2008
Tau Mai ia te Au, Tala ia Iesu
Tesema 2008

Taimi o Fetufaaiga

Tau Mai ia te Au, Tala ia Iesu

Saunia e Linda Christensen

“Ua matou tautalatala ia Keriso, ua matou olioli ia Keriso, ua matou talai atu Keriso, ua matou vavalo atu foi ia Keriso, ua matou tusitusi e tusa ma a matou valoaga” (2 Nifae 25:26).

Tau mai tala ia Iesu e fiafia ai,

Mea na fai ou te fesili ai ia te Ia.

Ala na ui ai, tala i le vasa,

Tau maia nei, tala ia Iesu.

(“Tau Mai Tala Ia Iesu,” Tusipese a Tamaiti, 36)

O a tala e uiga ia Iesu e sili ona e fiafia i ai? E te fiafia i le tala e uiga i Lona fanau mai? Na e faitau i Lona faamaluina o le sami sousou? Na e iloa na Ia faamaloloina se tagata tauaso ma toe faatu mai Lana uo o Lasalo mai le oti? Na e faitau ea e uiga i Lona alofa i tamaiti?

O tala e uiga ia Iesu o loo maua i tusitusiga paia. Na tusia e Nifae, o se perofeta o le Tusi a Mamona, “Ua matou tautalatala ia Keriso, ua matou olioli ia Keriso, ua matou talai atu Keriso, ua matou vavalo atu foi ia Keriso, ua matou tusitusi e tusa ma a matou valoaga” (2 Nifae 25:26). Na poloaiina e le Tama Faalelagi Ana perofeta ina ia molimau atu e uiga i Lona Alo, o Iesu Keriso, ma ia tausia ni faamaumauga ina ia mafai ona tatou aoao ai e uiga ia Iesu.

Ua tau atu e perofeta ia te oe e faitau tusitusiga paia i aso uma. I le masina o Tesema, ia faitau e uiga i le fanau mai o Iesu ma vavega na Ia faia. Talanoa ma lou aiga e uiga i le meaalofa faapelepele o le Togiola. A o e aoao e uiga i tala ia Iesu, o le a faamanuiaina oe e lagona Lona alofa mo oe, ma o le a tuputupu ae lau molimau e uiga i Lana talalelei.

Gaoioiga

O aso taitasi o Tesema ia sue le mau o lena aso i seti mau pupuu o loo i le itulau U4 ma faitau ia tala e uiga ia Iesu. Ona valivali lea o seti mau mo lena aso. O aso taitasi foi o loo lisi ai se ata mai le Pusa Ata a le Ekalesia (PAT) e mafai ona o faatasi ma le tala. Faamatala atu au tala e sili ona e fiafia i ai e uiga ia Iesu i lou aiga.

Manatu mo Taimi o Fetufaaiga

  1. Ao lei amataina le taimi o fetufaaiga, ia faatele le ata mai le Peraimeri 6, lesona 46, i. 211. Amata le taimi o fetufaaiga i le uuina i luga o se Tusi Paia ma se Tusi a Mamona. Fai atu i tamaiti e tau mai ia tusi e lua. Taaalo i se taaloga taumatemate faigofie e ala i le tauina atu o le igoa o se perofeta ma fesili atu i tamaiti e tau mai po o fea tusitusiga paia o loo i ai aoaoga a lena perofeta. Tuu le kopi ua faateleina o le itulau 211 i luga o le laupapa. Tau atu le mataupu faavae o le talalelei faalevaiaso: “Na muai tau mai e perofeta o le a afio mai Iesu Keriso i le lalolagi.” Faitau atu igoa o perofeta e toalima o loo i le kopi ua faateleina, ma tau atu taimi na latou soifua ai i le fogaeleele. Fai atu i tamaiti e sue po o le fea tusi o tusitusiga paia e o mai ai perofeta taitasi. Tofi tamaiti taitoatasi pe tofi vasega e sue ia mau o loo lisiina atu: Isaia 7:14; 9:6; Mika 5:2; 1 Nifae 11:18–21; Alema 7:9–10; ma le Helamana 14:1–6. Tufa atu i tamaiti taitasi se kopi o le pepa e tufa atu e valivali. Molimau atu o tusitusiga paia o le afioga a le Atua ma e molimau i le soifua mai o Iesu Keriso.

  2. Tusi le mataupu o le talalelei faalevaiaso i luga o le laupapa, ona faitau faatasi lea: “Sa faataunuuina valoaga. Na fanau mai Iesu Keriso ma na olioli tagata amiotonu.” Faamatala le uiga o le upu valoaga. Faaaoga tala faatino e faaaofia ai tamaiti i le aoaoina o mea na tutupu i le Tusi Paia ma le Tusi a Mamona e uiga i le fanau mai o Iesu (tagai “Tala Faatino,” O Le Aoao Atu, E Leai Se Isi Valaauga E Sili Ai [1999], 174–75). Faitau atu mau mai le Luka 2 ma le 3 Nifae 1:8–21. Toe faitau le mataupu faavae o le talalelei faalevaiaso. Fai atu i tamaiti e mafaufau i tala e uiga i le fanau mai o Iesu mai le Tusi Paia ma le Tusi a Mamona. Tau mai ni igoa o tagata amiotonu o e na olioli i Lona fanau mai. Fesoasoani i tamaiti ia iloa e olioli foi e amiotonu i aso nei a o tatou faamanatuina le fanau mai o Iesu. Talanoa e uiga i auala e mafai ona tatou olioli ai a o tatou faamanatuina Lona fanau mai. Aoao atu le tali o le “Outou Faamaoni o Mai” (Viiga, nu. 114). Molimau atu e uiga i tala i tusitusiga paia o le fanau mai o Iesu.

  1. Isaia 7:14; 9:6–7

    PAT 113

  2. Luka 2:1–7

    PAT 200

  3. Luka 2:8–20

    PAT 202

  4. Mataio 2:1–12

    PAT 203

  5. Mataio 2:13–15

    PAT 204

  6. Luka 2:40

    PAT 206

  7. Luka 2:41–52

    PAT 205

  8. Mataio 3:13–17

    PAT 208

  9. Ioane 9:1–17, 32–38

    PAT 213

  10. Mataio 8:23–27

    PAT 214

  11. Mataio 19:13–15

    PAT 216

  12. Mataio 5:1–10; 6:9–13

    PAT 212

  13. Ioane 11:1–3, 17–27, 41–44

    PAT 222

  14. Luka 17:11–19

    PAT 221

  15. Mataio 21:12–15

    PAT 224

  16. Mataio 26:17–30

    PAT 225

  17. Mataio 26:36–45

    PAT 227

  18. Mareko 14:42–46

    PAT 228

  19. Luka 23:32–46

    PAT 230

  20. Ioane 20:11–18

    PAT 233

  21. Luka 24:36–43

    PAT 234

  22. 3 Nifae 11:1–17

    PAT 316

  23. 3 Nifae 17:1–10

    PAT 317

  24. Talafaasolopito—Iosefa Samita 2:14–20

    PAT 403

  25. MFF 76:22–24

    PAT 240

Faatusa o Keriso, na saunia e Heinrich Hofmann, faaaloaloga a le C. Harrison Conroy Co.; pito i tua © Photospin