Faamoemoe

Vaaiga Aoao

O le faamoemoe o moomooga mautinoa ma le naunau atu i faamanuiaga folafolaina o le amiotonu. E masani ona taua e tusitusiga paia le faamoemoe o se gauai atu i le ola e faavavau i le faatuatua ia Iesu Keriso.

O le upu faamoemoe e faauigaina sese i nisi taimi. I la tatou gagana o aso uma, o le upu e masani ona i ai se faiteite o le le mautonu. Mo se faataitaiga, atonu tatou te faapea tatou te faamoemoe mo se suiga i le tau po o se asiasiga mai se uo. Ae ui i lea, i le gagana a le talalelei, o le upu faamoemoe o le mautinoa, le maluelue, ma malosi. Ua saunoa perofeta i le mauaina o se “faamoemoe mausali” (Alema 34:41) ma se “faamoemoe ua ola” (1 Peteru 1:3). Na aoao mai le perofeta o Moronae, “O le mea lea, soo se tasi e talitonu i le Atua e mafai moni lava ona faamoemoe mo se lalolagi sili atu ona lelei, ioe, se nofoaga lava i le aao taumatau o le Atua, o le faamoemoe lea e sau mai le faatuatua, e fai ma taula i agaga o tagata, lea o le a latou mautinoa ma mausali ai, ma faatumulia ai pea i galuega lelei e le aunoa, ma taitaiina ai e viia le Atua.” (Eteru 12:4).

“Pe a tatou maua le faamoemoe, tatou te faatuatuaina folafolaga a le Atua. Ua maua e i tatou se faamautinoaga leleoa pe afai tatou te faia ‘galuega o le amiotonu,’ tatou ‘te maua ai [lo tatou] taui, o le filemu lea i lenei lalolagi, ma le ola e faavavau i le lalolagi a sau’ (Mataupu Faavae ma Feagaiga 59:23). Na aoao mai Mamona faapea o lena faamoemoe e faatoa oo mai i le Togiola a Iesu Keriso: “O le a le mea tou te faamoemoe i ai? Faauta ou te fai atu ia te outou, tou te faamoemoe, e ala i le togiola a Keriso ma le mana o lona toetu, ia faatutu mai outou i le ola faavavau, ma o le pogai ona o lo outou faatuatua ia te ia e tusa ma le folafolaga” (Moronae 7:41).

Ao tatou tauivi e ola ai i le talalelei, tatou te tuputupu ae i lo tatou mafaia ona “ia tele lava lo outou faamoemoe ona o le mana o le Agaga Paia” (Roma 15:13). E faateleina lo tatou faamoemoe ao tatou tatalo ma saili atu i le faamagaloga a le Atua. I le Tusi a Mamona, na faamautinoa atu ai e se faifeautalai e igoa ia Arona se tupu sa Lamana, “afai e te salamo i au agasala uma, ma ifo i lalo i luma o le Atua, ma valaau atu i lona suafa i le faatuatua, ma le talitonu o le a e maua, ona e maua lea o le faamoemoe ua e naunau i ai” (Alema 22:16). Tatou te maua foi le faamoemoe ao tatou suesue i tusitusiga paia ma mulimuli i a latou aoaoga. Na aoao mai le Aposetolo o Paulo, “O mea uma foi na tusia anamua, na tusia ia e aoao mai ai ia te i tatou; ina ia tatou maua le faamoemoe e tupu mai i le onosai ma le faamafanafana mai o Tusi.”(Roma 15:4).

O le mataupu faavae o le faamoemoe e oo atu i le faavavau, ae e mafai foi ona lagolagoina i tatou i luitau o aso uma o le olaga. “Amuia le tagata,” na faapea mai ai le fai Salamo, “o i ai le Atua o Iakopo e fai ma ona fesoasoani, o i ai lona faamoemoe ia Ieova lona Atua” (Salamo 146:5). Faatasi ai ma le famoemoe, e mafai ona tatou maua le olioli i le olaga. E mafai ona tatou “maua le onosai, ma talitalia … puapuaga, faatasi ma le faamoemoe mausali o le a outou malu mai i o outou puapuaga uma i se aso” (Alma 34:41). Se’i tatou “fetaomi atu i luma ma le tumau ia Keriso, ma se susulu atoatoa o le faamoemoe, ma le alofa i le Atua ma tagata uma. O le mea lea, afai o le a outou fetaomi atu i luma, ma taumamafa fiafia i le afioga a Keriso, ma tumau e oo i le iuga, faauta, ua faapea ona fetalai mai o le Tama: O le a outou maua le ola e faavavau” (2 Nifae 31: 20).

Tusifaamaumau Ou Lagona Uunai