Faatuatua ia Iesu Keriso

Faalagolago i Lona mana, Lona poto, ma Lona alofa

O se mea masani le lagonaina i nisi taimi o le le atoatoa, lofituina, ma e oo lava i le leiloa. O le liliu atu ia Iesu Keriso o le tali lava lea i na lagona i taimi uma. A tatou faatuatua ia Iesu Keriso, o lona uiga o le faalagolago atoa atu lea ia te Ia—faalagolago i Lona mana, atamai, ma le alofa. Tatou te talitonu e ui lava tatou te le malamalama i mea uma, ae e malamalama o Ia. Ona sa aafia o Ia i o tatou tiga ma faanoanoa uma, ua Ia silafia ai le ala e fesoasoani ai ia i tatou e fetaiai ma o tatou faafitauli. (Tagai Alema 7:11–13).

O le a le faatuatua ia Iesu Keriso?

O le faatuatua ia Iesu Keriso o le mataupu faavae muamua lea o le talalelei. O lona uiga e le gata ina talitonu ia te Ia ae o le tuu atu o lou faatuatuaga ia te Ia. O le i ai o le faatuatua e aofia ai le faamoemoe ma le talitonu i mea e moni, e tusa lava pe le mafai ona e vaai i ai pe malamalama atoatoa i ai. O le faatuatua o se mataupu faavae o le faatinoga ma le mana lea e uunaia a tatou gaoioiga e fai mai lea aso i lea aso.

Vaaiga aoao i autu: Faatuatua ia Iesu Keriso

O taiala fesootai mo le suesueina o Iesu Keriso, Faamoemoe, Alofa Mama, Salamo, Vavega

Vaega 1

O le Faamalosia o lo Tatou Faatuatua ia Iesu Keriso o le a Fesoasoani ia i Tatou e Faatoilalo ai Luitau

atavali o alii i totonu o se vaa ma se tagata ua magoto o loo aapa atu mo se fesoasoani

Na fetalai mai le Faaola, “Afai e tusa lo outou faatuatua ma le fua o le sinapi, … e leai se mea tou te le mafaia” (Mataio 17:20). O le fua o le sinapi o se fatu itiiti lava, ae tupu ae ma avea ma se laau tele.

E mafai faapefea la ona faateleina lou faatuatua i le Faaola? Sa faamalamalama mai e Peresitene Russell M. Nelson o le “faateleina o lou faatuatua ma le faalagolago ia [Iesu Keriso] e manaomia ai se taumafaiga.” Sa ia aoao mai foi: “E lē manaomia e le Alii se faatuatua atoatoa mo i tatou e maua ai Lona mana atoatoa. Ae ua Ia talosagaina i tatou ia talitonu.”¹ O le talitonu ia Iesu Keriso e fesoasoani e te lagona ai le faaosofia e suesue i tusitusiga paia ma upu a perofeta o aso e gata ai ma tatalo mo le taitaiga faalelagi. A o e aoao e uiga ia Iesu Keriso ma lagona Lona alofa ma Lona Agaga, o le a tuputupu ae lou faatuatua ia te Ia.

Mea e mafaufau i ai

Maimoa le vitio “Exercise Faith in Christ” (1:43). O le a le mea ua aoao mai e Elder David A. Bednar e uiga i le faatinoina o le faatuatua? O le a se mea o le a e faia e faaaoga ai lou faatuatua ia Iesu?
E le faigofie ona oo mai le faatuatua ia Iesu Keriso, ma o le a e le faaaogaina atoatoa lou faatuatua i taimi uma. Mafaufau i le aafiaga o le Aposetolo o Peteru i le Mataio 14:25–33. E mafai faapefea ona fesoasoani Iesu Keriso ia te oe pe a e faaaogaina sina faatuatua itiiti ia te Ia?
Na aoao mai e le perofeta o le Tusi a Mamona o Alema afai tatou te totoina le fatu o le talalelei i o tatou loto ma fafagaina i lo tatou faatuatua, e mafai ona tatou tuputupu ae malie a tatou lava molimau malosi i le talalelei a Iesu Keriso. Suesue le Alema 32:21–43 ma mafaufau pe mafai faapefea ona e faaaogaina le faatuatua e tuputupu ae ai lau lava molimau.

Gaoioiga mo le aoao faatasi ma isi

Atonu e te manao e fai faatasi ni gaoioiga faaletino ma talanoa e uiga i le mea e faia e le faamalositino mo le tino. Ona faitau lea o vaega o le saunoaga a Elder Juan Pablo Villar “Faaaogaina o o Tatou Maso Faaleagaga,”² mai le konafesi aoao ia Aperila 2019, ma talanoa i le uiga o le faaaoga o le faatuatua ia Iesu Keriso.

Aoao atili

Roma 10:17; Helamana 15:7–8
Russell M. Nelson, “Ua Toetu Keriso; O Le Faatuatua ia te Ia O Le A Aveesea ai Mauga,” Liahona, Me 2021, 101–2
Aoaoga a Peresitene o le Ekalesia: Gordon B. Hinckley(2016), 333–42

Vaega 2

O le Faatuatua o se Mataupu Faavae o le Mana

atavali o se tagata tauaso o loo aapa atu mo Iesu

E ala i le faatuatua ia Keriso, e mafai ai ona tatou utuvai mai le mana o le Atua, ma mafai ai ona faia mea e finagalo ai le Atua mai ia i tatou. O le faatuatua moni e mafai ona aumaia vavega e tusa ai ma le finagalo o le Atua. O le faatuatua tatou te maua ai le malosi e faia ai mea faigata ma tuputupu ae ai faaleagaga. E sili atu foi ona mafai ona tatou taulimaina o tatou manaoga faaletino ma tulaga faigata pe a tatou talitonu i le Alii ma faalagolago i Ana folafolaga. O le tatalo faamaoni o le ala lea e maua ai le mana o le Atua—tatou te ole atu ai i le faatuatua mo le fesoasoani faalelagi ma le taitaiga tatou te manaomia (tagai Enosa 1:15).

Mea e mafaufau i ai

Faitau le Mareko 5:21–42. O le a le matafaioi a le faatuatua i nei vavega? E faapefea ona faapupula mai e lenei tala ni auala e mafai ona tofotofoina ai lou faatuatua?
Faitau pe matamata i le saunoaga a Elder Brent H. Nielson “E Leai Ea se Pulu Pasama i Kiliata?”³ Na faapefea ona iloa e Elder Nielson faamanuiaga na ia maua? Mafaufau pe mafai faapefea ona e vaavaai mo faamanuiaga e oo lava i taimi faigata. E mafai faapefea e le faia o nei mea ona faamalosia le faatuatua ia Iesu Keriso?

Gaoioiga mo le aoao faatasi ma isi

Matamata le vitio “Mountains to Climb” (5:05). Ona mafai lea ona outou galulue faatasi e fai se lisi o auala ua faamanuiaina ai oe e Iesu ma le Tama Faalelagi. Na faapefea e le faatinoina o le faatuatua ia Iesu Keriso ona fesoasoani ia te oe e onosaia ai ma faatoilalo luitau?

Aoao atili

Faataoto 3:5–6; Alema 14:26–28; Eteru 12:29–31
Dennis E. Simmons, “Ae Afai e Leai …,” Liahona, Me 2004, 73–75

Vaega 3

O le Mauaina o le Faatuatua e Alu ai le Taimi ma le Onosai

ata pue o se tamaitai talavou o loo tootuli ma tilotilo atu i fafo o se faamalama

Atonu na e oo i ni taimi na e lagonaina ai e lei faafofogaina au tatalo po o ou luitau sa sili atu nai lo le mea e mafai ona e taulimaina. Sa i ai se taimi na sau ai se tamaloa ia Iesu Keriso ma se tulaga faapena. Sa manaomia e lona atalii le faamalologa, ma sa fai atu le tamaloa ia Iesu e faamanuia o ia. Ina ua faamalamalama mai e Keriso e mafai mea uma ia i latou o e talitonu, sa alaga atu le tagata, “Le Alii e, ua ou faatuatua; ia e fesoasoani mai i lo’u le talitonu.” (Tagai Mareko 9:14–27.) Sa lava lona faatuatua e fesili ai, ae sa ia iloa e le atoatoa lona faatuatua. Pe a e tatalo mo se fesoasoani e faateleina ai lou faatuatua, ua e faaali atu e te iloa e mafai ona fesoasoani Iesu ia te oe—ma o le a Ia fesoasoani mai.

O aafiaga o tagata uma i le fausiaina o le faatuatua ia Iesu Keriso e tulaga ese. Afai o loo tauivi tagata e te alofa i ai ma lo latou faatuatua, ia manatua e tali atu ma le agalelei ma le agaalofa. Afai latou te o mai ia te oe ma ni fesili, e mafai ona e faalogo atu ma le alofa ma le onosai ia i latou ma lagolagoina i latou i la latou sailiga mo le upumoni. E mafai foi ona e fesoasoani ia i latou e saili ni punavai faatuatuaina lea e mafai ona latou vaavaai ai mo ni tali. Ma e mafai ona e ta’u atu ia i latou le tele o le alofa o Iesu ia i latou.

Mea e mafaufau i ai

Na aoao mai Elder Jeffrey R. Holland afai e i ai ni au fesili po o masalosaloga, e mafai ona e “pipiimau i mea ua uma ona e iloa ma tu malolosi seia oo mai se malamalama faaopoopo.”⁴ O a ni auala e mafai ai e le faatuatua ia Iesu Keriso ona fesoasoani ia te oe i fesili e lei taliina?

Aoao atili

Mataio 7:7; 1 Nifae 15:7–11; Mataupu Faavae ma Feagaiga 88:118
“Act in Faith: The Stonemason” (vitio), ChurchofJesusChrist.org
Afai o oe po o se tasi e te alofa i ai e i ai ni fesili e uiga i le talalelei po o aoaoga a le Ekalesia, tagai i le autu “Taliina o Fesili o le Talalelei” mo manatu e maua ai tali.

O Isi Punaoa e uiga i le Faatutua