O Le Talalelei Moni, Mama, ma Faigofie a Iesu Keriso
O le alofa i le Atua ma le alofa i o tatou tuaoi o le faavae lea o le aoaoga faavae o le auaunaga; aoaoina e faatotonugalemu-i-le-aiga ma lagolagoina-e-le-Ekalesia; tapuaiga faaleagaga i le aso Sapati; ma le galuega o le faaolataga.
O’u uso e ma tuafafine pele, e faigata ia ona ou talitonu o le 71 tausaga talu ai, i le 1948, sa avea ai a’u o se faifeautalai i Egelani ma le 44 tausaga ua mavae sa ma ave ai ma Barbara lo matou aiga i Kanata ina ua ou avea ma peresitene o le Misiona a Kanata Toronto. A o auauna atu ai iina ia Aperila 1976, na valaauina ai a’u i le Korama Muamua a Fitugafulu, ma faafuasei lava i le 1985, na valaauina ai a’u i le Korama a Aposetolo e Toasefululua. E lē pei o o’u valaauga na muamua atu sa aofia ai ni faamalologa i le lumanai, o lo’u faamalologa mai lo’u valaauga i le Toasefululua e le o se filifiliga sili lea i le taimi nei; peitai, ou te tatalo o le a oo mai lena aso pe a maea uma mea na valaauina a’u e le Alii e fai.
I le mafaufau ai i o’u tausaga mulimuli e 43 o auaunaga o se Pulega Aoao ma le avanoa na ou maua e auauna atu ai i fanau a le Tama Faalelagi, ua ou iloa atili ai e finagalo o Ia i Ana fanau uma ia maua le filemu, olioli, ma le fiafia i o latou olaga.
Na aoao mai le perofeta o Liae, “Ua i ai [alii ma tamaitai], ina ia latou maua le olioli.” E tele mafuaaga e mafai ai ona tatou lē maua le filemu, olioli, ma le fiafia i lenei olaga, e aofia ai le mativa, taua, faalavelave faalenatura, ma faafitauli e lei faamoemoeina i galuega, soifua maloloina, ma mafutaga faaleaiga.
Ae e ui lava e le mafai ona tatou pulea le tele o na malosiaga mai fafo lea e aafia ai o tatou olaga iinei i le lalolagi, ae a o tatou taumafai e avea ma soo faamaoni a le Alii o Iesu Keriso, e mafai ona tatou maua le filemu, olioli, ma le fiafia e ui lava i faafitauli faalelalolagi o siomia ai i tatou.
Sa fai mai se tasi o la’u fanau i se tasi taimi, “Tama, ou te tuufesili lava pe o le a mafai ea ona ou oo i ai.” Sa ou tali atu, “Pau lava le mea o loo finagalo ai le Tama Faalelagi ia i tatou o le faia o le mea sili tatou te mafaia i aso taitasi.” Uso e ma tuafafine, fai le mea sili tou te mafaia i lea aso ma lea aso, ma i se taimi vave lava, o le a e iloa ai e silafia oe e lou Tama Faalelagi ma e alofa o Ia ia te oe. Ma pe a e iloa lena mea—iloa moni lava—o le a i ai se faamoemoega ma se uiga moni o lou olaga, ma o le a faatumuina oe i le olioli ma le filemu.
I le avea ai ma Malamalama o le Lalolagi, ua fetalai mai ai le Faaola, “Ina ia le tumau pea i le pouliuli se tasi e faatuatua mai ia te a’u.”
“O Iesu Keriso o le suafa lea ua tuu mai e le Tamā, ma ua leai se isi igoa ua tuu mai e mafai ona faaolaina ai [i tatou];
“O le mea lea, e ao i alii uma [ma tamaitai] ona latou ave i o latou luga le suafa ua tuu mai e le Tamā.”
Ua aoao mai i tatou e tusitusiga paia e manao Satani e taitai tagata i le pouliuli. O ana taumafaiga uma o le polokaina lea o le malamalama ma le upumoni a Iesu Keriso ma Lana talalelei. E pei ona aoao atu e Liae lana fanau, o loo “saili [le tiapolo] ia pagatia tagata uma pei o ia.” Afai o le “galuega ma [le] mamalu [o le Tama Faalelagi]” o le “aumaia [o] le tino ola pea ma le ola faavavau o [alii ma tamaitai],” o le “galuega” la a Lusifelo o le aumaia o le faanoanoa ma le tagiaue e le gata i fanau a le Atua. O le agasala ma le solitulafono e faaitiitia ai le Malamalama o Keriso i o tatou olaga. O le mafuaaga lena ua avea ai le olioli atoatoa i le Malamalama o Keriso ma a tatou sini faamoemoeina, lea e aumaia le filemu, olioli, ma le fiafia.
I le 18 masina talu ai, na musuia ai e le Alii Lana perofeta ma Aposetolo e faatino le tele o ni fetuunaiga [ma suiga] matagofie. Peitai, ou te popole ina ne’i lē talisapaiaina atoatoa faamoemoega faaleagaga o nei fetuunaiga ona o le soona naunau i suiga lava ia.
Na saunoa Iosefa F. Samita: “O le talalelei moni, mama, faigofie a Iesu Keriso ua toefuatai mai. E nafa i tatou ma le faatumauina [o le talalelei] i luga o le fogaeleele.” Na ia faaopoopo mai o le talalelei moni, mama, ma faigofie o le “aoaoga faavae faaola lea a Keriso.”
Sa aoao mai le Perofeta o Iosefa Samita e faapea “e ala i le Togiola a Keriso, e mafai ai ona faaolaina tagata uma, e ala i le usiusitai i tulafono ma sauniga o le Talalelei.”
O uluai mataupu faavae o le talalelei o le faatuatua i le Alii o Iesu Keriso, salamo, papatisoga, le meaalofa o le Agaga Paia, ma le tumau seia oo i le iuga. Na aoao mai lona uso o Ailama: “Ia talai atu pea lava pea: o le a outou iloaina ai mai lea aso i lea aso o le faaalia mai ia te outou ni manatu fou ma le malamalama faaopoopo e faatatau i ai. E mafai ona outou faalauteleina … ia matuai malamalama manino i ai. Ona mafai lea ona outou matuai faafaigofieina ina ia malamalama ai i latou [tou] te aoaoina.”
O auala sili lava mo i tatou e vaai ai i faamoemoega faaleagaga a le Ekalesia o le olai ai i aoaoga moni, mama, ma faigofie a Keriso ma faaaoga ia poloaiga sili e lua a le Faaola: “Ia e alofa atu i le Alii lou Atua ma lou loto atoa. … Ia e alofa atu i lē lua te tuaoi e pei o oe lava ia te oe.”
O le usiusitai ai i na poloaiga sili e lua e saunia ai se auala ia lagona atili ai le filemu ma le olioli. Pe a tatou alolofa ma auauna atu i le Alii ma alolofa ma auauna atu i o tatou tuaoi, o le a tatou lagonaina lava le fiafia atili lea e oo mai ia i tatou i se auala e sili atu.
O le alofa i le Atua ma le alofa i o tatou tuaoi o le faavae lea o le aoaoga faavae o le auaunaga; aoaoina e faatotonugalemu-i-le-aiga ma lagolagoina-e-le-Ekalesia; tapuaiga faaleagaga i le aso Sapati; ma le galuega o le faaolataga i itu uma e lua o le veli e lagolagoina e Aualofa ma korama a toeaina—o nei mea e faavae i luga o poloaiga faalelagi o le alofa i le Atua ma le alofa i o tatou tuaoi. O nei mea e faavae i luga o poloaiga faalelagi o le alofa i le Atua ma le alofa i o tatou tuaoi. E mafai ona i ai se isi faavae e sili atu, sili atu ona taua, ma sili atu ona faigofie nai lo lena?
O le ola ai i le fuafuaga moni, mama, ma faigofie o le talalelei o le a tuuina mai ai ia i tatou nisi taimi e asiasi ai i tina ua oti a latou tane, tamā ua oti a latou avā, o ē matuaoti, tuuatoatasi, mama’i, ma ē matitiva. O le a tatou maua le filemu, olioli, ma le fiafia i le olaga pe a auauna atu i le Alii ma o tatou tuaoi.
O fetuunaiga i le aso Sapati lea e faamamafa ai le aoaoina ma le suesueina o le talalelei e faatotonugalemu-i-le-aiga ma lagolagoina e le Ekalesia o se avanoa e toe faafou ai o tatou agaga ma lo tatou tuuto atu i le Atua i totonu o puipui o o tatou lava fale. O le a se mea e sili atu ona faigofie, taua, ma loloto? Uso e ma tuafafine, e mafai ona tou silafiaina o le aoaoina ma le aoao atu o le talalelei i o tatou aiga o se auala taua lea e saili ai le olioli ma le fiafia i o tatou olaga?
O le saunoa ai e uiga i le Sapati, na fetalai mai ai le Faaola, “Aua e moni o se aso lenei ua tofia mo oe e te malolo ai mai au galuega, ma avatu ai au tapuaiga i le Silisili Ese.” Na Ia faaopoopo mai, “Ina ia atoatoa lou olioli … [e ala i le] olioli ma le tatalo… e [tatau ona e] faia o nei mea ma le faafetai, ma loto ma mata fiafia … ma le loto ma le mata fiafia.”
Faamolemole ia matau nisi o upu autu i lenei faaaliga: olioli, fiafia, faafetai, loto fiafia, loto fiafia, ma mata fiafia. E foliga mai ia te a’u o le tausia o le aso Sapati e tatau ona aumai ai ni ataata i o tatou foliga.
A o tatou auauna atu i se auala maualuga atu ma paia atu, faamolemole ia mafaufau i le taua o lo tatou faafeiloaia o tagata uma o ē o mai i a tatou sauniga Lotu, aemaise lava tagata fou ma tagata asiasi mai. E tatau ia i tatou uma ona fiafia i le lagiina o viiga ma faalogologo ma le toto’a i upu o tatalo o le faamanatuga ma se loto ma se mafaufau matala.
O molimau o le faatuatua i a tatou sauniga anapogi ma molimau e taitaia e se uso o le au epikopo, o lē e faasoa maia se molimau puupuu e taulai atu i le fuafuaga o le fiafia ma le talalelei moni, mama, ma faigofie a Keriso. E tatau i isi tagata uma ona mulimuli i lena faataitaiga. E manaomia ona tatou manatua o loo i ai isi nofoaga talafeagai e faamatalaina ai ni tala pe faasoa atu ai ni tala o ni faigamalaga. A o tatou tausia a tatou molimau ia faigofie ma taulai atu i le talalelei a Keriso, o le a Ia saunia se toefaafouga faaleagaga a o tatou faasoa atua a tatou molimau ma le tasi ma le isi.
O auaunaga mataalia e sili ona malamalama i ai e ala i le mafaufau i le alofa i le Atua ma le alofa i o tatou tuaoi. I se faaupuga faigofie, tatou te auauna atu ona tatou te alolofa i lo tatou Tama Faalelagi ma Ana fanau. O a tatou taumafaiga faaleauaunaga o le a sili atu ona faamanuiaina pe afai tatou te tausisia le faafaigofieina o a tatou auaunaga. O le olioli sili e sau mai mea faigofie o le olaga, o lea e manaomia ai ona tatou faaeteete e aua ne’i mafaufau faapea e tatau ona faaopoopo nisi mea i soo se fetuunaiga ua tatou maua e fausia ai le faatuatua ma molimau malolosi i loto o fanau a le Atua.
Aua tatou te faafaigataina mea i le faia o ni fonotaga faaopoopo, o mea e faamoemoeina, po o nisi tulaga manaomia. Ia Faafaigofie. O lena faafaigofie o le a e maua ai le filemu, olioli, ma le fiafia lea na ou talanoa atu ai.
Mo le tele o tausaga o faamoemoega o taitaiga o le Ekalesia, e pei ona ta’ua i le Tusitaulima 2, o ni taunuuga ia e manino ma faigofie.
“E faamalosiauina e taitai ia tagata uma o le ekalesia ia maua sauniga tatau uma o le perisitua, ia tausia feagaiga e faatatau i ai, ma ia agavaa mo le faaeaga ma le ola e faavavau.…
“Tagata Matutua: Ia uunai tagata matutua taitoatasi ina ia agavaa mo le mauaina o sauniga o le malumalu. Aoao tagata matutua uma ia faailoa o latou augatuaa ma faia sauniga e fai ma sui mo i latou i le malumalu.
“Autalavou: Fesoasoani e saunia alii talavou taitoatasi ia maua le Perisitua Mekisateko, ia maua sauniga o le malumalu, ma ia agavaa e auauna atu i se misiona faamamaluina. Fesoasoani e saunia tamaitai talavou taitoatasi ina ia agavaa e osia ma tausia feagaiga paia ma maua sauniga o le malumalu. Ia faamalolosia le autalavou e ala i le auai i gaoioiga ‘anoa.
“Tagata Uma o le Ekalesia: Fesoasoani i taitai perisitua ma ausilali, aufono a uarota, faifeautalai o le uarota ma faifeautalai faamisiona, ma le au paia e galulue soosoo tau’au i se taumafaiga paleni e laveai mai tagata taitoatasi, faamalolosia aiga ma iunite o le Ekalesia, ia faateleina le toaaga i le perisitua, ma faapotopoto mai Isaraelu e ala i le liua, faatumauina, ma le faatoaagaina mai. Ia aoao tagata o le au paia ia saunia mea e manaomia mo i latou lava ma o latou aiga, ma ia fesoasoani atu i ē matitiva ma ē le tagolima i le ala a le Alii.”
O la’u auaunaga i le Ekalesia ua faamanuiaina ai a’u i le tele o aafiaga faaleagaga ofoofogia ma faapitoa. O a’u o se molimau o loo taitaiina e le Alii Lana Ekalesia e faataunuu ai Ana faamoemoega. Ua ou mauaina se taitaiga faalelagi e sili atu nai lo lo’u gafatia. O le olioli i le ola ai i le talalelei mo a’u na faatotonugalemuina i le aoaoga faavae ma le talalelei moni, mama, ma faigofie a Iesu Keriso.
Ua ou galue i lalo o ki ma taitaiga a ni perofeta ma Peresitene e toaono o le Ekalesia mai ia Spencer W. Kimball e oo mai ia Russell M. Nelson. Ou te molimau atu o i latou taitoatasi sa avea ma o loo avea o se perofeta filifilia a le Atua. Ua latou aoao mai ia i tatou ni mataupu faavae taua e uiga i le Ekalesia ma le ma le talalelei ma le mataupu faavae a Keriso. O loo ave e Peresitene Nelson le galuega a le Alii i luma i se tulaga saoasaoa ofoofogia. Ou te fai atu “ofoofogia” ona e na o ia o le Usoga e matua atu ia te a’u, ae ua fai si faigata mo a’u le tautulituli atu o ia! O a’u o se molimau o ki o le perisitua ma le valaauga o se perofeta a le Atua ua i ai i ona luga. Ua aoao atu e Peresitene Nelson le talalelei moni, mama, ma faigofie a Iesu Keriso. Ou te molimau atu o Iesu o le Keriso, ma o Lana Ekalesia lenei—ou te molimau atu ai ma le lotomaualalo, i le suafa paia o Iesu Keriso, amene.