O Keriso: O Le Malamalama e Susulu i le Pogisa
Afai e te lagona ua mu itiiti le sulu o lau molimau ma ua oo mai le pogisa, ia lototele. Tausi au folafolaga i le Atua.
O lo’u ofisa i le Maota o le Aualofa e i ai se vaaiga atoatoa o le Malumalu o Sate Leki. O po uma, e pei o le galuega a le uati, e ola moli o fafo o le malumalu pe a tau pogipogi. O le malumalu o se sulu e mumu tumau ma le mautinoa i fafo atu o lo’u faamalama.
I se tasi po ia Fepuari ua mavae atu, sa lē masani ai le pogisa pea o lo’u ofisa a o goto ifo le la. Ina ua ou tilotilo atu i fafo i le faamalama, sa pogisa mai le malumalu. E le’i kiina moli. Sa vave ona ou mafaufau. Sa lē mafai ona ou vaai atu i tumutumu o le malumalu sa ou vaaia i afiafi uma mo tausaga e tele.
O le vaaia o le pogisa i mea sa ou faamoemoe e iloa atu ai le malamalama sa faamanatu mai ai ia te a’u o se tasi o o tatou manaoga taua ina ia tuputupu a’e ai o le fesootai pea i le puna o le malamalama—o Iesu Keriso. O Ia o le puna o lo tatou mana, o le Malamalama ma le Ola o le Lalolagi. A aunoa ma se fesootaiga malosi ia te Ia, e amata ona tatou feoti faaleagaga. O le iloaina o lena mea, e taumafai ai Satani e faaaoga ia faatosinaga faalelalolagi ua fetaiai ma i tatou uma. E galue o ia e faaitiitia lo tatou malamalama, talepe fesootaiga, motusia le sapalai o le eletise, ma tuua ai na o i tatou i le pogisa. O nei faatosinaga o ni tulaga masani ia i le olaga faitino, ae ua galue malosi Satani e faaesea i tatou ma ta’u mai ia i tatou ua na o i tatou lava o loo feagai ma na mea.
O Nisi o i Tatou Ua Lē Fia Faia se Mea ona o le Faanoanoa
Pe a lofituina i tatou i faalavelave, pe a tiga tele le olaga ua le mafai ai ona tatou mānava, pe a fasia i tatou e pei o le tagata i le ala i Ieriko ma ua tuua a talioti, e afio mai Iesu ma liligi le suauu i o tatou manu’a, sii ma le alofa i tatou i luga, avatu i tatou i se faletalimalo, ma tausi i tatou. Ia i tatou o loo faanoanoa, ua Ia fetalai mai i ai: “O le a ou … faamamaina avega ua tuu i o outou tau’au, e oo ia te outou tou te le lagonaina i latou i luga o o outou tua, … ina ia mafai ona outou iloa ma le mautinoa o A’u, o le Alii le Atua, e asiasi atu i o’u tagata i o latou puapuaga.” E faamaloloina e Keriso ia manua.
O Nisi o i Tatou Ua Matuai Vaivai Lava
Na saunoa Elder Jeffrey R. Holland: “E le o faamoemoe ia tatou taufetuli saoasaoa e sili atu nai lo o lo tatou malosi. … Ae [e ui lava i lea], ou te iloa … e toatele outou e taufetuli saoasaoa tele ma e toetoe lava a uma lo outou malosi ma sapalai faalemafaufau i nisi o taimi.” Pe a lofituina i tatou i mea ua faamoemoeina, e mafai ona tatou laa i tua ma ōle atu i le Tama Faalelagi po o le a se mea e faamatuuese atu. O se vaega o lo tatou aafiaga faaleolaga o le aoaoina po o a mea e lē faia. Ae e ui lava i lea, o nisi taimi e mamafatū ai le olaga. Ua famautinoa mai e Iesu ia i tatou, “Ia outou o mai ia te au outou uma o e tigaina ma mafatia i avega o au foi e malolo ai outou.”
Ua naunau Keriso e auai faatasi ma i tatou i le amo ma toso ina ia faamāmāina a tatou avega. O Keriso o le malologa.
O Nisi o i Tatou Ua Lagonaina e Lē o i Tatou o se Tagata Masani o le Ekalesia
Mo ni mafuaaga eseese, tatou te lē lagonaina le taliaina po o le talisapaiaina. Ua faaali mai e le Feagaiga Fou ni taumafaiga maoae na faia e Iesu e aapa atu ai i ituaiga uma o tagata: o lepela, ao lafoga, tamaiti, le au Kalilaia, fafine talitane, o fafine, au Faresaio, o ē agasala, o Samaria, fafine ua oti a latou tane, o fitafita Roma, tagata mulilulua, o ē le mama i tulaga faalesauniga. I le toetoe lava o tala uma, o loo Ia aapa atu i se tasi e le masani ona taliaina i faapotopotoga.
I le Luka 19 o loo faamatalaina ai le tala e uiga i le telona sili i Ieriko e igoa ia Sakaio. Na a’e o ia i se laau ina ia iloa atu ai Iesu o loo afio ane. Sa faafaigaluegaina e le malo o Roma ia Sakaio ma vaai [tagata] ia te ia o se tagata pi’opi’o ma se tagata agasala. Na silasila atu Iesu ia te ia i luga o le laau ma valaau atu ia te ia, “Sakaio e, ia e vave ifo ia i lalo, aua e tatau ona ou nofo i lou fale i le aso nei.” Ma ina ua silasila atu Iesu i le lelei o le loto o Sakaio ma mea na ia faia mo isi, na Ia taliaina lana taulaga ma fetalai atu, “Ua oo mai le faaolataga i le aiga nei i le asō, [aua] o ia [foi o se] atalii o Aperaamo.”
Na fetalai atu ma le agamalu Keriso ia sa Nifaē, ua “ou poloaiina ia aua nei i ai se tasi o outou e alu ese atu.” Na maua e Peteru se faaaliga mamana i le Galuega 10 ina ua ia folafola atu, “Ua faasino mai e le Atua ia te au aua ou te tauina atu ua sa pe leaga se [tagata].” O se tulaga manaomia lē fetuunaia mo soo Kerisiano ma le Au Paia o Aso e Gata Ai le faaalia o le alofa moni i le tasi ma le isi. Na tuuina mai e Iesu lea lava ituaiga o valaaulia e tasi ia i tatou lea na Ia tuuina atu ia Sakaio: “Faauta, ou te tu atu i le puipui ma tuitui atu: [afai e te] faalogo mai i lo’u leo, ma tatala mai le puipui, ou te ulufale atu ia te [oe], ma te tali sua foi ma [oe], o [oe] foi ma a’u.” E silasila mai Keriso ia i tatou i luga o a tatou laau.
O Nisi o i Tatou o Loo Mafatia Faalelagona i Fesili
E le’i tele ni tausaga talu ai, na mamafatū ia te a’u ma lē fiafia i ni fesili sa lē mafai ona ou mauaina ni tali i ai. I le taeao po lava o se tasi Aso Toonai, sa fai ai sa’u miti. I le miti sa ou vaai ai i se tamai fale ma ou iloa ai e tatau ona ou alu e tu i totonu. E lima ni fata faaofuofu (arches) na siomia ai, ae o faamalama na faia i ma’a. Sa ou faitio i le miti, i le lē fia alu i totonu ona sa matua laitiiti ma pogisa. Ona oo mai lea o se manatu i lo’u mafaufau lea na susunuina ai ma le onosai e le uso o Iareto ni maa i ni tioata manino. O le tioata o se maa ua faia i ai se suiga. Ina ua pa’i atu le Alii i maa mo le uso o Iareto, sa susulu i le malamalama i totonu o vaa pogisa. Na faafuasei lava ona faatumulia a’u i se manao ina ia i ai i totonu o lena tamai fale e sili atu nai lo se isi lava nofoaga. O le nofoaga tonu lava lea—le nofoaga e tasi—mo a’u e “vaai” moni ai lava. Sa le’i o ese fesili ia na faalavelave mai ia te a’u, ae o le fesili sa sili ona ou mafaufau i ai ina ua ou ala i luga: O le a faapefea ona e faateleina lou faatuatua, e pei o le uso o Iareto, ina ia mafai ona liua au maa i le malamalama?”
Na faia o tatou faiai faaletino e saili ai le malamalamaaga ma le uiga i mea itiiti e auauai mai. Ou te lē iloa ia mafuaaga uma pe aisea ua matua mafiafia ai le veli i le olaga faitino. E le o le tulaga lenei i lo tatou atinaega faavavau tatou te maua uma ai tali. O le tulaga lea tatou te atinae ai lo tatou faamautinoaga (po o nisi taimi o lo tatou faamoemoe) i le mautinoa o mea e le o vaaia. E oo mai le faamautinoaga i auala e lē faigofie ona iloiloina i taimi uma, ae e i ai le malamalama i lo tatou pogisa. Na fetalai Iesu, “O A’u o le malamalama, ma le ola, ma le upumoni o le lalolagi.” Mo i latou o loo sailia le upumoni, atonu e foliga mai e faavalevalea i le taimi muamua se tamai potu laitiiti ma pogisa o i ai faamalama ua faia i maa. Ae o le onosai ma fesili faamaoni, e mafai ai e Iesu ona liua o tatou faamalama o maa i le tioata ma le malamalama. O Keriso o le malamalama e vaai ai.
O Nisi o i Tatou Ua Lagona e Le Mafai Ona Lava lo Tatou Lelei
O le vali mumu ulaula o le Feagaiga Tuai e le gata ina felanulanuai ae e umi foi le malosi, o lona uiga o le a pipii le vali i le ie mamoe ma e le alu ese e tusa lava po o le a le tele o taimi e taina ai. E faaaoga e Satani lenei manatu e pei o se pate: o ie mamoe papae ua pisipisia i le lanu mumu ulaula e le toe foi lava i le paepae. Peitai na folafola mai e Iesu Keriso, “Ua sili ona maualuga o o’u ala i o outou ala,” ma o le vavega o Lona alofa tunoa e faapea, afai tatou te salamo i a tatou agasala, e toe faafoi e Lona toto mumu ulaula i tatou i le mama. E le talafeagai, ae e ui i lea e moni.
Ata pue mai le iStock.com/iinwibisono
“E ui lava ina pei o ofu mumu a outou agasala, e sisina ia e pei o le kiona; e ui lava ina mumu ia e pei o le ie ulaula, e avea e pei o fulufulu mamoe” Na fetalai malosi mai le Alii: o ia “o le ua salamo i … [agasala], o ia lava lea ua faamagaloina, ma o A’u, o le Alii, e le toe manatuaina lava i latou.” I se isi uiga: O mai, inā tatou filifili faatasi. Na e faia ni mea sese; ua le ‘a’u’a’u ai. Sau ia te a’u ma salamo. Ou te lē toe manatuaina lava le agasala. E mafai ona e toe atoatoa. Ua ia te a’u se galuega mo oe e fai. O Keriso e faasinasinaina ia fulufulu.
Ae o a laasaga aoga? O le a le ki i le toe faafesootaia o le mana o Iesu Keriso pe a tatou lē mautonu? Na saunoa ai Peresitene Nelson ma le faigofie tele: “O le ki o le osia ma le tausia o feagaiga paia. … E le o se auala faigata.” Ia faatotonugalemu Keriso i lou olaga.
Afai e te lagona ua mu itiiti le sulu o lau molimau ma ua oo mai le pogisa, ia lototele. Tausi au folafolaga i le Atua. Fai atu au fesili. Ia liliu ma le onosai le maa i le tioata. Liliu atu ia Iesu Keriso, o lē e alofa pea ia te oe.
Na fetalai Iesu, “O Aʼu o le malamalama [lea e] susulu i le pouliuli, ae ua lē malamalama i ai le pouliuli.” O lona uiga e tusa lava po o le a le malosi e taumafai ai, e le mafai e le pogisa ona tapeina lena malamalama. Po o le a lava. E mafai ona e faatuatuaina o le a i ai Lona malamalama iina mo oe.
O i tatou, po o tagata tatou te alolofa i ai, e ono ō pogisa i se taimi lē tumau. I le tala e uiga i le Malumalu o Sate Leki, na maua e le pule o fale, o Brother Val White se valaau i le taimi lava lena. Sa matauina e tagata. O le a se mea na faaletonu i moli o le malumalu? Muamua, na o atu le aufaigaluega taitoatasi i pusa eletise uma i totonu o le malumalu ma ki taitasi moli. Ona latou suia lea o maa i le sapalai otometi o le eletise ma faataitai ia iloa ai po o le a le mea na pe ai.
E faigata ona e kiina na o oe ia moli. Tatou te manaomia ni uo. Tatou te manaomia le tasi ma le isi. E pei lava o tagata faigaluega o fale o le malumalu, e mafai ona tatou fesoasoani i le tasi ma le isi i le o mai, toe fafaga o tatou maa faaleagaga, toe lipea le mea na sese.
O tatou moli taitoatasi atonu e taipei lava ua na o se matāuila se tasi i luga o se laau. Ae tatou te faasusulu atu pea lo tatou tamai malamalama, e pei o le Lotoa o le Malumalu i le taimi o le Kerisimasi. O le mea silisili o mea uma, e pei ona uunaia e Peresitene Nelson, e mafai ona tatou aumaia le malamalama o le Faaola ia i tatou lava ma tagata e taua ia i tatou e ala i le faatinoga faigofie o le tausia o a tatou feagaiga. I auala eseese, ua taui mai ai e le Alii lena faatinoga faamaoni i le mana ma le olioli.
Ou te molimau atu e pele outou. Ua silafia e le Alii le malosi o loo outou taumafai ai. O loo outou alualu i luma. Ia faaauau pea. Na te silafia a outou osigataulaga uma lēmavaaia ma faitauina i latou mo lo outou lelei ma le lelei o i latou e te alofa i ai. E le o faia fua la outou galuega. E le o tuua na o outou. O Lona lava suafa, o Emanuelu, o lona uiga “Ua ia i tatou le Atua.” O loo Ia faatasi moni lava ma oe.
Fai ni nai laa i luga o le ala o feagaia, e tusa lava pe ua pogisa tele e vaai mamao atu ai. O le a toe ola mai moli. Ou te molimau atu i upumoni o loo i afioga a Iesu, ma ua faataumulia i le malamalama: “Faalatalata mai ia te au ma o le a Ou faalatalata atu ai ia te outou; saili mai ia te au ma le filiga ma o le a outou maua ai au; ole mai, ma o le a outou maua ai; tuitui mai, ma o le a tatala atu ai ia te outou.” I le suafa o Iesu Keriso, amene.