Na’o Tusiga Faatekinolosi
O Le Avea o le Mataupu Faavae ma Feagaiga e Patino ia te Oe
O le suesueina o le Sau, Mulimuli Mai ia te A’u o le tausaga lenei o le a fesoasoani ia i tatou ia iloa le auala e mafai ona i ai mau patino.
I lenei tausaga o le a tatou suesueina le Mataupu Faavae ma Feagaiga i a tatou lesona o le Sau, Mulimuli Mai ia te A’u . Ua aoao mai le Mataupu Faavae ma Feagaiga e uiga i le aoaoga faavae o le talalelei, i faamanuiaga o le tausia o poloaiga, ma le sailia ma le mauaina o faaaliga patino. O le mea moni, o le tele lava o le tusi o se faaaliga tuusa’o mai le Alii, ma e tu o se molimau mamana e mafai foi ona Ia talanoa atu ia te oe.
E te faia au suesuega faaletagata lava ia o tusitusiga paia ina ia sili atu le mamana pe a e iloaina o mea e taua ia te oe, e taua foi i le Alii. E saofaga o Ia i soo se vaega o lou olaga, pe o le galuega, aoaoga, fegalegaleaiga, auaunaga, po o lou tulaga manuia lautele. O le Mataupu Faavae ma Feagaiga “ua i ai se valaaulia i tagata uma i soo se mea ia faalogo i le siufofoga o le Alii o Iesu Keriso, ma fetalai atu ia te i latou mo lo latou manuia faaletino ma lo latou faaolataga e faavavau” (faatomuaga i le Mataupu Faavae ma Feagaiga).
O le tautalagia o lena mea, afai e faigata ia te oe i nisi taimi ona e fesootai ma le Mataupu Faavae ma Feagaiga, o nisi nei o motugaafa i le auala e faia ai au suesuega ia patino ma anoa:
1. Tatalo Muamua ma Suesue ma se Faamoemoega
O le upu muamua o le vaega 1 o le faalogo, o le valaaulia lea a le Alii e faalogo ma le faamaoni ma gauai i Ana upu. Ua naunau le Alii ia te oe e faalogo atu ia te Ia ma mulimuli i Ana fautuaga aua Na te malamalama i ou manaoga ma pe faapefea ona fesoasoani ia te oe. O le amataina o lau suesuega i se tatalo, e mafai ai ona e valaaulia le Agaga Paia, ia sili atu ona nofouta i uunaiga, ma taulai atu i susuega loloto o fuaiupu.
Na aoao mai Elder Richard G. Scott (1928–2015) o le Korama a Aposetolo e Toasefululua: “I le gasologa o augatupulaga uma, ua musuia e le Tama i le Lagi ni alii ma ni tamaitai e saili, e ala i le taitaiga a le Agaga Paia, ni tali i faafitauli e sili ona faigata i le olaga. Na Ia musuia na auauna faatonuina e faamaumau na tali e fai ma se ituaiga o tusitaulima mo i latou o Ana fanau e faatuatua i Lana fuafuaga o le fiafia ma i Lona Alo Pele, o Iesu Keriso.”1 O le Mataupu Faavae ma Feagaiga o se tasi o na tusi. A o e sauniuni e maua faaaliga faaletagata lava ia e ala i le mafaufau loloto po o le a ma le pe faapefea foi ona suesue, ua e faaali atu ai i le Alii lou naunautai e galue faatasi ma ia mo le taitaiga.
Fai ma suisui au faiga masani o suesuega e mafai foi ona fesoasoani ia te oe e maua ai vaaiga fou. Taumafai e suesue i le autu po o le taimi tonu na tuuina mai ai faaaliga (tagai i le Faasologa o Anotusi), ona faailoga lea o fuaiupu i se auala o le a fesoasoani ia te oe e vaai faalemafaufau ai i mataupu faavae o loo aoaoina.
2. Ia Iloa le Talaaga Faasolopito
O le iloaina o le mea ua uunaia ai faaaliga i le Mataupu Faavae ma Feagaiga o le a fesoasoani e te malamalama ai i mea o aoao mai e le Alii.2 “O nei faaaliga paia na maua mai o ni tali i talosaga, i taimi o le manaomia, ma na afua mai i tulaga moni lava faalesoifuaga na i ai ni tagata moni lava. Sa saili le Perofeta ma e na galulue faatasi ma ia taitaiga paia, ma o nei faaaliga ua faamaonia ai sa latou mauaina. I faaaliga, e vaaia e le tagata i nei faaaliga le toefuataiga ma le fofolaina mai o le talalelei a Iesu Keriso ma le faafeao mai o le tisipenisione o le atoaga o taimi” (faatomuaga i le Mataupu Faavae ma Feagaiga).
O le vaega o le “Toefuataiga ma le Talafaasolopito o le Ekalesia” i le polokalama feaveai o le Gospel Library o loo i ai ni punaoa maoae e uiga i le talafaasolopito e tau atu i mea taua na tutupu, e pei o le Talafaasolopito o le Ekalesia ma tala i Autu o le Talalelei, ma tala e uiga i le talaaga faavaomalo o le Ekalesia. O le malamalama i le talaaga faasolopito e mafai ona fesoasoani ia te oe e iloa ai pe faapefea ona e lagonaina o Ia.
3. Faapatinoina
O le tele o vaega i le Mataupu Faavae ma Feagaiga ua tuuto atu i tagata eseese o e o loo fetalai i ai le Alii. A o faitauina, taumafai e tuu i ai lou igoa e suitulaga ai ia i latou—o lenei mea e mafai ona faamanatu atu ai ia te oe e fetalai patino le Alii ia te oe pe a e faatatauina ia te oe lava ia tusitusiga paia (tagai i le 1 Nifae 19:23).
E le gata i lea, aua nei galo e sue au toa o le Mataupu Faavae ma Feagaiga! E pei lava ona avea Nifae ma au toa manumanu, vaai po o ai e te faafesootaia ma le e musuia ai oe i le Mataupu Faavae ma Feagaiga. Ua faatumulia lenei tusi i faataitaiga o le Au Paia o loo liliu atu i le Alii mo le taitaiga ma le lagolago—i taimi lelei ma le leaga.
Ua ou maua se molimau i le Mataupu Faavae ma Feagaiga a o ou saili ma le agaga tatalo ia iloa savali patino o loo i le Alii mo au i vaega taitasi. Ua musuia lava au e ala i le faatuatua o i latou o e na faataatia faavae mo le Toefuataiga, ua avea au ma se vaega. O le suesueina o lenei tusi i lenei tausaga o le a faamanatu atu ai ia te oe le ofoofogia o le fetalai mai o le Alii ia i tatou, e pei lava ona ia fetalai atu i isi i augatupulaga ua mavae. O le a e iloaina o loo Ia silafia oe ma ou tulaga faaletagata lava ia, ma o le a Ia taialaina oe e ala i ou luitau tulaga ese. Ma o lou faatuatua ma le faalagolago ia te Ia o le a faaauau pea ona tuputupu ae.