O Le A Le Mea e Sosoo Pe a uma le Seminare?
O le faauuga o le seminare e le o le gataaga lea o au suesuega faalelotu. O loo i ai se mea matagofie ua faapolopolo mai mo oe.
I le seminare e te suesue ai i tusitusiga paia ma e masalo tou te feiloai ai e le aunoa ma isi o lau tupulaga. E te lagonaina le taliaina, ma e te lagonaina le Agaga. O lea la, a faamaeaina lau seminare, pe ua uma ai foi ma nei aafiaga? E matua leai lava.
O le isi laasaga e sosoo ai o le polokalama a le Ekalesia o le inisitituti, ma o le a e matuai fiafia i ai. Pe e te alu i le kolisi pe leai, e mafai ona faaauau lou aoao e uiga i le talalelei, sauni mo se misiona ma se faaipoipoga i le malumalu, ma fefaasoaai aafiaga ma isi o lau tupulaga.
O nisi nei o tali i fesili autu e uiga i le inisitituti. E mafai ona e maua nisi faamatalaga atili i le institute.lds.org.
O le a le inisitituti?
O le inisitituti e aofia ai vasega e aoao ai i le talalelei, e aofia ai vasega e uiga i tusitusiga paia, aoaoga a perofeta, ma tapenaga mo se misiona po o se faaipoipoga i le malumalu. I nisi o inisitituti e mafai ona e filifili mai le tele o vasega.
O ai e mafai ona auai?
O le autalavou matutua nofofua uma lava ua fautuaina malosi e auai i vasega o le inisitituti. Soo se tasi lava—faaipoipoina pe nofofua—e i le va o le 18 e oo i le 30 tausaga e mafai ona auai.
O fea e mafai ona ou maua ai le inisitituti?
O nisi eria ua i ai fale o le inisitituti e lata i kolisi ma iunivesite. I nisi o eria e fai vasega i falelotu o le Ekalesia po o isi nofoaga. Ia faafesootai lou epikopo po o le peresitene o le paranesi e aoao ai e uiga i le polokalama o le inisitituti i lou eria, po o le alu i le institute.lds.org e sue ai se inisitituti e lata atu ia te oe.
Aisea e tatau ai ona ave ni a’u vasega o le inisitituti?
Ua saunoa Peresitene Thomas S. Monson: “Ia fai le auai i le inisitituti o se mea e ave i ai le faamuamua. … Mafaufau i ai. O le a faia ai ni faauoga, o le a lagonaina ai le Agaga, ma o le a faamalosia ai faatuatua. Ou te folafola atu ia te outou, a o outou auai i le inisitituti ma suesue ma le filiga i tusitusiga paia, o le a faateleina lo outou malosi e aloese ai mai faaosoosoga ma maua le taitaiga a le Agaga Paia i mea uma tou te faia” (institute.lds.org, 21 Ape., 2009).
Ata na saunia e le Media Services