Talatuu e Valu e uiga i le Salamo

Afai e te le mautinoa po o le a se mea e tatau ona e salamo ai ma po o afea, o ni tali la nei.

E le faigofie le salamo, ma o nisi taimi e tiga. Ae e mafai ona e faia. E manaomia ai le suiga ma le lotomaualalo, ma e mafai ona e faia! O nisi nei o talatuu masani e uiga i le salamo ma ni tali e matuai lelei lava.

Talatuu #1: Ou te manatua pea la‘u agasala, o lona uiga e lei faamagaloina au.

“O le a taumafai Satani e faatalitonu i tatou e le faamagaloina a tatou agasala aua e mafai ona tatou manatuaina. O Satani o le pepelo; e taumafai o ia e faapuaoa la tatou vaaiga ma taitai ese mai ai i tatou mai le ala o le salamo ma le faamagaloga. E lei folafola mai le Atua faapea, o le a tatou le manatuaina a tatou agasala. O le manatuaina o le a fesoasoani ia i tatou e aloese mai ai i le toe faia o mea sese lava na. Peitai, afai tatou te tumau i le moni ma le faamaoni, o le a oo ina manifinifi le manatua o a tatou agasala.”¹

—Peresitene Dieter F. Uchtdorf

Talatuu #2: O loo ou lagona pea le tausalaina, o lona uiga e lei faamagaloina au.

“Mo i latou o e ua salamo faamaoni ae e foliga mai e le o mafai ona lagona le mapusaga: ia faaauau pea ona tausi poloaiga. Ou te folafola atu ia te outou, o le a oo mai lena mapusaga i le taimi lava a le Alii. O le faamaloloina e manaomia ai foi le taimi.”²

—Elder Neil L. Andersen

Talatuu #3: O mafaufauga leaga e oo mai i lo‘u mafaufau, ma e leai se mea e mafai ona ou faia i ai.

“O nisi mafaufauga leaga e o mai lava latou. O isi e oo mai aua ua tatou valaauliaina i latou e ala i mea tatou te vaai ma faalogo i ai. O le talanoa i ai po o le matamata i ni ata leaga … e mafai ona faaosofia ai lagona malolosi. O le a faaosoosoina ai oe e matamata i [vitio] po o ata tifaga leaga. O nei mea o loo siomia ai outou, ae e le tatau ona outou auai ai. Ia galulue i le tausia mama o outou mafaufauga e ala i le mafaufau i se mea lelei. O le mafaufau e na o le tasi le mea e mafai ona mafaufau i ai i le taimi. Faaaoga lena mea moni e tulei ese ai mafaufauga mataga. I mea uma, aua e te fafagaina mafaufauga e ala i le faitauina po o le matamata i mea e sese. Afai e te le pulea ou mafaufauga, o Satani o le a faaauau ona faaosoosoina oe seia oo ina e faatinoina na mafaufauga.”³

—Elder Richard G. Scott (1928–2015)

Talatuu #4: E le mafai ona alofa le Atua ia te au ona o au mea sese.

“E alofa le Atua i Ana fanau uma, ma o le a le uma lava Lona alofa ma le faamoemoe mo i tatou. E manino lava le fuafuaga a lo tatou Tama Faalelagi, ma e maoae foi Ana folafolaga: ‘E lei auina mai e le Atua lona Atalii i le lalolagi ina ia faasala i le lalolagi; a ia … faaolaina le lalolagi’ (Ioane 3:17).”⁴

—Peresitene Dieter F. Uchtdorf

Talatuu #5: E leaga tele au agasala ma e le mafai ona faamagaloina au.

“Pe o le a le tele o avanoa e te manatu ua e misia, pe o le a foi le tele o mea sese e te lagona sa e faia, po o ni taleni e te manatu e te le o mauaina, po o le a foi le mamao ese mai le aiga ma le Atua e te lagona ua oo i ai lau malaga, ou te molimau atu e te lei malaga lava i se mamao e le mafai ona aapa atu i ai le alofa faalelagi. E le mafai ona e magoto ia maualalo ifo nai lo le malamalama le gata o le Togiola a Keriso e aapa atu ai ia te oe.⁵

—Elder Jeffrey R. Holland

Talatuu #6: Ou te le o toe faia se agasala matuia, o lea ou te le manaomia ona vaai le epikopo. E mafai ona ou tatalo lava ma lelei ai, po o le na ona ta‘u i ou matua.

“Na tautino mai e le Alii o le epikopo o se faamasino o Isaraelu (tagai i le MF&F 107:72, 74). Ua ia te ia le tiutetauave e fuafua ai po o agavaa tagata o lana uarota. E ala i le faauuga ma le ola amiotonu, ua agavaa le epikopo i faaaliga mai le Agaga Paia e faatatau i tagata o lana uarota, e aofia ai oe.

“E mafai ona fesoasoani le epikopo ia te oe i le faagasologa o le salamo i auala e le mafai e ou matua po o isi taitai ona tuuina atu ai se fesoasoani. Afai e ogaoga tele le agasala, e mafai ona ia fuafua pe tatau ona faatapulaaina ou aia i le Ekalesia. Mo se faataitaiga, i le avea ai ma se vaega o le faagasologa o lou salamo, atonu na te talosagaina oe e taofi mai le ai ma inu i le faamanatuga po o le faaaogaina o le perisitua mo se vaitaimi. O le a oulua galulue faatasi e fuafua le taimi e te toe agavaa ai e toe faaauau ai na gaoioiga paia.”⁶

—Elder C. Scott Grow

Talatuu #7: E le mafai ona ou talanoa i le epikopo ona o le a vaai maualalo ai ia te au.

Ou te folafola atu ia te oe na te le tausalaina oe. I le avea ai ma se auauna a le Alii, o le a ia agalelei ma malamalama ao ia faalogo atu ia te oe. O le a ia fesoasoani ia te oe i le faagasologa o le salamo. O ia o le avefeau o le alofa tunoa o le Alii e fesoasoani ia te oe ina ia mama e ala i le Togiola a Iesu Keriso.”⁷

—Elder C. Scott Grow

Talatuu #8: Ua ou toe faia foi, o lea ou te le agavaa ai ina ia faamagaloina. Atonu e le mafai ona ou suia.

“O nisi taimi i a tatou taumafaiga i aso taitasi ia avea atili e faapei o Keriso, tatou te tauivi ai pea lava pea ma faafitauli lava e tasi. E i ai taimi tatou te le iloa ai lo tatou alualu i luma seiiloga tatou te latalata atu i le tumutumu ma toe vaai ifo ai mai tumutumu mauga maualuluga. Ia aua le lotovaivai. Afai o loo e taumafai ma galue ia salamo, ua e i ai i le faagasologa o le salamo.”

“I le taimi lenei, se tasi o loo faapea mai, ‘Uso Andersen, e te le malamalama. E le mafai ona e lagonaina le mea na ou lagonaina. E faigata tele le suia.’

“E te sa‘o; ou te le malamalama atoatoa. Ae o loo i ai se Tasi na te faia. Ua Ia silafia. Sa ia lagonaina ou tiga. Ua ia folafola mai, “Ua ou taia lou faatusa i ou alofilima” [Isaia 49:16]. O le Faaola o loo i ai, ma aapa mai ia i tatou, talosagaina i tatou: ‘O mai ia te au’ [3 Nifae 9:14]. E mafai ona tatou salamo. Tatou te mafaia!”⁸—

Elder Neil L. Andersen

O le Salamo e Suia ai Oe

O le maua o le avanoa e lagonaina ai le faamagaloina o se mea e taua tele ia te au. E te lagona moni lava le saoloto mai se avega mamafa i lou loto, ma e te lagona le alofaina ma le faamafanafanaina. Afai o se luitau le suia, e aoga le taumafai. E matua suia lava oe i se isi tagata, o le tagata e finagalo le Atua e avea ai oe, o le tagata na e sau i le lalolagi e tauivi ina ia avea ai, ma ia sili atu! Ia Maua le Lototele!

Rodrigo Octavio A.

A uma ona Tautau Atu, O le a E Maua se Lagona Lelei

Atonu e te popole i le mea o le a tau atu e lau epikopo, po o le a lona mafaufau ia te oe. O le a le faamaonia lava, ou popolega e moni. E pau lava lona manao o le fesoasoani ia te oe. O le a ia le faamasinoina pe tausalaina oe. O le a malamalama lou epikopo. Ma a uma ona ta’uta’u atu, o le a e maua se lagona e faitau miliona taimi e sili atu ai ona lelei, ma pe a fai e te mama, e ofoofogia. Afai e i ai sou faafitauli, foia nei loa. O le vave ona e faia, o le vave lea ona e mama ma maua le olioli.

Molly Jeanette T.

E le Manaomia Ona Vaai le Epikopo?

O se taimi ua mavae sa ou agasala, ona faia lea o se tatalo ma mafaufau ua ou salamo faamaoni. I se tasi aso sa ou maua ai se lagona maoae i lo‘u loto e tatau ona fai se talanoaga faamaoni lava ma le epikopo. Sa ou talanoa i le epikopo, ma na ia taitaia au i le mea e tatau ona ou faaleleia atili ai. Sa ou anapogi ma ofoina atu ni tatalo faatauanau. O le taimi lea sa ou lagonaina sa ou salamo faamaoni. Ou te iloa e alofa le Tama Faalelagi mo i tatou ma o le Togiola a Keriso tatou te maua ai le faamagaloga moni pe a tatou salamo, ma ta’uta’u atu a tatou agasala.

Awrellyano Gomes da S.

Po o le a Lava le Tele o le Agasala, e Mafai Lava Ona e Salamo

Na onosaia e Iesu Keriso le Togiola mo i tatou ina ia mafai ona tatou salamo i a tatou agasala. Ua faafia ona saunoa mai perofeta e tusa lava pe o le a le tele po o le laitiiti o le agasala, e mafai lava ona e salamo. E finagalo le Faaola ia e salamo, ma e finagalo o Ia e fesoasoani ia te oe. Ae Na te le mafai ona faamalosia Lona ala i lou olaga; e tatau ona e talia o Ia ma tuu atu ia te Ia ia iloa e ala i le tatalo e te manao pe manaomia o Ia i lou olaga. I o’u tofotofoga uma, ou te iloa e alofa le Atua ia te au.

Madison B.

E Mafai Ona E Faia

Ia i latou o e ua pauu, tu oe lava i luga. E i ai ou taitai ma tagata o e alolofa ia te oe ma e mananao e avea oe ma se tagata e sili ona lelei i le mea e mafai ona avea ai oe. E mafai ona outou faia faatasi lena mea. Ia manatua pea o Iesu Keriso e alofa ia te oe ma e faatasi ma oe i laasaga uma.

Michael Lee T.

E Finagalo le Atua ia E Salamo

Salamo—oka o se meaalofa ofoofogia mai lo tatou Tama oi le Lagi. Ua Ia tuuina mai ia i tatou le avanoa e avea ai faapei o Ia e ala i le Togiola a Keriso. E finagalo o Ia ia tatou salamo, e o mai ia te ia. E faapei o Korianetona, o le a tatou faia uma lava ni mea sese, o nisi e ogaoga atu i lo isi, ae tatou te faia UMA lava. E faapei foi o Korianetona, e mafai ona tatou salamo ma suia lo tatou olaga. (Tagai Alema 39–42.) E lava le alofa o le Tama Faalelagi ia i tatou e finagalo ai o Ia ia tatou toe foi atu ia te Ia. E tusa lava po o a mea ua e faia, o loo i ai se ala e toe foi atu ai i le filemu ma le fiafia.

Mckayla J.