Aufono a le Uarotai la Latou Galuega
O loo faaaoga e le Au Paia o Aso e Gata Ai ia aufono a uarota ma paranesi e faamanuia ai olaga o i latou e manaomia le fesoasoani.
I le po o le aso 22 o Me, 2011, i le lotolotoi o le feei o sailini, sa taunuu atu ai se asiosio tele i le ogatotonu o Joplin, Misuri, ISA, ma faaleagaina ai fale ma olaga. Sa sili atu le ogaoga o le laveaga o le Uarota a Joplin Muamua e le asiosio, ae i le taimi lava lea, sa amata ai e Epikopo Chris Hoffman ma le aufono a le uarota ona siaki po o faapefea mai ia tagata o le uarota.
“Sa i ai sa matou fuafuaga na faataatia e tali atu ai aua sa matou talanoa e uiga i nei tapenapenaga i le aufono a le uarota a o lei tutupu mai,” o lana faamatalaga lea. “Sa matou faalagolago foi i le Agaga ia iloa ai le mea e fai. Sa toulu pou eletise. Sa le ola telefoni feaveai. Sa matou tatalo ma faalogologo mo tali, ma sa oo mai—sa oo mai i taimi uma lava. O se agaga faafetai lea ia te a’u i le avea ai ma se epikopo le faalogo atu i tagata o le uarota o faapea mai, ‘O le mea lea sa ou faia,’ ae le o le, ‘O le a se mea e te manao ou te faia?’”
O le tali i Joplin ua faaalia ai le mana o se aufono lotogatasi a le uarota. “O le fonotaga a le aufono a le uarota o se tasi lea o fonotaga aupito taua i le Ekalesia,” na tusi ai Elder M. Russell Ballard o le Korama a Aposetolo e Toasefululua, “aua e mafai ai e taitai o korama a le au perisitua ma ausilali ona talanoa ma faia fuafuaga faatasi ma le au epikopo. … Mai aufono ma komiti uma o le Ekalesia, ou te talitonu o le aufono a le uarota e mafai ona i ai se aafiaga sili i le fesoasoani atu i fanau a lo tatou Tama.”1
Autasi i le Alofa ma le Faatuatua
I Puerto Francisco de Orellana, o se nuu maotua i le vaomatua o Ekuatoa, e malosi lava sootaga o le alofa ma le faatuatua o le au paia. O fonotaga faalemasina a le paranesi e atagia ai lo latou agaalofa. Latou te taulai muamua atu i tagata taitoatasi ma aiga, ona sosoo ai lea ma auala e mafai ona fesoasoani atu ai polokalama. Sosoo atu ai ma musumusuga.
E toatele le au paia e manaomia le fesoasoani i le sailiga o galuega. Ua iloa e le aufono a le paranesi o luitau a le au paia e masani lava ona mafai ona taulimaina i se tulaga faalelotoifale. A o talanoaina e le aufono ia manaoga o se tina nofofua ma sana tama teine talavou o lē e i ai ni faafitauli tau i le soifua maloloina, sa iloa e le Peresitene o le Aualofa se galuega e mafai ona faigaluega ai le tina ae o loo latalata ai foi le tina i lana tama teine.
O le aufono a le uarota e utuvai mai foi i punaoa a le Ekalesia, e pei o mea mo le mafutaga faaleaoaoga mo matata a le Tautua a le AAG mo Galuega.2 Sa latou faavaeina foi se vasega e aoaoina e se tagata o le paranesi, lea sa fesoasoani ai i se isi tagata o le paranesi e maua se galuega lelei atu.
Fai mai Ramiro Reyes, le fesoasoani muamua i le au peresitene o le paranesi, e uiga i le aufono a le paranesi: “O i tatou o meafaigaluega i aao o le Alii. O le a Ia ausia Ana sini e ala atu i a tatou galuega.”
O Se Ala i le Malumalu
I Liverpool, Niu Ioka, ISA, a o auai atu le peresitene o le Peraimeri o Melissa Fisk i le fonotaga a le aufono a le uarota, sa ia mauaina se vaaiga manino i lona mana. Ina ua tago ifo o ia i lana ato e avane se tamai api, sa tau atu i se ata o ni tamaiti Peraimeri e toa 28 sa pueina i luga o faasitepu o le Malumalu o Palemaira Niu Ioka. Sa soo uma o latou [foliga] i u a pi. Mo sina taimi, sa tatai ese ai e le ata lona mafaufau mai le fonotaga, ae taulai puupuu atu i le aso sa o atu ai le Peraimeri a le uarota i Palemaira e olioli i lagona paia o lotoa o le malumalu. Ae paga lea, a o fofola atu e tamaiti o latou palanikeke, sa faafuasei ona leua ai ia i latou se faamoega pi.
Ina ua uma ona togafitia tagata uma, sa valaaulia loa e taitai ia tamaiti e pai atu i le malumalu. Sa mumusu tamaiti aua sa fefefe ina ne’i i ai ni isi pi. O lea sa tutu ai matua ma taitai i se laina ma fatuina ai se auala i le malumalu. O lenei faiga sa maua ai e tamaiti le lototele e o atu ai i luma.
A o toe uai atu Melissa i le fonotaga a le aufono a le uarota, sa ia mafaufau faapea, “Maimau pe ana siomia tagata uma e ni uo ma ni taitai agalelei a o latou agai atu i luma i le malumalu.”
Sa faasalaveia ona mafaufauga ina ua faalogo atu o loo ta’ua e le Peresitene o le Aualofa se uso sa manaomia le fesoasoani: “E le’i lotu o ia i le Aso Sa ua tea. O le a ou faamautinoaina e logoina o ia e ona faiaoga asiasi e uiga i le malaga o loo loma i le malumalu.”
“O loo i ai i le taimi nei ni o latou faafitauli faigata,” o le faaopoopo ane lea a le peresitene o le korama a le au toeaina. “O le a ou tulitataoa i o latou faiaoga o aiga ma vaai pe o i ai se mea e mafai ona matou faia.”
“E mafai ona fesoasoani atu tamaitai talavou i le vaaiga o tamaiti,” o le tala lea a le peresitene o Tamaitai Talavou.
A o vaai atu Melissa i foliga o tagata o le aufono a le uarota, sa ia vaaia ai le alofa moni ma le popole. Sa oo ane se ataata i ona foliga. “Ua saunia e le Alii ni auala mo Ana fanau e puipuia ma alofaina ai,” o ona mafaufauga na. “O le aufono a le uarota!”
E pei foi ona i ai i Joplin, Puerto Francisco de Orellana, ma Liverpool, o loo faaauau pea ona maua e taitai o le Ekalesia i le lalolagi atoa ia faamanuiaga o aufono a uarota ma paranesi. A o latou faia, o le a latou fusia faatasi le mana tulagaese o nei aufono e fesoasoani ai i le Alii e faamanuia Ana fanau ma ausia ai Lana galuega.
Tauagavale: ata na saunia e Craig Dimond
Tauagavale: ata na saunia e Joshua J. Perkey