Fesili ma Tali
“O le a se mea e mafai ona ou faia e faaitiitia ai le tautu o au tatalo i mea ua masani ai ae ia faateleina le anoa?”
Ua faamanino mai e tusitusiga paia e faapea o le faafitauli o le tautu i upu le aoga (tagai Mataio 6:7). O nisi taimi o le a manaomia ai ona e toe ta’ua mea taua i au tatalo. Ae afai e te toe tauina ni upu e aunoa ma lou mafaufau i ai, o lona uiga, e te le o talanoa moni ma le Tama Faalelagi. Ina ia aloese mai le tautu i upu e le aoga, ia aoao e tatalo ma le “loto atoa” (tagai 2 Nifae 31:13; Moronae 7:9; 10:4)—o lona uiga, o le tatalo ma le faamaoni ma loto e galue i le faatuatua.
I le 3 Nifae na tatalo soo o le Faaola “e lei tuua lava,” ma “ua latou le tautu i upu e tele, aua ua foaiina mai ia te i latou o upu latou te tatalo ai” (3 Nifae 19:24). O le Agaga Paia e mafai ona taialaina oe i au tatalo ma avea ai o ni tatalo e sili ona anoa (tagai Roma 8:26). E aoga foi pe a saili se taimi e tatalo ai i se nofoaga filemu pe afai e te le o faanatinati.
Ma le mulimuli, mafaufau i le tele o mea e mafai ona e tatalo ai. E te fiafia i le tele o faamanuiaga i aso taitasi, ma e te manaomia le fesoasoani faalelagi i le tele o tulaga. Faafetai i le Tama Faalelagi mo ou faamanuiaga, ma tatalo mo mea o loo e manaomia. E mafai ona e tatalo mo le faamagaloga, fesoasoani i tofotofoga, ma le puipuiga i faaosoosoga.
Tatalo E Le Manatu Faapito
O nisi taimi pe a tatou tatalo, ou te manatu tatou te manatu faapito ai—i le mafaufau lea mo na o i tatou lava ma mea tatou te mananao i ai. Ia mafaufau foi i isi ma o latou manaoga. Faitau faamanuiaga taitasi, ma faafetai atu i le Tama Faalelagi mo ia faamanuiaga. O le tatalo e le faapea e mo na o lo tatou Tama Faalelagi ina ia faafofoga mai i o tatou manaoga ma a tatou faitioga, ae e mo i tatou foi ia tatou faalogo atu ia te Ia. E faapefea ona tatou maua ni faaaliga pe afai e na o le faatatope lava ona fai atu le mea tatou te mananao ai ona oso loa lea i le moega e moe? Fesili atu ia te Ia pe o le a se mea e finagalo o Ia e te faia. O le a avea ai oe o se tagata lelei atu.
Rebecah W., 16, Idaho, ISA
Tuu atu i le Agaga Paia e Taialaina Oe
Faaavanoa se taimi e mafaufau loloto ai i mea e sili ona e lagonaina ai le agaga faafetai ma po o le fea le mea e sili ona e manaomia i lou olaga. O le a taitaiina oe e le Agaga ma o le a tuuina atu tali ma fautuaga o le a faapea ona oo mai o ni manatu, mafaufauga, ma musumusuga. Atonu foi e te tausia se tusi o talaaga e mafai ona e tusia ai nei mafaufauga ma manatu mo le toe faatatau atu i ai i le lumanai.
Elder Sebo, 21, Misiona a Texas Houston
Manatunatu i Lou Aso
Pe a ou tatalo i le po, ou te mafaufau i mea na ou faitauina i tusitusiga paia. Ou te taumafai e manatua mea na mafai ona sao ona ou faia ma mea e manaomia ona ou faaleleia atili. E mafai ona ou ole i le Tama Faalelagi e fesoasoani mai ia te au i faafitauli o le aso. Ou te ole atu ia te Ia e fesoasoani mai e le aunoa ina ia ou manatua Ana fautuaga ma tuuina mai ia te au le malosi ou te mulimuli ai. Talu ai e eseese lava aso uma, e tusa lava pe o ni mea ua masani ai, e i ai lava mea eseese o le a tutupu mai. O le tulaga lena, pe a tatou manatunatu i lo tatou aso, o le a i ai ni mea eseese tatou te ole atu ai ma faafetai atu ai.
Kétia F., 20, Palmas, Pasila
Tatalo Leotele
Saili se taimi ma se nofoaga e mafai ona tuua ai na o oe ma e tatalo leotele ai. Pe a e tatalo leotele, e sili atu ona e lagonaina le patino ma le anoa [o au tatalo]. E faigofie atu ona aloese mai le tautu i upu e le aoga ma taofi mai lou mafaufau mai le feosofai solo. E pei lava o se talanoaga ma le Tama Faalelagi.
Elder Marra, 20, Misiona a Colorado Colorado Springs
Tatalo ona Faalogologo Lea
Pe a e lagonaina lou manaomia ona faalagolago atu i le Alii ma faalelei atili le lua sootaga ma Ia, mafaufau i mea e te manao i ai ma tootuli i le tatalo. Vaai faalemafaufau i le Tama Faalelagi, ma talanoa ia te Ia e pei lava o lou Tama, aua o Ia [o lou tama]. Tau atu ia te Ia mea uma e te mafaufau i ai. Fai se talanoaga faamaoni, o le loto i le loto. Faatuatua ia te Ia, faafetai atu ia te Ia, ma ole atu ia te Ia mo le faamagaloga, fiafia i Lona faatasi mai, tau atu i ai e te alofa ia te Ia, ona e faalogologo lea ma le totoa mo ni tali.
Raúl A., 20, Aai o Mekisiko, Mekisiko
Tatalo mo Mea Faapitoa
O le fuafua mamao, e tusa lava pe na o ni nai minute e tuu faatasi ai ou mafaufauga ma manaoga aupito faamaoni, ia mautinoa o le a sili atu ona e uai atu i upu o le a e fai atu i lou Tama Faalelagi. Mafaufau i lou aiga, aiga lautele, ma isi o e atonu o loo manaomia au tatalo. E toatele lava tagata o e o loo manaomia le fesoasoani, taiala, ma le puipuiga.
O le uai atu i faamanuiaga faapitoa ma tatalo auiliili e mafai ona suia ai le mea masani o le “Faamolemole fesoasoani mai ia ou maua se aso manuia” i le “Faamolemole taiala au i au filifiliga ina ia ou faia ni faataitaiga lelei mo isi.” O ituaiga tatalo na o le a sili ona faapelepele i ai lou loto ona e sili atu ona faapei o Keriso—o le mea lena e tatau ona i ai.
Hannah T., 14, Maryland, ISA
Ata pue o Peresitene Monson na saunia e le Busath Photography