Ua Faamamafa e le Aoaoga Faaleautaitai i le Lalolagi Atoa le Ala i le Tuputupu A’e Moni Lava
Sa faamatalaina e taitai o le Ekalesia le taua o le “tuputupu ae moni” ma le auala e faataunuuina ai, i le aso 11 Fepuari, 2012, i le Fonotaga Faaleaoaoga Faaleautaitai i le Lalolagi Atoa.
Sa auai Peresitene Dieter F. Uchtdorf, Fesoasoani Lua i le Au Peresitene Sili, ma uso o le Korama a Aposetolo e Toasefululua, le Au Peresitene o Fitugafulu, ma au peresitene o ausilali a le Ekalesia i aoaoga a taitai o le Ekalesia i le lalolagi atoa.
“I le utugagana a le Ekalesia, o le tuputupu a’e e mafai ona faauigaina o ‘tagata auai fou.’ … Peitai o letuputupu ae moni, ua faauigaina, o le ‘tuputupu ae i le aofaiga o tagata toaaga o le ekalesia,’” o le faamalamalama mai lea a Peresitene Uchtdorf.
Sa faaopoopo mai Elder M. Russell Ballard o le Korama a Aposetolo e Toasefululua, “O le tuputupu ae e tupu pe afai e iu ane le liua patino o le olaga atoa i le talalelei, i le faateleina o le faamaoni o tagata taitoatasi ma aiga.”
O lena faateleina o le faamaoni e aofia ai mea e le faigofie ona fuaina, e pei o tatalo i aso taitasi, suesuega o tusitusiga paia, afiafi faaleaiga, alofa i le aiga, ma aafiaga patino i le Togiola, o le saunoaga lea a Peresitene Uchtdorf.
“Ua tele taimi, tatou te faafaigataina le matagofie ma le faigofie o le talalelei a Iesu Keriso i lisi e le uma o faamoemoega auiliili,” na ia saunoa ai. “Ae peitai, a tatou taulai atu i le ‘aisea’ o le talalelei, e faapea ona mou ese ai le tele o le le mautonu.”
O le tele lava o le faasalalauga sa taulai atu i aoaoga faavae ma mataupu faavae autu, lea e maua ai tali i fesili pe “aisea”.
“O fesili talafeagai o le ‘aisea’ o le a taitai atu ai i tatou i faaiuga talafeagai o le ‘o ai,’ ‘o le a,’ ‘o afea,’ ‘o fea,’ ‘aisea,’ ma le ‘e faapefea,” o le saunoaga lea a Peresitene Uchtdorf.
O Le Faaipoipoga ma le Aiga i le Fuafuaga
“O Le Ekalesia e fausia mai i aiga,” o le saunoaga lea a Peresitene Boyd K. Packer, Peresitene o le Korama a Aposetolo e Toasefululua. “O uarota ma siteki e lona lua mai. A tatou talanoa i aiga, ona tatou vaaia lea o le tuputupu ae moni i le Ekalesia.”
Sa ia ta’ua o tane ma tamā uma e tatau ona avea ma se tofi o le perisitua i totonu o lona aiga, e pulefaamalumalu i lona aiga i le amiotonu. Sa ia saunoa foi, e tatau i taitai perisitua ona taitai ma le agavaa—e ui ina eseese tofi i totonu o le perisitua, ae e tutusa lava le tele o le perisitua o loo i alii agavaa uma e umia le perisitua ma le isi (tagai i le MF&F 1:20).
Sa faamamafaina e Elder Russell M. Nelson o le Korama a Aposetolo e Toasefululua e faapea, o tane ma ava, tama ma tina, e ao ona fausia se mafutaga o le alofa, salamo, ma le tatalo ina ia faamanuiaina ai i le faamalolosia ma le puipuia o le aiga, o le “totonugalemu lea o le fuafuaga a Le Foafoa mo le taunuuga e faavavau o Lana fanau” (“O Le Aiga: O Se Folafolaga i le Lalolagi,” Liahona ma le Ensign, Nov. 2010, 129).
“E faatolu ona tuuina mai i tusitusiga paia le lapataiga e faapea, o le a matuai faaumatia le lalolagi i le toe foi mai o le Alii pe afai e le faatulagaina lelei nisi o tulaga faapitoa,” o lana saunoaga lea. “I ia taimi taitasi o lena lapataiga e faatatau lea i le tulaga o le aiga o tagata ua aunoa ma sauniga o le faamauga o le malumalu. A aunoa ma nei sauniga o le faaolataga, o le a faapea ona le faataunuuina le mamalu o le Atua.”
O le ausiaina o lena sini tupito—o le ola faavavau ma le faaeaga mo fanau uma a le Atua—e manaomia ai le tupu o lena tuputupu ae moni i totonu o o tatou aiga, i uarota ma paranesi, ma le Ekalesia atoa.
Faaaogaina o le Talalelei
O le tuputupu ae ma le liua moni e oo mai mai le faaaogaina o le talalelei i le olaga i aso taitasi. I se talanoaga o fesili-ma-tali, sa faamalamalama mai ai e Elder L. Tom Perry ma Elder D. Todd Christofferson o le Korama a Aposetolo e Toasefululua e faapea, o le faaaogaina sili lava o le talalelei o le osia ma le tausia o feagaiga o le malumalu. O le usiusitai i feagaiga, na fai mai ai Christofferson, e mafai ona suia ai le tagata o le lalolagi i se Tagata Paia i le aluga o taimi.
O le aapa atu i isi o le isi itu taua lea o le faaaogaina o le talalelei. O tagata o le Ekalesia e nafa taitoatasi, ma faapea foi o se Ekalesia ma le aapa atu e laveai mai i latou e i ai manaoga faaletino ma faaleagaga, o le saunoaga lea a taitai.
E le tatau ona tatou faatuai i le soosoo tauau ma isi tapuaiga ma faalapotopotoga e naunau i le faia o auaunaga e tausia e matitiva ma e le tagolima, na saunoa ai Elder Christofferson. O taitai perisitua e tatau ona taulamua i nei taumafaiga, ae e tatau i le au paia ma faifeautalai ona lagolago atu foi i lena matafaioi.
O se talanoaga faavaega sa faamamafaina ai le taulai atu i le tautuaina o aiga, faamalolosia o e umia le Perisitua Mekisateko, ma fesoasoani e fausia faatuatua ma molimau a le autalavou. Sa auai ai Elder Ballard ma Elder Neil L. Andersen o le Korama a Aposetolo e Toasefululua, faatasi ai ma Elder Ronald A. Rasband o le Au Peresitene o Fitugafulu; Elaine S. Dalton, peresitene aoao o Tamaitai Talavou; ma Rosemary M. Wixom, peresitene aoao o le Peraimeri.
Na saunoa Elder Rasband, e tatau i taitai uma lava ona aofia ai i le toe aumaia o le au paia ia toaaga atoatoa, ae sa faamamafaina e Elder Andersen e faapea, e manaomia le saga aofia ai o le autalavou i le toe faatoaagaina ma le faamalolosia mai o isi talavou.
Faataunuuina o le Tuputupu Ae Moni
E oo mai le tuputupu ae moni a o tatou faaaogaina mataupu faavae o le talalelei i o tatou olaga i aso taitasi, o le faamamafa mai lea a Peresitene Uchtdorf.
“A o e mafaufau i nei autu, fesili ifo ia te oe lava e uiga i le ‘aisea’ o lau tautua ma le auaunaga ma le taunuuga ‘lea, o le a’ i ou tiutetauve o ni tagata taitoatasi ma o se aufono,” o lana saunoaga lea.
Aoao Atili
E mafai e tagata taitoatasi ona maimoa, faalogologo i le, lolomi, ma sii mai mea mai le faasalalauga i le tele o gagana i le lds.org/study/other-addresses ma kiliki i le Aoaoga a Taitai i le Lalolagi Atoa.
Sa saunoa Elder M. Russell Ballard o le Korama a Aposetolo e Toasefululua i le taimi o se talanoaga faavaega sa faia o se vaega o le Fonotaga Faaleaoaoga Faaleautaitai i le Lalolagi Atoa ia Fepuari 2012.
© IRI