2 Timoteo 3:16–17

Na aoao mai le Aposetolo o Paulo i le auala e faamanuia ai e tusitusiga paia o tatou olaga.

16 O tusi paia uma lava e mai le Agaga o le Atua ia, e aoga foi ia e aoao ai, e aoai ai, e faatonu ai, e faapoto ai foi i le amiotonu:

17 Ina ia atoatoa ona lelei ai o le tagata o le Atua, ia saunia lava ia i galuega lelei uma lava.

O Tusitusiga Paia Uma Lava

“A tatou mananao e talanoa i le Atua, tatou te tatalo. Ma a tatou mananao ia te Ia e talanoa mai ia i tatou, tatou te suesue i tusitusiga paia; aua o Ana afioga e fetalaia mai e ala i Ana perofeta. Ma o le a Ia aoaoina i tatou a o tatou faalogologo atu i musumusuga a le Agaga Paia.

“Afai e te le’i faalogoina Lona siufofoga o fetalai atu ia te oe lata mai nei, ia e foi atu i tusitusiga paia ma se vaaiga fou ma e pei o le taimi muamua lea ua e faalogo i ai. O i latou o o tatou maea faaola faaleagaga.”

Elder Robert D. Hales o le Korama a Aposetolo e Toasefululua, “Tusitusiga Paia: O Le Mana o le Atua i lo Tatou Faaolataga,” Liahona, Nov. 2006, 26–27.

Aoaoga faavae

“O mataupu faavae moni, e malamalama i ai, e suia ai uiga ma amioga. O le suesueina o mataupu faavae o le talalelei o le a vave ona faaleleia ai le amio nai lo se suesuega o le amio lea o le a faaleleia ai le amio.”

Peresitene Boyd K. Packer, Peresitene o le Korama a Aposetolo e Toasefululua, “Aua le Fefe,” Liahona, Me 2004, 79.

Faatonutonu

Faatonutonu—aoaiga, faasagatonu, otegiaga, po o le faasa’oina, e masani lava i se faiga agalelei.

Faasaoga

O le upu autu faa Eleni sa faaaogaina i le Tusi Paia o lona uiga moni o le “toe faasa’osa’o.” O lea la o tusitusiga paia e fesoasoani e faasagatonu ai oe ma mulimuli i le ala sa’o ma le vaapiapi (tagai i le 2 Nifae 9:41).

Sauniaina

Sauniaina—faatulagaina, sapalaiina.

Galuega Lelei

O a ituaiga o galuega lelei ua fesoasoani atu tusitusiga paia e te saunia e fai? O nisi nei o mea sili ona manino. E mafai ona e mafaufau i nisi mea? Tusi e uiga i ai i lau api o talaaga.

Auauna atu o se faifeautalai faamisiona
Faataunuuina o valaauga i le Ekalesia (e pei o au peresitene o korama ma vasega)
Aoaoina atu o le talalelei
Tuuina atu o le molimau
Faasoaina atu o le talalelei
Taliina o fesili a uo e uiga i le Ekalesia