Autalavou Matutua
Faamaloloina mai le Leai o ni Lagona Faaleagaga
Tatou te i ai i se tulaga lamatia faaleagaga pe a taofia lo tatou lagonaina o le Agaga, ae faatasi ai ma le fesoasoani a Keriso e mafai ai ona tatou faatoilaloina le leai o ni lagona faaleagaga.
Ata pue mai le Getty Images
O le lepela o se faamai pipisi tatou te faitau i ai i le Tusi Paia. Ua mafua mai i se siama e faatupuina ai patapata ma manua matautia i le tino. Ae o se auga autu o lenei faamai o le, e mafai ona tufa le faaleagaina o musele o le tino, ma iu ai ina leai se lagona e mafai ona pai atu, vevela, tiga, po o isi faalogona. O tagata o loo aafia ai o le a gagase atoa le tino.
E ui lava e le ogaoga tele le lepela pe ua taatele foi e pei ona i ai i taimi ua leva, ae o tagata i aso nei ua aveesea mai lo latou mafaia e lagona ai—ae nai lo o se faaletonu faaletino, ua tatou lamatia i le avea ai ma gagase faaleagaga.
Na faamalamalama mai e Elder Neal A. Maxwell (1926–2004) o le Korama a Aposetolo e Toasefululua e faapea, o lenei tulaga o le le faalogoina o se mea e mafai ona maua mai i le le amanaiaina o uunaiga a le Agaga Paia ae le o le tausia o poloaiga a le Atua. Sa ia aoao mai:
“O lo tatou malosiaga e lagona ai e puleaina o tatou uiga i le tele o auala, ma e ala mai le lē faagaoioia pe a uunaia i tatou e o tatou lagona ia fai mea lelei, tatou te faagaseina ai lena malosiaga e lagona ai. O le lagona alofa maoae o Iesu i manaoga o e na faatasi ma ia na mafai ai e ia ona tali atu i faatinoga.
“I le isi pito o le fua faaleagaga o loo i ai tagata e pei o uso faalogotata o Nifae; na taua e Nifae le faateleina o lo latou lē lagonaina o mea faaleagaga: ‘sa fetalai mai foi [le Atua] ia te oulua i se leo filemu itiiti, peitai ua oulua teʼa atu ma le toe lagonaina, na oulua lē mafafai ai ona lagona ana fetalaiga’ [1 Nifae 17:45].”1
O loo i ai se tulaga matautia tele pe a taofia lo tatou lagonaina o le Agaga pe e tusa lava pe tatou te lē o mautinoa pe faapefea ona talanoa mai le Agaga ia i tatou. E faigofie lava ona faalavelaveina e le lalolagi tatou pe aveese i tatou i aso taitasi, ma oo ai ina tatou gagase i lena siufofoga lava, itiiti ae mamana, lea e saunia i taimi uma e taiala i tatou i aso taitasi (tagai 1 Tupu 19:11–12).
Ae tusa lava foi pe tatou te lagona e ono i ai se mea e tupu ia i tatou “lepela faaleagaga” i nisi taimi, e mafai ona faamaloloina i le faamalologa.
E ao ona tatou manatua pea o Iesu Keriso o le tagata lea na faamaloloina tagata ua lepela i le taimi o Lana galuega. Ma o ia lea e mafai ona faamaloloina le leai o ni o tatou lagona faaleagaga i le aso ma fesoasoani ia tatou toe lagonaina le Agaga. E mafai ona fesoasoani nisi o ki nei:
Lagonaina o le Agaga
O se ki i le toe lagona e oo mai i lo tatou mafaia ona faalogo ma iloa musumusuga a le Agaga Paia. Na aoao mai Moronae “O le mana foi o le Agaga Paia tou te iloa ai le tonu i mea uma lava” (Moronae 10:5). E mafai ona tatou aveesea lagona gagase mai ia i tatou, saili faaaliga faaletagata lava ia, ma lagonaina mo i tatou lava le moni o mea uma.
I lau malaga toe foi ai i le lagonaina o le Agaga, fesili ia te oe lava ia fesili nei ina ia malamalama ai i lau sootaga ma faaaliga:
-
O le a le taimi mulimuli na ou maua ai se faaaliga faaletagata lava ia?
-
O le a le taimi mulimuli na ou ole atu ai mo se faaaliga faaletagata lava ia?
-
O le a le taimi mulimuli sa ou ole atu ai i le Tama Faalelagi e fesoasoani mai ia ou iloa faaaliga patino i lou olaga?
I le aotelega, pe o outou sailia moni ea faaaliga mai le Atua? E faigata ona lagona le olioli i fua o le Agaga pe a foliga mai ua tapunia le lagi (tagai i le Kalatia 5:22–23). Ae o le sailia lava e oe o faaaliga i lou olaga i aso taitasi o le ki lea e tatalaina ai le lagi ma toe valaaulia ai le Agaga i lou olaga.
Faauiga Seseina o Faaaliga
Ae o iinei o le a faigata ai aafiaga faaleagaga ma faaaliga faaletagata lava ia.
A tatou talanoa e uiga i faaaliga faaletagata lava ia, e vave ona oso o tatou mafaufau i faaaliga vaaia, asiasiga a agelu, po o leo faapitoa. Ae a tatou le oo i nei mea, atonu tatou te lagonaina o le mauaina o le taitaiga mai le Agaga, e leai se faamoemoe. Atonu tatou te lagonaina e pei ua i ai se mea ua sese ia i tatou, lea e mafai ona taitai atu ai i tatou e lafoai le sailia ai o le Agaga.
Ae e tatau ona tatou iloaina o le lagonaina o le Agaga e le o faatatau i ni taimi o le luluina o le lalolagi, e le na o le fetalai mai o le Alii ia i tatou e uiga i a tatou faaiuga tetele o le olaga. O le isi lua tatou te tausulu i ai, o le tele o taimi tatou te liliu atu ai i le Alii mo se fesoasoani i na o ni filifiliga tetele e pei o aoga, matata, faaipoipoga, ma aiga, ae ua tatou le amanaiaina ona liliu atu ia te Ia i mafaufauga uma (tagai Mataupu Faavae ma Feagaiga 6:36). Ae e tele taimi e talanoa mai ai le Tama Faalelagi ia i tatou. E talanoa mai o Ia ia i tatou i le ala tatou te iloa ai e sili ona lelei faaletagata lava ia. E mafai ona Ia taiala i tatou i aso taitasi, e oo lava i na auiliiliga laiti o o tatou olaga.
Saunia e Maua Faaaliga
Ina ia mafai ona lagona le lagi, e tatau ona tatou tatalaina muamua o tatou taliga i mea faalelagi. O nisi nei o auala e mafai ona tatou tatalaina ai o tatou taliga ma saunia ai i tatou lava ina ia lagona atu le Alii:
Talitonu. I lo tatou tulitulimatagauina o le faatoilaloina o le lepela faaleagaga, atonu e manaomia lo tatou suia o o tatou mafaufauga ma talitonu moni i le Tama Faalelagi ma maua le faatuatua o le a Ia faia ma tuuina mai ia i tatou faaaliga. O le mea moni, e tatau ona tatou faamoemoeina o Ia o le a Ia faia. E mafai foi ona tatou fesili atu ia te Ia e fesoasoani mai ia tatou iloa le auala e talanoa mai ai o Ia ia i tatou. E tatau ona tatou faamoemoe ina ia i ai tele ni aafiaga faaleagaga i taimi tatou te taumafai ai e mulimuli i le Faaola ma tausi Ana poloaiga.
Tuu i ai se taumafaiga i aso taitasi. E mafai foi ona tatou nofouta atili i le Agaga e ala i le tatalo ma le faamaoni, suesue i tusitusiga paia, taliaina o le faamanatuga, auai i le malumalu, auai i le faia o galuega o talafaasolopito o aiga, faalogologo i musika faaleagaga, auaunaga, po o nisi lava mea e te lagona e latalata atu ai i le Atua. O lo tatou latalata atili atu ia te ia, o le tele foi lena o lo tatou tatalaina o o tatou loto e faamalolo ai le lepela faaleagaga ma toe lagonaina le Agaga Paia.
Usitai. O le isi vaega taua o le valaaulia o le Agaga e toe foi atu i lou olaga o lou naunautaiga lea e mulimuli i mea e tau mai e le Agaga ia te oe. Na aoao mai Peresitene Henry B. Eyring, Fesoasoani Lua i le Au Peresitene Sili e faapea:
“A e faaalia lou naunautaiga ia usiusitai, o le a auina mai e le Agaga nisi uunaiga tele atu ia te oe o mea e finagalo le Atua e te faia mo Ia.
“A e usitai, o le a atili ona aumai soo ia uunaiga mai le Agaga, ma saga latalata atu ai pea i le mafutaga faifai pea. O le a faateleina lou mana e filifili ai le mea sao.”2
O le naunau e mulimuli i le finagalo o le Alii nai lo o tatou lava tagata e mafai ona faigata i nisi taimi, ae e faamanuiaina i tatou i taimi uma i le faateleina o le malosi faaleagaga pe a tatou faia. E oo lava i le usiusitai i ni auala laiti, mai le filifili e totogi a tatou sefuluai, tausia o le paia o le aso Sapati, po o le mulimuli foi i se uunaiga e auauna atu i se isi tagata, e mafai ona fesoasoani ia i tatou e faia se avanoa mo le Agaga i o tatou olaga.
O le Lagonaina o le Agaga o se Meaalofa
E tatau foi ona tatou manatua le folafolaga o loo i ai i a tatou feagaiga o le papatisoga ma le Alii. O i tatou ua mauaina le meaalofa o le Agaga Paia, ua folafola mai e mafai ona tatou maua le Agaga e faatasi ma i tatou i aso uma a o tatou taumafai e tausia a tatou feagaiga (tagai Mataupu Faavae ma Feagaiga 20:77, 79).
Na tuuina mai ia i tatou e le Tama Faalelagi le meaalofa o le Agaga Paia ma e finagalo ia tatou olioli i lena meaalofa i lona atoatoa. O le mafutaga faifai pea a le Agaga Paia e mafai ai ona tatou faia faaiuga ma le mautinoa, lagonaina o le mafanafana i taimi o luitau, tuputupu ae faaleagaga, lagona le filemu ma le olioli, ma iloa le auala e auauna atu ai i isi. O se Meaalofa Moni Lava.
O le faamalologa mai le le lagonaina faaleagaga e faalagolago i lo tatou lava faatuatua ma le naunau e aapa atu pea, e tusa lava pe leai se mea tatou te lagonaina. A o tatou taumafai e valaaulia le Agaga i o tatou olaga, o le a tatou maua sina uunaiga itiiti e ala i sina mea itiiti pe a tatou faalogo ma usiusitai. O le ola ai i o tatou olaga ia ogatasi ma le finagalo o le Atua, e fesoasoani lea ia i tatou e atiina ae se lagona maaleale o le alofa i le Agaga ma o le a faamalolo faasolosolo ai i tatou mai soo se gagase tatou te lagonaina. Afai tatou te aapa atu i le Faaola e tusa lava pe leai se mea tatou te lagonaina, o le a Ia fesoasoani ia i tatou ia lagonaina o loo i ai o Ia iina (tagai Mataupu Faavae ma Feagaiga 88:63).