O Le Togiola ma le Malaga i le Olaga Faitino
Mai se saunoaga i se faigalotu na tuuina atu i le Iunivesite o Polika Iaga i le aso 23 o Oketopa, 2001. Mo le anotusi atoa i le Igilisi, asiasi i le speeches.byu.edu.
O le mana gafatia o le Togiola ua faamalosia ai i tatou e fai ma ia lelei ma ia galulue i tua atu o o tatou lava manao taitoatasi ma le gafatia masani.
O le faamoemoega autu o le talalelei a le Faaola sa otootoina faapuupuu e Peresitene Tavita O. MaKei (1873–1970): “O le faamoemoega o le talalelei o le … ia faia tagata leaga ma ni tagata lelei ae o tagata lelei ma ni tagata e lelei atu, ma ia suia le natura o le tagata.”1 O lea la, o le malaga i le olaga faitino o le alualu i luma mai le leaga i le lelei i le lelei atu ma ia maua le suiga tele o le loto—ma ia suia o tatou natura le lelei (tagai i le Mosaea 5:2).
O le Tusi a Mamona o lo tatou tusitaulima o faatonuga a o tatou faimalaga i le ala mai le leaga i le lelei i le lelei atu ma taumafai ia suia o tatou loto. Ua aoao mai le Tupu o Peniamina e uiga i le malaga i le olaga faitino ma le tiute o le Togiola i le ta’imuaina ma le manuia o lena malaga: “Ona o le tagata natura o se fili i le Atua, ma sa faapea lava mai le pau o Atamu, ma o le a faapea lava, e faavavau faavavau lava, vagana ai ua gauai atu o ia i uunaiga a le Agaga, ma tuu ese le tagata natura ma avea ma tagata paia e ala i le togiola a Keriso le Alii” (Mosaea 3:19; ua faaopoopo le faamamafa).
Ou te tata’i atu o outou mafaufau i ni fuaitau faapitoa se lua. Muamua—“tuu ese le tagata natura.” O le malaga mai le leaga i le lelei o le faagasologa o le tuu ese o le alii po o le tamaitai natura o loo i totonu o i tatou taitoatasi. I le olaga nei e tofotofoina ai i tatou uma e le tino. O elemene tonu lava na foafoaina ai o tatou tino o le natura lava ia e le atoatoa, ma e aafia i taimi uma i ave o le agasala, mea le lelei, ma le oti. Peitai e mafai ona faateleina lo tatou malosi e faatoilalo ai manao o le tino ma faaosoosoga “e ala i le togiola a Keriso.” A tatou faia ni mea sese, a o tatou solitulafono ma agasala, e mafai ona tatou salamo ma toe mama e ala i le mana faaola o le Togiola a Iesu Keriso.
Lona lua—“avea ma tagata paia.” O le fuaitau lenei e faamatalaina ai le faauau pea ma le vaega e lua o le malaga i le olaga ia avea “tagata lelei ma ni tagata lelei atu” po o, i nisi faaupuga, ia avea atili e pei o se tagata paia. O le vaega lona lua lenei o le malaga, lenei faagasologa o le alu mai le lelei i le lelei atu, o se autu lea e le lava ona tatou suesueina pe aoaoina atu pe lava foi le malamalama i ai.
Ou te masalo o le toatele o tagata o le Ekalesia ua sili atu ona masani i le natura o le mana togiola ma le mana faamamā o le Togiola nai lo latou masani i le mana faamalosi ma le mana e gafatia ai. E ese le iloa na afio mai Iesu Keriso i le lalolagi e maliu mo i tatou—e taua ma o le faavae lea i le aoaoga faavae o Keriso. Ae e tatau foi ona tatou talisapaia le finagalo o le Alii, e ala i Lana Togiola ma e ala mai i le mana o le Agaga Paia, ia ola i totonu ia i tatou—e le gata ia taitaia i tatou ae ia faamalosia foi i tatou.
O le toatele o i tatou ua tatou iloa a tatou faia ni mea sese, tatou te manaomia le fesoasoani e faatoilalo ai aafiaga o le agasala i o tatou olaga. Ua uma ona totogi e le Faaola le tau ma mafai ai e i tatou ona mama e ala i Lona mana faaola. O le toatele lava o i tatou ua malamalama lelei o le Togiola e mo tagata agasala. Ae peitai, ou te le o mautinoa lelei, pe ua tatou iloa ma malamalama o le Togiola e mo tagata paia foi—mo alii ma tamaitai lelei o e usiusitai, agavaa, ma galulue malosi ma e o loo taumafai ia lelei atu ma auauna atu ma le faamaoni sili atu. Atonu tatou te talitonu sese e faapea e tatau ona tatou faia le malaga mai le lelei i le lelei atu ma o i tatou lava e avea ai i tatou ma se tagata paia, e ala i le naunautai faamaoni, finafinau, ma le lotopulea, faapea ai ma o tatou gafatia e manino lava le tapulaa.
O le talalelei a le Faaola e le faapea e na o le taumamao ma mea leaga i o tatou olaga; ae e faatatau moni i le faia ma le avea ma se tagata lelei. Ma o le Togiola ua aumaia ai le fesoasoani mo i tatou e faatoilalo ma aloese ai mai le leaga ae ia fai ma avea ma tagata lelei. E maua le fesoasoani mai le Faaola i le malaga atoa o le olaga faitino—mai le leaga i le lelei i le lelei atu ma ia suia ai o tatou natura moni.
Ou te le o faapea atu o mana togiola ma le gafatia o le Togiola e eseese ma vavaeese. Ae, o nei itu e lua o le Togiola e fesootai ma e tutusa; e tau fai manaomia uma ina ia mafai ona faaaogaina i vaega uma o le malaga i le olaga. Ma e taua e faavavau mo i tatou uma ona iloa o nei elemene e lua o le malaga i le olaga faitino—o le tuu ese o le tagata natura ma avea ma tagata paia, e tau fai faatoilalo ai le leaga ae avea ma [tagata] lelei—e ausia e ala i le mana o le Togiola. O le finafinau o le tagata lava ia, naunautai ma le uunaiga patino, lelei na fuafuaina ma le faatutuina o sini e manaomia uma lava, ae e matuai le lava lava mo i tatou e faamaeaina ai ma le manumalo lenei malaga i le olaga. E moni lava, e ao ona tatou faalagolago “i galuega, ma le alofa mutimutivale, ma le alofa tunoa o le Mesia Paia” (2 Nifae 2:8).
Alofa Tunoa ma le Mana Gafatia o le Togiola
I le lomifefiloi o le Tusi Paia, ua tatou iloa ai o le upu alofa tunoa e masani ona faaaoga i tusitusiga paia e faamatala mai ai, o se mana faamalosiau po o se mana e mafai ai:
O le “[alofa tunoa o] se upu e masani ona faaaoga i le Feagaiga Fou, ae maise lava i tusitusiga a Paulo. O le manatu autu lava o le upu o auala paia o le fesoasoani po o le malosi, ua aumai e ala i le alofa ma le alofa mutimutivale tele o Iesu Keriso.
“E ala mai i le alofa tunoa o le Alii o Iesu, ua mafai e ala i lana taulaga togiola, o le a tulai ae ai tagata i le tino ola pea, e maua e tagata uma lona lava tino mai le tuugamau i se tulaga o le ola e faavavau. E faapena foi ona ala mai i le alofa tunoa o le Alii e mafai ai e tagata taitasi, e ala i le faatuatua i le togiola a Iesu Keriso ma le salamo i a latou agasala, ona maua le malosi ma le fesoasoani e fai ai galuega lelei lea semanu e le mafai ona latou faia pe ana faapea e tuu atu i o latou lava gafatia. O lenei alofa tunoa o se mana gafatia e mafai ai e alii ma tamaitai ona taofimau i le ola faavavau ma le faaeaga pe a uma ona faalauteleina o latou lava taumafaiga sili ona lelei.”2
O le alofa tunoa o le lagolago faalelagi po o le fesoasoani faalelagi lea e matuai manaomia lava e i tatou taitoatasi e agavaa ai mo le malo selesitila. O lea la, o le mana gafatia o le Togiola e faamalosia ai i tatou e fai ma ia lelei ma ia galulue ia sili atu i o tatou lava manao taitoatasi ma gafatia masani.
I a’u suesuega patino i tusitusiga paia, e masani ona ou tuuina ai le faaupuga “mana gafatia” i soo se taimi lava ou te tau atu ai i le upu alofa tunoa. Mo se faataitaiga, tagai i le fuaiupu lenei lea ua tatou masani uma ai: “Ua matou iloa e faaolaina i tatou i le alofa tunoa, pe a uma mea uma e mafai ona tatou faia” (2 Nifae 25:23). Ou te talitonu e tele ni mea e mafai ona tatou aoaoina e uiga i lenei itu taua o le Togiola pe afai o le a tatou tuuina i ai le “mana gafatia ma le [mana] faamalosi” i taimi taitasi tatou te tau atu ai i le upu alofa tunoa i tusitusiga paia.
Faataitaiga ma Aafiaga
O le malaga i le olaga faitino o le sau mai le leaga i le lelei i le lelei atu ma ia suia o tatou natura. Ua tumu le Tusi a Mamona i faataitaiga o soo ma perofeta o e sa iloa, malamalama, ma sa liua e le mana gafatia o le Togiola i le faia o lena malaga. A o tatou malamalama lelei i lenei mana paia, o le a matuai faalauteleina ma faatamaoaigaina lo tatou vaaiga manino i le talalelei. O se vaaiga manino faapea o le a suia ai i tatou i ni auala maoae.
O Nifae o se faataitaiga lea o se tagata na iloaina, malamalama, ma faalagolago i le mana gafatia o le Faaola. Manatua sa toe foi atu atalii o Liae i Ierusalema e aumai Isamaeli ma lona auaiga i la latou faamoemoega. Sa tetee Lamana ma isi sa malaga faatasi ma Nifae mai Ierusalema e toe foi atu i le vaomatua, ma sa apoapoai atu Nifae i ona uso e faatuatua i le Alii. O le taimi lea o la latou malaga na saisai ai e uso o Nifae o ia i maea ma taupulepule e fasioti o ia. Faamolemole e matau le tatalo a Nifae: “Le Alii e, e tusa ma lo’u faatuatua ia te oe, sei e laveaia a’u mai lima o o’u uso; ioe, foai mai ia te a’u le malosi ia mafai ai ona ou motusia o nei maea ua noatia ai a’u” (1 Nifae 7:17; ua faaopoopo le faamamafa).
Tou te silafia o le ala lea atonu ou te tatalo ai pe ana faapea e noatia a’u e o’u uso? “Faamolemole ia aveese a’u mai lenei mea leaga i le taimi NEI lava!” E sili ona manaia ia te au le faapea, sa le’i tatalo Nifae ina ia suia ona tulaga. Ae, sa tatalo o ia mo le malosi e sui ai ona tulaga. Ma ou te talitonu sa tatalo o ia i lenei auala tonu lava aua sa ia iloa, malamalama, ma na oo ia te ia le mana gafatia o le Togiola.
Ou te manatu o filifili sa noatia ai Nifae, sa le’i faamaneta ona toulu ese mai ona lima ma tapulima. Ae, ou te manatu sa faamanuiaina o ia i le finafinau ma le malosi patino na sili atu i lona gafatia e masani ai, ma “i le malosi o le Alii” (Mosaea 9:17) sa ia galue i ai ma milo ma toso ia noataga, ma iu ina mafai moni ona ia motusia ia maea.
O le aafiaga o lenei mea na tupu mo i tatou taitoatasi e tuusao lava. A o tatou malamalama ma faaaoga le mana gafatia o le Togiola i o tatou olaga patino, o le a tatou tatalo ma saili mo le malosi e sui ai o tatou tulaga nai lo le tatalo mo o tatou tulaga e sui. O le a avea i tatou ma sui e galulue nai lo o ni mea faitino e taugalueaina (tagai i le 2 Nifae 2:14).
Mafaufau i le faataitaiga i le Tusi a Mamona a o sauaina Alema ma lona nuu e Amulona. Na oo mai le siufofoga o le Alii i nei tagata lelei i o latou puapuaga ma faailoa mai:
“Ma o le a ou faamāmāina foi avega ua tuu i o outou tauau, e oo ia te outou tou te le lagonaina i latou i luga o o outou tua. …
“Ma o lenei sa oo ina faamāmāina avega sa tuu i luga o Alema ma ona uso; ioe, sa faamalosia i latou e le Alii ina ia mafai ona latou tauave ma le faigofie a latou avega ma sa latou gauai atu ma le fiafia ma le onosai i le finagalo atoa o le Alii” (Mosaea 24:14–15; ua faaopoopo le faamamafa).
O le a le suiga i le vaega lenei? Sa le o le avega na suia; sa le’i vave aveesea ia luitau ma faigata o sauaga mai tagata. Ae sa faamalolosia Alema ma i latou sa mulimuli ia te ia, ma o le faateleina o lo latou gafatia ma le malosi sa faapea ona māmā ai avega sa latou aveina. O nei tagata lelei sa faamalosia e ala i le Togiola e fai ma sui ma fai se aafiaga i o latou tulaga. Ma “i le malosi o le Alii” sa faapea ona taitaiina atu ai Alema ma ona tagata i le saogalemu i le nuu o Saraemila.
Atonu e faamaoni lava ona e mafaufau faapea, “O le a le mea ua fai ai le mea na tupu ia Alema ma lona nuu o se faataitaiga o le mana gafatia o le Togiola?” O le tali o loo maua i se faatusatusaga o le Mosaea 3:19 ma le Mosaea 24:15.
“Ma tuu ese le tagata natura ma avea ma tagata paia e ala i le togiola a Keriso le Alii, ma avea e pei o se tamaitiiti, e usiusitai, agamalu, lotomaualalo, onosai, ma tumu i le alofa, loto ina usitai uma ua silafia e le Alii e tatau ona faaoo mai i ona luga, e pei ona usitai atu se tamaitiiti i lona tama” (Mosaea 3:19; ua faaopoopo le faamamafa).
A o tatou agai i luma i le malaga o le olaga faitino mai le leaga i le lelei i le lelei atu, a o tatou tuu ese le alii po o le tamaitai o le lalolagi o i totonu o i tatou taitoatasi, ma a o tatou taumafai e avea ma au paia ma ia suia o tatou lava natura, ona tatau lea ona faamatalaina i uiga ua auiliiliina faafia i lenei fuaiupu ona faamatalaina ai le ituaiga tagata o loo avea ai oe ma a’u. O le a avea atili i tatou e faapei o se tamaitiiti, e sili atu ona usiusitai, sili atu ona onosai, ma sili atu ona loto ina usitai.
Ia faatusatusa la uiga nei i le Mosaea 3:19 ma uiga sa faaaoga e faamatalaina ai Alema ma lona nuu: “Ma sa latou gauai atu ma le fiafia ma le onosai i le finagalo atoa o le Alii” (Mosaea 24:15; ua faaopoopo le faamamafa).
Ua ou iloa le tulaga ese o le tutusa o uiga o loo faamatalaina i nei fuaiupu ma se faailoaga o le nuu lelei o Alema sa faasolo ina avea ma nuu lelei atu e ala i le mana gafatia o le Togiola a Keriso le Alii.
Manatua le tala ia Alema ma Amoleka o loo i le Alema 14. I lenei mea na tupu e toatele le Au Paia faamaoni sa susunuina, ae o nei auauna e toalua a le Alii sa faafalepuipuiina ma sasaina. Mafaufau i le augani lenei sa faia e Alema a o tatalo o ia i le falepuipui: “Le Alii e, ia tuu mai ia te i maua le malosi e tusa ma lo maua faatuatua ua ia Keriso, seia laveaiina ai i maua” (Alema 14:26; ua faaopoopo le faamamafa).
Ua tatou toe vaaia ai nei foi le malamalama o Alema ma lona talitonu i le mana gafatia o le Togiola na atagia i lana talosaga. Ma ia matau le taunuuga o lenei tatalo:
“Ona laua [Alema ma Amoleka] motusi ai lea o maea sa saisai ai i laua; ma ina ua vaai mai tagata i lenei mea, sa amata ona latou sosola, ona ua oo mai i o latou luga le mata’u i le faafanoga. …
“A o Alema ma Amoleka, sa o mai i fafo o le falepuipui, ma sa le lavevea i laua; ona sa tuu mai e le Alii ia te i laua le mana, e tusa ma lo laua faatuatua sa ia Keriso” (Alema 14:26, 28; ua faaopoopo le faamamafa).
O lenei foi la, ua manino le i ai o le mana gafatia a o tauivi tagata lelei e tetee le tiapolo ma taumafai e avea ma tagata lelei atu ma auauna atu ma le lelei atili “i le malosi o le Alii.”
O se isi faataitaiga mai le Tusi a Mamona e aoga tele. I le Alema 31, sa taitaia ai e Alema se misiona ia toe maua mai tagata sa Sorama ua liliuese, o e, ina ua uma ona fauina sa latou Rameutoma po o le pulelaa paia, sa latou faia se tatalo faatonuina ma le faamaualuga.
Matau le augani mo le malosi i le tatalo patino a Alema: “Le Alii e, se’i e tuu mai ia te au ina ia mafai ona ou maua le malosi, ina ia mafai ona ou talitalia ma le onosai nei puapuaga o le a oo mai i o’u luga, ona o le amioletonu o lenei nuu” (Alema 31:31; ua faaopoopo le faamamafa).
Sa tatalo foi Alema ina ia maua e ana soa faifeautalai se faamanuiaga faapena: “Se’i e tuu mai ia te i latou ia mafai ona latou maua le malosi, ina ia mafai ona latou onosaia o latou puapuaga ia o le a oo mai i o latou luga ona o amioletonu a lenei nuu” (Alema 31:33; ua faaopoopo le faamamafa).
Sa le’i tatalo Alema e aveese ona puapuaga. Sa ia iloaina o ia o se sui o le Alii, ma sa tatalo mo le malosi e galue ai ma sui ai lona tulaga.
O le manatu autu o le faataitaiga lenei o loo maua i le fuaiupu mulimuli o le Alema 31: “Sa tuu mai foi [e le Alii] ia te i latou le malosi, ina ia latou le mafatia i soo se ituaiga o puapuaga, vagana ai ua tofatumoanaina i le olioli ia Keriso. Ia o lenei mea sa tusa ai ma le tatalo a Alema; ma na tupu foi lenei mea ona sa tatalo o ia ma le faatuatua” (fuaiupu e 38; ua faaopoopo le faamamafa).
Sa le’i aveesea ia puapuaga. Ae sa faamalosia Alema ma ana soa ma faamanuiaina e ala i le mana gafatia o le Togiola ina ia “le mafatia i soo se ituaiga o puapuaga, vagana ai ua tofatumoanaina i le olioli ia Keriso.” Oka se faamanuiaga ina a ofoofogia. Se lesona foi ina a aoga mo i tatou taitoatasi e aoao mai ai.
E le na o tusitusiga paia e maua ai faataitaiga o le mana gafatia. Sa fanau Daniel W. Jones i le 1830 i Misuri, ma sa auai o ia i le Ekalesia i Kalefonia i le 1851. I le 1856 sa auai o ia i le laveaiga o vaega o taavaletosolima sa paulia i Wyoming ona o matagi kiona malolosi. Ina ua maua e le au laveai le Au Paia puapuagatia, ma tuuina atu le toomaga faavavave sa mafai ona latou tuuina atu, ma fai feutagaiga mo tagatamama’i ma vaivai e aveina atu i le Aai o Sate Leki, sa ofo atu Daniel ma nisi o alii talavou e faamuli e leo ia meatotino a le vaega. O meaai ma sapalai sa tuua mo Daniel ma ana uo sa utiuti ma sa vave ona uma. O le upusii lenei mai le apitalaaga patino a Daniel Jones o loo faamatalaina ai mea sa tutupu mulimuli ane.
“E le’i umi ae tau leai ni manu matou te fasia. Sa matou aia uma aano leaga o manufasi; e ma’i ai le tagata i le aina. Mulimuli ane, sa uma uma na mea, sa leai se isi mea na totoe vagana ai pa’u [o manu]. Sa matou faataitaia. O le tele lava na faavela ma ai e aunoa ma ni mea faamanogi meaai ma sa mama’i uma ai le vaega. …
“Sa foliga faaletonu mea uma, aua sa leai se mea na totoe ae na o pa’u mata leaga sa aumai mai povi matelaina. Sa matou ole atu i le Alii e faatonu i matou i le mea e fai. Sa le’i muimui le usoga, ae sa lagona e tatau ona faalagolago i le Atua. … Mulimuli ane, sa musuia au i le ala e fai ai ia mea ma tuuina atu le fautuaga i le vaega, ma ta’u i ai le faiga e kuka ai; ina ia latou toloina ma salusalu ese fulufulu; o lenei faiga sa tele ina tape ma aveese ai le tofo le lelei lea na maua ona o le mafoe. A uma ona salusalu, ona faapuna lea mo se itula se tasi i ni vai se tele, sasaa ese le vai lea ua aveese uma ai le piipii, ona fufulu lea ma toe salusalu faalelei le pa’u, fufulu i le vaimalulu, ona faapupuna lea seia totoo ona faamaalili lea, ona faatoulu lea i ai o sina suka ma ai loa. O lenei faiga sa o se galuega tele, ae sa leai se isi mea e fai, ma sa sili atu ona lelei nai lo le matelaina.
“Sa matou ole atu i le Alii e faamanuia o matou laualo ma ia masani i lenei meaai. … I le aiga la sa fiafia tagata uma i le taumafataga. E tolu aso sa matou le aai ai a o lei faia lenei taumafaiga lona lua. Sa matou fiafia i lenei taumafa matagofie i le pe a ma le ono vaiaso.”3
I na tulaga, atonu ou te tatalo ai mo se isi mea e ai: “Le Tama Faalelagi, faamolemole auina mai mo a’u se manulele po o se pafalo.” Atonu foi o le a ou le manatua e tatalo ina ia malosi lo’u manava ma masani i le meaai sa matou aai ai. O le a le mea sa iloa e Daniel W. Jones? Sa ia iloa le mana gafatia o le Togiola a Iesu Keriso. Sa le’i tatalo o ia e sui ona tulaga. Sa tatalo ina ia faamalosi o ia e taulima ai ona tulaga. E pei foi ona faamalosia Alema ma lona nuu, Amoleka, ma Nifae, sa i ai se vaaiga manino faaleagaga a, Daniel W. Jones ia iloa ai le mea e talosaga atu ai i lena tatalo.
O le mana gafatia o le Togiola a Keriso e faamalosia ai i tatou e fai mea e le mafai ona tatou faia e i tatou lava. O nisi taimi ou te mafaufau ai pe tatou te mafaia i lo tatou lalolagi i aso nei o le faigofie—i lo tatou lalolagi o ogaumu leisa ma telefoni feaveai ma taavale ea malulu ma fale lelei—pe tatou te iloa ona faailoa atu lo tatou faalagolago i aso uma i lena mana gafatia o le Togiola.
O Tuafafine Bednar o se tamaitai e uigaese le faatuatua ma le atamai, ma ua ou aoaoina ni lesona taua e uiga i le mana faamalosi mai ana faataitaiga le leoa. Sa ou vaavaai atu i lona onosai i le ogaoga ma le faifaipea o ona ma’i afuafua—e ma’i moi lava i le aso atoa i aso uma mo masina e valu—i le taimi o ana maitaga taitasi e tolu. Sa ma tatalo faatasi ina ia faamanuiaina o ia, peitai sa le’i aveesea ai lava lena luitau. Nai lo lena, sa mafai ona ia faia faaletino mea e le mafai ona ia faia i lona lava malosi. I le aluga o tausaga, sa ou vaaia foi le ala na faalauteleina ai lona gafatia e taulima ai ulaga ma le taufaifai lea na sau mai se sosaiete faalelalolagi pe a faalogo se tamaitai o le Au Paia o Aso e Gata Ai i se fautuaga faaperofeta e fai le aiga ma le faafaileleina o tamaiti ma mea e ave i ai le faamuamua maualuga. Ou te faafetai ma faamalo ia Susan mo le fesoasoani ia ou aoaoina na lesona sili ona taua.
E Silafia ma Malamalama le Faaola
I le Alema mataupu e 7 tatou te iloa ai le ala ma le pogai e mafai ai e le Faaola ona tuuina mai le mana gafatia:
“Ma o le a afio atu o ia, ma mafatia i tiga ma puapuaga ma faaosoosoga o ituaiga eseese uma; ma o le a oo ia te ia nei mea, ina ia mafai ona faataunuuina o le upu ua fai mai, o le a ia ave i ona luga tiga ma ma’i o ona tagata.
“Ma o le a ia ave i ona luga le oti, ina ia mafai ona ia tatalaina fusi o le oti ia ua noatia ai ona tagata; ma o le a ia ave i ona luga o latou vaivaiga, ina ia mafai ona faatumuina ona loto i le alofa mutimutivale, e tusa ai ma la le tino, ina ia mafai ona ia silafia e tusa ai ma la le tino, le ala e fesoasoani ai i ona tagata, e tusa ma o latou vaivaiga” (Alema 7:11–12; ua faaopoopo le faamamafa).
Na puapuagatia le Faaola e le gata mo o tatou agasala ae faapea foi mo le le tutusa, le sa’o, o tiga, o le ita, ma le atuatuvale faalelagona lea e lofituina soo ai i tatou. E leai se tiga faaletino, leai se ita o le loto, leai se puapuaga o le agaga, leai se ma’i po o le vaivai e te oo i ai pe ou te oo i ai i la tatou malaga i le olaga faitino e le’i oo muamua i ai le Faaola. E i ai le taimi o o tatou vaivaiga tatou te alalaga atu ai, “E leai se tasi e malamalama. Leai se tasi e iloa.” Atonu e leai se tagata ola na te iloa. Peitai o le Alo o le Atua na te silafia ma malamalama lelei lava, aua sa Ia lagonaina ma tauave a tatou avega ona faatoa tatou oo lea i ai. Ma talu ai ua uma ona Ia totogia le tau atoa ma tauave lena avega, ua Ia malamalama lelei ai lava ma mafai ona faaloaloa mai Lona aao o le alofa mutimutivale i le tele o itu o o tatou olaga. E mafai ona aapa mai o Ia, pai mai, ma fesoasoani—e tamoe mo’i mai ia i tatou—ma faamalosia i tatou ia avea atili ma tagata e mafai ona avea ai i tatou ma fesoasoani ia tatou faia na mea e le mafai ona tatou faia e ala i le faalagolago i lo tatou lava malosi.
“Ia outou o mai ia te a’u, o outou uma o e tigaina ma mafatia i avega, o a’u foi e malolo ai outou.
“Ia outou amoina la’u amo, ma ia outou faaaoao ia te au; aua o au le agamalu ma le lotomaulalo: ona maua lea e outou o le malologa mo o outou agaga.
“Aua e avegofie la’u amo, o la’u avega foi e mama ia” (Mataio 11:28–30).
E tautino atu la’u molimau e uiga, ma le talisapaia o le taulaga e le iu ma le faavavau a le Alii o Iesu Keriso. Ua ou iloa o loo soifua le Faaola. Ua ou tofo i Lona mana togiola ma Lona mana gafatia, ma ou te molimau atu o nei mana e moni ma o loo avanoa mo i tatou taitoatasi. E moni lava, “o le malosi o le Alii” e mafai ona tatou faia ma faatoilalo ai mea uma a o tatou fetaomi atu i luma i la tatou malaga i le olaga faitino.
Lo’u Tama e, saunia e Simon Dewey
Ata na tusia e Jeff Ward
Ata na tusia e Jeff Ward
Faamatalaga mai le Vaai i O’u Lima, na saunia e Jeff Ward