Fesili & Tali

“Aisea e tatau ai ona ou alu i le seminare pe afai e mafai ona ou suesue a’u lava i tusitusiga paia?”

O le a i ai le taimi atoa e totoe o lou olaga e suesue ai na o oe au tusitusiga paia, o lea afai o loo i ai mo oe, ia faaaoga le avanoa i seminare e suesue ai i tusitusiga paia faatasi ma ni faiaoga ma ni uo sili ona lelei i le taimi nei.

O le aoao ma suesue i lalo o le taitaiga a se faiaoga lelei e fesoasoani e te maua ai se vaaiga fou i mau ia atonu e te le’i malamalama atoatoa muamua i ai. E ono faasoa atu foi e le faiaoga ia aoaoga mai perofeta ma isi taitai o le Ekalesia lea e tuuina atu ai ia te oe se malamalamaaga lelei atu e uiga i mau.

Ma le isi, e masani lava ona sili atu le manaia o le aoao faatasi ma lau vasega. O le a e maua ai se avanoa e talanoa ai i mea e te tau i ai i lau faitauga. Atonu foi e i ai ni aafiaga a tagata o lau vasega lea e avea ai ni mau faapitoa ma ni mau e sili ona latou fiafia i ai. O le faalogo atu i o latou aafiaga e mafai ona tino mai ai mau mo oe. Ma ona o lou aoaoina faatasi o le talalelei ma isi, e mafai ona e olioli ai i faamanuiaga folafolaina: “O le mea e potopoto faatasi ai le toalua po o le toatolu i lo’u igoa, … o iina o le a ou i ai i le lotolotoi o i latou” (MF&F 6:32).

O le seminare foi e fatuina ai se faatulagaga mo au suesuega. E uunaia ai oe e faitau i se televave patino, lea e fesoasoani ia te oe e faauma ai tusi taitasi o tusitusiga paia. E te maua ai le avanoa e talanoaina ma tauloto ai ia fuaiupu o mautauloto. E mafai ona e mautinoaina le maua o le tele o mea aoga mai tusitusiga paia e ala i le auai i le seminare nai lo o se isi lava ala i lenei taimi o lou olaga.

Uo Fou, Manatu Fou

O le seminare e te maua ai ni uo fou, ma latalata atu ai i le tasi ma le isi, e pei o se aiga. E te aoaoina mea moni ia e le mafai ona e iloaina na o oe lava. E malie ma e ese le faaleagaga. E te amataina sa’o ai lou aso. Afai e te le o auai i le taimi nei, ia amata loa ma o le a suia ai lou olaga.

Katarina B., 16 tausaga, Kalefonia, ISA

Fiafia

O le seminare e amataina ai lo’u aso. Ua fai ai a’u ma se tagata ua sili atu le fiafia ma sili atu le manao e talanoa e uiga i le talalelei i isi tagata. E loloto atu a matou suesuega o mau, o lea ua tele ai ina ou malamalama.

Madi S., 15 tausaga, Colorado, ISA

Tuufaatasiga Atoatoa

O le seminare o se aafiaga faagaeetia. O nisi taimi, e le lava ai le suesue na o oe lava. O suesuega faaletagata lava ia ma le seminare o se tuufaatasiga atoatoa. E ese le maoae o faiaoga, ma afai e i ai sau fesili, e mafai ona fesoasoani atu ou faiaoga ma tagata o le vasega e tali.

Dawson D., 15 tausaga, Idaho, ISA

Malamalamaaga Atili

A ou suesue na o a’u i tusitusiga paia, ou te tau le lagonaina so’u fiafia tele nai lo taimi matou te suesue faatasi ai ma isi. Ma le isi, e mafai ona tatou aoaoina ni manatu mananaia mai isi pe a tatou suesue faatasi i tusitusiga paia. E ala mai i le seminare ua ou iloa ai le tele o tala mananaia, ma e tele mea ua ou iloa e uiga i mea e mafua mai ai mau, lea e atili manaia ai suesuega! Ua ou fiafia ona sa ou filifili e auai i le seminare.

Rebecca M., 16 tausaga, Schleswig-Holstein, Siamani

Molimau Malosi Atu

O le mea muamua, na fetalai le Alii o le mea e faapotopoto ai le toalua po o le toatolu i Lona suafa, o le a i ai o Ia ma i latou (tagai i le Mataio 18:20; MF&F 6:32). O le lagonaina o Lona Agaga e mafai ona fesoasoani ia i tatou e mafaufau loloto ai i mea ua Ia faia mo i tatou. Lona lua, pe a suesue faatasi ma isi i tusitusiga paia, e mafai ona tatou malamalama lelei atu i mea ua tusia. A o faalogologo atu i le tasi ma le isi, e mafai ona tatou faalogo atu i se mea tatou te le’i iloaina e i tatou lava, ma e mafai foi ona tupu lena mea i isi pe a faasoa atu o tatou malamalama. Tolu, a ou alu i le seminare, e faamalosia la’u molimau. O le seminare o se avanoa e faasoa atu ai a tatou molimau ma faalogologo atu i molimau a isi. E fesoasoani tatou te tumau ai i le ala sa’o.

Dmitri G., 16 tausaga, Dnipropetrovs’k, Iukureini

Aoao mai Isi

O le alu i le seminare o se mea lea e tatau lava ona ou faia. E le gata ina aoao ma faamalamalama mai e lo’u faiaoga tuuto ia upumoni o loo maua i mau, ae e tele naua mea ou te aoaoina mai i a matou talanoaga faalevasega. E faasoa mai e isi tamaiti aoga o latou aafiaga i mea ua latou aoaoina, ma latou te fesoasoani ia ou maua le malamalama atili e uiga i le talalelei ma le Faaola ma Lana Togiola. E le lava le suesue na o oe lava, aua ua ou maua nisi o tali i o’u faafitauli i talanoaga faalevasega. E mafai ona ou molimau atu ua faia e le seminare se vaega taua i le fafagaina o la’u molimau i le moni o le Ekalesia a Iesu Keriso.

Denzel J., 15 tausaga, Samoa

Malamalama ma le Upumoni

Pe a ou alu i le seminare, ou te sailia le malamalama ma le upumoni ma faamaulu le ofutau atoatoa o le Atua (tagai i le MF&F 27:15–18). O lena ofutau e fesoasoani ou te iloa ai Lona siufofoga i taimi uma ma i nofoaga uma. O le suesue i tusitusiga paia i aso uma e faamalosia ai lo’u faatuatua ma la’u molimau ma fesoasoani ia ou malosi ai i o’u tofotofoga. O le auai i le seminare o se tasi o auala sili ona lelei e maua ai le malamalama ma le upumoni ma suesue ai tusitusiga paia ma mafaufau loloto.

Nohemi M., 17 tausaga, Puebla, Mekisiko

E Tolu Mafuaaga

Muamua, ona ou te fia alu i se misiona, o lea ou te auai ai i le seminare. E tatau ona alapopo faifeautalai ma suesue le talalelei i le taeao. O le auai i le seminare e fesoasoani ou te atiina ae ai le mausa lelei o le alapo. Lona lua, i le taeao, e manino ma malamalama o tatou mafuafau, o lea e mafai ai ona tatou taulai atu i a tatou aoaoga ma suesuega. O se mea atamai le faaaoga o itula sili ona lelei o le aso e aoao ai e uiga i le Atua. Lona tolu, afai ou te suesue na o a’u, atonu o le a le loloto atu lo’u malamalama e pei o lo’u faiaoga. Faatasi ai ma lana taitaiga ma aoaoga, e mafai ona tele atu ni mea ou te aoaoina nai lo mea ou te aoaoina na o a’u lava.

H. Chen Yuan, 16 tausaga, T’ai-chung, Taiwan

O tali ua faamoemoe e mo se fesoasoani ma ni manatu, ae e le o se faalauiloaga aloaia o aoaoga faavae o le Ekalesia.

O Faamanuiaga o le Seminare

“Ua ou iloa le mana lena e oo mai i le auai i polokalama seminare ma inisitituti. O na polokalama na faaleleia ai lo’u olaga, ma ou te iloa o le a faaleleia ai foi lou olaga. O le a tuuina ai se puipuiga ia te oe ma puipuia oe mai faaosoosoga ma faigata o le lalolagi. O loo i ai se faamanuiaga sili i le mauaina o se malamalama o le talalelei. Ma ua ou iloa e leai se isi nofoaga e sili atu ona lelei mo tagata talavou o le Ekalesia e maua ai se malamalama faapitoa o mea paia nai lo polokalama o le inisitituti ma seminare.”

Elder L. Tom Perry o le Korama a Aposetolo e Toasefululua, “Mauaina o le Upumoni,” Liahona, Ian. 1998, 70–72.

O Le Isi Fesili

“E faapefea ona ou faamalamalama atu i la’u uo o le soli o le tulafono o le legavia o se mea le lelei?”

Auina mai lau tali a o lei oo i le aso 15 o Me, 2012, i le liahona.lds.org, i le i-meli i le [e-mail], pe meli mai i le:

Liahona, Questions & Answers 5/12

50 E. North Temple St., Rm.2420

Salt Lake City, UT 84150-0024, USA

E ono faapupuuina tali mo le uumi po o le manino.

O le faamatalaga ma le faatagaga o loo i lalo e tatau ona aofia mai ai: (1) igoa atoa, (2) aso fanau, (3) uarota po o le paranesi, (4) siteki po o le itu, (5) lau faatagaga tusitusia, ma, afai e i lalo ifo o le 18 ou tausaga, o le faatagaga tusitusia a ou matua (e talia foi le i-meli) e lolomiina ai lau tali ma lou ata.