Faamanuiaga o le Malumalu i se Aiga e Na o se Vaega e Auai i le Ekalesia

Saunia e Kay Przybille

O lou alu i le malumalu na ou maua ai ni manatu na faaleleia atili ai le ma mafutaga ma lou toalua, o le sa le o se tagata o le Au Paia o Aso e Gata ai, faapea le ma fanau.

O Iuni i le 1986 na ou momoliina atu ai lou tina i le Malumalu o Cardston Alberta ina ia mafai ona maua ona faaeega paia. Ua uma ona maua ou faaeega paia, ae sa ma nonofo ma lou toalua e le auai i le ekalesia i se itu maotua o British Columbia, ma na ou tuua ai lava lou pepa faataga ia uma le aoga. O lea, sa mafai ai ona ma savavali atu ma lou tina e tau i le laulau o pepa malumalu, ae na le mafai ona ou mulimuli atu ia te ia i se isi mamao i tua atu. Sa ou alu i fafo, ma ou faalagolago i le puipui o le malumalu, ma ou tagi ai.

O le mavae ai o lena aafiaga, na ou naunau ai lava ina ia ou le toe tutu i fafo o le malumalu. Sa lagolagoina e lou toalua lau faaiuga, ma e lei umi ae ou toe alu soo i le malumalu i taimi na mafai ai. O iina na ou aoaoina ai mataupu faavae na faapea ona faia ai se suiga tele i lou lava olaga ma i le matou mafutaga ma lou aiga ma uo.

Suiga i Lo’u Olaga

Muamua, sa ou matauina se suiga i le maualuga o lou onosai. Sa ou faaaluina le tele o tausaga e taumafai ai e tau taofiofi lou lotoita e aunoa ma se faamanuiaina tele. A o aoaoina au e lou tapuai atu i le malumalu e uiga i le ma mafutaga ma lou Tama Faalelagi ma isi tagata, na sui ai ou uiga. Na ou iloaina ai o lou aiga ma au uo o tagata ia na ou muai iloaina ae ou te lei sau iinei. E lei aumaia i latou i lou olaga e faalavelave pe faaita ia te au ae ia matou galulue faatasi ina ia mafai ona ou aoaoina lesona o le olaga. Na ou maua le malamalamaaga a o ou taumafai e aoao mea na latou taumafai e aoao mai ia te au, ma na ou maua le onosai e talia ai e agai foi i latou i luma e tusa ma lo latou lava gafatia. Na ou iloaina ai foi o le olaga e le o se tauiviga ina ia aoaoina isi ina ia atoatoa ina ia mafai ona ou maua le fiafia; ae o se malaga fiafia e agai atu i le atoatoa faatasi ai ma tagata ou te alofa i ai.

O le suiga lona lua o ou uiga i lou toalua. Ae ma te lei faaipoipo, sa ou naunau lava e tuu o ia o le ulu o le aiga ma ia aua nei aluese mai o ia mai le ma mafutaga. E ui lava i lau faaiuga, ae sa ou tauivi lava e talia na filifiliga ma o nisi taimi e faatagaina ana amioga masani e aafia ai lou fiafia. I le malumalu na ou aoaoina ai o le ma galulue faatasi ma te maua ai le gafatia e avea ai o se soa atoatoa i le faavavau. Mai lou manatu fou, na ou iloa ai ina ua ma galulue faatasi, na atoa i maua. O o ma vaivaiga ma malosiaga, mea e fiafia i ai ma taleni na tutusa lelei lava ma le isi o lea sa ma malolosi ai o se soa nai lo le taimi na taumafai ai lava le tagata ia.

A o ou aoao e talia eseesega o lou toalua, na amata ona tuuitiitia lou faitio ae faaaoga se agaga o le faifaimea faatasi ma le galulue faatasi i la maua faaipoipoga. Na ou iloa ai sa vave lava ona ou oo i le tagata sa ou manao ia avea ai au. Ma le isi, ina ua lagona e lou toalua ua tele lava ina ou lagolago atu ia te ia, na faateleina ai foi lona alofa ia te au.

O le vaega lona tolu sa faaleleia o le mauaina o le faatuatua e faapea, e mafai ona ou tuua le ma fanau e toafa, o e ua matutua nei, e ola i o latou lava olaga e aunoa ma lou manatu faapea e tatau ona ou taumafai ia latou ola i ni olaga e faapea ma faapea. O nisi o i latou sa le toaaga i le Ekalesia, ae sa ou manao lava e faatosina i latou mo le lelei e aunoa ma le faalavelaveina o lo latou saolotoga. I se tasi au malaga faapitoa i le malumalu, na ou tusia ai o latou igoa i le lisi tatalo ma sa ou tatalo umi ma le faamaoni mo i latou. Na ou maua se faamautinoaga malosi ma le toafilemu e faapea, o le a lelei mea uma mo i latou.

A o ou toe mafaufau i lenei aafiaga i se taimi mulimuli ane, na ou iloaina ai e alofa tele le Tama Faalelagi ia i latou e sili atu nai lo au aua na malamalama lelei atu o Ia ia i latou. E finagalo o Ia e faamanuia i latou ma ia latou toe foi atu ia te Ia, ma o le a ia saunia mo i latou ni avanoa e aoao ai. O le taimi nei, a amata ona ou popole, ou te mafaufau i lena aafiaga ma fai ai mea uma ou te mafaia, ma le iloa o le a fai e le Alii isi mea e totoe.

O se suiga lona fa i lou olaga na oo mai i se lagona o le filemu lautele na oo mai ia te au, na tupu mai se vaega ona o lou alu atu i le malumalu na aumaia ai se vaaiga e sili atu i le faavavau. Ou te talitonu lava e pule lava le Alii, ma ua lava ma totoe punaoa i luga o lenei fogaeleele mo i tatou ina ia tatou ola toamalie ai, o le a i ai laufanua lauusiusi i totonu o le toafa o le amioleaga. Ua ou le toe mafaufau nei e faapea ua tuua na o au. O le Agaga Paia o lau soa, ma e mafai ona ou talanoa atu i lou Tama Faalelagi i le tatalo i lou aso atoa. Sa masani ona ou popole tele e uiga i filifiliga; o le taimi nei, ou te sailia musumusuga a le Agaga ma ou galue ai a o ou faia ia filifiliga. Ma talu ai ua ou le toe lagonaina le manatu e faapea e tatau ona ola isi i le olaga ou te manatu e tatau ona latou ola ai, ua tele ai ou taimi ma le malosi e “galue ina ia [ou] ola ai” (Mamona 9:27).

O lenei vaaiga fou na aveeseina ai se avega tele mai ou tauau. O le finagalo moni lava lea o le Alii i Lana fetalaiga:

“Ia outou amoina la’u amo, ma ia outou faaaoao ia te au; aua o au le agamalu ma le loto maulalo: ona maua lea e outou o le malologa mo o outou agaga.

“Aua e avegofie la’u amo, o la’u avega foi e mama ia” (Mataio 11:29–30).

Faamanuiaga o le Aiga

O le faaauau pea ona auai atu i le malumalu o le a aoga lea mo au pe a na faapea la o faamanuiaga na ou maua o ni faamanuiaga patino o le toafilemu, faamautinoaga, ma le onosai. Ae na i ai foi isi aafiaga—e tele lava—ua faapea ona faamanuiaina ai au ma lou aiga.

Ua ou aofia nei i talafaasolopito o aiga ma e tele aafiaga matagofie na ou maua e aofia ai tagata o aiga, i le olaga nei ma i latou o loo i tua atu o le veli.
O Novema o le 1993 na faaipoipo ai le ma tama teine lona lua i le malumalu, ma sa mafai ona ou auai atu i le faamauga.
O Me i le 2006, i le mavae ai o le 37 tausaga o le ma faaipoipoga, na auai ai lou toalua i le Ekalesia. O Aokuso i le 2007 na faamauina ai i maua, ma na faamau ai le ma tama teine lona lua ia i maua. O le ma tama teine matua, o le sa faamauina i lona toalua ma lana tama teine ia Novema o le 2006, na faamauina ia maua ia Aokuso 2008.

E faavavau ona ou faafetai pea i se tina o le na taitaia le ala e ala i le papatisoina ina ua fitu ou tausaga ma o le na musuia au i se taimi mulimuli ane ina ia toe faia lou pepa faataga o le malumalu. O le mulimuli i ana faataitaiga ua aumaia ai le tele o faamanuiaga patino, ma o na faamanuiaga ua faasafua atu i isi tagata o lou aiga.

I totonu o le malumalu, na ou aoaoina ai o loo ia i maua ma lou toalua le gafatia e avea ai o se soa atoatoa e faavavau. Mai lenei vaaiga fou, na ou iloa ai sa ma malolosi atu o se soa nai lo le taimi na [taumafai] ai lava le tagata ia.

Ata o ata tusi na saunia e Craig Dimond; ata pue o le Malumalu o Cardston Alberta na saunia e Jed A. Clark