O Le Molimau a le Perofeta o Iosefa Samita

O upu nei a le Perofeta o Iosefa Samita lava ia, e uiga i le o’o mai o le Tusi a Mamona:

“O le po o le … aso luasefulu-tasi o Setema [1823] … na ou tatalo ma aioi atu ai i le Atua Malosi Aoao. …

“A o faapea ona ou valaau atu i le Atua, sa ou vaaia se malamalama ua o’o mai i lo’u potu, sa faaauau pea ona faateleina seia o’o ina sili atu le malamalama o le potu nai lo le aoauli, ae faafuasei loa ona faaali mai o se tagata i tafatafa o lo’u moega, ua tulai i le ’ea, ona sa lē papa’i ona vae i le fola.

“Sa ofu o ia i se ofu talaloa sa matuā pa’epa’e lava. O se pa’epa’e sa silisili atu nai lo soo se mea faalelalolagi ua ou vaai i ai; pe ou te talitonu foi e mafai ona faia o se mea faalelalolagi ia foliga mai faapea lona pa’epa’e tele ma iila. Sa aliali mai ona lima, ma ona ogalima foi, i luga a’e teisi o le tapulima; sa faapea foi, ona aliali mai o ona vae, faapea ma ona ogavae, i luga a’e teisi o tapuvae. Sa lē ufitia foi lona ao ma lona ua. Sa mafai ona ou iloaina, sa leai se isi ona ofu sa ofuina ae na o lea ofu talaloa, ona sa matala sa mafai ai ona ou vaai atu i lona fatafata.

“Sa le gata ina matuā pa’epa’e tele lona ofu talaloa, ae sa matuā mamalu tele lona tagata atoa e le mafai ona faamatalaina, ma o ona fofoga sa pei moni lava o le uilaemo. Sa matuā malamalama lava le potu, ae sa le sili atu le susulu e pei o lea na siomia ai lona tagata. O le taimi muamua lava na ou vaai atu ai ia te ia, sa ou fefe; peitai sa vave ona tea ese atu o le fefe mai ia te a’u.

“Sa ia fetalai mai ia te a’u i lo’u igoa, ma fai mai ia te a’u o ia o se avefeau na auina mai i le afioaga o le Atua ia te a’u, ma o lona igoa o Moronae; ma o loo i ai i le Atua se galuega mo a’u ou te faia; ma o le a tauleleia ma tauleagaina lo’u igoa i atunuu uma, ituaiga, ma gagana, pe o le a tauleleia ma tauleagaina i totonu o tagata uma.

“Sa ia fetalai mai o loo i ai se tusi ua teuina, ua tusia i luga o papatusi auro, o loo tuuina mai ai se tala o tagata muamua sa nonofo i le konetineta lenei, ma le mea na latou tupuga mai ai. Sa fetalai mai foi o ia o loo i ai i totonu le atoatoaga o le Talalelei tumau e faavavau, e pei ona tuuina atu e le Faaola i tagata anamua;

“Faapea foi, sa i ai ni maa se lua ua i totonu o ni faavaa siliva—ma o ia maa, sa faapipii i se ufifatafata, ua ta’ua o le Urima ma le Tumena—ua teu faatasi ma papatusi; ma o le umia ma le faaaogaina o ia maa sa tā’ua ai tagata anamua po o taimi muamua o ‘tagatavāai’; ma ua saunia e le Atua ia maa mo le faamoemoe o le faaliliuina o le tusi. …

“Sa toe fetalai mai o ia ia te ā’u, a ’ou mauaina ia papatusi ua fetalai i ai o ia—ona e le i o’o i le taimi e tatau ona maua mai ai—ia aua ne’i ou faaalia atu i se tasi; po o le ufifatafata ma le Urima ma le Tumena; ae ia tau lava o i latou o le a poloaiina ai a’u ia faaali atu i ai; afai ou te faaalia atu i soo se tasi, o le a faaumatia a’u. A o fetalai mai o ia ia te a’u e uiga i papatusi, sa tatala mai se faaaliga i lo’u mafaufau sa mafai ai ona ou vaai i le mea sa teu ai papatusi, ma sa matua manino ma malamalama lelei le faaaliga vaaia sa ou toe iloa lelei ai lea mea ina ua ou asiasi atu i ai.

“Ina ua mavae lenei fesootaiga, sa ou vaai atu i le malamalama sa i totonu o le potu ua amata ona faapotopoto vave ane faataamilo i le tino o le tagata sa fetalai mai ia te a’u, ma sa faapea lava ona faia se’ia o’o ina toe tuua le potu i le pogisa, vagana ai le faataamilo latalata ane ia te ia; ae faafuasei loa, ona ou vaai, i le taimi lava lea, i se avanoa faaniutu ua matala sa’o a’e lava i le lagi ma sa afio a’e o ia se’ia o’o lava ina mou ese atu atoa o ia, ma tuua ai le potu e pei ona sa i ai ae lei o’o mai lea malamalama mai le lagi.

“Sa ou taoto ma mafaufau i le uiga ese o lenei mea na ou vaaia, ma le ofo tele i mea na ta’u mai ia te a’u e lenei avefeau uiga ese; ae, a o ou mafaufau loloto i ia mea, sa faafuasei ona ou iloa ua amata ona toe malamalama lo’u potu, ma sa le’i pine, i lea lava taimi, ae toe tu mai lea lava avefeau mai le lagi i tafatafa o lo’u moega.

“Sa ia amata, ma toe faamatala mai mea lava ia e tasi na ia faia i lana asiasiga muamua, e aunoa ma se eseesega tele; ina ua uma, sa ia ta’u mai ia te a’u e uiga i faamasinoga matautia o le a o’o mai i luga o le lalolagi, ma faafanoga tetele e ala mai i oge, le pelu, ma faama’i; ma o nei faamasinoga mamafa o le a o’o mai i luga o le lalolagi i le tupulaga lenei. Ina ua uma ona ia faamatala mai o nei mea, sa toe afio a’e o ia e pei ona ia faia muamua.

“E o’o mai i lea taimi, sa matua loloto lava uunaiga sa o’o mai i lo’u mafaufau, sa sola ese le fia moe mai i o’u mata, ma sa ou taoto ma le lofituina i le maofa tele i mea na ou vaaia ma faalogoina. Ae sa ou ofo, ina ua ou toe vaaia lea lava avefeau e tasi i tafatafa o lo’u moega, ma faalogo atu ia te ia ua toe faamatala pe ua toe ta’u mai ia te a’u mea uma lava ia e pei o taimi muamua; ma faaopoopo mai se lapataiga ia te a’u, ua fetalai mai ia te a’u o le a taumafai Satani e faaosooso a’u (ona o le tulaga mativa o le aiga o lo’u tamā), ia ou aumai papatusi mo le faamoemoe ia ou mauoa ai. O lenei mea sa faasa mai e ia ia te a’u, fai mai ia aua ne’i i ai ia te a’u se isi lava faamoemoe mo le mauaina mai o papatusi tau lava mo le viiga o le Atua, ma ia aua lava ne’i tosina a’u i se isi lava manatu nai lo le faatuina o lona malo; a leai e lē mafai ona ou mauaina papatusi.

“Ina ua mavae lenei asiasiga lona tolu, sa toe afio a’e o ia i le lagi e pei o taimi muamua, ma toe tuu ai a’u ou te mafaufau loloto i le uiga ese o mea na faatoa o’o mai nei ia te a’u; ae le’i umi lava ona mavae le afio a’e o le avefeau faalelagi mai ia te a’u mo le taimi lona tolu lea, ae vivini loa moa, ma ou iloa ai ua lata mai le ao, o lona uiga o a ma talanoaga atonu na alu ai lena po atoa.

“Sa lei umi ona mavae lena ae ou tu a’e mai lo’u moega, ma, e pei ona masani ai, sa ou alu atu i galuega tatau ai o le aso; peitai, a’o ou taumafai e galue e pei o i isi taimi, sa ou iloa ua matuā leai lava so’u malosi sa lē mafai ona ou faia o se mea. O lo’u tamā, o lē sa ma galulue faatasi, sa ia iloa mai e i ai se mea ua faaletonu ia te a’u, ma sa fai mai ia te a’u ou te alu i le fale. Sa ou amata loa ma le faamoemoe ou te alu i le fale; peitai, a’o ou taumafai e sopoia le pa ou te alu ese atu ai mai le fanua sa ma i ai, sa matuā leai lava so’u malosi, ma sa ou pa’ū ifo i le eleele, ma sa ou lē iloa ai se mea mo se taimi.

“O le mea muamua lava e mafai ona ou manatua o se leo na fetalai mai ia te a’u, ua fetalai mai ia te a’u i lo’u igoa. Sa ou tepa a’e i luga, ma ou vaai atu i lea lava avefeau e tasi o tulai mai i luga a’e o lo’u ulu, ua siomia i le malamalama e pei o taimi muamua. Ona ia toe faamatala mai foi lea ia te a’u o mea uma sa ia faamatala mai ia te a’u i le po ua mavae, ma poloai mai ia te a’u ia ou alu i lo’u tamā ma faamatala atu ia te ia e uiga i le faaaliga vaaia ma poloaiga na ou mauaina.

“Sa ou usitai; sa ou foi atu i lo’u tamā i le fanua, ma faamatala atu ia te ia le mea atoa. Sa tali mai o ia ia te a’u o se mea ua mai i le Atua, ma fai mai ia te a’u ou te alu ma fai e pei ona faatonuina ai e le avefeau. Sa ou tuua loa le fanua, ma ou alu i le mea na ta’u mai e le avefeau ia te a’u o loo teu ai papatusi; ma ona o le manino lelei o le faaaliga vaaia na o’o mai ia te a’u e uiga i lenei mea, sa ou iloa lelei lava le nofoaga i le taimi lava na ou taunuu i ai.

“E latalata i le nuu o Manaseta, i le itumalo o Onatario, i Niu Ioka, o loo tu ai se maupu’epu’e telē lava, ma ua sili ona maualuga i soo se maupu’epu’e i lena vaiaai. I le itu i sisifo o lenei maupu’epu’e, e le mamao mai le tumutumu, i lalo o se maa telē lava, sa taatitia ai papatusi, sa teuina i totonu o se pusa maa. O lenei maa sa mafiafia ma lapotopoto i le ogatotonu i le itu i luga, ma manifinifi i le faasolo atu i pito, ma aliali ai lona ogatotonu i luga o le eleele, ae o pito uma faataamilo sa ufitia i le eleele.

“Ina ua uma ona ou eli ese o le eleele, sa ou aveane se laau, ma ou sulu le isi pito i lalo o autafa o le maa, ma laga i luga i sina uunaiga itiiti. Sa ou tilotilo i totonu, ma o iina moni lava sa ou vaai ai i papatusi, le Urima ma le Tumena, ma le ufifatafata, e pei ona faamatala mai e le avefeau. O le pusa sa taatitia ai i totonu sa faia i le faapipii faatasi o ni maa i se ituaiga o simā. I le ta’ele o le pusa sa faataatitia faafelavasai ai ni maa se lua, ma o luga o ia maa sa taatitia ai papatusi ma isi mea sa tuufaatasi ai.

“Sa ou faia se taumafaiga e aumai i fafo ia mea, peitai sa faasaina a’u e le avefeau, ma ia toe faailoa mai ia te a’u, e lei o’o i le taimi e aumai ai, ma e le tu’uina mai lava, sei o’o i le fa o tausaga mai le taimi lena; ae sa fetalai mai o ia ia te a’u ia ou sau i le mea lena i le taimi tonu lava e atoa i ai le tausaga mai le taimi lena, ma o le a ia feiloai ai ma a’u iina, ma ia faapea lava ona ou faia se’ia o’o i le taimi mo le mauaina o papatusi.

“Sa faapea lava, e pei ona poloaiina ai a’u, ona ou alu i le faaiuga o tausaga taitasi, ma o taimi taitasi uma na ou alu atu ai na ou maua ai lea lava avefeau iina, ma maua mai ia te ia faatonuga ma le malamalama i taimi taitasi o a ma talanoaga, e faatatau i mea o le a faia e le Alii, ma le ala ma le auala e taitai ai lona malo i aso e gata ai. …

“Sa o’o ina o’o mai le taimi mo le mauaina mai o papatusi, le Urima ma le Tumena, ma le ufifatafata. O le aso luasefulu-lua o Setema, i le tausaga e tasi le afe valu selau luasefulu ma le fitu, ina ua ou alu atu e pei ona masani ai i le faaiuga o se isi tausaga i le mea sa teu ai papatusi, na tuu mai ai ia te a’u e lea lava avefeau faalelagi ia mea ma le poloaiga lenei: ua ia te a’u le tausiga o ia mea; ma afai ou te tuusolo ma le faatalalē ia mea, po o so’u faatamala i ai, o le a vavaeeseina a’u; ae afai ou te faaaoga a’u taumafaiga uma e faasaoina ia mea, se’ia o’o ina sau o ia, le avefeau lea, mo ia mea, o le a puipuia lava i latou.

“Sa vave ona ou iloa le pogai na ou maua ai poloaiga patino ia ou tausi saogalemu ia mea, ma le pogai na fetalai mai ai le avefeau a uma ona ou faataunuuina o le galuega ua tuu mai i o’u lima, o le a sau o ia mo i latou. Ona e lei pine ona iloa ua ia te a’u ia mea, ae faaaoga e tagata taumafaiga malolosi e faoeseina ai mai ia te a’u. Sa faaaoga soo se togafiti sa mafai ona faia mo lena faamoemoe. Sa o’o ina sili atu le matuitui ma le tiga o sauaga nai lo le taimi muamua, ma sa mata’i pea lava pea e motu o tagata avanoa latou te fao ai ia mea mai ia te a’u pe a mafai. Peitai ona o le poto o le Atua, sa saogalemu pea ia mea i o’u lima, seia o’o ina mae’a ona ou faataunuuina o le galuega sa manaomia mai lo’u lima. Ma ina ua mae’a e tusa ai ma tuutuuga, sa toe afio mai le avefeau, mo ia mea, ma sa ou tuu atu ai ia te ia; ma ua i ai ia te ia ia mea i lana vaaiga e o’o mai i le aso nei, le aso lua lea o Me, o le tasi le afe valu selau tolusefulu ma le valu.”

Mo se tala atoa, tagai i le Iosefa Samita—Talafaasolopito i le Penina Tau Tele.

O le talafaamaumau mai anamua sa faapea ona aumai mai le eleele e pei o le leo o se nuu ua tautala mai i le efuefu, ma faaliliuina i le gagana o ona po nei e ala i le meaalofa ma le mana o le Atua e pei ona faamaonia i se faamaoniga Paia, sa muai lomia ma faasalalauina i le lalolagi i le gagana Peretania i le tausaga e 1830, The Book of Mormon (O LE TUSI A MAMONA).