Ua Aoao e Elder Christofferson, Elder Jensen le Au Paia i Atenitina

I le Aso Toonai, 12 Novema, 2011, sa saunoa atu ai Elder D. Todd Christofferson o le Korama a Aposetolo e Toasefululua ma Elder Jay E. Jensen o le Au Peresitene o Fitugafulu, i le autalavou, talavou nofofua matutua, taitai perisitua, faifeautalai, ma le au paia i Salta, Atenitina.

Sa auai ai foi ia Elder Mervyn B. Arnold, Peresitene o le Eria a Amerika i Saute i Saute; lona faletua o, Devonna; ma Elder Ruben Spitale, Fitugafulu Eria. Sa auai ai foi le faletua o Elder Christofferson, o Kathy, ma le faletua o Elder Jensen, o Lona.

Na toeitiiti atoa le 1,300 o talavou ma matua na auai i le faeasaite lea sa saunoa uma ai Elder Christofferson ma Elder Jensen. Ae o le isi 10,000 o le au paia sa maimoaina le faasalalauga i Atenitina atoa i faleautu o siteki e 70.

Sa saunoa Elder Jensen, o le sa auauna atu muamua o se Peresitene o le Eria a Amerika i Saute i Saute, “Afai tou te le manatua se mea sa ou fai atu ai, ou te manao ia outou manatua se fuaitau mai se perofeta, o Peresitene Thomas S. Monson, o le ou te molimau atu o se perofeta moni a le Atua. O le fuaitau lenei: ‘O filifiliga e iloa ai le taunuuga.’”

O loo ia i tatou le faitalia—o le mafai ma le avanoa e fai ai faaiuga—sa saunoa ai Elder Jensen, ma o na filifiliga tatou te filifilia ai o tatou taunuuga.

Sa ia faamatalaina se tala i se uo sa filifili i se tasi po e inupia ma ave le taavale ma tupu ai se faalavelave na maliliu ai ni tagata se toalua. Sa ia faatusaina i le tala i le la filifiliga ma lona toalua e tolopo le la faaipoipoga ina ia mafai ona ia faia se misiona a o avea ma se alii talavou.

“Ina ua [ou foi mai] sa ma faaipoipo loa i le malumalu. Sa ma osia ni feagaiga, lea ma te faafouina i vaiaso taitasi o o maua olaga atoa. Sa ma faia se filifiliga ua faapea ona iloa ai lo maua taunuuga,” o lana faamatalaga lea.

Sa sosoo ai ma Sister Christofferson, i le faasoaina atu o lana molimau e uiga i faamanuiaga o le tausia o feagaiga, ma sa faaiuina e Elder Christofferson le sauniga.

“Na pau lava le mea e te matuai manaomia o le alofa ma le faatuatua,” o le saunoaga lea a Elder Christofferson. “O le faatuatua lena e fesoasoani ia i tatou i a tatou faaipoipoga, aiga, matata, [ma] galuega.”

Sa ia faamamafaina o poloaiga e aumai ai faatonuga i o tatou olaga ma fesoasoani ia tatou maua le mea e sili ona taua.

Ona ia fautuaina lea o le autalavou ma o latou matua ia fai se tautinoga e mulimuli i fautuaga o loo maua i le tamaitusi Mo Le Malosi o le Autalavou.

“O lenei tusi o le a matuai faamalolosia ai a outou fanau, e tusa lava pe tuua na o i latou—ma le iloaina o loo ola foi o latou matua i nei lava mataupu faavae,” sa ia saunoa ai.

Sa faaiuina e Elder Christofferson i le faailoa atu o se alofa i le au paia i Atenitina, lea sa ia faamisiona ai i le toeitiiti limasefulu tausaga ua mavae.

A o i ai i Salta, sa feiloai ai foi Elder Christofferson ma Elder Jensen ma faifeautalai i le lotoifale ma le autalavou matutua nofofua, lea sa laua ta’uina atu i ai alofaaga o le Usoga.

Sa saunoa uma atu Elder Christofferson ma Elder Jensen i faifeautalai mai le Misiona a Argentina Resistencia i le amataga o Novema 2011.

Ata na saunia e James Dalrymple