O Se Faamalamalamaga Puupuu e uiga i le Tusi a Mamona

O le Tusi a Mamona o se talafaamaumau paia o tagata Amerika anamua sa togitogia i luga o papatusi metala. O faapogai na tuufaatasia mai ai lenei talafaamaumau e aofia ai mea nei:

O Papatusi a Nifae, e lua ituaiga: o papatusi laiti ma papatusi tetele. O papatusi laiti sa faaaoga faapitoa mo mataupu faaleagaga ma auaunaga ma aoaoga a perofeta, a o papatusi tetele, sa faatumulia tele i se talafaasolopito faaletino o tagata ua faatatau i ai (1 Nifae 9:2–4). E ui i lea, mai le taimi o Mosaea, ua i ai foi i papatusi tetele ni mea taua tele faaleagaga.
O Papatusi a Mamona, e aofia ai se otootoga na faia e Mamona mai papatusi tetele a Nifae, ma le tele o ni faamatalaga. Sa i ai foi i nei papatusi se faaauauga o le talafaasolopito na tusia e Mamona ma ni faaopoopoga a lona atalii o Moronae.
O Papatusi a Eteru, ua tuu mai ai le talafaasolopito o sa Iaretō. O lenei talafaamaumau sa otootoina e Moronae, o lē sa faaopoopo i ai ni ana lava faamatalaga ma tuufaatasi le talafaamaumau ma le talafaasolopito aoao i lalo o le igoa, o le “Tusi a Eteru.”
O Papatusi Apamemea o ni papatusi sa aumaia e le nuu o Liae mai Ierusalema i le 600 T.L.M. O nei papatusi sa aofia ai “tusi e lima a Mose, … o le talafaamaumau foi o Iutaia mai le amataga, … e oo mai i le amataga o le nofoaiga a Setekaia, le tupu o Iuta; o valoaga foi a perofeta paia” (1 Nifae 5:11–13). E tele upusii mai nei papatusi, ua sii mai ai Isaia ma isi perofeta o le tusi paia ma perofeta ua lē mai le tusi paia, ua i le Tusi a Mamona.

O le Tusi a Mamona ua i ai ni vaega po o ni vaevaega autu e sefulu ma le lima, ua ta’ua, vagana ai se tasi, o ni tusi, e masani ona faaigoaina i igoa o o latou tusitala autu. O le vaega muamua (o tusi muamua e ono, e gata mai i le tusi a Ominae) o le faaliliuga mai papatusi laiti a Nifae. O le va o le tusi a Ominae ma le tusi a Mosaea o loo i ai se faaopoopoga ua ta’ua o Upu a Mamona. O lenei faaopoopoga ua sosoo ai le talafaamaumau na togitogia i papatusi laiti ma le otootoga a Mamona o papatusi tetele.

O le vaega sili ona umi, mai le tusi a Mosaea seia oo atu i le Mamona mataupu 7, o se faaliliuga o le otootoga a Mamona o papatusi tetele a Nifae. O le vaega mulimuli, mai le Mamona mataupu 8 e oo i le faaiuga o le tusi, sa togitogia e Moronae, le atalii o Mamona, o lē, ina ua uma ona ia tusia o le talafaamaumau o le olaga o lona tamā, na faia le otootoga o le talafaamaumau o sa Iaretō (ua fai ma tusi a Eteru) ma ia faaopoopo mulimuli ane i ai vaega ua ta’ua o le tusi a Moronae.

Pe tusa o le tausaga e 421 T.A., na faamau ai e Moronae, le perofeta tusitalafaasolopito mulimuli o sa Nifaē le talafaamaumau paia ma natia i le Alii, ina ia aumai i aso e gata ai, e pei ona valoia e le siufofoga o le Atua e ala mai i Ana perofeta anamua. I le 1823 T.A., o Moronae lava lea, ua avea nei ma tagata toetu, sa asiasi i le Perofeta o Iosefa Samita, ma mulimuli ane tuuina atu ia te ia papatusi ua togitogia.

E faatatau i lenei lomiga: O le ulua’i itulau autu, o loo muamua atu i le itulau o le anotusi, ua aumaia mai papatusi ma o se vaega o le tusitusiga paia. O faatomuaga e le o taina faatusilima, e pei ona i ai i le 1 Nifae ma sosoo ai ma le mataupu 9 o le Mosaea, o vaega foi ia o le tusitusiga paia. O faatomuaga o loo faatusilima, e pei o ulutala o mataupu, e le o ni uluai tusiga ia ae o ni fesoasoaniga mo suesuega ua faaaofia ai mo le faafaigofieina o faitauga.

E i ai ni sese laiti i upu sa i lomiga ua mavae o le Tusi a Mamona sa faasalalauina i le gagana Peretania. O le lomiga lenei ua i ai ni faasa’oga ua manatu ua tatau ai, ina ia ogatasi upu ma itulau muai tusia mo le uluai faasalalauga ma lomiga, atoa ma lomiga sa faasa’oina e le Perofeta o Iosefa Samita.