Alofa, Puipui, ma Faamalosia

Suesue ma le agaga tatalo i mea nei, ma pe a talafeagai ai, ia talanoaina faatasi ma uso e te asia. Faaaoga fesili e fesoasoani ai ia te oe e faamalosia ai ou uso ma avea ai le Aualofa ma se vaega ola o lou lava olaga.

Faatuatua, Aiga, Toomaga

E pei o le Faaola, o faiaoga asiasi e auauna atu taitoatasi (tagai i le 3 Nifae 11:15). O le a tatou iloa ua manuia la tatou auaunaga o ni faiaoga asiasi pe a mafai ona faapea mai o tatou uso: (1) ua fesoasoani lo’u faiaoga asiasi ua ou tuputupu ae ai faaleagaga; (2) Ua ou iloa e amanaia tele a’u ma lo’u aiga e lo’u faiaoga asiasi; ma le (3) afai e i ai ni o’u faafitauli, ou te iloa o le a gaioi lo’u faiaoga asiasi e aunoa ma le faatalitali se’i fai atu i ai.¹

E mafai faapefea e i tatou o faiaoga asiasi ona alofa, puipui, ma faamalosia se uso? O ni fautuaga nei se iva o loo maua i le mataupu e 7 o le O Afafine i Lo’u Malo: O Le Talafaasolopito ma le Galuega a le Aualofa e fesoasoani atu i faiaoga asiasi e auauna atu ai i o latou uso:

Tatalo i aso uma mo ia ma lona aiga.
Saili musumusuga ia iloa ai o ia ma lona aiga.
Asiasi i ai e le aunoa ia iloa po o a mai o ia ma faamafanafana ma faamalosia o ia.
Ia tumau ona fesootai soo e ala i asiasiga, valaau i telefoni, tusi, i-meli, savali e tesi, ma faatinoga faigofie o le agalelei.
Faafeiloai o ia i fonotaga a le Ekalesia.
Fesoasoani ia te ia pe a i ai se faalavelave faafuasei, ma’i, po o isi manaoga faavavave.
Aoao ia te ia le talalelei mai tusitusiga paia ma Savali a Faiaoga Asiasi.
Musuia o ia e ala i le faia o se faataitaiga lelei.
Lipoti atu i se taitai o le Aualofa e uiga i a latou auaunaga ma le manuia faaleagaga ma faaletino o le uso.

Mai Tusitusiga Paia

Luka 10:38–39; 3 Nifae 11:23–26; 27:21

Mai lo Tatou Talafaasolopito

“Ua avea faiaoga asiasi ma se auala mo tamaitai o le Au Paia o Aso e Gata Ai i le lalolagi atoa e alolofa ai, faafailele, ma auauna atu ai—e ‘galulue e tusa ai ma na lagona tiga alofa na totoina e le Atua i o outou fatafata,’ e pei ona aoao mai e Iosefa Samita.”²

Fai mai se uso e le’i leva ona maliu lana tane, e uiga i ona faiaoga asiasi: “Sa laua faalogo mai. Sa la faamafanafanaina a’u. Sa la fetagisi ma a’u. Ma sa la opoina a’u. … Sa [la] fesoasoani mai e aveesea ai lo’u le fiafia ma le faavauvau i na uluai masina o le tuulafoaiina.”³

O le fesoasoani atu i galuega faaletino o le isi foi lea ituaiga o auauna atu. I le konafesi aoao ia Oketopa 1856, sa faasilasila atu ai e Peresitene Polika Iaga e faapea, sa i ai ni paionia o taavale tosolima sa paulia i le kiona mafiafia e 270–370 maila (435–595 km) le mamao. Sa talosaga atu o ia i le Au Paia o Aso e Gata Ai i le Aai o Sate Leki e laveai i latou ma ia “fesoasoani atu i na o mea lava tatou te ta’ua o mea faaletino.”⁴

Sa tusia e Lucy Meserve Smith e faapea, sa toese e fafine o latou ofuloto [o laulavalava tetele sa maua ai le mafanafana] ma totini, iina lava i le tapeneko ma faaputu i totonu o taavaletoso e auina atu i paionia maalili. Ona latou faaputuputuina lea o mea e momoe ai ma lavalava mo i latou o e o le a faapea ona o mai ma ni nai meatotino laiti. Ina ua taunuu mai taavaletosolima, ua tumu le fale i le taulaga “i mea sa saunia mo i latou.”⁵

Taitoatasi, saunia e Walter Rane, faaaloaloga o le Falemataaga o Talafaasolopito a le Ekalesia