Faatomuaga

O le Tusi a Mamona o se tusi o tusitusiga paia e pei o le Tusi Paia. O se talafaamaumau o fegalegaleaiga a le Atua ma tagata sa nonofo i Amerika anamua, ma ua i ai le atoatoaga o le talalelei tumau faavavau.

O le tusi na tusia e le toatele o perofeta anamua e ala i le agaga o valoaga ma faaaliga. O a latou upu, na tusia i papatusi auro, na sii mai ma otooto e se perofeta tusitalafaasolopito e igoa ia Mamona. Ua tuuina mai i lea talafaamaumau se tala o ni faiganuu tetele se lua. O le tasi na o mai mai Ierusalema i le 600 T.L.M. ma sa mulimuli ane vaeluaina i ni malo se lua, ua ta’ua o sa Nifaē ma sa Lamanā. O le isi na o mai mamao i tua atu i le taimi na faaeseese ai e le Alii gagana i le Olo o Papelu. O le nuu lenei ua ta’ua o Sa Iaretō. Ina ua mavae le afe ma afe o tausaga, sa faaumatia nei malo uma e lua vagana ai sa Lamanā, ma o i latou o ni isi o tuaa o Initia Amerika.

O le mea aupito sili ona taua na tupu ua faamaumauina i le Tusi a Mamona, o le auaunaga patino lea a le Alii o Iesu Keriso i totonu o tagata sa Nifaē, ina ua mavae Lona toetu mai. Ua faamatala mai i le tusi mataupu faavae autu o le talalelei, ua otooto mai ai le fuafuaga o le faaolataga, ma ua taʼu mai ai foi i tagata mea e ao ona latou faia e maua ai le filemu i le olaga nei ma le olataga e faavavau i le olaga a sau.

Ina ua maea ona faia e Mamona ana tusitusiga, sa ia tuuina atu le talafaamaumau i lona atalii o Moronae, o lē sa faaopoopo i ai ana lava upu itiiti ona natia lea o papatusi i le Maupuepue o Kumora. I le aso 21 o Setema, 1823, o Moronae lava lea e tasi, ua avea nei ma tagata toetu ma le faamamaluina, na faaali mai i le Perofeta o Iosefa Samita ma faatonu o ia e uiga i le talafaamaumau anamua ma lona faaliliuga faamoemoeina i le gagana Peretania.

I le aso atofaina, na tuuina mai ai papatusi ia Iosefa Samita, o lē na faaliliuina i le meaalofa ma le mana o le Atua. O lenei talafaamaumau ua lomia nei ma faasalalauina i gagana e tele o se molimau fou ma faaopoopo o Iesu Keriso o le Alo o le Atua soifua, o i latou uma foi o le a o mai ia te Ia ma usiusitai i tulafono ma sauniga o Lana talalelei e mafai ona faaolaina.

E faatatau i lenei talafaamaumau na saunoa mai ai le Perofeta o Iosefa Samita: “Sa ou fai atu i le au uso o le Tusi a Mamona o le tusi aupito sili ona saʼo i soo se isi lava tusi i luga o le lalolagi, ma o le ma’aʼauʼau o la tatou tapuaiga, ma e sili ona latalata atu o se tagata i le Atua i lona ola ai i ona mataupu, nai lo se isi lava tusi.”

E faaopoopo ia Iosefa Samita, sa saunia foi e le Alii ni isi e toasefulutasi e vaai i papatusi auro mo i latou lava ma avea ma molimau faapitoa o le moni ma le paia o le Tusi a Mamona. O a latou molimau tusia ua i totonu o lenei tusi, “O Le Mau a Molimau e Toatolu” ma le “O Le Mau a Molimau e Toavalu.”

Matou te valaau atu i tagata uma e i soo se mea, ia faitau i le Tusi a Mamona, ia mafaufau loloto i ai i o latou loto le savali o i ai, ona ole atu lea i le Atua, le Tamā Faavavau, i le suafa o Keriso pe ua moni le tusi. O i latou o e e mulimuli i lenei ala ma ole atu i le faatuatua, o le a latou maua se molimau i le moni ma le paia o le tusi e ala i le mana o le Agaga Paia. (Tagai i le Moronae 10:3–5.)

O i latou o e mauaina lenei molimau paia mai le Agaga Paia o le a latou iloa foi e ala i lea lava mana o Iesu Keriso o le Faaola o le lalolagi, o Iosefa Samita o Lana talifaaaliga ma le perofeta i aso nei e gata ai, ma O Le Ekalesia a Iesu Keriso o le Au Paia o Aso e Gata Ai o le malo o le Alii ua toe faatuina i luga o le lalolagi, e saunia ai mo le Afio Mai Faalua o le Mesia.