O Uluai Tamaitai o le Toefuataiga
Sa Faaaoga e Lusi Ana Meaalofa Faaleagaga
E faapei o Lusi Maki Samita, e mafai e i tatou taitoatasi ona maua faaaliga. E tofu i tatou uma ma meaalofa faaleagaga tulaga ese e mafai ona faamanuiaina ai o tatou aiga ma le Ekalesia.
Ata na tusia e Toni Oka
O Oketopa 1838, ma o Lusi Maka Samita na ia uuina lima o lana fanau tama o Ailama ma Iosefa a o le’i toesea mai ona atalii. Na poloaiina e taitai o le malo le au paia e o ese ma le eria. O nisi o taitai o le Ekalesia sa pueina e ni fitafita, ma se faamasinoga solitulafono faalefaamiliteri na faatonuina e tafana i latou. Sa mafaufau Lusi pe mafai ona toe vaai o ia o ola ona atalii.
O le a se mea e ono fesoasoani i se tina e onosaia se tofotofoga e pei o lenei? I tausaga mulimuli ane, o le a toe tepa i tua Lusi i le taimi lenei ma toe manatua sa faamalosia o ia e se savali o le mafanafana na maua “i le meaalofa o valoaga”: “Ia faamafanafanaina lou loto e faatatau i lau fanau; o le a le faatiga i latou e o latou fili.”1
O lenei aafiaga na tuuina atu ai ia Lusi ma ona lagona faaleaiga le “faamafanafanaga, lea na sili atu i faamafanafanaga faalelalolagi uma.”
O le au Samita ma le toatele o isi aiga o le Au Paia o aso e gata ai na tutuli ese i latou mai Misuri. Ina ua uma ona maua le sulufaiga i le setete tuaoi o Ilinoi, sa taumafai Lusi ma Iosefa Samita le matua e saili faamatalaga e uiga i o laua atalii ae sa lei maua ni tali. Sa toe fetalai mai le Agaga i le filemu i le Agaga o Lusi, ma tau atu ia te ia o le a taunuu mai Ailama ma Iosefa i le afiafi na sosoo ai.
O Epikopo Eteuati Paterika, o le sa faatasi ma Lucy ina ua ia mauaina lenei faaaliga, sa faaalia lona masalosalo: “Sa ou talitonu pea ia te oe muamua; ae ou te le iloa se vaaiga o lenei valoaga ua faataunuuina; ae afai e faapea o le a ou le toe masalosalo lava i a outou upu.”
O le moe i lena afiafi, na vaai ai Lusi i se faaaliga e uiga i ona atalii vaivai ma fiaaai o loo malaga i le laufanua valevalenoa. Sa sauni Lusi mo i latou e o mai i le fale—ma ua taunuu moni lava i le aso na sosoo ai. Sa latou faamatalaina se malaga e fetaui lelei lava i le mea sa ia vaaia. Ina ua mavae lena, na fai mai Epikopo Paterika o le a ia faailoa atu e faavavau ia Lusi “ina ia avea ai ma se perofeta moni.”