi a Mamona. Sa amata ona ou faitauina ma lagonaina se mea faapitoa, ae sa ou le iloaina po o le a lena mea. O se masina mulimuli ane, sa ou faamaeaina ai ma tuu i luga o lau fatatusi.
O le tolu tausaga mulimuli ane, sa ou feiloai ai i faifeautalai e toalua i se nofoaga o nofoaafi i Tokyo. Sa la valaaulia au e faalogologo i le la savali. Sa ou aumaia lau Tusi a Mamona i le isi a matou fonotaga.
Sa la amataina le talanoaga i le faapea mai, “E ma te fia faasoa atu se tusi taua ia te oe.”
Sa ou tago i le Tusi a Mamona mai lau ato ma fesili atu, “O le tusi ea lenei? “Ua uma ona ou faitau i ai.”
Sa faateia i latou. Mulimuli ane, sa aoaoina au i le talalelei, ma sa fautuaina au e faifeautalai e ole atu i le Atua ma se loto faamaoni pe moni le Tusi a Mamona (tagai Moronae 10:4–5).
I se tasi po sa ou mafaufau ai i le Atua, le Ekalesia, le Tusi a Mamona, ma le auala e mafai ona ou fiafia ai ma lagonaina ai se mea mafanafana i totonu. Sa tonu ia te a’u ou te papatiso.
Ina ua ou auai i le Ekalesia, sa faaauau pea ona ou faitauina le Tusi a Mamona. I se tasi aso a o ou faitauina, sa ou maua ai se mafaufauga manino e uiga i fualaau a lou Tama mo le toto maualuga. Sa ou aoao atili e uiga i ai ma iloa ai o se taunuuga o se itu e ono mafua ai le atuatuvale. I lau fautuaga, sa fai atu lou tama i lana fomai e sui lana talavai. Ua alu ese lona atuatuvale talu mai lena taimi.
O le tele o lou faitau, o le tele foi lena o lou talitonu o le Tusi a Mamona o le afioga a le Atua. Sa oo ina sili atu ona ou fiafia ma manao e faasoa atu le upu moni i isi.
Na tetee e ou matua i lou alu i se misiona ma iu ai ina la tulieseina a’u mai lo latou fale, ae sa ou naunau lava. Sa ou auauna atu i Tennessee, ISA. I le avea ai ma se faifeautalai o le Au Paia o aso e gata ai mai se atunuu lotu Puta o loo auauna atu i le nofoaga o le Tusi Paia o le Iunaite Setete, sa masani ona fesiligia au pe faapefea ona ou talitonu i le Tusi a Mamona. Sa ou molimau atu sa ou tatalo e uiga i lona moni ma maua se tali e moni.
Ina ua maea lau misiona, sa ou faamaeaina le aoga ma auai i se kamupani tele i Iapani lea na siitia atu ai au i nisi o nofoaga i le salafa o le lalolagi, e aofia ai Myanmar, Egelani, ma Aialani. Soo se mea lava sa ou alu i ai, sa ou faasoa atu ai lau molimau o le Tusi a Mamona ma le toatele o tagata e mafaia, mai se avetaavale i taavale laupasese i se faifeau o le setete.
O le Tusi a Mamona—ma o le a i ai pea lava—o le taula lea o lou olaga ma lou faatuatua ia Iesu Keriso. Soo se taimi lava ou te lofituina ai i faigata, ou te faitauina ai le Tusi a Mamona ma faatoilalo ai ou faigata i le lagolago faaleagaga mai le Tama Faalelagi ma lo tatou Faaola. O le Tusi a Mamona ua faamanuiaina ai au i aso uma o lou olaga.