E Na’o Tusiga Faatekinolosi: Talavou Matutua
O A’u Fesili ma le Alofa o Keriso
Ua ou iloa o le vaai i a’u fesili o se “vaivaiga i le malamalama” e fesoasoani ou te agai atu ai i luma i le faatuatua ia Keriso.
I le faaiuga o se faigalotu faatasi ma Peresitene Russell M. Nelson na tuuina mai i le autalavou matutua, sa ia faamanuiaina i tatou “ina ia mafai ona iloatino le va o le sao ma le sese, i le va o tulafono a le Atua ma siufofoga feteena’i o le lalolagi.” Na ia faamanuiaina i tatou “i le mana e iloa ai le taufaasese a le fili … [ma] e i ai le mana sili atu e maua ai faaaliga.”1 O se faamanuiaga sili mo i tatou o ni talavou matutua! Na i ai o’u lava aafiaga i le mauaina o faaaliga e faatatau i fesili.
O aʻu o se tagata e fiailoa soʻo se mea lava ma e soona mafaufau i mea uma. O fesili ma se faanaunauga mo tali ua avea pea ma se vaega o lo’u natura, ma o le mea moni sa sili atu ona taua ia te au i taimi uma. Ae i le aluga o tausaga, e i ai nisi taimi ou te lagonaina ai le tuuatoatasi po o le maasiasi i le i ai o ni fesili ma ni masalosaloga e uiga i le talalelei ma le Ekalesia. Aua foi, ua tau mai e tusitusiga paia ia i tatou “aua le masalosalo” (Mataupu Faavae ma Feagaiga 6:36). Ma sa fesili atu le Faaola ia Peteru, “O oe na le faatuatua itiiti, se a le mea ua e masalosalo vale ai?” (Mataio 14:31).
Iloaina o Vaivaiga i lo Tatou Malamalama
I se tasi taimi, sa lagona ai le vaivai o lo’u faatuatua. Ae na mafai lava e le Atua ona aoao mai ia te au se lesona matagofie a o ou faitauina le Tusi a Mamona. Ina ua uma ona talai atu Keriso i sa Nifae, sa Ia matauina se mea. Na Ia faapea mai, “Ua ou iloa ua outou vaivai, ua le mafai ona outou malamalama i a’u upu uma ia na poloaiina ai au e le Tama e tautala atu ia te outou i le taimi nei” (3 Nifae 17:2).
Sa ou lagona le pei o Keriso o fetalai mai i na upu ia te au. Sa ou lagona foi lou vaivai, ma sa le mafai ona ou malamalama i mea uma sa Ia finagalo ou te iloa. O le tali atu a Keriso i lenei vaivaiga na ootia ai au: na vaai atu Keriso i le alofa o sa Nifae, ma e ui ina sa latou vaivai tele e malamalama i Ana upu, ae sa ia auauna atu ma alofa ia i latou i se auala e mafai ai ona latou malamalama ai.
I taimi ou te lagona ai le vaivai tele, le lava tele, po o le maaleale o le malamalama i upu a Keriso, Na te faamanuiaina ai au i le agaalofa ma le malamalama. O Lona alofa e aumaia ai ia te au le malosi e tumau ai pea ma saili pea mo upumoni ou te sailia.
Lagonaina o le Alofa o Keriso a o Tatou Saili le Upumoni
Afai o loo e feagai i le upumoni po o le aoaoga faavae i le taimi nei, aua le popole. E le afaina le tauivi i mea faigata ma i ai ni fesili po o ni atugaluga faapea o nisi taimi e luluina ai oe. A o e saili mo le upumoni, ia manatua e malamalama le Atua ia te oe, alofa ia te oe, ma e fiafia pe a e faaaogaina lou faitalia e saili ai le malamalama. E le o se mea lena e maasiasi ai. Na saunoa mai Elder Jeffrey R. Holland o le Korama a Aposetolo e Toasefululua: “O le tau i le pogisa ma le faanoanoa ma le aioi atu mo le malamalama, o le mea lea na tatalaina lenei tisipenisione. O le mea lena e alu ai pea lava, ma o le mea foi lena o le a e alu ai pea lava.”2
E mafai ona tatou iloa le moni o mea uma e ala i le mana o le Agaga Paia (tagai i le Moronae 10:5), ae e seasea lava ona oo mai pe o afea tatou te mananao ai. E aumai e le Atua ia tali i “lea fuaitau i luga o lea fuaitau, ma lea mataupu i luga o lea mataupu” (2 Nifae 28:30). E oo mai le Upumoni i le taimi a le Alii. Na te silafia le taimi tatou te saunia ai mo le malamalama, ma Na te silafia mea e tatau ona tatou maua a o lei mauaina.
Ou te faafetai mo se Atua o le a aoaoina i tatou i o tatou vaivaiga ma e faatagaina i tatou ia muai faamoemoe, ona talitonu ai lea, ona iloa ai lea. Ma ou te iloa e mafai ona tatou maua le upumoni e ala i faaaliga patino, e pei lava ona folafola mai e Peresitene Nelson. E popole le Tama Faalelagi i a tatou fesili, ma o le a Ia taialaina i tatou i totonu o i latou. O nisi taimi o Lana tali o le suia o o tatou loto ina ia mafai ona tatou iloa atu ni mea i se malamalama e ese mai, ma o nisi taimi e na ona talosagaina ai i tatou ina ia onosai ma faamaoni ma “saunia [o tatou] mafaufau mo a taeao” mo Ia e afio mai e aoaoina mulimuli mai i tatou (tagai i le 3 Nifae 17:3).
Ou te iloa po o le a lava le malamalama tatou te le o maua, e mafai ona tatou faaauau pea i luma ma le faamoemoe ma le faatuatua o le a i ai se aso o le a faaalia ai mea uma. Ma a oo i lena taimi, e mafai ona tatou faaauau ona faalatalata atu ia Keriso, o le o loo vaai mai i o tatou vaivaiga ma e alofa ia i tatou uma.