Fesoasoani Faamatua
O Mea Na Aoaoina ai Au e le Salu Faamama e Uiga i le tulaga Faamatua
E alala le tusitala i Iuta, ISA.
O feau a lau fanau sa fesoasoani e tali ai lau tatalo.
Ata na tusia e David Green
Sa ou ala ae i se tasi taeao ma le lagona lofituina. O ou tiute o se matua sa lagona le mamafatu, ma sa ou matua iloaina ou vaivaiga. Na foliga mai na i ai se avanoa tele i le va o le vaai faalemafaufau o le a avea ai au ma se matua ma pe faapefea foi ona ou i ai moni.
Sa ou tootuli e tatalo ma tau atu i le Tama Faalelagi le tele o lou alofa ia te Ia. Sa ou tau atu ia te ia lou alofa tele i tamaiti ua Ia faamanuiaina ai lo matou aiga. Ma sa amata ona ou tauina atu ia te ia lou taumafai e avea ma se matua lelei, ae sa ou lagona e pei ou te le o faia lava ni galuega lelei. A o ou tatalo, sa ou mafaufau e uiga i le tele o le lelei o lau fanau pe afai e na’o le Atua lava ia na te tausia i latou.
Ona oo mai lea o se ata i lou mafaufau. Sa ou vaai faalemafaufau i lau fanau o salu le fola o le umukuka. O se tasi lenei o galuega e tele ua tofia ai i latou e fai e fesoasoani ai i lo matou aiga. O nisi taimi o le vaavaai atu ia i latou e tau toamalie aua o loo latou aoao pea ma misia ai le tele o ni nofoaga e o i ai. Ae ou te tuu atu ia i latou e faia, faapea foi ma isi feau i aso taitasi, aua ua i ai sau vaaiga mamao sili atu mo i latou. Ou te iloa e ala i nei faiga uma e le atoatoa, o le a latou aoao ma tuputupu ae ai. E iu lava, o le a mafai ona latou faia i le vave ma le mataalia e pei ona ou mafaia. O lena faaaliga ia i latou o le avea ma se matafaioi ma le tutoatasi e sili atu ona tauia nai lo le pe a faapea ou te faia lava a’u mea uma. Ou te le o tausia ni fanau mo ni taimi pu’upu’u e faamanuiaina ai—o loo ou taumafai e fesoasoani ia i latou ia faamanuiaina i latou mo se taimi umi lava.
Ma sa ou mafaufau pe masalo e moni se mea faapenei foi mo o tatou matua faalelagi. E silafia e le Tama Faalelagi e le mafai ona tatou faia se galuega atoatoa o le avea ma matua. O nisi mea tatou te faia atonu e le tau toamalie, ae ua Ia faatagaina aua Na te silafia o loo tatou aoaoina ma tuputupu ae. Ua ia te Ia le vaaiga sili o taimi umi. Na te muai vaaia i tatou i se aso ia avea ai o se matua e pei o Ia, mafai ona alofa atoatoa, aoao atu ma le mataalia, ma faataitai atoatoa. A o tatou faaletonu, Na te silafia o loo tatou atiina ae ni uiga e pei o le onosai ma le alofa mama. Ma o lea, i Lona atamai, Na te faatagaina ai i tatou e toilalo ma toe taumafai mai.
Ou te moomoo maimau pe ana mafai ona avea au ma se matua atoatoa! E pei ona tusia e Iosefa Samita, e masani lava ona ou pau “i ni sese e tele valea” (Iosefa Samita—Talafaasolopito 1:28). Ae ou te maua le mafanafana i le iloaina e malamalama le Atua i lou loto, o lona uiga ua Ia silafia o loo ou taumafai e aoao gofie. Ou te lagona le olioli pe a fesili mai lau fanau, “e mafai faapefea ona ou faia ia lelei sili atu lenei mea?” ma e foliga mai ua mananao e faaleleia. O le mea sili e mafai ona ou faia faapena mo le Tama Faalelagi.
A o faasolo nei manatu uma lava i lou mafaufau, sa toe tasi lava se isi taimi ou te lotovaivai ai. “Ae faapefea pe afai o au mea sese faamatua e tiga ai lau fanau?” Sa ou fesili atu ai. “Ou te le manao e toe taofia i latou, e tusa lava pe ou te oo i se mea matagofie i le faagasologa.”
O le faatusa o le faamama a la’u fanau na oo mai i lou mafaufau. A uma ona taumafai ma le naunautai lau tama teine e mopu le fola ona teleai atu lea pe faamaea se isi galuega, e masani lava ona ou fufuluina ia nofoaga o loo manaomia ona faamama o loo totoe o loo pipii pea. Ma sa ou mafaufau i le alofa mutimutivale ma le mana o Iesu Keriso e le iu, o Lana Togiola e faamamaina ma aofia ai nofoaga loo pipii pea o le olaga. O lona alofa tunoa e oo mai ai ona o ou vaivaiga o se matua, e pei lava ona oo atu lona alofa tunoa mo tiga ua puapuagatia ai lau fanau ona o ou faaletonu. I se auala e le mafai e se tasi o i tatou ona malamalama i ai, e mafai e Lana Togiola ona faamaloloina mea uma lava.
E tele lou mafanafana i le faaaliga patino na ou maua i lena aso. Sa ou lagonaina le Agaga o aoaoina au e faapea, o au taumafaiga sili ona lelei, i le faiga faapaaga ma le Alii, ua lava lea. Ou te iloa o le a faaauau pea ona galue le Tama Faalelagi i olaga o lau fanau, o lea mea itiiti ma lea mea, ina ia faia ma le atoatoa le mea e le atoatoa ona ou faia. Faatasi ai ma Lana fesoasoani, e mafai ai e lau fanau i se aso ona susulu atu i o latou lava tulaga sao, e pei lava foi o le malosi na toe faatuina ai e le Tama Faalelagi i latou i le taimi muamua. Vagana ua i ai foi i Lana fuafuaga le suia o au i le faagasologa—faapaiaina ma mamanuina au ina ia avea atili e faapei o Ia. E, le silisiliese naʼuā o le poto o lo tatou Atua!