Pesepesega [o le Kerisimasi] i le Atunuu atoa
O musika ma pesega na avea lava ma se tulaga aupito taua i lou aiga. A o ou tuputupu ae, na ta e lou uso le piano ae matou faapotopoto faatasi ma isi ou tei e toalima e usu a matou pese Lotu matou te fiafia lava i ai. O nei taimi o nisi ia o mea e manatua e sili ona ou faapelepele i ai.
Ina ua ou faauu mai le aoga maualuga, sa ou nofo latalata lava i lou aiga seia oo ina ou faaipoipo atu i se alii lelei lava o le sa faigaluega i lo matou taulaga i le Fua Vaalele a le I.S. E tasi le tausaga ma le afa mulimuli ane, na matou siitia atu ai ma lou toalua ma le ma tama teine na lua masina le matua i se vaega o le fua vaalele i le isi itu o le atunuu. Na maua le isi a ma tamaitiiti, ma faatasi ai ma tupe e manaomia i le i ai o ni pepe se lua, sa le mafai ai ona matou toe o atu e asi o matou aiga. Faatasi ai ma le toaono o tamaiti sa i ai pea i le aiga, sa le mafai ai foi e ou matua ona asiasi mai ia i matou. O le nonofo mamao mai lou aiga ma le misia o lou toalua ona o le tele o ana galuega i le militeli, na masani ai ona ou lagonaina le tuua toatasi. O aso malolo o aso sili ia ona faigata.
I le Vaeluaga o le Kerisimasi i le 1996, a o fai a ma vaega ma lou toalua i a matou gaoioiga masani ma le ma fanau e toalua i le Vaeluaga o le Kerisimasi, na fai lava ma liliu atu ou mafaufauga i ou matua ma nai ou tei. Na ou tilotilo atu i le uati ma iloa ai o le taimi lea ua latou saofafai uma i luga o se palanikeke e fofola faalelei i luga o le fola ma aai i se “aiga fiafia o le Kerisimasi” o fualaau aina, o sosisi pupuu, sisi, ma masi a o faitau e lou tama le tala i le fanau mai o Keriso mai tusitusiga paia. Na ou vaai i o latou foliga i lou mafaufau. Ua na o au le tagata o le a le i ai.
A o ou mafaufau loloto, sa ou tatalo mo se auala ina ia ou lagona atili ai le fesootai atu ma lo matou aiga atoa. E lei umi, ae tatagi le telefoni, ma na iu ai ina ma talanoa ma lou tina. Fai mai o ia, na i ai se mea mo i matou e faalogologo atu i ai. Na ou kiina i luga le sipika o le telefoni, ona matou faalogologo lea a o faapotopoto ou uso laiti e toatolu i le piano a le matou aiga ma usuina le fati na sili ona matagofie o le pese “Do You Hear What I Hear?” Na ma fetagisi ma lou toalua a o matou faalogologo i leo eseese e tolu na sau mai le telefoni. Na toetoe lava a matou lagonaina le matou i ai faatasi ma lou aiga i totonu o le potu.
O la latou pese faatauvaa na aumaia ai i totonu o lo matou fale i lena Vaeluaga o le Kerisimasi se lagona fiafia o le a ou teufatuina pea. Mai meaalofa uma na matou maua i lena Kerisimasi, o le tele na faatauina mai faleoloa ma na afifiina faalelei ma faaigoa, ae o lena pese matagofie na sili atu ona pele ia i matou.