Autalavou Matutua
Faatalitali mo Tali e aunoa ma le Masalosalo
O le seleseleina o faamanuiaga a le Alii e manaomia ai le onosai, ae e pei ona tatou iloa uma lava, o le faatalitali e le o se mea malie.
A o ou laitiiti, sa ou ita lava i lou faatalitali ai i le taeao. Ou te matua fiafia ma le onosai po o le a se mea e aumai e leisi aso e soso’o ai ma e tele se taimi i le tele o po e fetosoa’i ai ma feliua’i i lo’u moega ma le le mafai ona moe lelei ma lo’u aluso’o i le faamalama, ae tuu ese atu se mapuea le fiafia i taimi uma ou te iloa ai o loo pogisa pea fafo. Ia te au, o le taeao e masani lava ona umi le taimi e faatalitali e oo mai ai.
O nisi taimi i le ogatotonu o le po, ou te alu ai e fesili i ou matua po o le a le taimi. La te faamautinoa mai ia te au o le a oo mai le taeao. E masani lava ona lelei lau moe pe a mae’a le taimi lena.
O le faatalitali mo faamanuiaga folafolaina e mafai i nisi o taimi ona lagona faapena. Tatou te ofoina atu tatalo faamaoni, faitau a matou tusitusiga paia, ma lagonaina na lagona mafanafana o le faamautinoaga. Ae afai e le suia o tatou tulaga siosiomaga i le taimi lava lena—afai e le oo mai le taimi lava lea ni tali po o faamanuiaga—e mafai ona amata ai lo tatou masalosalo o le a le o’o mai lava.
Masalosalo o le A Oo Mai Tali
Mai aafiaga, ua ou iloa ai o masalosaloga e masani lava ona mafua mai i le taulai atu i tulaga nai lo le Faaola ma lona alofa mo i tatou.
O le tele o lo tatou faalauteleina o o tatou tulaga siosiomaga ma le leai o so tatou faamoemoe i mea e foliga mai e le o ni mea mo i tatou, o le faaitiitia foi lena o lo tatou iloa e alofa le Faaola ia i tatou ma o loo ia i tatou a o tatou laasia laa taitasi i luma. Ua iloa e Satani le mea lenei, o le mafuaaga lea ua ia totoina ai ni masalosaloga itiiti i o tatou mafaufau ina ia tatou fesiligia ai le alofa o le Faaola mo i tatou, o lo tatou taua e faavavau, ma le tele o lo tatou taua i le Tama Faalelagi.
Faatalitali e aunoa ma le Masalosalo
O le faatalitali o se vaega o le olaga. Ma o le faatalitali i tali a le Alii ma faamanuiaga ma folafolaga e mafai i nisi taimi ona lagona le le mafai ona tatalia. Ae e i ai nai mea e mafai ona tatou faia e faatalitali ai mo ni faamanuiaga e aunoa ma le gauai atu i masalosaloga:
Muamua, e mafai ona tatou toe tepa i tua i na taimi pe a tatou maua ni tali po o ni uunaiga. Ia manatua na lagona o le mafanafana po o le olioli e musumusu mai ai le filemu i lou loto ma lou mafaufau. O na lagona ma tali e mai le Atua. O le suiga o taimi e le suia ai na upumoni ma folafolaga. E mafai ona tatou mulimuli i fautuaga faa-aposetolo ina ia “talia o outou manatuaga paia. Talitonu i ai. Tusi i lalo mea na. … Talitonu e oo mai ia te oe mai lou Tama Faalelagi ma Lona Alo Pele. Tuu atu latou te aumaia le onosai i ou masalosaloga ma le malamalama i ou tulaga faigata.”1 I le taulai atu lea i le Agaga ma mea na ua tatou iloa e moni, o le a aveesea ai le masalosalo mai mea e tatou te taula’i iai. Ma e mafai ona tatou maua le talitonuga tatou te manaomia e agai ai i luma ma le faamoemoe.
Lona lua, e tatau ona tatou manatua o le mauaina o faaaliga patino, e tatau ona tatou naunau e faaauau ma se mata o le faatuatua e ui i le le atoatoa o le malamalama. E pei lava ona ou faatalitali mo le oo mai o le taeao, e mafai ona tatou iloa e tusa lava pe tatou te faatalitali mo ni faamanuiaga folafolaina, e i ai le sauniuniga e fai, o laa laiti e fai, ma le malamalama e tatau na maua i le taimi lea. A o tatou faatalitali, e mafai ona faaauau pea ona tatou aoao ma taumafai ia agavaa mo faamanuiaga o loo teuina mo i tatou.
Ma le mea Mulimuli, e mafai ona tatou tausia se vaaiga e faavavau, i le mafaufau faapea “e i ai nisi faamanuiaga e vave oo mai, o nisi e tuai, ma o nisi e le oo mai seia oo i le lagi; ae mo i latou e taliaina le talalelei a Iesu Keriso, e oo mai lava ia i latou, ”e pei ona aoao mai Elder Jeffrey R. Holland o le Korama a Aposetolo e Toasefululua.2 “O loo faamoemoe mai le Atua ia lava lou faatuatua ma le naunautai ma lava le talitonuina o Ia e faaauau ai pea ona e agai i luma, faaauau ai pea ona ola, ma faaauau ai pea ona olioli.”3 E oo mai lava faamanuiaga a le Alii, e pei lava o le la oso i taeao taitasi. Vaai i le faavavau nai lo taeao.
Aoao mai i le Faatalitali
I taimi o le masalosalo pe a tatou lagona le pei o tatou i se potu pogisa e aunoa ma le malamalama o le lagi, ia tatou manatua o aao o le Faaola e faaloaloa mai pea ia i tatou, e faatalitali ma le naunautai mo i tatou e aapa atu ia te ia. O le a ia faamautinoa mai ia i tatou lona alofa mo i tatou, e pei lava ona sa faia e o’u matua i soo se taimi lava ou te popole ai i lena taeao o le a le oo mai lava.
A o tatou avea le Faaola ma taulaiga autu, o le faatalitali mo faamanuiaga folafolaina ma tali o le a itiiti se faigata. O le faatali e avea ma se taimi o le aoaoina ma sauniuniga aoga. E mafai ona tatou aoao pe faapefea ona taulai atu i le finagalo o le Tama Faalelagi ae le o o tatou lava ia. E mafai ona tatou iloa ma le mautinoa e alofa o ia ia i tatou ma o le a afio mai o ia ia i tatou i taimi uma lava. Ma o lena mautinoa o le a faatoilaloina ai le masalosalo ma le pogisa uma. O le a oo mai lava le taeao, ma o le a faapena foi i Ana folafolaga.