O se lomiga fou mo se Ekalesia i le lalolagi atoa

O matou uso e ma tuafafine pele,

E mafai ona maua tagata O Le Ekalesia a Iesu Keriso o le Au Paia o Aso e Gata Ai i atunuu i le salafa o le lalolagi. E ui lava tatou te tautatala i le tele o gagana, ae ua tatou lotogatasi i a tatou taumafaiga e mulimuli i le Faaola ma olioli i le iloaina o i tatou uma o fanau a le Atua.

Mai uluai aso o le Ekalesia toefuataiina, ua lagolagoina e lomiga e pei o mekasini a le Ekalesia ia tagata i a latou taumafaiga e aoao, ola, ma faasoa atu le talalelei. O savali musuia na fesoasoani i le au paia e fesootai ai ma taitai o le Ekalesia ma le tasi ma le isi. Faatasi ai ma se manao e faalautele atu nei faamanuiaga i le tele o fanau a le Atua, matou te fiafia e faasoa atu lenei uluai lomiga o le Liahona fou ia te outou.

O isi suiga i mekasini a le Ekalesia e aofia ai ni lomiga fou mo tamaiti ma le autalavou i le lalolagi atoa. O mekasini taitasi — o le Liahona, Mo le Malosi o le Autalavou, ma le Friend— o le a galulue limalima faatasi ma le Sau, Mulimuli Mai ia Te Au o punaoa suesue o tusitusiga paia lea e lagolago ai le aoaoina o le talalelei i totonu o lou aiga. O le a sili atu foi ona maua nei mekasini i alaata komepiuta.

O le faamoemoega o mekasini a le Ekalesia lava ia o loo tumau lava ona tutusa: ia fesoasoani i fanau a le Atua ia liua atili i lo latou Faaola, o Iesu Keriso. Matou te faafetai tele mo lo outou naunau e aoao ma ola ai i le talalelei, ma iloa o nei mekasini o le a fesoasoani ia te outou i na taumafaiga.

Ma le faamaoni lava,

O le Au Peresitene Sili