O le Filifiliga Sili Ona Lelei
Sa ou tei i le mauaina o se savali tuusao mai le Agaga. Sa ou iloa le mea e fai ma sa ou le’i toe faatuai mo se sekone.
Ata pu’e i luma o le malumalu o Vancouver British Columbia na tuuina mai e le tusitala; o isi ata mai le Getty Images
Ina ua alu lou toalua e faigaluega, sa masani ona faauma au galuega i le fale o aso taitasi ona ou taoto lea ma faaalu ni nai itula i luga o le Facebook, Messenger, ma le Instagram. Sa toeitiiti 15 itula ou te faaaluina i le vaiaso i luga o faasalalauga faaagafesootai. Sa foliga mai sa le mafai ona taofi le faasoaina o vitio ma ata malie, ae sa seasea ona ou faasoa atu ni savali e uiga i le Ekalesia. O le tele o taimi e tatau ona momoe ai, sa fesoasoani lo’u toalua ia te au e aveese faasalalauga faaleagafesootai ina ia mafai ai ona ou moe.
O le taimi lenei, ua ou faatuina ai se sini e faitau le Tusi Paia i auala uma e fesoasoani ai ia te au ia ou malamalama lelei i le talalelei a Iesu Keriso. O aso taitasi ou te tuuto atu ai au lava ina ia faitau pe tusa ma le tolu mataupu. I aso na alu ai nisi o lo’u taimi e faasalalau faaagafesootai, ou te taumafai ai e faitau nisi mea faaopoopo.
I se tasi po na ou tuuina ai lau Tusi Paia i o’u autafa e faitau ai ni nai mataupu. Ae lei faitauina, sa ou tago atu i la’u telefoni ma faaalu le isi itula ma le afa i luga o faasalalauga faaagafesootai. Ina ua ou iloaina le taimi lea, sa tuu ese lau telefoni ma tootuli e tatalo. O lau tatalo e lei o’o i le 10 sekone le umi. O le taimi lava na ou tu ae ai i luga, na oo mai se leo i lou mafaufau ma faapea mai, “ou te manao ia te oe e faaalu se taimi tele i le tatalo e pei ona e faia i ala o faasalalauga faaleagafesootai.”
Sa ou tei i le mauaina o se savali tuusao mai le Agaga. Sa ou iloa le mea e fai ma sa ou le’i toe faatuai mo se sekone. O le taimi lava lena, na ou tapeina ai le polokalama o ala o faasalalauga faaleagafesootai mai lau telefoni ma amata ai ona fai se anapogi faaagafesootai o ala o faasalalauga.
O se vaiaso mulimuli ane, sa ou maua ai le faaeega paia i le malumalu. Faatasi ai ma Feagaiga na ou osia ma le Alii, sa ou folafola atu ai ia te Ia, o le taimi avanoa ou te faitau ai e uiga i le Ekalesia ma le Perofeta o Iosefa Samita ma faaauau ai le faitauina o le Tusi Paia.
Ua faamanuiaina tele au e le Tama Faalelagi ona o le filifili e faia se filifiliga sili atu e ala i le alu ese mai ala o faasalalauga faaleagafesootai ma toe faaalu nisi taimi e aoao ai e uiga i le talalelei toefuataiina a Iesu Keriso.