Saunia mo le Toe Afio Mai o le Alii
O Le Ekalesia a Iesu Keriso o le Au Paia o Aso e Gata Ai ua matuai faamalosia i se tulagaese ma ua poloaiina e faataunuu sauniuniga talafeagai mo le Afio Mai Faalua o le Alii.
I le lua vaiaso, o le a tatou faamanatuina ai le Eseta. Ua faamaonia mai e le Toetu le paia o Iesu Keriso ma le moni o le Atua le Tama. E liliu atu o tatou manatu i le Faaola, ma tatou mafaufau loloto ai i “Lona soifua le mafaatusalia ma le uiga mama lē mafuatia o Lana taulaga togiola sili.” Ou te faamoemoe tatou te mafaufau foi e uiga i Lona toe afio mai o loo faatalitalia pe a “pule o Ia o le Tupu o Tupu ma … Alii o Alii,”
I se taimi ua mavae i Buenos Aires, Atenitina, sa ou auai atu ai i se konafesi ma ni taitai mai se vaega lautele eseese o tapuaiga faalelotu. O lo latou alolofa mo o latou uso a tagata sa le mafaaseseina. Sa latou tuuto atu i le laveaiina o tagata o ē na mafatia ma fesoasoani i tagata ia tulai ae i luga atu o sauaga ma le mativa. Sa ou toe mafaufau i le tele o fesoasoani agaalofa a lenei Ekalesia, e aofia ai ni galuega faatino e galulue faatasi ai ma le toatele o vaega faatuatua o loo i ai i le konafesi. Sa ou lagona le lotofaafetai loloto mo le lima foai o tagata o Le Ekalesia a Iesu Keriso o le Au Paia o Aso e Gata Ai lea ua mafai ai ona faia ia ituaiga auaunaga FaaKeriso.
I lena taimi, na faamaonia mai e le Agaga Paia ni mea se lua ia te a’u. Muamua, o le galuega o auaunaga i manaoga faaletino e taua ma e tatau ona faaauau pea. O le lona lua sa le’i faamoemoeina, ae na mamana ma manino. O le mea lenei: i tua atu o le auaunaga lē manatu faapito, e matua taua lava le saunia o le lalolagi mo le Afio Faalua Mai o le Alii o Iesu Keriso.
Pe a afio mai o Ia, o faiga saua ma le lē tonu e lē gata o le a faaitiitia, ae o le a faamutaina:
“O le a nonofo faatasi foi le luko ma le tamai mamoe, ma o le a taoto le nameri faatasi ma le tamai oti, ma o le a faatasi le tamai povi ma le tamai leona ma povi pepeti; ma o le a taitaiina i latou e le tamaitiiti. …
O le a latou lē faamanuʼa pe faaumatia i se mea i loʼu mauga paia atoa; ona o le a tumu le lalolagi i le malamalama o le Alii e pei ona ufitia le sami i vai.”
E lē gata o le a faaitiitia le mativa ma mafatiaga; ae o le a mouese atu:
“Latou te le toe fia aai, e le toe fia inu foi; e le ogotia i latou i le la, po o se vevela.
“Aua o le Tamai Mamoe o loo i luma o le nofoalii na te fafaga ia i tatou ma taitai ia te i tatou i puna o vai ola; e soloieseina foi e le Atua o loimata uma nai o latou mata.”
E oo lava i le tiga ma le faanoanoa o le oti o le a lē toe i ai.
“I lena aso o le a lē oti se tamameamea seia matua o ia; ma o lona ola o le a pei o tausaga o se laau;
“Ma pe a oti o ia o le a lē moe o ia, o lona uiga i le eleele, ae o le a liua i le emo o le mata, ma o le a segia i luga, ma o le a mamalu lava lona malologa.”
O lea la ioe, se’i o tatou faia mea uma tatou te mafaia e faamāmā ai mafatiaga ma le faanoanoa i le taimi nei, ma se’i o tatou tuuto atili atu i tatou lava ma le filiga i sauniuniga e manaomia mo le aso o le a faamutaina atoa ai le tiga ma le amioleaga, pe a “nofotupu lava Keriso i le lalolagi; ma … faafouina le lalolagi ma maua lona mamalu faaparataiso.” O le a avea ma se aso o le togiolaina ma le faamasinoga. Sa faamatalaina ma le talafeagai e le Epikopo na muamua atu o le Lotu Anelikana o Durham, Dr. N. T. Wright, le taua o le Togiola a Keriso, Toetu, ma le Faamasinoga i le faatoilaloina o faamasinoga lē tonu ma le faasa’oina o mea uma.
Fai mai a ia “Ua atofaina e le Atua se aso o le a ia faaamasinoina ai ma le tonu le lalolagi e se tagata na ia tofiaina—ma o lenei mea ua ia tuuina mai ai le faamautinoaga i tagata uma e ala i le toe faatuina mai o lenei tagata mai le oti. O mea moni e uiga ia Iesu o Nasareta, ma aemaise lava i lona toetu mai le oti, o le faavae lea o le faamautinoaga o le lalolagi e leai se uiga. E le o se mea e mulimuli ane avea ma se lē mautonu; faapea a tatou faia le faamasinoga tonu i le taimi nei tatou te lē mapumapu i le pogisa, taumafai e fausiaina se fale o le a i’u lava ina pa’ū, po o le lipea o se taavale lea o le a i’u lava ina pe. Ina ua faatuina e le Atua Iesu mai le oti, o se gaoioiga itiiti lea na aofia ai le gaoioiga sili o le faamasinoga tonu o loo i ai i se atigi, [o le] fatulaau, … o le faamoemoega sili. Na tautino mai e le Atua, i se auala sili ona malosi e mafaufauina, o Iesu le Nasareta sa avea moni lava ma Mesia. … I se tulaga sili ona ofoofogia o le talafaasolopito, na feagai [Iesu] lava ia ma se faamasinoga saua ma le lē tonu, na sau mai le nofoaga na faatusaina ma tuufaatasia ai le tele o sauaga ma faiga lē tonu o le talafaasolopito, ia tauaveina na vevesi, lena pogisa, lena saua, lena faiga le tonu, ia te ia lava, ma faaumatia ai lona mana.”
A o o’u i ai i le konafesi i Buenos Aires lea na ou ta’ua muamua, na faamanino mai e le Agaga ia te a’u, o Le Ekalesia a Iesu Keriso o le Au Paia o Aso e Gata Ai ua matuai faamalosia i se tulagaese ma ua poloaiina e faataunuu sauniuniga talafeagai mo le Afio Mai Faalua o le Alii; ioe, sa toefuatai mai mo lena faamoemoega. E mafai ona e maua i se isi lava mea se nuu o ē taliaina le vaitau lenei e pei ona valoiaina o le “[tisipenisione] i le faaatoaga o tausaga” lea ua faamoemoe ai le Atua e “[faapotopoto faatasi mea uma ia tasi] ia Keriso”? Afai e te lē maua iinei se nuu ua faamoemoe i le ausiaina o mea e tatau ona ausiaina mo ē uma o soifua ma maliliu e saunia ai mo lena aso, afai e te lē maua iinei se faalapotopotoga ua loto e tuuto atu ni aofaiga tetele o taimi ma tupe i le faapotopotoina ma le sauniaina o se nuu o le feagaiga ua saunia e talia le Alii, e te lē mauaina lava la i se isi nofoaga.
I le fetalai atu ai i le Ekalesia i le 1831, na tautino atu e le Alii:
“O ki o le malo o le Atua ua tuu atu i tagata i luga o le lalolagi, ma mai iina o le a taavale atu ai i luma le talalelei i tuluiga o le lalolagi, e pei ona o le a taavale atu le maa na tofi mai le mauga e anunoa ma lima, seia tumu ai le lalolagi atoa. …
“Valaau atu i le Alii, ina ia alu i luma lona malo i luga o le lalolagi, ina ia maua e e o nonofo ai, ma sauni mo aso o le a oo mai, lea o le a afio mai ai i lalo le Atalii o le Tagata o i le lagi, ua laei i le pupula o lona mamalu, e fetaiaʼi ma le malo o le Atua ua faatu i luga o le lalolagi.”
O a ni mea e mafai ona tatou faia e saunia ai i le taimi nei mo lena aso? E mafai ona tatou sauinia i tatou lava o se nuu; e mafai ona tatou faapotopoto maia le nuu o le feagaiga a le Alii; ma e mafai ona tatou fesoasoani e toefuatai le folafolaga o le faaolataga “na faia i tamā,” o tatou tuaa. O nei mea uma e tatau ona tupu i se fuataga maualuga atu a o le’i toe afio mai le Alii.
Muamua, ma e taua tele mo le toe afio mai o le Alii, le i ai i luga o le fogaeleele o se nuu ua saunia e talia o Ia i Lona afio mai. Na Ia fetalai mai o i latou o ē o totoe i luga o le fogaeleele i lena aso “mai lava i lē ua aupito itiiti e oo atu i lē aupito sili, … o le a faatumulia i le malamalama o le Alii, ma o le a vaai mata i le mata, ma o le a sii aʼe o latou leo, ma o le a latou pepese faatasi ma le leo le pese fou lenei, fai mai: Ua toe aumai e le Alii Siona. … Ua faapotopoto e le Alii mea uma i le mea e tasi. Ua aumai e le Alii Siona i lalo mai lugā. Ua avaʼe i luga e le Alii Siona mai lalō.”
I aso anamua, na ave ai e le Atua le aai amiotonu o Siona ia te Ia Lava. E faapena foi, i aso e gata ai o le a talia e se Siona fou le Alii i Lona toe afio mai. O Siona o ē mama loto, o se nuu e tasi le loto ma tasi le mafaufau, e nonofo i le amiotonu ma e leai sē mativa i totonu o i latou. Na saunoa mai le Perofeta o Iosefa Samita, “E tatau ona tatou avea le faatuina o Siona ma o tatou faamoemoega silisili.” Tatou te faatuina Siona i o tatou aiga, uarota, paranesi, ma siteki i le lotogatasi, amioatua, ma le alofa mama.
E tatau ona tatou faailoa atu o le faatuina o Siona na tupu i taimi faigata—“o se aso o le toasa, o se aso o le susunuina, o se aso o le faatafunaga, o le tagituʼi, o le faanoanoa, ma o le auega; ma o le a oo mai i luga o le lalolagi atoa e pei o se asiosio, ua fetalai mai ai le Alii.” O le mea lea, o le faapotopotoina i siteki e avea “mo se puipuiga, ma mo se sulufaiga mai le afā, ma mai le toasa pe a sasaa mai e aunoa ma le suia i luga o le lalolagi atoa.”
E pei lava o taimi ua mavae atu, sa tatou “potopoto soo faatasi, e anapopogi ma tatalo, ma talatalanoa, o le tasi i le tasi, e uiga i le uelefea o o [tatou] agaga. Ma … taumamafa i le areto ma le [vai], i le faamanatuina o le Alii o Iesu.” E pei ona faamalamalamaina e Peresitene Russell M. Nelson i le konafesi aoao ia Oketopa ua te’a, “O le faamoemoega lava o le Ekalesia ua leva ona i ai o le fesoasoani lea i tagata uma ia faateleina lo latou faatuatua i lo tatou Alii o Iesu Keriso ma i Lana Togiola, ia fesoasoani ia i latou i le osia ma le tausia o a latou feagaiga ma le Atua, ma ia faamalosia ai ma faamauina o latou aiga.” E tusa ai ma lea mea, sa ia faamamafa mai le taua o feagaiga o le malumalu, le faapaiaina o le Sapati, ma le taumamafa fiafia i aso uma i le talalelei, e faatotonugalemuina i le aiga ma lagolagoina e se mataupu aoaoina ua tuufaatasia mo suesuega i le lotu. Tatou te fia iloa e uiga i le Alii, ma e tatou te fia iloa le Alii.
O le taumafaiga autu i le faatuina o Siona o le faapotopotoina lea o le nuu o le feagaiga a le Alii ua loa ona faataapeapeina. “Matou te talitonu i le faapotopotoina moni o Isaraelu ma le toefuataiga mai o Ituaiga e Sefulu.” O tagata uma o ē o le a salamo, talitonu ia Keriso, ma papatisoina, o Lona nuu lena o le feagaiga. Na valoia e le Alii Lava Ia a o le’i oo i Lona afio mai, o le a tala’i atu le talalelei i le lalolagi uma “e toe aumai [Ona] tagata, o e o le aiga o Isaraelu,” “ma ona oo mai ai lea o le iuga.” Ua faataunuuina le valoaga a Ieremia:
“A e ui i lea, faauta, e oo mai ona po, o loo fetalai mai ai Ieova, e le toe fai ane ai tagata, O loo soifua Ieova, o Le na aveina ae le fanauga a Isaraelu nai le nuu o Aikupito;
“Ae faapea, o loo soifua Ieova, o Le na aveina ae le fanauga a Isaraelu nai le nuu i le itu i matu, ma nuu uma na i ai i latou: aua ou te faafoisia mai i latou i lo latou laueleele, na ou foaiina atu i o latou tamā.”
Na faamamafa mai pea lava pea e Peresitene Nelson faapea o le “faapotopotoina [o Isaraelu] o le mea aupito sili lea ona taua o loo tupu i le lalolagi i le taimi nei. E leai se isi mea e faatusalia i lona maoae, e leai se isi mea e faatusalia i le taua, e leai se isi mea e faatusalia i le malualii. Ma afai e te filifili ai, … e mafai ona avea oe o se vaega tele o lena mea.” O le Au Paia o Aso e Gata Ai ua avea pea ma se nuu faafaifeautalai. E faitau afe na tali atu i valaau faamisiona talu mai le amataga o le Toefuataiga; e fia sefulu afe o loo auauna atu i le taimi nei. Ma, e pei ona faatoa uma ona aoao atu e Elder Quentin L. Cook, e mafai ona tatou auai uma i ni auala faigofie ma masani ai, i le alofa, valaauliaina o isi e auai ma i tatou i le lotu, asiasi i o tatou aiga, avea ma se vaega o la tatou li’o. O le lolomiina o le Tusi a Mamona o se faailoga lea ua amataina le faapotopotoina. O le Tusi a Mamona lava ia o le meafaigaluega o le faapotopotoina ma le liuaina.
E taua foi i le sauniuniga mo le Afio Faalua Mai o le taumafaiga sili lea o le togiolaina o o tatou tuaa. Na folafola mai e le Alii e auina mai Elia le perofeta a o le’i oo i le Afio Faalua Mai, “le aso tele ma le matautia o le Ieova,” e “faaali atu … le Perisitua” ma “toto i loto o fanau folafolaga na faia i tamā.” Na oo mai Elia e pei ona folafolaina. O le aso 3 o Aperila, 1836, o le nofoaga o le Malumalu o Katelani. I lena lava nofoaga ma i lena lava taimi, na ia faaee atu ai le perisitua na folafolaina, ki mo le togiolaina o ē ua maliliu ma le faatasia o tane, avā, ma aiga i augatupulaga uma i le olaga nei ma le faavavau atoa. A aunoa ma lenei mea, o le a lē faataunuuina le faamoemoega o le foafoaga, ma i lena tulaga, o le a “fetuuina” le lalolagi po o le “matuai faatafunaina.”
I le faigalotu a le autalavou a o lumanai le faapaiaga o le Malumalu o Roma Italia, na faaali atu ai e le fiaselau o alii ma tamaitai talavou sa auai ia Peresitene Nelson ni kata na latou saunia o i ai igoa o o latou tuaa . Na latou sauni e ulu atu i le malumalu e faatino papatisoga sui mo na tuaa i le taimi lava na matala ai. O se taimi matuai faamalieloto, ae o se tasi o faataitaiga o taumafaiga faanatinati e faatuina Siona mo augatupulaga na muamua atu.
A o tatou taumafai ina ia filiga i le faatuina o Siona, e aofia ai la tatou vaega i le faapotopotoina o le au filifilia a le Alii ma le togiolaina o ē ua maliliu, e tatau ona tatou taofi ina ia manatua o le galuega lenei a le Alii ma o loo Ia faia. O Ia o le Alii o le tovine, ma o i tatou o Ana auauna. Na Ia talosagaina i tatou e galulue i le tovine ma lo tatou malosi i lenei “taimi mulimuli” ma e galue o Ia faatasi ma i tatou. Atonu o le a sili atu ona saʻo le faapea atu ua Ia faatagaina i tatou e galulue faatasi ma Ia. E pei ona fai mai Paulo, “Na ou totoina, na faasusuina e Apolo; a e peitai o le Atua ua faatupuina.” O Iea la o loo faanatinatiina Lana galuega i lona taimi. O le faaaogaina o a tatou taumafaiga lē atoatoa—o a tatou “ala faatauvaa”—e faataunuu ai e le Alii mea tetele.
O loo fausiaina ma le mausali lenei tisipenisione maoae ma le mulimuli i lona tumutumuga—o le a tuufaatasia le Siona i le lalolagi ma Siona mai lugā i le afio mai ma le mamalu o le Faaola. Ua poloaiina le Ekalesia a Iesu Keriso ia saunia—ma o loo saunia—le lalolagi mo lena aso. Ma, i lenei Eseta, ia tatou faamanatuina moni le Toetu o Iesu Keriso ma mea uma e faatatau i ai: Lona afio mai e nofotupu mo le afe tausaga o le filemu, o se faamasino amiotonu ma le faamasinoga tonu mo tagata uma, o le tino ola pea o i latou uma o e na soifua i luga o lenei lalolagi, ma le folafolaga o le ola e faavavau. O le Toetu o Keriso o le faamautinoaga tupito lea o le a faasa’oina mea uma. Se’i o tatou faatuina Siona ia faanatinati mai ai lena aso. I le suafa o Iesu Keriso, amene.