Savali a Faiaoga Asiasi

O Iesu Keriso O Le Malamalama, Ola, ma le Faamoemoe o le Lalolagi

Ia aoao atu mau ma faamatalaga e fetaui ma manaoga o uso o loo e asia. Ia molimau atu e uiga i le aoaoga faavae. Ia valaaulia i latou o loo e aoaoina e faasoa mai mea ua latou lagonaina ma aoaoina.

E Faapefea Ona Avea Iesu Keriso ma Malamalama ma Ola o le Lalolagi?

1 Nifae 17:13: “E fai foi au ma o outou malamalama i le vao; … o lea, e pei ona outou tausi i au poloaiga e faapea ona taitaiina outou e agai atu i le nuu ua folafolaina; a e tou te iloa o au lava e taitaiina ai outou.”

Elder Dallin H. Oaks o le Korama a Aposetolo e Toasefululua: “O Iesu Keriso o le malamalama ma le ola o le lalolagi. O mea uma sa faia e ia. I lalo o le taitaiga ma le fuafuaga a le Atua le Tama, o Iesu Keriso o Le Foafoa, o le puna o le malamalama ma le ola o mea uma. …

“O Iesu Keriso o le malamalama o le lalolagi aua o ia o le puna o le malamalama lea ‘e susulu atu mai le afioaga o le Atua e faatumulia mea uma i le vavaloloa’ (MFF 88:12). O Lona malamalama o le ‘malamalama moni e faamalamalamaina ai tagata uma e o mai i le lalolagi’ (MFF 93:2). O Ana faataitaiga ma Ana aoaoga e faailoa mai ai le auala tatou te savavali ai. …

“O Iesu Keriso o le ola o le lalolagi ona o lona tulaga faapitoa e pei ona taua i tusitusiga paia ‘o le ala sili ma le faavavau o le laveaiina nai le oti’ (2 Nifae 11:5). O Lona Toetu ma lana Togiola ua faasaoina ai i tatou mai le oti faaletino ma le oti faaleagaga” (“O Le Malamalama ma le Ola,” Liahona, Tes. 1997, 42–43; tagai New Era, Tes. 1996, 6).

E Mafai Faapefea Ona Ou Maua le Faamoemoe ia Iesu Keriso?

Peresitene Dieter F. Uchtdorf, Fesoasoani Lua i le Au Peresitene Sili: “O le talalelei a Iesu Keriso ua i ai le mana paia e sii ae ai oe i se mea e maualuga atu mai mea e foliga mai i nisi taimi o se avega e le magafatia po o vaivaiga. Ua silafia e le Alii ou tulaga ma ou luitau. Na fetalai o Ia ia Paulo ma i tatou uma, ‘O lo’u nei alofa tunoa e lava lea e fesoasoani ia te oe.’ E faapei foi o Paulo e mafai ona tatou tali atu: ‘Ua tele lo’u fiafia i le mitamita i mea ua ou vaivai ai. Ina ia tumau i ou luga le mana o Keriso’ (2 Korinito 12:9)” (“E Le Tatau Ea Ona Tatou Olioli?” Liahona ma le Ensign, Nov. 2007, 19).

Julie B. Beck, peresitene aoao o le Aualofa: “Na fesili Mamona, ‘Po o le a le mea … tou te faamoemoe i ai?’ O lana tali ua tau mai ai ia te i tatou ni faamoemoega tetele se tolu: ‘E ia te outou le faamoemoe ona o le togiola a Keriso, ma le mana o lona toe tu mai, ina ia faatuina i le ola faavavau’ (Moronae 7:41).

“Ina ua papatisoina outou, sa avea outou ma tagata ua auai i le uluai faamoemoe tele, o le Togiola a Keriso. O taimi uma lava tou te aai ai ma feinu ma le agavaa i le faamanatuga, ua outou maua le avanoa e toe amata ai. … O lou faamoemoe ma le faatuatua i le Faaola o le a faateleina pe a e salamo ma e faia e oe lava ia ni suiga faaletagata. …

“O le faamoemoe tele lona lua o le Toetu. Ua tofu outou ma le folafolaga, o le a outou toetutu ona o lo tatou Faaola o Iesu Keriso. …

“Faatasi ai ma le faamoemoe o le Togiola ma le Toetu, ua i ai foi ma se faamoemoe tele lona tolu, o le faamoemoe lea i le ola e faavavau. … Talu ai ona ua i ai so outou Faaola, ua outou talitonu foi i se olaga fiafia e faavavau o le foafoaina o mea, auauna atu, ma le aoao. O lena ua outou i ai i le ala sa’o ma le vaapiapi, ma o loo i ai se faamoemoe o loo susulu mai i o outou luma atu. … Ia tau lava o lou tumau ai iina, ma fetaomi atu i luma ma le faamoemoe atoatoa lelei” (“O Loo I Ai le Faamoemoe o loo Susulu mai i o Tatou Luma,” Liahona ma le Ensign, Me 2003, 103–5).

Faamatalaga mai le O Le Iesu Keriso Toetu, na saunia e Grant Romney Clawson; si’o: faamatalaga mai le Iesu Keriso, na saunia e Harry Anderson