Tamaitai ma le Mana o Feagaiga
Saunia e Jean B. Bingham
Peresitene Aoao o le Aualofa
E mafai ona tatou olioli i avanoa ma le mana ua tatou maua e ala mai i le perisitua.
Ata na tusia e Amber Eldredge??
Na a’oa’o mai Peresitene Russell M Nelson e tutusa lava le matala o le lagi i tamaitai ua maua faaeega paia i le mana o le Atua e tafe mai ia latou feagaiga faa-perisitua e pei ona matala foi i alii o loo umiaina le perisitua.
“Ou te tatalo ina ia faamauina lena upumoni i o outou loto taitoatasi ona ou te talitonu o le a suia ai lou olaga,” lana faamatalaga lea. “Ou te fia tuuina se faamanuiaga i o outou luga, ina ia outou malamalama i le mana o le perisitua lea ua faaee atu ia te outou [i le faaeega paia] ma o le a outou faaaogaina lena mana e ala i le faatinoina o lou faatuatua i le Alii ma i Lona mana.”
Na valaaulia e Peresitene Nelson ia tamaitai o le Ekalesia ina ia “suesue ma le agaga tatalo” e uiga i le mana o le perisitua ma “iloa ai le mea o le a aoao mai e le Agaga Paia” ia i tatou. Ua ou fiafia na valaaulia i tatou taitoatasi e lo tatou perofeta soifua, e aoao ma ia maua faaaliga ma ia sili atu ona “faateleina le malamalama ma faaaoga le mana ua faapea ona [tatou] maua faaeega paia.”1
I le tele o taimi i lou olaga atoa, sa ou oo ai i faamanuiaga folafolaina lea e oo mai i le mulimuli i fautuaga a perofeta. E le ese le valaaulia lenei. I le mafaufau ai e uiga i le valaaulia a Peresitene Nelson, sa vave ona liliu atu lou mafaufau i le malumalu—o le nofoaga lea sa faaeeina mai ai ia te au le mana o le perisitua—ma le meaalofa o lena mana i lou olaga atoa. E tele tausaga na tuu mai ia te a’u ou te iloa manino ai pe faapefea e lena mana ona faailoa mai i lou olaga.
O le mana o le perisitua, e pei lava o le meaalofa o le Agaga Paia, e sau mai lo tatou Tama alofa o i le Lagi ma mai lo tatou amiotonu patino. I le tausia o a tatou feagaiga ma le Alii, tatou te maua ai le avanoa e maua ai faaaliga e uiga i o tatou olaga, e uiga i o tatou aiga, galuega, aoga—mea uma ia tatou te sailia ai le taitaiga. E leai se mea e taua ia i tatou e le faatauaina e le Alii. Ma a tatou valaaulia le Agaga e faatasi ma i tatou, e mafai ona tatou maua se malamalamaaga sili atu e uiga i le mana o le perisitua e ala i le taitaiga a le Agaga Paia.
O le tele lava o lo’u aoao e uiga i le mana o le perisitua e ala i suesuega faaletagata lava ia ma aafiaga, o le tele foi lea o lo’u malamalama i le taua o vaega uma o o tatou olaga. O le mana o le perisitua e fesoasoani tatou te maua ai faaaliga mo o tatou luitau i aso taitasi.
I o’u valaauga, ona o loo o’u auauna atu ma le pule o le perisitua ua tuuina mai ia te a’u e se tasi ua i ai ki, e tele taimi sa i ai ni ou manatu po o ni upu na tuuina mai ia te a’u ua na o mea e manaomia ona faalogo i ai se tamaitai talavou po o se teine o le Aualofa po o se tamaitiiti o le Peraimeri. Ou te iloa o na upu na oo mai ona o le pule o le perisitua na tuuina mai ia te au ina ua vaetofia au mo lena valaauga.
I faaipoipoga, e pei o soo se mafutaga, e o atu tagata i laasaga ma vaega o le aoaoina ma le tuputupu ae. Ua ou aoaoina a ou manatuaina o ai lou toalua, o ai a’u, ma le mea e tatau ona tatou faia faatasi o ni fanau a le Atua, ua suia ai lou loto. O le faamauina faatasi ai e ala i le pule o le perisitua ua faamamanaina ma uunaia ai i tatou uma ina ia avea atili ai i le lotogatasi. Ina ua fetalai le Faaola, “Afai e le tasi outou e le a au outou” (Mataupu Faavae ma Feagaiga 38:27), e le na o Lona uiga o le faatulagaga a le Ekalesia. E uiga foi o Ia i a ma sootaga faaleaiga.
Ma i le avea ai ma se tina, ou te manatua lou popole i se tamaitiiti talavou matua o le sa faia mea na ou iloa o le a le fiafia ai lena tamaitiiti. Sa matou malilie e talanoaina le popolega ma sa ou faatulagaina se taimi e talanoa ai. A o lei oo i le taimi atofaina mo le valaau atu o le telefoni, sa ou maua au lauga na saunia; Sa ou iloaina lelei lava le mea o le a ou fai atu ai. Sa ou tatalo ia mafuta le Agaga ma a’u. O le mea na oo mai i lou gutu mai le amataga o la matou talanoaga, ma i le taimi atoa o le valaauga sa matuai ese lava nai lo le mea na ou fuafua e tau atu. Ae o le mea tonu lena na manaomia e le tamaitiiti. O le meaalofa o le Agaga Paia na mafai ai ona faamaluluina loto ma avea ai ma se vaifofo sili ona lelei ua faailoa mai. O le faatinoga lena o le auala e galue ai le mana o le perisitua i o tatou olaga.
O le tele o taimi, e faatusatusa e tamaitai i latou lava ma isi. Ae e leai se tasi o i tatou e lagona le fiafia pe a tatou faatusatusaina i tatou lava ma isi. E tofu tamaitai taitoatasi ma se tuufaatasiga tulaga ese o tomai ma taleni, ma o meaalofa uma na tuuina mai e le Atua. E le faapea ona o oe ma au e le tutusa—pe o soo se aofaiga lava o tamaitai e le tutusa—e le toe faia ai na o i tatou pe itiiti pe sili atu foi. E manaomia ona tatou mauaina a tatou meaalofa ma atiina ae, manatua po o ai na tuuina mai ia i tatou, ona faaaoga lea mo Ona faamoemoega. A o tatou faasoa atu a tatou meaalofa ina ia faamanuiaina ai isi, ua tatou iloaina le mana o le perisitua i o tatou olaga.
Sa ou maua le avanoa e feiloai ai i le toatele o tamaitai maoae o e o loo faaalia le faatuatua ma le mana e ala i a latou amioga. E tuuina mai e tamaitai a latou taleni ma tomai i ni auala tulaga ese ma eseese. Latou te faia se eseesega tele i olaga o i latou uma o loo siomia ai i latou—i o latou aiga, o latou nofoaga faigaluega, Ekalesia, aoga, po o soo se isi lava mea latou te faaaluina ai o latou taimi.
O se tasi o mea ua ou aoaoina e uiga i le perisitua, tatou te faia le mea sili pe a tatou galulue felagolagomai o le tasi ma le isi. O le ala lena na mamanuina ai e le Alii; o le mamanu paia lena. E le manaomia ona tatou tauva aua o na meaalofa ma taleni eseese ma tomai e manaomia—mai alii ma tamaitai uma. O loo taitaiina lemu i tatou e le Alii i lena ala ina ia mafai e i tatou uma ona maua se malamalama sili atu i le auala e galulue faatasi ai ma le auala e faatauaina ai saofaga a le tasi ma le isi. O le ala moni lava o le ala sili lea e faataunuu ai Lana galuega.
E le manaomia ona faatali tamaitai mo se tasi e tau atu ia i latou le mea e fai i a latou meaalofa, taleni, ma le pule. Ua ia i tatou le mafai e maua ai faaaliga mo i tatou lava. E le tatau ona tatou faatalitali ina ia faataonuina ia tatou; e tatau ona ia i tatou le lototele e faatino ai le faaaliga tatou te maua. Saili i musumusuga ma tali atu i le taitaiga a lena agaga o se faailoga o le tatou faalagolago atu i le maua o le perisitua, o se tautinoga sa tatou faia pe a tatou tausia a tatou feagaiga ma le Atua.
E pei ona aoao mai Peresitene Nelson, “O le a se mea e sili atu ona manaia nai lo le galue ai ma le Agaga ia malamalama i le mana o le Atua-le mana o le perisitua?” Na Ia folafola mai, “A o faateleina lou malamalama ma a o e faatinoina le faatuatua i le Alii ma Lona mana o le perisitua, o lou mafai e utuvai ai mai lenei ‘oa faaleagaga ua faaavanoa mai e le Alii o le a faateleina.”2 Ma ou te iloa o nei folafolaga mai lo tatou perofeta soifua e mautinoa.