O Le Mata o le Faatuatua

Saunia e Elder Neil L. Andersen

O Le Korama a Aposetolo e Toasefululua

A tatou pikiina ma filifilia mea ua tatou taliaina i le folafolaga, ua tatou faapogisaina lo tatou vaaiga e faavavau, i le soona tuu o le faataua tele i lo tatou olaga iinei ma le taimi nei.

A o toeitiiti oo i Lona faasatauroga, na avatu ai Iesu i luma o Pilato i le fale faamasino. “O oe ea le Tupu o Tagata Iutaia?” Na fesili atu ai Pilato ma le inoino. Na tali atu Iesu: “E le mai le lalolagi nei lo’u malo. … Na ou [sau] i le lalolagi, ina ia ou molimau [e uiga] i le upu moni. O i latou uma lava o i le upu moni, e faalogo mai i latou i lo’u leo.”

Na fesili Pilato ma le masalosalo, “O le a le upumoni?”¹

I le lalolagi i le asō, o le fesili “O le a le upumoni?” e mafai ona matuā tiga i tagata e le talitonu i tapuaiga faalelotu.

O se sailiga i le Google mo le “O le a le upumoni?” e aumaia ai le silia ma le miliona tali. E sili atu le tele o faamatalaga ua tatou maua i luga o a tatou telefoni feaveai nai lo tusi uma o se faletusi. O loo tatou ola faatasi ma le anoanoa’i o faamatalaga ma manatu. O loo tuliloaina i tatou e leo o faaosoosoga ma faatosinaga i itu uma.

I le siomia ai i fenumiaiga o nei aso, e leitioa a toatele ē talitonu i upu na tautalagia i le 2,500 tausaga talu ai e [le fai filosofia o] Protagoras [i le fai filosofia talavou] o Socrates: “O mea e moni mo oe,” na ia fai mai ai, “e moni mo oe, ma o mea e moni mo a’u e moni mo a’u.”²

Upumoni e ala i le Talalelei Toefuataiina a Iesu Keriso

I le faamanuiaina i le talalelei toefuataiina a Iesu Keriso, tatou te folafola atu ma le lotomaualalo o loo i ai nisi o mea e moni atoatoa ma tonu a’ia’i. O nei upumoni e faavavau e tutusa mo atalii ma afafine uma o le Atua.

Ua aoao mai tusitusiga paia, “Ma o le upumoni o le iloa lea o mea e pei ona i ai, ma e pei ona sa i ai, ma e pei ona o le a oo mai.”³ O loo i ai i upumoni mea na tutupu ma mea o le a tutupu, e faalautele ai le vaaiga o mea o loo tutupu i le taimi nei.

Na fetalai mai Iesu, “O a’u nei le ala, ma le upu moni, ma le ola.”⁴ E faaali mai e le upumoni ia i tatou le ala i le ola e faavavau, ma e na o lo tatou Faaola, o Iesu Keriso e auala mai ai. E leai lava se isi auala.

Ua aoao mai i tatou e Iesu Keriso i le auala tatou te ola ai, ma, e ala i Lana Togiola ma le Toetu, ua Ia ofoina mai le faamagaloga mai i a tatou agasala ma le tino ola pea i talaatu o le veli. E moni atoatoa lenei mea.

Ua Ia aoao mai i tatou e faapea e le afaina pe o tatou mauoa pe matitiva, lauiloa pe lē mailoa, atamai pe faatauvaa. Ae, o lo tatou sini o le olaga faaletino o le faamalosia lea o lo tatou faatuatua i le Alii o Iesu Keriso, filifili le lelei i lo le leaga, ma ia tausi Ana poloaiga. A o tatou patipatia fatufatua’iga faasaienisi ma vailaau, o upumoni a le Atua o loo i ai le tele atu o mea nai lo nei mea na maua.

I le tetee atu i upumoni o le faavavau, ua i ai pea mea taufaasese e tosoesea fanau a le Atua mai le upumoni. O finauga a le tiapolo e tutusa i taimi uma. Faafofoga i [upu] nei, na fofogaina mai i le 2,000 tausaga ua mavae:

“E le mafai ona [outou] iloa ia mea [tou] te le vaavaai i ai. … [O soo se mea e faia e se tagata] e le o se solitulafono.”

“[E le o faamanuiaina outou e le Atua, ae] [e manuia tagata] taitoatasi e tusa ma lona [lava] atamai.”⁵

“E lē o se mea ua tonu i le mafaufau [faapea o se tagata e pei o] … Keriso … [o le a avea ma] Alo o le Atua.”⁶

“[O le mea ua tou talitonu i ai o se sitaili faavalevalea ma o se] faavaleaina o o outou mafaufau.”⁷ E pei ua [tatou] faalogo i ai i aso nei, a ea?

Faatasi ai ma le Toefuataiga o le talalelei, ua tuuina mai ai e le Atua ia i tatou le ala e aoao ma iloa ai upumoni taua faaleagaga: tatou te aoao i latou e ala i tusitusiga paia, o a tatou tatalo faaletagata lava ia, o o tatou lava ia aafiaga, e ala i fautuaga a perofeta ma aposetolo soifua, ma e ala i le taitaiga a le Agaga Paia, o lē e mafai ona fesoasoani mai ia i tatou e “iloa ai le moni o mea uma lava.”⁸

O Le Upumoni o Le Iloatino Faaleagaga

E mafai ona tatou iloa mea a le Atua pe a tatou sailia i latou faaleagaga. Na saunoa mai Paulo, “E le iloa e se tasi mea a le Atua, ae e ala i le Agaga o le Atua. … [Aua] ua faamasinoina latou faaleagaga.”⁹

Tagai i le ata lenei na saunia e Michael Murphy. Mai i lenei vaaiga, e faigata ona e talitonu o se faatinoga o le faatufugaga o se mata o se tagata. Ae ui i lea, a o e vaai i togitogi mai se vaaiga e ese mai, e te vaaia le matagofie o le foafoaga a le faatufugaga.

E faapena foi, tatou te vaai i upumoni faaleagaga a le Atua e ala i le vaaiga o se mata o le faatuatua. Na saunoa mai Paulo: “E le talia e le tagata faaletino o mea a le Agaga o le Atua: aua o mea valea ia ia te ia, na te le mafai foi ona iloa, aua e faamasinoina faaleagaga.”¹⁰

O tusitusiga paia, o a tatou tatalo, o o tatou lava ia aafiaga, o perofeta o aso nei, ma le meaalofa o le Agaga Paia e aumaia ia i tatou se vaaiga faaleagaga o le upumoni e taua mo la tatou malaga i i nei i le lalolagi.

O Le Folafolaga e ala i le Mata o le Faatuatua

Se’i tatou tagai i le folafolaga e uiga i aiga e ala i mata o le faatuatua.

Sa faalauiloa mai e Peresitene Gordon B. Hinckley le “O Le Aiga: O Se Folafolaga i le Lalolagi” i le faamatalaga lenei: “Ona o le tele o mataupu sese ua manatu le lalolagi o upumoni ia, faatasi ma le tele o le taufaasese e faatatau i tulaga faatonuina ma tulaga faatauaina, faatasi ai ma le tele o faaosoosoga ma faatosinaga o loo pisia lemu ai mai le lalolagi, ua matou lagona ai ia lapatai [outou].”¹¹

E amata le folafolaga: “O tagata uma—tane ma tamaitai—na foafoaina i le faatusa o le Atua. O i latou taitoatasi o se atalii po o se afafine agaga faapelepele a ni matua faalelagi, ma, o lea ua tofu ai ma se natura paia ma se taunuuga.”

O upumoni nei e faavavau. O oe ma a’u e le o se mea na tupu faafuaveta o le natura.

Ou te fiafia i upu nei: “I le muai olaga, na silafia ma tapuai atalii ma afafine agaga i le Atua o lo latou Tama e Faavavau ma na taliaina Lana fuafuaga.”¹²

Sa tatou ola ae tatou te le’i fananau mai. O la tatou faasinomaga patino o se vaega o i tatou e faavavau. I auala tatou te lē malamalama atoatoa i ai, o lo tatou tuputupu ae faaleagaga iina i le muai olaga ua faatosinaina ai tagata ua tatou i ai iinei.¹³ Na tatou taliaina le fuafuaga a le Atua. Na tatou iloa o le a tatou oo i faigata, tiga, ma le faanoanoa i le lalolagi.¹⁴ Na tatou iloa foi o le a afio mai le Faaola ma afai tatou te faamaonia lo tatou agavaa, o le a tatou tutu i le Toetutu, ma maua “[mamalu] faaopoopo i luga o o [tatou] ulu e faavavau ma faavavau lava.”¹⁵

E tuusa’o le folafolaga: “Matou te ta’utino atu o le ala ua foafoaina ai le ola faitino, ua faatuina i le finagalo paia. Matou te faamaonia le paia o le ola ma lona taua i le fuafuaga e faavavau a le Atua.”

E uunaia e le fuafuaga a lo tatou Tama se tane ma le ava e aumai fanau i le lalolagi ma uunaia i tatou e tautatala i le puipuia o pepe e le’i fananau mai.

O Mataupu Faavae o le Folafolaga E Matagofie le Fesootaiina

A tatou pikiina ma filifilia mea ua tatou taliaina i le folafolaga, ua tatou faapogisaina lo tatou vaaiga e faavavau, i le soona tuu o le faataua tele i lo tatou olaga iinei ma le taimi nei. E ala i le mafaufau lotoloto ma le agaga tatalo i le folafolaga e ala i mata o le faatuatua, tatou te malamalama atili ai i le auala e fesootai ai ma le matagofie ia mataupu faavae, lagolagoina o le tasi ma le isi, ma faaali mai ai le fuafuaga a lo tatou Tama mo Lana fanau.¹⁶

Pe tatau ea ona faate’ia tatou pe a folafola mai e perofeta a le Alii Lona finagalo ma, mo nisi, e tuufesili pea? Ioe, o nisi e vave lava ona teenaina siufofoga o perofeta,¹⁷ ae o isi e mafaufau loloto ma le agaga tatalo i a latou fesili faamaoni—o fesili e taliina i le onosai ma se mata o le faatuatua. A na faapea na faaali mai le folafolaga i le aiga i se isi seneturi, o le a i ai pea fesili, ae o ni fesili e ese ai nai lo fesili o aso nei. O le tasi faamoemoega o perofeta o le fesoasoani lea ia i tatou ia foiaina ni fesili faamaoni.¹⁸

A o le’i avea ma Peresitene o le Ekalesia, na saunoa mai Peresitene Russell M. Nelson: “E silasila agai i luma Perofeta. Latou te vaai i tulaga lamatia faigata ua tuuina e le tiapolo pe o le a tuuina i lo tatou ala. E muai vaaia foi e perofeta avanoa silisili ma faamanuiaga o faatalitali mai ia i latou o ē faalogo ma le faamoemoe e usiusitai.¹⁹

Ou te molimau atu i le moni ma le mana faaleagaga o siufofoga autasi o le Au Peresitene Sili ma le Korama a le Toasefululua.

O Le Lalolagi o loo Savali ‘Ese

I lo’u olaga atoa, ua tatou vaaia se suiga matautia i talitonuga a le lalolagi e uiga i le tele o mataupu faavae ua aoaoina i le folafolaga. I le taimi o lo’u talavou ma le amataga o tausaga o le faaipoipoina, e toatele tagata i le lalolagi na savavali ese mai tulaga faatonuina a le Alii ua tatou ta’ua o le tulafono o le ola mama, e faapea o sootaga faalefeusuaiga e na o le va lava o le alii ma le tamaitai ua uma ona faaipoipoina faaletulafono e faatino ai. I lo’u vaitausaga 20 ma le 30, na toatele [tagata] na o ese mai le puipuiga paia o pepe e le’i fananau mai, aua sa amata ona talia tele le faapa’ū pepe. I le tele o tausaga talu ai nei, e toatele tagata na o ese mai le tulafono a le Atua e faapea o le faaipoipoga o se tuufaatasiga paia i le va o le alii ma se tamaitai.²⁰

O le vaavaai atu i le toatele o tagata o loo savavali ese mai i tuaoi ua faatulagaina e le Alii, ua faamanatu mai ai ia i tatou lena aso i Kapanaumi ina ua tautino atu e le Faaola Lona paia ma e faanoanoa ai “[e toatele] o ona soo … e lei toe feoai i latou ma ia.”

Ona faliu atu lea o le Faaola i le Toasefululua: “Pe tou te fia o ese foi?”

Na tali Peteru:

“Le Alii e, a matou o ea ia te ai? O ia te oe upu o le ola e faavavau.

“Ua matou talitonu, ma ua matou iloa o oe o le Keriso, o le Alo o le Atua soifua.”²¹

E Le o Tagata Uma e Fetaui Lelei [Lagona] i totonu o le Folafolaga

O loo i ai le toatele o tagata, talavou ma matutua, o ē faamaoni ma faatuatua i aoaoga a perofeta, e ui e le fetaui lelei o latou lagona o i ai i le taimi nei ma le folafolaga i le aiga: o fanau ua fesouā’ina olaga ona o le tete’a o matua; o talavou e i ai uo ua faatauemu i le tulafono o le ola mamā; o tamaitai ma alii ua tetea ua matuā faamanualia ona o le lē faamaoni o se toalua; o tane ma avā ua lē mafai ona maua ni fanau; o tamaitai ma alii ua faaipoipo atu i se toalua e le tutusa o la’ua faatuatuaga i le talalelei toefuataiina; o tamaitai ma alii nofofua o ē, mo ni mafuaaga e tele, ua lē mafai ai ona faaipoipo.

O se tasi o uo mo le toeitiiti atoa le 20 tausaga, ou te faamemelo tele i ai, e le’i faaipoipo ona o le tosina atu i le itupa e tasi. Na tumau faamaoni o ia i ana feagaiga o le malumalu, faalautele ana taleni fatufatua’i ma faapolofesa, ma na auauna atu ma le mamalu i le Ekalesia ma le nuu. Na ia fai mai talu ai nei ia te a’u, “Ou te malamalama lelei ia i latou o i lo’u tulaga o ē filifili e lē tausia le tulafono o le ola mama i le lalolagi o loo tatou ola ai. Ae e le’i fetalai mai ea Keriso ia i tatou ina ia “’aua ne’i avea ma ni ō o lenei lalolagi’? E manino lava o tulaga faatonuina a le Atua e ese mai i [tulaga faatonuina] a le lalolagi.”

O tulafono a tagata e tele lava ina ō i fafo atu o tuaoi ua faatulagaina e tulafono a le Atua. Mo i latou e mananao e faafiafia le Atua, o le faatuatua, onosai, ma le filiga e mautinoa lava e manaomia.²²

Na ma masani ma lo’u toalua, o Kathy, i se tamaitai nofofua, pe tusa ua 45 ona tausaga, e talenia i ana tomai faapolofesa ma e auauna atu ma le lototoa i lana uarota. Sa ia tausia foi ia tulafono a le Atua. Na ia tusia:

“Sa ou moemiti i le aso o le a faamanuiaina ai a’u i se tane ma se fanau. O loo o’u faatali pea. E i ai taimi, e aumai ai e lo’u faafitauli lagona o le faagaloina ma le tuuatoatasi, ae ou te taumafai e aveese le taulai i mea ou te lē o maua, ae [taulai] atu i mea ua ou maua ma le auala e mafai ai ona ou fesoasoani atu i isi.

“Na fesoasoani ia te a’u le auauna atu i lo’u aiga lautele, i la’u uarota, ma i le malumalu. E le o faagaloina a’u pe tuuatoatasi aua o a’u o se vaega o, ma o i tatou uma o se vaega o se aiga e toatele atu.”

O Loo i ai le Toatasi o Lē e Malamalama

O le a fai mai nisi, “E te lē malamalama i lo’u faafitauli.” Atonu ou te lē malamalama i ai, ae ou te molimau atu o loo i ai le Toatasi e malamalama i ai.²³ O loo i ai le Toatasi o lē, ona o Lana taulaga na faia i le faatoaga ma i luga o le satauro, e silafia a outou avega. A outou saili atu ia te Ia ma tausi i Ana poloaiga, ou te folafola atu ia te outou o le a Ia faamanuiaina outou ma aveese avega ua mamafatū tele o loo tauave toatasi. O le a Ia tuu atu ia te outou ni uo e faavavau ma avanoa e auauna atu ai. Ae sili atu ona taua, o le a Ia faatumulia outou i le Agaga mamana o le Agaga Paia ma faasusulu atu Lana faamaoniga faalelagi i luga o outou. E leai se filifiliga, e leai se isi auala, e teenaina le mafutaga a le Agaga Paia po o faamanuiaga o le faavavau, e agavaa mo a tatou iloiloga.

Ou te iloa o loo soifua le Faaola. Ou te molimau atu o Ia o le puna o upumoni uma lea e sili ona taua ma o le a Ia faataunuu faamanuiaga uma ua Ia folafola mai ia i latou o ē tausia Ana poloaiga. I le suafa o Iesu Keriso, amene.

Faamatalaga

1. Ioane 18:33, 36–38.

2. William S. Sahakian and Mabel Lewis Sahakian, Ideas of the Great Philosophers (1966), 28.

3. Mataupu Faavae ma Feagaiga 93:24.

4. Ioane 14:6.

5. Alema 30:15, 17.

6. Helamana 16:18.

7. Tagai i le Alema 30:14, 23, 27.

8. Moronae 10:5.

9. Faaliliuga a Iosefa Samita, 1 Korinito 2:11 [i le 1 Korinito 2:11, vaefaamatalaga i]; 1 Korinito 2:14.

10. 1 Korinito 2:14.

11. Gordon B. Hinckley, “Ia Tu Malosi e Tetee atu i Togafiti a le Lalolagi,” Liahona, Ian. 1996, 119. Na faamatala talu ai nei e Peresitene Russell M. Nelson nisi o talafaasolopito o le folafolaga, e pei ona aotele e Sheri Dew i le Insights from a Prophet’s Life: Russell M. Nelson (2019), 208:

    “I se tasi aso i le 1994, sa faaalu ai e le Korama a Aposetolo e Toasefululua se aso i le latou potu fono i le Malumalu o Sate Leki i le talanoaina o faafitauli o loo siomia ai le aiga. Sa latou iloiloina mea uma mai le pogai o le faateteleina o le salalau solo o ponokalafi e oo i ituaiga eseese o tulafono taufaaofi e tetee ai i le aiga. E le o se talanoaga fou lea, ae o lena aso o le mataupu talanoaina atoa lava sa taulai atu i lenei lava autu taua e tasi.

    “Sa iloiloina e le Toasefululua mea uma e lua, o aoaoga faavae ma aiaiga faavae, i le iloiloina ai o mea na e le mafai ona suia—aoaoga faavae—ma mea na e ono avea ma—aiaiga faavae. Sa latou talanoaina faafitauli na vaai ua oo mai, e aofia ai se tulei malosi faalesosaiete e faataga faaipoipoga o le itupa e tasi atoa ai ma aia tatau o tagata e sui ai o latou itupa. ‘Ae e le o le mutaaga lena o mea na matou vaaia,’ sa faamalamalama mai ai Elder Nelson. ‘Sa mafai ona matou iloaina taumafaiga a nuu eseese e o ese mai tulaga faatonuina uma ma tapulaa o gaoioiga faafeusuaiga. Sa matou vaaia le fenumiaiga o itupa. Sa mafai ona matou vaaia le oo mai o ia mea uma.

    “O lenei talanoaga faaumiumi, faatasi ai ma isi talanoaga mo se vaitaimi, na taitai atu ai i le faaiuga e tatau i le Toasefululua ona saunia se pepa o faamatalaga, masalo o se folafolaga, e otooto atu ai le tulaga o le Ekalesia e uiga i le aiga ma tuuina atu i le Au Peresitene Sili mo le iloiloga.”

12. “O Le Aiga: O Se Folafolaga i le Lalolagi,” Liahona, Me 2017, 145.

13. Na saunoa mai Peresitene Dallin H. Oaks: “O le faitau afe o tagata soifua na fananau mai i lenei lalolagi na filifilia le fuafuaga a le Tama ma tau mo lea mea. O le toatele o i tatou na osia foi feagaiga ma le Tama e faatatau i mea tatou te faia i le olaga faitino. I auala e le’i faaalia mai lava, o a tatou faatinoga i le lalolagi o agaga e uunaia ai i tatou i le olaga faitino” (“The Great Plan of Happiness,” Ensign, Nov. 1993, 72).

14. Tagai i le Dallin H. Oaks, “Upumoni ma le Fuafuaga,” Liahona, Nov. 2018, 25–28.

15. Aperaamo 3:26.

16. Na saunoa Peresitene Dallin H. Oaks:

    “E talitonu le Au Paia o Aso e Gata Ai ua liuaina, o le aoaoga faavae i le folafolaga i le aiga, lea na fofogaina mai i le toetoe atoa le kuata seneturi talu ai, o le toefaamamafa lea a le Alii i upumoni o le talalelei e manaomia ona tatou tausia ai i tatou ia manumalo i luitau o i ai nei i le aiga. …

    “Ou te molimau atu o le folafolaga i le aiga o se malelega o le upumoni e faavavau, o le finagalo o le Alii mo Ana fanau o ē sailia le ola e faavavau. Ua avea pea ma faavae o aoaoga ma faatinoga a le Ekalesia mo le 22 tausaga talu ai ma o le a faaauau pea mo le lumanai. Mafaufau i ai, aoao atu, ola ai, ma o le a faamanuiaina outou a o outou fetaomi atu i luma agai i le ola e faavavau. …

    “… Ou te talitonu o o tatou uiga e faatatau i le folafolaga i le aiga ma lona faaaogaina o se tasi lea o na tofotofoga mo lenei tupulaga. Ou te tatalo mo tagata uma o le Au Paia o Aso e Gata Ai ia tutu mausali i lena tofotofoga” (“O Le Fuafuaga ma le Folafolaga”,” Liahona, Nov. 2017, 30–31).

17. Sa saunoa mai Peresitene Russell M. Nelson: “E i ai i latou e faailogaina i tatou [o ni] tagata faailogalanu, ae o tagata faailogalanu o i latou ia latou te lē faatagaina i tatou e lagona mea e pei ona tatou lagonaina ae mananao ia i tatou e faatagaina i latou ia lagona mea e pei ona latou lagonaina. O lo tatou tulaga e faavae atoa i le tulafono o le ola mama. O Tulafono e Sefulu o loo aoga pea. E le’i aveesea lava [pe faaleaogaina]. … E le o sa tatou aia le sui o tulafono ua faatulafonoina e le Atua” (i le Dew, Insights from a Prophet’s Life: Russell M. Nelson, 212).

18. “A o osofaia ai le aiga i le lalolagi atoa, o upumoni o le folafolaga i le aiga o le a faamalosia ai oe.

    “O outou le autalavou o le tofi tautupu e manaomia ona malamalama i taunuuga ogaoga o fetauaiga a le lalolagi i le taimi nei i le faauigaga moni o le faaipoipoga. O le finauga i le vaitau lenei o le fesili lea pe mafai ona faaipoipo ni tagata se toalua o le itupa e tasi. Afai e i ai sau fesili e uiga i le tulaga o le Ekalesia e faatatau i lenei mea po o soo se faafitauli taua lava, ia mafaufau loloto i ai ma le agaga tatalo, ona gauai atu lea i savali faaperofeta i le konafesi aoao a le Ekalesia o loo loma ia Oketopa. O na lauga musuia, faaopoopo i ai ma musumusuga mai le Agaga Paia, o le a aumaia se malamalamaaga atoatoa i lou mafaufau” (Russell M. Nelson, “Youth of the Noble Birthright: What Will You Choose? [Church Educational System devotional for young adults, Jan. 13, 2013), broadcasts.lds.org

19. Russell M. Nelson, “Tutu Atu o ni Tagata Moni o le Meleniuma,,” Liahona, Oke. 2016, 53.

20. Sa saunoa mai Peresitene Nelson: “O faigamalo i le lotoifale ua malosi le faatosinaina e faiga faaagafesootai ma filosofia faalelalolagi a o latou tusia, ma toe tusia, ma faamalolosia tulafono. Po o a lava tulafono faalemalo e ono faavaeina, o le aoaoga faavae a le Alii e faatatau i le faaipoipoga ma le ola mama e le mafai ona suia. Ia manatua: o le agasala, e tusa lava pe ua faatagaina e tagata, o le agasala lava i le silafaga a le Atua!” (“O Faaiuga mo le Faavavau,” Liahona, Nov. 2013, 108).

21. Ioane 6:66–69.

22. Tagai i le Alema 32:41–43; E faagaeetia pea a’u i taimi uma i lenei mataupu maoae e uiga i le tuputupu a’e o lo tatou faatuatua, uiga mama o le faatuatua, onosai, ma le filiga ia e ta’ua faatasi i fuaiupu taitasi o fuaiupu mulimuli e tolu.

23. Tagai i le Alema 7:12; E le gata na puapuagatia Iesu Keriso mo a tatou agasala ae mo o tatou foi vaivaiga: “O le a ia ave i ona luga le oti, ina ia mafai ona ia tatalaina noataga o le oti ia ua noatia ai ona tagata; ma o le a ia ave i ona luga o latou vaivaiga, ina ia mafai ona faatumuina ona loto i le alofa mutimutivale, e tusa ai ma la le tino, ina ia mafai ona ia silafia e tusa ai ma la le tino, le ala e fesoasoani ai i ona tagata, e tusa ma o latou vaivaiga.” (O upu uiga tutusa mo vaivaiga o le ma’i, le atoatoa, mafatiaga, faaletonu.) Tagai i le Mataupu Faavae ma Feagaiga 88:6: “Na afio ifo o ia i lalo o mea uma, lea na malamalama ai o ia i mea uma, ina ia mafai ona i ai o ia, o le malamalama o le upumoni, i mea uma ma ala atu i mea uma.”