Mo Matua
Perofeta ma Faaaliga
Matua Pele e,
O le Mataupu Faavae ma Feagaiga o se tuufaatasiga o faaaliga mai le Alii. O le suesueina o nei mea e aumaia ai ia i tatou se avanoa tulaga ese e faamasani ai i le siufofoga o le Faaola a o Ia saunoa, e le na o i Ana perofeta, ae e ala atu ia i latou i tagata o aso fai soo o le Ekalesia e pei o i tatou.
O le masina lenei, e tuu atu ai e mekasini ia te oe ni avanoa eseese e talanoa ai i lau fanau, e aofia ai e uiga i faaaliga, le ala e galue ai, ma e finagalo le Atua e talanoa atu ia i latou.
Talanoaga o le Talalelei
O le filemu i Ana Folafolaga (Mataupu Faavae ma Feagaiga 6)
Faaali le pepa o le savali o loo i le itulau 2 ma faitau i upu a le Faaola mai le vaega e 6. O lenei folafolaga na tuuina atu ia i Iosefa Samita ma Oliva Kaotui ia Aperila 1829. I lena taimi, sa na o le 23 tausaga o Iosefa, ae ua feagai ma le teenaina ma le sauaina. Na faapefea ona fesoasoani nei upu ia Iosefa ma Oliva? E mafai faapefea ona faatatau nei upu i luitau i lou olaga? O a ni mea e mafai ona tatou faia e maua ai nei faamanuiaga folafolaina?
O Perofeta ma Faaaliga Faaletagata Lava Ia (Mataupu Faavae ma Feagaiga 1)
E fetalai mai le Alii ia i tatou taitoatasi ma e ala mai i perofeta (tagai vaega 1). Faaaoga le “Faavae o le Talalelei” i le itulau e 10 e fesoasoani ai i lau fanau e aoao atili ai e uiga i faaaliga. Mafaufau faatasi i le faitauina faatasi o le savali mai ia Peresitene Russell M. Nelson i le itulau e 6. O le a sou lagona i le mea o tau mai e le Atua ia te oe e ala i Lana perofeta? O le mulimuli i lana fautuaga e mafai ona taitai atu ai i le faatutuina o sini i le polokalama a Tamaiti ma le Autalavou. (Mo nisi faamatalaga e uiga i lenei autu, e mafai foi ona e matamata pe faitau i le lauga a Peresitene Nelson, “Faaaliga mo le Ekalesia, Faaaliga mo o Tatou Olaga,” Liahona, Me 2018, 93 – 96.)
Lagolago mo le Sau, Mulimuli Mai Ia Te A’u
Aua le misia manatu o loo i le itulau 26 lea e lagolagoina au suesuega faalevaiaso o le Sau, Mulimuli Mai Ia Te A’u.
Fiafiaga o Suesuega Faaleaiga
Mauaina o Keriso
Na aoao mai Peresitene Ezra Taft Benson (1899–1994), “E toetoe lava o itulau uma o le … O le Mataupu Faavae ma Feagaiga … e aoao atu e uiga i le Matai.”1
-
Seti se taimi mo le lua minute.
-
O le a vave tagai tagata o le aiga i le amataga o le Mataupu Faavae ma Feagaiga e faitau le aofai o mau faasino ia Keriso e mafai ona latou maua. Amata i le faatomuaga ma faaiu i le vaega e 9.
-
A uma le taimi, tuu atu se taimi faaopoopo mo tagata taitasi e filifili ai se tasi o nei fuaiupu e faapitoa le taua ia i latou. Ia auauai e faasoa atu.
Talanoaga: E mafai faapefea ona tatou suesue i le Mataupu Faavae ma Feagaiga i lenei tausaga e faatotonugalemu ia Keriso? O le a se mea e mafai ona tatou faia e “faalogo” ai i le siufofoga o le Alii?
1, 2, 3, e Fetalai Mai o Ia ia te Au
O le Mataupu Faavae ma Feagaiga e o faatasi ma le Tusi Paia ma le Tusi a Mamona i le aoaoina o i tatou ia Keriso ma Ana faaaliga ia i tatou. O le folasaga i le Mataupu Faavae ma Feagaiga o loo faamatala mai ai e mafai ona tatou faalogo “i le siufofoga alofa ae mausali o le Alii o Iesu Keriso” i faaaliga o loo i ai i lenei tusi.
-
Tuu atu faalilolilo i tagata taitoatasi o le aiga se numera: (1) Tusi Paia, (2) Tusi a Mamona, po o le (3) mataupu faavae ma Feagaiga.
-
O le a maua e tagata taitoatasi se fuaiupu anoa i lena tusi lea o loo i ai le “leo malu ma le malosi” o le Alii o loo aoao po o faamalamalama mai mataupu faavae ia i tatou.
-
E aunoa ma le faaalia o mau e faasino i ai, ia auauai e faasoa leotele mai fuaiupu. O isi o le a sii i luga a le o le 1, 2, po o le 3 tamatamailima e mate ai po o le fea tusi o tusitusiga paia na sau ai fuaiupu taitasi.
Talanoaga: E faapefea e mau mai taimi anamua ona galulue faatasi ma faaaliga o ona po nei o loo maua i le Mataupu Faavae ma Feagaiga e fesoasoani ai ia i tatou e aoao atili e uiga ia Keriso ma faalogo i Lona siufofoga? E mafai faapefea ona tatou faaleleia atili lo tatou tomai e faalogo ai i le siufofoga o le Alii a o tatou suesueina le Mataupu Faavae ma Feagaiga i lenei tausaga?