Tala Faamamai o le Talalelei
Ia Faapaiaina La Outou Galuega
O Neal A. Maxwell sa tautua mo le lua tausaga o se Lagolago i le Toasefululua ma le lima tausaga i le Au Peresitene o Fitugafulu a o lei lagolagoina o ia o se tasi o le Korama a Aposetolo e Toasefululua i le aso 3 o Oketopa, 1981. Na maliu o ia i le aso 21 o Iulai, 2004, i le Aai o Sate Leki ina ua tuanai le valu tausaga o tauivi ma le gasegase o le lukimia. Na fofogaina e Elder Maxwell lenei saunoaga faapitoa i se taimi faapitoa e uiga i le faapaiaina i le taimi o le konafesi aoao ia Aperila 2002.
O nei faamatalaga e mo i latou e le atoatoa ae o loo taumafai pea i le aiga o le faatuatua [i le Ekalesia]. E pei ona masani ai, o le tagata muamua lava e sili ona manaomia, o au lava lea.
E matele lava ina tatou mafaufau o le faapaiaina lava ia, o le faamatuu atu lea o a tatou meatotino, pe a faatonuina ai mai le lagi. Ae o le faapaiaina moni lava ia, o le faamatuuina atu lea o oe lava i le Atua. O le loto, agaga, ma le mafaufau o upu autu ia a Keriso i le faamalamalamaina o le uluai poloaiga, lea tatou te taumafai e usitaia i taimi uma, ae le na o le aso ma i e lua (tagai Mataio 22:37). Afai tatou te tausia, ona faapaiaina ai lea atoatoa o a tatou galuega e faamanuiaina ai o tatou agaga (tagai 2 Nifae 32:9).
O lea atoatoa e aofia ai le gauai atu faatasi o mafaufauga, o upu, ma amioga, o le faafeagai tonu lava o le feitaga’i: “Aua pe faapefea ona iloa e le tagata le alii e le i auauna i ai o ia, o le tagata ese foi ia te ia, ma ua mamao i manatu ma manao o lona loto?” (Mosaea 5:13).
E toatele e faatuatuanai i le faapaiaina aua e foliga mai e lavelave naua pe faigata foi ona fai. Peitai, o i latou e galulue ma le filiga, latou te iloa le le fiafia o le lagi, ona e ui ina i ai se alualu i luma ae o loo lualuagia foi ma le faatuutuu. O le mea lea, ou te tuuina atu ai ni apoapoaiga alofa, faatasi ai ma le faamaoniga o lenei taitaiga, o le faamalosiauga e faaauau le faigamalaga, ma le faamafanafanaga pe a tatou feagai ma faigata.
Ia Gauai Atoatoa Atu
O le gauai atu faaleagaga e le ausia i se minute, ae e faasolosolo malie le faaleleia, ma le laa atu mai lea faasitepu i lea faasitepu. O faasitepu e tatau ona taitasi e laasia i le taimi. O le a mafai ai ona “faaumatia o tatou loto i le finagalo o le Tama” ma ua tatou “fia usitai … e pei lava ona gauai le tamaitiiti i lona tama” (Mosaea 15:7; 3:19). I se tasi itu, e ui ina tatou taumafai [ina ia faapaiaina], ae o le a tumau pea ona tatou lagona le le faamalieina ona e i ai lava taimi e maumau i le faiga o mea e le taua.
O le a fesoasoani faataitaiga e aofia ai le faapaiaina i tamaoaiga. Ina ua faatau atu e Anania ma Safaira a laua meatotino, sa la “tuu faanana foi mana nisi mea o le tau” (tagai Galuega 5:1–11). E toatele naua i tatou e taofiofi mamau “nisi mea,” patino, e pei o le faiga o mea tatou te faavalea i ai o ni meatotino. O le mea lea, po o a lava isi mea atonu ua tatou foai atu, o le vaega mulimuli lava e aupito sili ona faigata ona faamatuu atu. O le tuuina atu na o se vaega o a tatou mea po o i tatou foi o lena e lelei, ae e atagia manino mai ai le ‘alofaga faapea, “O la na avatu i le ofisa” (tagai Iakopo 1:7–8).
Mo se faataitaiga, atonu e i ai ni o tatou tomai patino po o ni taleni foi, tatou te mafaufau sese ai faapea o tatou e ona ia. Afai e faifai pea lo tatou taofiofi mamau i na mea e sili atu nai lo le Atua, o lona uiga ua tatou solomuli mai le usitai atoatoa i le uluai poloaiga. Talu ai e aumai e le Atua ia i tatou le “manava … i lea itula ma lea itula,” o le mea lea, e le fautuaina ai le saputu o le manava! (Mosaea 2:21).
E vaaia se maa faalaveavae pe a tatou tautua i le Atua ma le lima foai i o tatou taimi ma tusi siaki, ae tatou te taofiofi tufaaga o o tatou tagata i totonu, e tau mai ai e lei tuuina atu uma o tatou tagata mo Ia!
O nisi e i ai ni tulaga faigata pe a lata ina maea ni galuega faapitoa. Peitai, o Ioane le Papatiso o se faataitaiga lea, a o tautala e uiga i le faatupulaia o le lafu a Iesu, “E ao ina tupu pea o Ia, peitai au nei, e tauau ina itiiti o au” (Ioane 3:30). O le manatu faaseseina e tusa ai ma o tatou tofiga faapea ona pau lea o le faailoga o le tele o le alofa o le Atua ia te i tatou, e na ona faaopoopo ai i lo tatou mumusu e tuu. Uso e ma tuafafine, o le taua o le tagata lava ia ua maea ona faatuina e le Atua e “sili”; e le fesuisuiai pei o maketi o fefaatauaiga.
E tumau le le faaaogaina o isi laasaga aua, e faapei foi o le alii mauoa, amiotonu, talavou, tatou te le o naunau e faafetaiai vaega e tatau ona tatou faaleleia (tagai Mareko 10:21). Ua aliai mai ai le totoe pea o le manatu faapito.
E tele mea o loo faaalia ai lo tatou faatuatuai e faapaiaina i tatou lava. Mo se faataitaiga, o le malo terasitila, e aofia ai i latou o e “mamalu,” e manino lava e le o ni molimau pepelo. Ae o i latou “na le loto totoa i le molimau ia Keriso” (MFF 76:75, 79). O le auala sili lava e molimau totoa atu ai ia Keriso, o le avea atili lea e faapei o Ia, ma o le faapaiaina e mamanuina ai o tatou olaga ia faapei o Ia (tagai 3 Nifae 27:27).
Aua Nei Faamuamuaina Isi Atua i lo le Atua
A o tatou faafetaiaia nei luitau sa ou taua, e sili ona fesoasoani pe a tatou gauai atu faaleagaga—o nisi taimi ia “faagalo” ni mea, e oo lava i le olaga faitino, o isi taimi ia “taofiofi mamau,” ma o isi lava foi taimi, ia faaaoga ai le isi laasaga (tagai 1 Nifae 8:30).
Ae afai e le lava le faautatuaga, e mafai ona matua faigata lava le isi laasaga. E ui ina sa iloa e Lamana ma Lemuelu mafaufau papau i le ala na faamanuia ai e le Atua ia Isaraelu anamua, ia sosola ese mai le Farao matautia, ae na leai lava so laua faatuatua i le Atua e fesoasoani ia i laua i si nei lava taitai faatauvaa o Lapana.
E mafai foi ona tatou o ese mai le ala, pe afai tatou te popole tele e faamalie o tatou pule faalegaluega ma isi mea fai. O le faamalieina o “isi atua” nai lo le Atua moni, e solia ai foi le poloaiga muamua (Esoto 20:3).
O nisi taimi tatou te puipuia ai o tatou uiga faatamaiti, e foliga mai e taua i o tatou tagata. Peitai, o le avea ma soo e pei lava o se “taaloga e fepaiai,” [o lona uiga e mafai ona tiga], e pei ona molimau mai le Perofeta o Iosefa:
“Ua pei au o se maa talatala tele … ma na pau lava le taimi e faalamolemole ai au o le taimi e oloia ai i nisi tulimanu pe a fetaui ma se isi mea, e matua taia lava i le malosi o le saoasaoa. … Ona avea ai lea o au ma se meafaigaluega lamolemole ua faaiilaina i le utu a le Silisiliese.”1
Talu ai e tele taimi tatou te naunau ai [e avea ma soo] ae mumusu e sui o tatou uiga le lelei, o le “vaega” ua taofi, ua taofia ai nisi o tagata sili ona atamamai mai le faia o o latou sao i le galuega a le Atua. E sili atu le agamalu e pei o Mose, o le sa aoaoina mea “na te lei mafaufauina lava” (Mose 1:10). Peitai, ona o le lavelave o le sootaga i le va o lo tatou saolotoga e filifili ai, ma o tatou faasinomaga tulaga ese, o le ala lea e matuai faatuatuai ai. O le lafoaia o mafaufauga, o se manumalo moni lena, aua e folasia mai ai ia te i tatou ala loloto ma le “maualuluga atu”! (Isaia 55:9).
Peitai, e ao foi ona tatou iloa, o le maelega foi e faataunuu ni mea lelei, e mafai ai ona faaitiitia lo tatou faamaoni i le Atua. Mo se faataitaiga, o loo tatou vaaia e mafai e se tagata ona ova le naunau i taaloga ma faamemelo i le fuaitino. E mafai e se tasi ona faaaloalo i le natura o mea, ae faagalogalo le Atua na faia le natura. E mafai ona ova le naunau o se tasi i musika lelei, ma e faapena foi i se galuega taua. O tulaga faapena, e masani ai ona le faia “mea silisili” (Mataio 23:23; tagai foi 1 Koronito 2:16). E na o le Silisiliese lava e mafai ona taialaina atoa i tatou i le maualuga o le lelei e mafai e oe ma au ona fai.
I poloaiga sili e lua, na tautino mai ai e Iesu, e leai se mea e sili atu ona taua nai lo na, ae le o le isi itu (tagai Mataio 22:40). E le faapea ua faataatia ese le uluai poloaiga ona o le tulimataia malosi o se manuia e maualalo ifo, aua tatou te le tapuai i se atua maualalo.
Manatua le Aao o le Atua
A o lei sapi i le seleselega o taumafaiga amiotonu, sei o tatou muai manatua le aao o le Atua. Nei o tatou faapea ane, “O lou malosi ma le malosi o lou lima ua ou maua mai ai lenei oloa” (Teuteronome 8:17). A le o lea, po ua tatou “tala gugutu” ia i tatou lava e pei ona sa faia ai e Isaraelu anamnua (vagana ai le autau toaitiiti a Kitiona), sa latou limalalau faapea “o lo’u lava lima ua ola ai au” (Faamasino 7:2). O le talagugutu i o tatou lava “lima” e faaopoopo ai le faigata ona faailoa atu le aao o le Atua i mea uma (tagai Alema 14:11; MFF 59:21).
I se nofoaga e igoa o Meripa, o se tasi o tagata maoae, o Mose, na atu lona loto i le fetagisi mai o tagata mo se vai. E lei leva ae “fai atu [Mose] ma le le magafagafa,” ma faapea atu, “Ma te faatafeina mai ea le vai ai lenei papa mo outou?” (Salamo 106:33; Numera 20:10; tagai foi Teuteronome 4:21). Na aoao ai e le Alii le Mose ofoofogia ona o le saonauna sese lea na ia faaaogaina, [o loo tau mai ai e manao Mose i le viiga ae ia le na o le Atua] ma sa atili faaatamaiina ai o ia. E lelei foi ona tatou agamalu e pei o Mose (tagai Numera 12:3).
E lei faapea lava na aluese mai Iesu mai Lona faamoemoega! E ui lava ina sa femaliuai o Ia ma faia le tele naua o mea lelei, sa Ia silafia lava e le aunoa, o loo faatalitali mai le Togiola, ma sa ia aioi atu ma se tofa loloto, “Lou Tama e, faaola mai ia te au i lenei ituaso: a o le mea lava lea na ou oo mai ai i lenei ituaso” (Ioane 12:27; tagai foi 5:30; 6:38).
Pe a tatou atiina ae se faaopoopoga o le alofa, onosai, ma le agamalu, e tatau foi ona tuu atu lea faaopoopoga i le Atua ma tagata. E le gata i lea, e leai se isi tagata e tutusa ma i tatou i avanoa ua tatou maua.
E moni, o laasaga ia na taua tatou te iloa ai nisi luitau fou atonu tatou te le fia oo i ai. O lea foi, o i latou e fetaiai ma luitau ma manumalo ai, o ni faatosinaga mamana i latou mo i tatou. E masani ona sili lo tatou sagisagi filemu atu i e tatou te viia. Sa manatua e le atalii faamaumauoa fiaai ia meaai i lona aiga, ae sa fetosoaiina o ia i isi manatu ma ia faapea ai ma le naunautai, “O le a a’u tulai ma alu i lou tama” (Luka 15:18).
O Le Faapaiaina e Faafoi Atu Ai i le Atua Mea e a Ia
A o taumafai e gauai atu atoatoa, o o tatou faanaunauga e aofia ai a tatou mea uma e tatau ona tatou avatu i le Atua. O meaalofa masani ma o latou mafuaaga tatou te avatu ia te Ia, e mafai ona malamalama le tuu i ai o le faailoga “Faafoi i Le Na Auina Maia,” ae faamataitusi tetele le [Le Na Auina Maia] E oo lava foi pe a maua e le Atua lenei meaalofa e tasi, ona toe maua mai ai lea e le au faamaoni atoatoa “o mea uma o ia te [Ia]” (MFF 84:38). Oka so tatou faamanuiaga e maua i lenei fesuiaiga!
I le taimi nei, e tumau lava le mea moni: Ua tuuina mai e le Atua o tatou ola, o a tatou filifiliga, o a tatou taleni, ma avanoa; ua Ia aumaia a tatou oa; ua Ia aumaia le taimi faatulagaina tatou te ola ai faatasi ma le manava tatou te manaomia (tagai MFF 64:32). I le taialaina ai la e lena malamalama, o le a tatou aloese mai ai i le faia o ni sese ogaoga e faavae i manatu sese. O nisi e sili atu ona le malie nai lo le faalogologo i se aufaipese e toavalu ma sese ai faapea o le Aufaipese a le Tapeneko!
E leitioa ona faamamafa mai e Peresitene [Gordon B.] Hinckley … le ao ona avea o i tatou ma tagata o le feagaiga, ma sa faamamafa mai ai feagaiga o le faamanatuga, sefuluai, ma le malumalu, ma ta’ua ai o le ositaulaga o le “autu lea o le Togiola.”2
O Le Faataitaiga a Iesu o le Usiusitai
O le usitai maoae na ausia ma faataunuuina e le Faaola, a o feagai o Ia ma le matamataita o tagata ma tiga o le Togiola ma “ia loto [Na] te le inu i le ipu oona, ae teena” (MFF 19:18). I sa tatou fua faatauvaa e le atoatoa, tatou te feagai ma mea e ao ona faatoilaloina ma moomoo maumau pe a na mafai ona aveesea.
Manatu i le mea lenei: Mata o le a le taua o le galuega a Iesu pe a na fai Na te faia nisi vavega e aunoa ma le faataunuuina o le vavega maoae i Ketesemane ma Kalevario? O isi o Ana vavega na oo mai ai le faaopoopoga manuia o le ola, ma faaitiitia ai mafatiaga—o nisi. Ae e mafai faapefea ona faatusatusa nei vavega i le vavega aupito sili o le Toetu mo le atulaulau? (tagai 1 Korinito 15:22). O le faateleina o potoi areto ma i’a na fafagaina ai le motu o tagata fia taumamafa. Ae tusa lava, e le i umi foi ae toe fia taumamafa i latou na avatu i ai, a o i latou e aai i le Areto o le Ola, o le a le toe fiaaai lava (tagai Ioane 6:51, 58).
Pe a mafaufau loloto i le tulimata’ia o le faapaiaina, e gatete o tatou loto ma le malamalama lelei i mea atonu e manaomia. Ae na fetalai faamafanafana mai le Alii, “Ua lava lo’u alofa tunoa mo outou” (MFF 17:8). Pe ua tatou talitonu moni ea ia te Ia? Ua Ia folafola mai foi na te faia mea vaivai e avea ma mea malolosi (tagai Eteru 12:27). Pe ua tatou naunau moni ea e usitai atu i lena faiga? Ae afai la tatou te mananao ia maua uma ia mea, e le tatau ona taofi pe tuua nisi mea!
O le tuu atu o o tatou loto ina ia saga faaumatia i le finagalo o le Tama, o lona uiga moni lava, e ausia ai se tutoatasi faateleina, e sili atu ai ona malosi e mauaina “mea uma o i ai i le [Atua]” (MFF 84:38). E le gata i lea, e mafai la faapefea ona tuuina mai ia i tatou Ana “mea uma” pe a le faapei o tatou loto o Ia? E le mafai foi ona talisapaia atoatoa Ana “mea uma” e i latou e le o naunau e avatu mea uma.
O lona uiga, o i tatou lava ua tatou faafitia ona o lo tatou taofia “o nisi mea” po o le a lava. E le tatau ona tatou fesili, “Le Alii e, o au ea?” (Mataio 26:22). Ae fesili le tagata lava ia e uiga i maa faalaveavae, “Le Alii e, po o le mea ea lea [e tatau ona ou faaleleia]?” Atonu ua leva ona tatou iloa le tali, ma ua manaomia se faaiuga nai lo Sana tali e aumai.
O le fiafia aupito sili i le fuafuaga alofa a le Atua, ua teuina mo i latou e naunautai e atiina ae ma totogi le tau o le malaga fai i Lona malo. Uso e ma tuafafine, “o mai, tatou faafou [lenei] malaga fai.”3
I le suafa o le Alii o le aao faaloaloa (tagai MFF 103:17; 136:22), o Iesu Keriso, amene.Ua faaopoopo vaiulutala; ua faalaugatasia le sipelaga, sitaili, ma le ta’uaina o punaoa.
Faamatalaga mai le Keriso ma le Taulealea Mauoa, na saunia e Heinrich Hofmann, faaaloaloga a le C. Harrison Conroy Co.
Aua Nei Faia Lo’u Loto, A o Lou Finagalo, na saunia e Harry Anderson, © Puletaofia Ekalesia Aso Fitu, e le mafai ona kopiina
O le usitai maoae na ausia ma faataunuuina e le Faaola, a o feagai o Ia ma le matamataita o tagata ma tiga o le Togiola ma “ia loto [Na] te le inu i le ipu oona, ae teena.”
Ata pue o le faamanatuga na saunia e Grant Heaton; SOIFUAGA O KERISO, SAUNIA E, Robert T. Barrett, E LE MAFAI ONA KOPIINA
O le faateleina o potoi areto ma i’a na fafagaina ai le motu o tagata fia taumamafa. Ae tusa lava, e le i umi foi ae toe fia taumamafa i latou na avatu i ai, a o i latou e aai i le Areto o le Ola, o le a le toe fiaaai lava.