Manatu mo Afiafi Faaleaiga

O lenei lomiga e aofia ai tusiga ma gaoioiga e mafai ona faaaoga mo afiafi faaleaiga. O ni faataitaiga nei se lua.

“O Faamanuiaga o le Seminare,” itulau e 20: Ia toe faamanatu le tusiga a o lei oo i le taimi [o le talanoaga] ma filifili pe o a ni auala e sili ona lelei e faaaoga ai le savali i lou aiga. Afai e i ai sau fanau talavou i le seminare, amata i le fesili atu ia i latou pe aisea e taua ai le seminare ia i latou. Ona faitau lea o le vaega e ta’ua “Mauaina o Faamanuiaga Folafolaina.” Ia uunaia lau fanau laiti ane e saunia e auai i le seminare pe a lava lo latou matutua. Afai e leai sau fanau talavou e auai i le seminare, atonu e te manao e faitau le tusiga ona talanoa lea i le taua o le seminare i le autalavou i aso nei.

“E Iloa e Tagata Uma ia Bleck,” itulau e 42: Mafaufau e usu le pese “Fai Mea Tonu” (Viiga, nu. 148) o se pese amata. Faitau pe otooto le tala e uiga ia Bleck. Fai i tagata o le aiga e faasoa atu se aafiaga sa tatau ai ona latou faia se filifiliga faigata i le va o ni auala eseese ma pe o a foi ni taunuuga na maua ai mai le filifiliga sa latou faia. Ia faaiu i le faitauina o le upusii mai ia Peresitene Thomas S. Monson.

Faatauvaa, Toafilemu, ma Lemafaagaloina

Sa o se afiafi faaleaiga lemafaagaloina faatasi ma le ma fanau teine laiti e toalua, o Angélique, e 6 tausaga, ma Béthanie, e 4 tausaga. Sa ma tau fai faapauu ifo ma lo’u toalua i o ma nofoa, vaivai ma le le iloa po o fea e amata ai. O lea sa amatamea ai le ma fanau teine ma vili le uili o tofiga o le afiafi faaleaiga, ma tuu mai ia i maua uma ni tofiga. O le galuega a lo’u toalua o le taitai, o Béthanie o musika, o a’u sa i ai gaoioiga, ae o Angélique sa faia le lesona.

Sa filifili e Béthanie le “Ou Te Fia Vaai i le Malumalu” (Tusipese a Tamaiti, 99), ma sa matou usuina faatasi. Sa fai e Papa le tatalo amata. Ona tago lea o Angélique i le lomiga aupito lata mai o le Liahona ma filifili se tusiga i le vaega a tamaiti. O loo aoao o ia e faitau i le aoga, o lea sa ia faitau mai ai le tusiga ia i matou. O le lagona sa i totonu o lo matou fale, o le lagona o le toafilemu. Sa molimau mai le Agaga e moni mea sa ia faitauina mai.

Sa matou taaalo faatasi i ni taaloga, ma o a’u sa faia le tatalo faaiu. A o ou tatalo, sa le mafai ona taofia lo’u faafetai i lo tatou Tama Faalelagi mo Lona Agaga ma le alofa ma mo le faamanuiaina o lo matou fale i nei agaga laiti. Sa ma iloaina ma lo’u toalua o lo maua tiutetauave o le tausia lea o i laua ma aoao i laua i le talalelei. O le faia o afiafi faaleaiga o se vaega lea o lena tiutetauave paia.

Sylvie Poussin, Réunion