Potutusi
Alofa Tunoa

“Alofa Tunoa,” Autu ma Fesili (2023)

Ua faamafanafana e Keriso tamaitai

Taiala mo le Suesueina o le Talalelei

Alofa tunoa

Meaalofa a le Atua o le alofa, alofa mutimutivale, ma le fesoasoani

E alofa ma popole le Atua mo oe ma Ana fanau taitoatasi. Na te faaee mai ma le alofa mutimutivale ia i tatou le fesoasoani faalelagi ma le lagolago, lea o loo faasino i ai tusitusiga paia o le “alofa tunoa.” Ua mafai le alofa tunoa ona o le Togiola a Iesu Keriso. Tatou te le ausia uma a tatou taumafaiga e tausi poloaiga a le Atua, o lea tatou te le taulia ai pe galulue mo le meaalofa o le alofa tunoa. Ae, o le alofa tunoa e foai fua mai e le Tama Faalelagi, ua mafai ai e i tatou ona maua faamanuiaga silisili. A e taumafai e faateleina lou faatuatua ia Iesu Keriso, o le a e iloaina faataitaiga e le mafaitaulia o Lona alofa tunoa ma le agalelei i lou olaga.

O le a le alofa tunoa?

O le alofa tunoa o le meaalofa o le fesoasoani faalelagi ma le malosi tatou te maua mai le Tama Faalelagi e ala i le Togiola a Iesu Keriso. E masani ona talanoa mai tusitusiga paia e uiga i le alofa tunoa o le mana gafatia ma le faamalologa faaleagaga e ofoina mai e ala i Lona alofa mutimutivale ma le alofa. O faamanuiaga uma a le Atua ma le alofa mutimutivale agamalu e oo mai ia i tatou e ala i le alofa tunoa o Iesu Keriso.

Vaaiga aoao i autu: Alofa Tunoa

O taiala fesootai mo le suesueina o le talalelei: Iesu Keriso, Togiola a Iesu Keriso, Faaolataga, Faatuatua ia Iesu Keriso, Ola i le Talalelei a Iesu Keriso

Vaega 1

Vaavaai mo le Alofa Tunoa o le Atua i Lou Olaga ma o le a E Lagonaina Lona Alofa Faateleina

talavou o loo savali i talaane o le malumalu

Pe a e talitonu i le Tama Faalelagi ma Iesu Keriso, ua amata ona e vaai i le tele o Mea ua La faia mo oe, ona La te alolofa ia te oe. Tatou te maua le tele o faamanuiaga mai le Atua, pe tatou te iloaina pe leai le punavai paia. O isi faamanuiaga ua faapolopoloina mo i latou o e saili e tausi poloaiga a le Tama Faalelagi, salamo i agasala, ma liliu atu ma le lotomaualalo ia te Ia i le tatalo faamaoni ma ole atu mo mea latou te manaomia. Ae e leai se tasi o i tatou e mafai ona galue mo le fesoasoani ma le taitaiga a le Atua (tagai Roma 3:23–24; Mosaea 2:20–21). O faamanuiaga paia uma e tuuina mai e ala i le alofa tunoa o le Atua.

O le malamalama i le alofa tunoa paia e mafai ona e maua ai le mautinoa e saili le fesoasoani a le Atua i aso taitasi ona e alofa mutimutivale o Ia ma naunau e faaaoga le mana paia mo oe (tagai Eperu 4:14–16; Moronae 8:3). O le soifuaga faaletino o Iesu Keriso o se faataitaiga o le tuputupu ae faaleagaga ma le mauaina o se atoaga o faamanuiaga e ala i le alofa tunoa o le Tama Faalelagi (tagai Mataupu Faavae ma Feagaiga 93:12–13). Ua valaaulia outou e Iesu Keriso e o mai ia te Ia ma le Atua le Tama ma maua lo Laua alofa tunoa ina ia mafai ona faamanuiaina atoatoa outou ma faamamaluina e pei ona i ai i Laua (tagai Mataupu Faavae ma Feagaiga 93:19–20).

Mea e mafaufau i ai

  • Na tautino mai e Nifae, “E fiafia lo’u agaga i le alofa tunoa [o le Alii]” (2 Nifae 11:5). O le a le uiga o le alofa tunoa o le Atua ia te oe? Aisea e te manatu na faaaoga ai e Nifae le upu fiafia e faamatala ai ona lagona e uiga i le alofa tunoa o le Atua?

  • Na aoao mai Peresitene Dieter F. Uchtdorf, “O se elemene o le alofa tunoa o le Atua o le tatalaina lea o pupuni o le lagi, lea e liligi mai ai e le Atua faamanuiaga o le mana ma le malosi, tatou te mafaia ai ona ausia mea ia e le mafai ona oo i ai lo tatou lava malosi.”1 O a laasaga e te ono faia e maua ai faamanuiaga o le mana paia ma le malosi ua saunia le Atua e faasoa atu ia te oe?

Gaoioiga mo le aoao faatasi ma isi

  • Valaaulia tagata o lau vaega e faitau Eteru 12:27. Talanoaina faataitaiga o vaivaiga e masani ona aafia ai fanau a le Atua. Talanoa e uiga i le suiga e mafai ona oo mai i se tagata e ala i le mana paia o le alofa tunoa o le Atua. Valaaulia tagata auai e manatua taimi na latou lagonaina ai le mana o le alofa tunoa o le Atua. Valaaulia i latou e faasoa mai ni aafiaga pe a talafeagai.

Aoao atili

Vaega 2

Ua Faaolaina Oe i le Alofa Tunoa o Iesu Keriso

Keriso o loo tootuli i autafa o le fafine

Sa aoao mai Liae, “E lē mafai e se tagata ona mau i le afioaga o le Atua, vagana ai ua ala atu i galuega, ma le alofa mutimutivale, ma le alofa tunoa o le Mesia Paia” (2 Nifae 2:8). O le faatinoga aupito silisili o le alofa o le Atua o le Togiola a Iesu Keriso, e aofia ai Lona Toetu. Ona o lena taulaga, na ofoina mai e ala i le alofa tunoa o Iesu Keriso, ua Ia laveaiina ai i tatou mai le uu tumau o le oti ma tatala ai le ala mo i tatou taitoatasi e salamo ai i a tatou agasala ma maua ai le faamagaloga.

O le a le faamalosia e le Atua se tasi ia maua Lona alofa tunoa ma toe foi atu i Lona afioaga. O le mea lea, ua Ia fetalai mai ai ia tatou “faalelei [i tatou lava] ma le finagalo o le Atua, ae lē o le finagalo o le tiapolo ma le tino; … ua na o le alofa tunoa lava o le Atua e faaolaina ai i [tatou]” (2 Nifae10:24). I le avea ai ma soo lotomaualalo, tatou te o mai ia Iesu Keriso e ala i le faatuatua, salamo, papatisoga, mauaina o le Agaga Paia, ma taumafai e tausi Ana poloaiga. O le faia o lena mea, tatou te faaali atu ai lo tatou manao e faia mea uma tatou te mafaia a o iloaina o Lona alofa tunoa o le mea lea e faaolaina ai i tatou (tagai i le 2 Nifae 25:23).

Mea e mafaufau i ai

  • Faitau le 2 Nifae 25:23 ma mafaufau i le malamalamaaga lenei mai ia Peresitene Dieter F. Uchtdorf:

    “E le faaolaina i tatou “ona” o mea uma e mafai ona tatou faia. Pe ua faia ea e se tasi o i tatou mea uma e mafai ona tatou faia? …

    “Ua ou mautinoa na iloa e Nifae o le alofa tunoa o le Faaola e faatagaina ma mafai ai e i tatou ona faatoilaloina le agasala. O le mafuaaga lea na matua galue maelega ai Nifae e faatauanau lana fanau ma ona uso ‘ia talitonu ia Keriso, ma ia faalelei ma le Atua.’ [2 Nifae 25:23].

    “Pe a uma mea uma, o lona uiga o mea uma e mafai ona tatou faia! Ma o lona uiga o a tatou galuega i le olaga nei!”2

    Aisea e taua ai le vaai atu i le alofa tunoa o se meaalofa nai lo se mea e tatau ona galue i ai?

Gaoioiga mo le aoao faatasi ma isi

  • Maimoa i le saunoaga a Elder Dieter F. Uchtdorf e uiga i le alofa tunoa i le vitio “Saved by Grace” (1:41). Talanoa faatasi e uiga i le taua o le tali atu o le tagata lava ia i le fuafuaga a le Atua mo lo tatou faaolataga. Aisea e manaomia ai ona tatou salamo pe afai e faaolaina i tatou e le alofa tunoa o le Atua?

Aoao atili

Vaega 3

E Avatu e le Alofa Tunoa ia te Oe le Malosi e Alofa atu ai ma Auauna Atu i le Atua ma Isi

tagata o loo tufa atu meaai

Ua faapea mai le Bible Dictionary, “E … ala i le alofa tunoa o le Alii, e maua ai e tagata taitoatasi, e ala i le faatuatua i le Togiola o Iesu Keriso ma le salamo i a latou agasala, le malosi ma le fesoasoani e fai ai galuega lelei, ia semanu e le mafai ona latou tausisia pe ana tuu e fai i a latou lava ala.” (Grace).

I le avea ai ma soo o Iesu Keriso, e mafai ona e maua le fesoasoani faalelagi e auauna atu ai i le Atua ma isi e pei o le Aposetolo o Paulo, o le na matauina, “Ou te mafaia mea uma lava i le faamalosi mai o Keriso ia te au” (Filipi 4:13). Pe a valaauina i tatou e auauna atu i le malo o le Atua, Na te faaagavaa i tatou e ala i le tuuina mai o le alofa tunoa e faataunuu ai Lana galuega (tagai Alema 26:11–13). O le meaalofa o le alofa tunoa e maua ai foi e tagata taitoatasi le malosi faaopoopo e fetaiai ai ma luitau o le olaga (tagai Mosaea 24:14–15; Alema 31:30–35, 38).

Mea e mafaufau i ai

  • Vaai faalemafaufau i le gagauina o se lala laitiiti mai se laau po o le togavao. Mafaufau po o le a le mea o le a tupu i le lala laau pe a uma ona vavaeese mai lona punavai. Faitau le Ioane 15:1–11. O le a le mea na manao Iesu i Ona soo ia malamalama i ai e uiga i le mana ua Ia ofoina atu i fanau a le Atua? E mafai faapefea e lenei mataupu faavae ona fesoasoani ia te oe e malamalama atili ai i le ala e mafai ai e le alofa tunoa ona faamalosia oe i au taumafaiga e auauna atu i isi?

Gaoioiga mo le aoao faatasi ma isi

  • Matamata le vitio “The Atonement Enables Us” (2:18). Talanoa faatasi e uiga i le aafiaga o le alofa tunoa o le Atua i a tatou taumafaiga e faatino ia galuega lelei. Aisea e taua ai le tatalo mo le alofa tunoa o le Alii pe a tatou saili e galulue ma auauna atu i isi?

Aoao atili