Tala Fou o Malumalu

Faia le Faapaiaga mo le Malumalu o Quetzaltenango Kuatemala

Sa faapaiaina le Malumalu o Quetzaltenango Kuatemala i le Aso Sa, 11 Tesema, 2011, i ni sauniga se tolu e Peresitene Dieter F. Uchtdorf, Fesoasoani Lua i le Au Peresitene Sili. O sauniga o le faapaiaga sa faasalalauina i aulotu o le Ekalesia i totonu o le itu o le malumalu.

“Oka se matagofie o lenei malumalu,” o le saunoaga lea a Peresitene Uchtdorf i le faafiafiaga faaleaganuu i le Aso Toonai, lea sa sisiva, pepese, ma faatinoina ai e le au faafiafia talavou mai aulotu o le eria se faaaliga vaaia o le talafaasolopito i le lotoifale ma aganuu. “O loo i ai se susulu pupula e pei o se maataua, ma o se maataua lea mo lenei eria o lenei atunuu.”

O le Malumalu o Quetzaltenango Kuatemala o le malumalu lona 136 o le Ekalesia i le lalolagi atoa ae o le lona lima i Amerika Tutotonu. O lenei malumalu o le a tautuaina ai le tusa ma le 60,000 o le Au Paia o Aso e Gata Ai.

Ua Suatia e le Ekalesia le Eleele mo le Malumalu Lona Fitu i Pasila

O le aso 15 o Novema, 2011, sa pulefaamalumalu ai Elder David A. Bednar o le Korama a Aposetolo e Toasefululua i le sauniga o le suatiaina o le eleele mo le Malumalu o Fortaleza Pasila, o le malumalu lona fitu o le Ekalesia i Pasila.

“O lenei malumalu o le a avea ma se punavai o le faamoemoe, malamalama, ma le faatuatua i le Atua mo i latou uma o e o mai ma savavali ai iinei ma i totonu o lenei lotoa,” na saunoa ai Elder Bednar. “O le a lelei atu i taimi uma ma ese lenei aai ona o le malumalu o le a fauina ai iinei.”

O le a fausia le malumalu i Avenida Santos Dumont i Fortaleza, Ceará, Pasila. Sa fofogaina e Peresitene Thomas S. Monson le fausiaina o le Malumalu o Fortaleza Pasila i le taimi o le konafesi aoao o Oketopa 2009.

O le Malumalu o Quetzaltenango Kuatemala, sa faapaiaina i le aso 11 o Tesema, 2011, e Peresitene Dieter F. Uchtdorf, o le malumalu lona 136 lea a le Ekalesia.

CREDIT: