Tatou te Talanoa ia Keriso

Matagofie o le Alofa Tunoa

Saunia e Kristen Nicole Cardon

Ou te faalagolago i le alofa tunoa o Iesu Keriso i aso uma lava.

“Ia tatou fonotaga a le Ekalesia, e le masani ona tatou talanoa e uiga i le alofa tunoa,” o le tala lea a lo’u faiaoga faalelotu i le Iunivesite a Polika Iaga, “ae o i tatou, o tagata O Le Ekalesia a Iesu Keriso o le Au Paia o Aso e Gata Ai, e talitonu i le alofa tunoa.”

E sa’o lava, ou te le manatua se lesona a Tamaitai Talavou po o le Aoga Sa e uiga i le alofa tunoa, ae sa toe foi i tua o’u mafaufauga i le aufaipese a le matou aoga maualuga ma le usuina o le “Matagofie o le Alofa Tunoa.”

Matagofie o le alofa tunoa! (se faaupuga ina a manaia!)

Na laveaiina ai se faalogogata e pei o a’u!

Sa ou leiloa, ae ua toe maua;

Sa tauaso, ae ua pupula.¹

“O le alofa tunoa o le mana o le Atua mai le Togiola a Iesu Keriso,” o le faamalamalama mai lea a lo’u faiaoga. “Sa ou vaevaeina le alofa tunoa i ni mana se fa: toetu, faaolataga, faamalolo, ma le faamalosi.” Sa faaauau ona ia faamalamalama mai ia mana taitasi, ae sa toe foi foi lo’u mafaufau i o’u manatua.

O lena lava aufaipese i le aoga maualuga sa i ai se taimi sa malaga atu ai i Kalefonia, ISA, e tauva i se faaaliga musika. Sa o’u ma’i i le taimi tonu lava na sauni ai le malaga e o, ma o le tiga o lo’u faai o lona uiga o le a le mafai ona ou pese faatasi ma le aufaipese i le faaaliga—pe afai foi ou te pese, o le a leaga la’u pese, ma sau faatasi ai ma le tiga. Sa ou fai atu i lo’u tamā mo se faamanuiaga faaleperisitua ma faaaluina ai le aso na sosoo ai i le tatalo ia ou manuia.

Atonu ou te le’i malamalama atoa i lena taimi, a o ou usuina le “Matagofie o le Alofa Tunoa” ma se faai na lelei atoatoa i le taimi o le faaaliga, sa ou pese e uiga i lena lava mana na faamaloloina a’u i le aso na faatoa te’a atu. O le Togiola a le Faaola sa faamanuiaina ai a’u i lena aso; o Lona alofa tunoa sa fai ma puna o lo’u faamalologa.

“Ma o le a afio atu o ia, ma mafatia i tiga ma puapuaga ma faaosoosoga o ituaiga eseese uma; ma o le a oo ia te ia nei mea, ina ia mafai ona faataunuuina o le upu ua fai mai, o le a ia ave i ona luga tiga ma ma’i o ona tagata” (Alema 7:11).

E pei o le toatele o tamaiti tausaga muamua i kolisi, ina ua uma le aoga maualuga, sa lofituina au i au kosi i le kolisi ma luitau o le nofo mamao ma lo’u aiga ae o le taimi lava foi lena e toalima i matou sa nonofo i le potu e tasi.

O le taimi lena na ou malamalama ai i le mana faamalosi ma le gafatia o le alofa tunoa o Keriso. Sa ou faaaluina o’u aso e faigaluega ma suesue, ae sa ou faalagolago foi i tatalo i aso uma lea sa ou aioi atu ai i le Tama Faalelagi mo le malosi e faamaea ai galuega manaomia. A o faaauau le tausaga aoga, sa ou olioli i le iloaina, faatasi ai ma le mana faamalosi ma le gafatia o le Togiola a Keriso, sa mafai ona ou faatinoina e le gata i le lelei ae sa aunoa foi ma se faigata.

“Ou te mafaia mea uma lava i le faamalosi mai o Keriso ia te a’u” (Filipi 4:13).

E ui ou te le’i oo i isi vaega e lua o Lona alofa tunoa—toetu ma le atoaga o le faaolataga—Ou te faalagolago pea i le Togiola a Iesu Keriso i aso taitasi. O le alofa tunoa, o le mana o le Atua mai le Togiola a Iesu Keriso, ua faamaloloina ai a’u ma faamalosia ai a’u. A o ou taumafai e usitai i poloaiga a le Atua ma usitai i Lona finagalo, ou te maua le fesoasoani faalelagi e sili mamao atu nai lo lo’u lava atamai.

“E faaolaina i tatou i le alofa tunoa, pe a uma mea uma e mafai ona tatou faia” (2 Nifae 25:23).

Faamatalaga

1. John Newton, “Amazing Grace,” Olney Hymns (1779), nu. 41.

I Le Malosiaga o le Alii

“Faatasi ai ma le faatuatua i le Alii o Iesu Keriso ma le usiusitai i Lana talalelei, i le laa e tasi i le taimi agai i luma a o tatou malaga, augani atu mo le malosi, faaleleia o o tatou uiga faaalia ma o tatou faamoemoega, o le a tatou manuia i le lafu a le Leoleo Mamoe Lelei. O lena mea o le a manaomia ai le loto pulea ma aoaoga ma taumafaiga ma le malosi. Peitai e pei ona fai mai le Aposetolo o Paulo, ‘Ou te mafaia mea uma lava i le faamalosi mai o Keriso ia te a’u.’ (Filipi 4:13).”

Peresitene Howard W. Hunter (1907–95), “Developing Spirituality,” Ensign, Me 1979, 26.

E Faapefea Ona Aafia o Tatou Olaga i le Alofa Tunoa o le Alii?

Ua fesoasoani mai Elder David A. Bednar o le Korama a Aposetolo e Toasefululua e tali lenei fesili i le “O Le Togiola ma le Malaga i le Olaga Faitino” i le lomiga lenei i le itulau e 12:

• “E finagalo le Alii, e ala mai i Lana Togiola ma e ala i le mana o le Agaga Paia, e nofo i totonu o i tatou—e le gata ina ia faatonutonu i tatou ae faapea foi ona faamalosi i tatou.”

• “O le naunautai ma le lotopulea o le tagata lava ia, lotomau ma le uunaiga, fuafua lelei ma le faatutuina o sini e manaomia, ae e matuai le lava lea mo i tatou e faamaeaina ai ma le manumalo ia lenei malaga i le olaga faitino. E moni lava, e ao ona tatou faalagolago ‘i galuega, ma le alofa mutimutivale, ma le alofa tunoa o le Mesia Paia’ (2 Nifae 2:8).”

• “O le mana gafatia o le Togiola e faamalosia ai i tatou e fai ma ia lelei ma ia galulue ia sili atu i o tatou lava manao taitoatasi ma gafatia masani.”

Mafaufau e tusi i lau apitalaaga ma faasoa atu i lou aiga e uiga i taimi sa e lagonaina ai le alofa tunoa faamalolo, fesoasoani, po o le faamalosi a le Alii ia te oe.

Ata na saunia e Ash Ram