Atonu e Tatau Ona Tatou Tatalo
Scott Edgar, Iuta, ISA
I le tautotogo o le 1975 sa nonofo ai lo matou aiga i laufanua lanumeamata faifaatoaga i le eria o Rheinland-Pfalz i Siamani i Sisifo. O le matou foiga mai i le lotu i se tasi Aso Sa timuga, sa matou tutu ai e autilo i se taavale sa taavalevale ma taatia faatafa i autafa o le auala susu i le faatausiusiuga o le togavao. Ua amata ona pogisa totonu o le togavao ona o le mafiafia o le faamalumalu lea na faia e laau ma le pogisa ua oo mai.
Ina ua uma ona matou autilotilo i le taavale malepe, sa matou toe foi atu i le matou taavale ma iloa ai ua paulia i le palapala. Sa le mafai ona ou faasolomulia, ae e mafai ona ou alu i luma—i totonu o le togavao. Sa matou tietie muamua e ui atu i le togavao ma iloa ai o le tele o auala taloto i le togavao e fesootai lava ma e iu lava ina toe manu ae i fafo, o lea sa ou filifili ai e alu i luma i le pouliuli.
Sa vave ona ou iloaina ua ou faia le filifiliga sese. O le auala vaiti ma le susu, sa tumu i pupu loloto o palapala ma e atili ai lo matou mamao atu i totonu o le togavao pogisa. Sa ou taumafai e faasaoasaoa, ma le fefe afai matou te tutu, o le a oo ina matou paulia. Sa ou iloa atu se itu maualuga i luma atu tonu lava lea sa foliga mai e malo e taofiofia le mamafa o le taavale. O la’u fuafuaga o le aveese o le taavale mai le palapala ina ia ou maua se taimi e mafaufau ai. Sa oso i luga le taavale ma aluese mai le palapala.
Sa ou tapeina le taavale ae ou oso i fafo. O le pepe ai o moli, sa le mafai ai ona ou iloa atu se mea. Sa ou toe kiina moli o le taavale, uu mai le matou moliuila, ma ina ua uma ona ou siakia le taavale, sa ou filifili loa o la’u peti sili lava o le faasolomuli o le taavale i le togavao ona matuai faasaosaoa lava lea i le auala na matou o mai ai.
Sa ou solomuli mamao lava i totonu o le togavao i le mea na ou mafaia, faauu teisi le afi, ma toe faaoso loa i luga o le auala, ma goto maualalo ai i totonu o le palapala. O lea la ua matuai o matou pagatia lava. Sa matuai pouliuli atoa ma filemu fafo o le taavale. I totonu o le taavale sa ma saofafai ai ma lo’u toalua ma le ma fanau atuatuvale e toatolu.
Sa ou fesili atu i lo’u toalua mo ni manatu. Ina ua mavae sina taimi, sa ia fai mai, “Atonu e tatau ona tatou tatalo.” Sa toetoe lava o le taimi lena sa to’a mai ai tamaiti. Sa ou faia se tatalo faamaulalo ae faatauanau mo se fesoasoani. A o ou tatalo, sa oo mai ma le manino se manatu i lo’u mafaufau: “Faamau filifili o pa’u.”
Sa tutu si o’u toalua faapelepele i le 10 inisi (25 cm) o palapala i lona ofu lotu, ma uu le moliuila a o ou soloina pa’u pito i tua i o’u lima ma faamau filifili. Faatasi ai ma le faatuatua ma le talitonu, sa matou toe tatalo ai ma faaola loa le taavale. Sa matou o ese malie mai i le palapala ma iu lava ina matou toe oo atu i le auala taavale.
I le fiafia i le sao mai le palapala ma le pouliuli, sa toeitiiti ai lava a galo ia te au po o ai lea sa fesoasoani ia i matou e o ese mai le togavao. Sa faamanatu mai e lo’u afafine e lima tausaga ina ua fai mai, “Tama, e tali moni mai lava le Tama Faalealgi i tatalo, a ea?”