Valoaga o le Afio Mai o Keriso
Kalena Faitau Aso
E mafai ona e sauni nei mo le Kerisimasi e ala i le manatuaina o auala na sauni ai isi i aso ua mavae mo Ia.
E toatele perofeta o le Tusi Paia ma le Tusi a Mamona na muai tauina mai le fanau mai ma galuega a Iesu Keriso i le fia selau o tausaga a o lei oo i le taimi tonu na tupu ai. Mo aso e 12 a o lumanai le Kerisimasi, o le a avea lenei kalena faitau aso o se faatatau i mau e uiga i le fanau mai ma le soifuaga o Keriso ma gaoioiga e mafai ona e faia e te avea atili ai e pei o Keriso. Faitau le mau i aso taitasi, ma afai e te manao ai, fai le gaoioiga e o faatasi ma le mau. Faatasi ai ma le faatagaga a ou matua, e mafai ona e faaaogaina manatu mai le kalena lenei i le afiafi faaleaiga.
Ua saunoa mai Peresitene Thomas S. Monson: “Sei o tatou tuuese ia tusiata o le Kerisimasi mo ni nai minute, ma o latou faamatalaga susua o meaalofa. Sei o tatou liliu ese foi mai fugalaau mo Tina, le fusiua faapitoa mo Tama, le pepe meataalo manaia, o le nofoaafi mapumapu, o le uila ua leva ona faatalitali i ai—faapea foi i tusi ma vitio—ae uai atu o tatou mafaufau i meaalofa tumau ua tuuina mai e le Atua.”1
Pe a uma le vaitau o le Kerisimasi, ia taofi pea i lou mafaufau ma lou loto mea ua e aoaoina, ma faamanatu ai le Kerisimasi i le tausaga atoa e ala i le auauna atu i isi.
Tesema 13
Na valoia e Isaia, o se perofeta o le Feagaiga Tuai e faapea, o le a fanauina e se tamaitai mama le Alo o le Tama Faalelagi. O nei tala i tusitusiga paia na tusia i le silia ma le 700 tausaga a o lei soifua mai o Ia.
“Faauta, e to le taupou, ma fanau mai se tamatane, na te faaigoa foi ia te ia o Emanuelu” (Isaia 7:14; tagai foi 2 Nifae 17:14).
“Aua ua fanau mai mo i tatou le tama, ua foaiina mai mo i tatou le atalii, e i lona ua le malo, e igoa foi o ia, o le Silisili Ese, o le Faipule, O Le Atua malosi, O Le Tama o le Faavavau, O Le Alii o le Filemu”(Isaia 9:6;tagai foi 2 Nifae 19:6).
Ia filifili ma le agaga tatalo se uo, tagata o le aiga, po o se tagata o le uarota po o le paranesi. Ia tuu faalilolilo mo ia se meaalofa laitiiti, e pei o se meaai manaia, o se manatu mai tusitusiga paia, po o se kata o le Kerisimasi.
Tesema 14
Na vaai Nifae i se faaaliga i le taupou o Maria ma le pepe o Iesu:
“Na ia fetalai mai foi ia te au: Faauta, o le taupou lea ua e iloa, o ia o le tina o le Alo o le Atua i la le tino.
“Ua oo ina ou iloa ua aveeseina o ia i le Agaga; ina ua uma ona aveeseina o ia i le Agaga i se itula, ua fetalai mai le agelu ia te au: Vaai ia!
“Ona ou vaai ai lea ma ua toe iloa le taupou o sapasapai le tamameamea i ona lima.
“Ua fetalai mai foi le agelu ia te au: Faauta, o le Tamai Mamoe a le Atua, ioe, o le Alo o le Tama Faavavau!” (1 Nifae 11:18–21).
Fai se lisi o le Kerisimasi o mea e te manao e foai atu nai lo o mea e te manao e maua mai.
Tesema 15
Na molimau perofeta e uiga i le misiona a Keriso i le lalolagi. O le faamatalaga lenei o se faamaumauga mai le perofeta o Apinati, o le na soifua pe tusa o le 150 T.L.M.:
“Ua faapea foi ona gauai le tino i le Agaga, po o le Alo i le Tama, o le Atua e tasi ia, ua onosai i tofotofoga, a ua le gauai i le tofotofoga, ua onosai foi o ia ia tauemuina, ma sasaina, ma tuulafoaiina, ma faafitia e lona nuu.
“A mavae ia mea, a uma foi ona faia vavega e tele i le fanauga a tagata, …
“… e faapea lava ona taitaiina atu o ia, ma faasatauroina, ma fasiotia, o loo gauai le tino e oo lava i le oti, ua faaumatia foi le loto o le Alo i le finagalo o le Tama” (Mosaea 15:5–7).
Fai se meaai manaia o le Kerisimasi, ma foai atu i se aiga o le tou uarota po o le paranesi. O le foai atu o le a fesoasoani e faateleina ai le lotogatasi o le uarota ma faauoga.
Tesema 16
Na valoia e Alema ia mea nei i le nuu o Kiteona pe tusa o le 83T.L.M.:
“E afio mai foi le Alo o le Atua i le lalolagi. …
“Faauta foi, e fanaua o ia e Maria, … o ia foi o le taupou, o le ipu filifilia ma le taua, e faamamaluina ma to o ia i le mana o le Agaga Paia, e fanau mai foi le tama tane, ioe, o le Alo o le Atua.
“E maliu foi o ia, e onosai i mea tiga, ma puapuaga, ma tofotofoga uiga eseese; e faapea foi ina faataunuuina le upu ua faapea mai, na te ave i ona luga puapuaga ma ma’i o lona nuu.
“Na te ave foi le oti i ona luga, ina ia tatalaina e ia noanoaga o le oti o loo ua noanoatia ai nei lona nuu; na te ave foi i ona luga o latou vaivai, ina ia faatumuina lona alo i le alofa” (Alema 7:9–12).
Tuu atu le meaalofa o le auauna atu i se tasi o manaomia. Valaaulia lou aiga e fesoasoani atu ia te oe i le filifilia o se auaunaga e mafai ona e tuuina atu.
Tesema 17
E alofa Iesu Keriso i fanau taitoatasi a le Atua ma e le mafai ona ia faagaloina se tagata se toatasi. Na valoia e Esekielu e faapea, o le Alii o le a avea ma leoleo mamoe ma faapotopoto mai Ana mamoe ua leiloloa.
“Aua ua faapea ona fetalai mai o le Alii o Ieova; Faauta, o au o au lava, ou te sueina la’u lafu, ou te matua suesue lava i ai.
“E pei o le leoleo mamoe ona sueina o lana lafu i le aso o i ai o ia i lana lafu ua taapeape; e faapea ona ou sueina lau lafu, ma ou laveaiina i latou ai mea uma. …
“Ou te aumaia foi i latou nai nuu … ou te aumaia i latou i lo latou lava laueleele, ma fagaina i latou i mauga o Isaraelu” (Esekielu 34:11–13).
Faaalu se taimi faatasi ma si ou tei laitiiti, tagata o le aiga po o se uo. Faitau atu ia te ia le tala o le Kerisimasi o loo i le Luka 2.
Tesema 18
E ui ina sa atoatoa Iesu Keriso, ae sa manaomia lava ona papatisoina o Ia e faataunuu ai mea tonu uma. O le vaega lenei o se tala i le valoaga a Liae, na tusia e Nifae:
“Na fai mai foi lo’u tama, na te [Ioane le Papatiso] papatiso i Petapara i tala atu o Ioritana; ua na fai mai foi, na te papatiso i le vai; na te papatiso lava i le Mesia i le vai.
“Pe a uma ona papatisoina e ia le Mesia i le vai, e iloa ma molimau atu ai o ia, ua uma ona ia papatisoina le Tamai Mamoe a le Atua, o Le aveese agasala a le lalolagi” (1 Nifae 10:9–10).
Foai atu le meaalofa o le taimi e ala i le faaaluina o le taimi faatasi ma se tagata gasegase, tagata matua, po o se tina ua maliu lana tane i lau uarota po o le pitonuu. Fai atu ia te ia e faamatala mai ia te oe e uiga i se Kerisimasi sa sili ona fiafia i ai.
Tesema 19
Sa vavalo Samuelu le Sa Lamana e uiga i faailoga na siomia ai le fanau mai o le Faaola:
“Faauta, ou te avatu le faailoga ia te outou; aua pe a mavae mai tausaga e lima, faauta foi, ona afio mai ai lea le Alo o le Atua, e togiola i latou uma o e faatuatua i lona suafa.
“… E i ai i le lagi malamalama tetele, e iu ina leai se pogisa i le po a e lei oo i le ao e afio mai ai o ia, e iu ina i ai i tagata e peiseai o le ao. …
“Faauta, e oso mai le fetu fou, tou te lei vaaia se fetu faapea; e fai foi lenei mea ma faailoga ia te outou” (Helamana 14:2–3, 5).
Tusi i lau api o talaaga le uiga o le Kerisimasi ia te oe, ma po o a mea e masani ona fai e lou aiga i aso fiafia [o le Kerisimasi].
Tesema 20
A o lei fanau mai Keriso, sa faaali atu le agelu o Kaperielu ia Maria.
“O le ono o masina ua auina mai ai e le Atua o le agelu o Kaperielu i le aai o Kalilaia, o Nasareta le igoa,
“I le taupou o le aiga o Tavita, na faufautane i le tagata e igoa ia Iosefa; o Maria foi le igoa o le taupou.
“Ua ulufale mai le agelu ia te ia ona faapea mai lea o ia, Si ou alofa ia te oe le ua alofaina, ua ia te oe le Alii: amuia oe i fafine. …
“… Aua ua alofaina mai oe e le Atua.
“Faauta foi, o le a to oe, ma e fanauina se tamatane, e te faaigoa ia te ia o Iesu” (Luka 1:26–28, 30–31).
Faapotopoto faatasi tagata o le aiga ma uo ma o e usu ni pese o le Kerisimasi i le pitonuu, pe pepese i lo outou lava fale.
21 Tesema
Sa faatalitali ma le faamaoni Nifae, le atalii o le atalii o Helamana mo le afio mai o le Alii. Ae na fai atu tagata le talitonu ia te ia, “Ua mavae le aso, ma ua le taunuu upu a Samuelu; o le mea lea, e le aoga ai lo outou olioli ma lo outou faatuatua i lenei mea” (3 Nifae 1:6).
Ona alu lea o Nifae “i fafo ma na ifo toele, ma ua matua alaga atu i lona Atua ona o lona nuu” (f. 11).
Na tau atu e le Alii ia Nifae, “Ina faaea ia lou ulu ma ia loto tele; aua faauta, ua lata mai le aso o lenei po foi e tuuina atu ai le faailoga, a o taeao e alu atu ai a’u i le lalolagi e faaali atu ai i le lalolagi ou te faataunuuina mea uma ua ou poloaiina ia folafolaina atu i fofoga o a’u perofeta paia” (f. 13).
I au tatalo, ia faafetai atu i le Tama Faalelagi mo le meaalofa o Lona Alo.
22 Tesema
Mulimuli ane, na faataunuuina ai valoaga i le fanau mai o Keriso.
“Ua oo ina faataunuuina upu na oo mai ia Nifae, e pei ona fetalaia mai. …
“Ua i ai foi nisi e toatele o e na le talitonu i upu a perofeta, ua pauu i latou i le eleele e peiseai ua oti, … aua ua oo mai nei le faailoga sa folafolaina mai. …
“Ua oo foi ina leai se pouliuli i lena po atoa, a ua malamalama e pei o le tutonu o le la. …
“Ua oo foi ina pupula mai le fetu fou, e tusa ma le upu” (3 Nifae 1:15–16, 19, 21).
Na tuuina mai e Iesu Keriso mo i tatou le meaalofa aupito maoae o meaalofa uma, o Lona soifua. Ia faaali atu lou agaga talisapaia i ou matua e ala i le tusia o se tusi e faafetai atu ai ia i laua mo mea lelei uma sa laua faia mo oe. 23 Tesema
23 Tesema
O le po na fanau ai Keriso, na faaali atu ai se agelu i leoleo mamoe amiotonu i Peteleema, e folafola atu le tala fou o le fanau mai o Keriso.
“Ua fanau e ia lana tama ulumatua, ua ia aui ia te ia i le ie, ma faataoto ia te ia i le falepovi; aua latou te le ofi i le fale e tali ai malo.
“Sa i le vao o lea nuu leoleo mamoe sa nonofo ai ma leoleo po i lo latou lafu mamoe.
“Faauta foi, ua tu mai ia i latou le agelu a le Alii, ua pupula faataaliolio mai foi ia te i latou le pupula o le Alii: ua matua fefefe ai lava i latou.
“Ona fai mai lea o le agelu ia te i latou, Aua tou te matatau: aua faauta, ou te au mai ia te outou le tala lelei, e olioli tele i le nuu uma.
“Aua o le aso nei ua fanau ai i le aai a Tavita lo outou Faaola, o le Alii ia o Keriso” (Luka 2:7–11).
Fai se tautinoga ia avea oe ma se tagata e sili atu le fiafia ma agalelei.
24 Tesema
O i tatou, i le avea ai ma Kerisiano, e tutu o ni molimau a Iesu Keriso i aso uma o le tausaga e ala i le faatuatua ma galuega lelei. Na tuuina mai e le Perofeta o Iosefa Samita ma Sini Rikitone le molimau lenei:
“O lenei, ina ua uma ona faia molimau e tele e uiga ia te ia, o le molimau tupito mulimuli lenei i mau uma lava, ma te faia ia te ia: O loo soifua o ia!
“Aua na ma vaaia o ia, i le itu taumatau lava o le Atua; na ma faalogoina foi le siufofoga o molimau mai o ia lava lea o le Toatasi na Fanaua e le Tama—
“E mai ia te ia, ma ui mai ia te ia, ma o ia, na foafoaina ai lalolagi uma, o e nonofo ai foi o atalii ma afafine na fanaua e le Atua” (MFF 76:22–24).
Ia faasoa atu lau molimau i le Faaola i le isi faamoemoe talafeagai e sosoo ai, e pei o le sauniga anapogi ma molimau.
Ata na tusia e Scott Greer