Faamanuiaga O Le Aso Sapati
O le Au Paia i le lalolagi atoa e talanoa pe ua faapefea ona faamanuiaina o latou olaga i ni auala tulaga ese ona o lenei aso faapitoa, ma paia.
Ata na tusia e Pascal Campion
Vaai faalemafaufau ia te oe lava ua taliaina le valaaulia e sili ona taua o lou olaga: o se avanoa e faaalu ai se aso e faatasi ai ma Iesu Keriso. E faapefea ona e saunia faaleagaga ma faaletino mo se aso faapena? O a ni faamanuiaga atonu e te faamoemoe o le a oo mai i se asiasiga faapena?
Ua valaaulia i tatou taitoatasi e le Alii e faaavanoa se aso e talanoa ai ma Ia—le aso Sapati, lea na Ia faamanuiaina ma faapaiaina (tagai i le Esoto 20:11). O a ni faamanuiaga ua e fiafia ai ona o lou tausia o le paia o le aso Sapati? O ni manatu nei mai le Au Paia i le salafa o le lalolagi e mafai ona uunaia ai ni ou lava manatu ma uunaiga.
Latalata i le Atua ma Keriso
Na iloa e Sister Andrea Julião, mai São Paulo, Pasila, e pei lava o le mafutaga ma uo faalelalolagi e tuputupu ae malosi pe a tatou mafuta faatasi, o lo tatou sootaga ma le Tama Faalelagi o le a malosi atu pe a tatou taulai atu ia te Ia e ala i le tapuai i le Sapati.
A o asiasi atu i aiga e le o ni tagata o le Ekalesia, na filifili ai Tuafafine Julião e ala vave i le aso Sa ma taumafai e saili se lotu o le Au Paia o Aso e Gata Ai i le eria. Ao saunia lona aiga mo se aso o gaoioiga faafiafia ofoofogia, na sailia e Sister Julião le pitonuu seia oo ina ia feiloai atu i se tasi lea na faailoa mai se tumutumu o le falelotu i se mea mamao. Sa mafai e Sister Julião ona auai i sauniga o tapuaiga. “Sa ou maua se aso Sapati e aupito sili ona matagofie,” o lana tala lea. “Sa ou matuai lagonaina le alofa o le Tama Faalelagi. Sa ou lagonaina sa Ia olioli pe a usitai Ana fanau i Ana aoaoga. Sa ou mauaina se molimau e sili atu le malosi o le Ekalesia a Iesu Keriso.”
Faamalologa ma le Toomaga
O Peresitene Russell M. Nelson, o le Peresitene o le Korama a Aposetolo e Toasefululua, na saunoa e uiga i le auala na faamanuiaina ai lona olaga o se polofesa talavou e le aso Sapati: “Sa ou iloaina muamua lava o le Sapati o se aso fiafia i le tele o tausaga ua mavae a o avea ma se fomai tipitipi pisi, na avea le Sapati ma se aso mo le faamalologa faaletagata lava ia. E oo atu i le faaiuga o vaiaso taitasi, ua tiga ou lima mai le olo soo i le fasimoli, vai, ma se palasi e malo nifo. Na ou manaomia foi se malologa mai le mamafa o se galuega faigata. O le Aso Sa la na maua ai lena toomaga sa sili ona manaomia.”1
Mauaina o le Taimi mo le Talafaasolopito o Aiga
E lei leva talu ai nei, na tuuina mai ai e Eliza e 10-tausaga mai Edmonton, Alberta, Kanata, se lauga i le sauniga faamanatuga i se auala se tasi o le taulai atu i gaoioiga e talafeagai i le Sapati ua faamanuiaina ai lona olaga. Aua o Eliza o nisi taimi sa tauivi ma le musua i aso Sa, o ia ma lona aiga na filifili o le faasino igoa o le a avea o se gaoioiga lelei lea e taumafai i ai. E lei umi ae iloa e Eliza e fiafia o ia e galue i igoa ma faamaumauga. “Pe a ou amata, ou te fia faia pea e faavavau,” sa ia faasoa atu i le faapotopotoga.
Ina ua faalogo le tinamatua o Eliza e fiafia tele o ia i talafaasolopito o aiga, sa ia aoaoina Eliza pe faapefea ona faaopoopo tala ma ata i le gafa a lo latou aiga i le initoneti. “E matuai faafiafia loto lava, ou te fiafia i ai!” Le tala lea a Eliza. “Pe a ou faia galuega o talafaasolopito o aiga, ou te lagona le agaga o Elia. O se lagona matagofie.”
O se Agaga Siitia
Na molimau mai Sister Cheryl A. Esplin, fesoasoani muamua i le au peresitene aoao o le Peraimeri, i le faamanuiaga o le taumafa i le faamanatuga i le aso Sapati: “Pe a ou ‘ai ma inu i le faamanatuga, ou te vaai faalemafaufau atu i nisi taimi i se atavali o loo faaali mai ai le Faaola toetu ma Ona aao o loo faaloaloa mai, e pei ua Ia saunia e talia i tatou i Lana opo agaalofa. Ou te fiafia i lenei atavali. Pe a ou mafaufau i ai i le taimi o le faiga o le faamanatuga, e siitia lo‘u agaga e pei e mafai ona toetoe lava a ou faalogo i fetalaiga a le Faaola: ‘Faauta, ua faaloaloa atu ia te outou lou lima alofa mutimutivale, ma o soo se tasi e sau, o ia lea o le a ou taliaina; ma amuia lava i latou o e e o mai ia te au’ [3 Nifae 9:14].”2
O Avanoa e Auauna Atu ai
O Elder L. Tom Perry (1922–2015) o le Korama a Aposetolo e Toasefululua na aoao mai o se tasi o mafuaaga e manaomia ai le malolo mai a tatou galuega i le aso Sa e aveese ai i tatou mai “le avanoa e auauna atu ai i isi.”3
O le auauna atu i le Sapati o se mea na amata ai ona alofa Sister Zola Adjei a o tuputupu ae i le Paranesi o Kpong i Ghana. A o i ai i le aiga mai le aoga nofotumau i le taimi o le taumafanafana, sa o o ia ma isi talavou i ni vaega e asiasi i tagata o le latou paranesi latou te le‘i toe vaaia mo sina taimi. “Sa avea o se osigataulaga ona o le toatele o i matou na lagona le fiaaai i le tuua o le lotu, ma sa matou mamao mai i o matou aiga na le maua ai se taimi e aai ai ma toe potopoto mai,” o le tala lea a Sister Adjei. Ae o le osigataulaga sa matua aoga lava, ona sa mafai ona latou tatalo ma usu ia viiga faatasi ma tagata o lo latou paranesi ma valaaulia i latou i le lotu ma gaoioiga. O se tasi o le autalavou na ofo atu e savavali faatasi ma i latou i le lotu i le aso Sa na sosoo ai.
“O lenei faiga masani na faia se sootaga i totonu o i matou,” o le tala lea a Sister Adjei. “O nisi o i matou na tumau o ni uo malolosi mai i faaiuga na matou faia e o ma toe aumaia a matou uo ua leiloloa i le faaaogaina o ni nai itula o lo matou aso Sapati.”
Avanoa Faafaifeautalai
I le lalolagi o aso nei, o le faia o le aso Sa o se aso paia o le a mautinoa lava le faapitoa ai o i tatou—ma tuu mai ai ia i tatou avanoa e faasoa atu ai le talalelei i se auala masani lava a o matauina e isi le eseesega ia tatou mea masani e fai faalevaiaso. O le au aiga o Davies na oo i lenei aafiaga a o nonofo ai i le motu o Grenada ma le la tama teine laitiiti, o Adrielle. “E leai se tasi o uo a Adrielle o ni tagata o le Ekalesia, ma e ui o le toatele o i latou e talitonu i le Atua, o le aso Sa ia te i latou e na o se isi aso o le faaiuga o le vaiaso,” le faamalamalama mai a Sister McKenzie Lawyer Davies, le tina o Adrielle.
I ni nai masina ua mavae, sa valaaulia ai Adrielle i se pati o le aso fanau i se faletifaga i le aso Sa. Sa filifili lona aiga e momoli atu se meaalofa nai lo le alu i le tifaga ma le pati. “Ona sa na ona matou o atu e ofo atu le faamanuiaga, sa mafai ona faasoa atu ai o matou talitonuga e uiga i le Sapati ia i latou i se auala faauo ma faigofie,” le tala a Sister Lawyer Davies. “Sa ou fiafia ua amata e lau tama teine laitiiti ona faasoa atu le talalelei.”
Puipuiga mai Mea Faalelalolagi
Ua faapea mai le Mataupu Faavae ma Feagaiga 59:9 “Ina ia mafai ona e tausi atili atoatoa oe lava i le le pisia mai le lalolagi, ia e alu atu i le fale tatalo ma osi ae i luga au faamanatuga i lou aso paia.” O perofeta ma aposetolo o aso nei na aoao mai o le manatu o le tausia o i tatou lava “ina ne‘i pisia mai le lalolagi” e i ai se valaaulia ma se faamanuiaga ua folafola mai e galulue faatasi.
Mo se faataitaiga, na aoao mai Peresitene James E. Faust (1920–2007), Fesoasoani Lua i le Au peresitene Sili, ao tatou aloese mai faatosinaga faalelalolagi i le aso Sapati, e faamanuiaina i tatou i le puipuiga mai le ma‘ivalea i mea faalelalolagi: “I nei aso o le faateleina o le faigofie ona maua o oloa ma le mafaufau pea o tagata i mea faaletino, o loo i ai se puipuiga mautinoa mo i tatou ma a tatou fanau mai mala o o tatou aso. O le ki i lena puipuiga mautinoa e ofo ai lava, e mafai lea ona maua i le tausia o le Sapati.”4
Taimi Aoga o le Aiga
Na iloa e le aiga o Olson i Brigham City, Iuta, ISA, o suiga e oo lava i se tasi o vaega laiti o lo latou aso Sapati e aumaia ai faamanuiaga silisili. Nai lo le matamata masani i le televise i le aso Sa, sa latou taulai atu i le ala o faasalalauga e lagolagoina e le Ekalesia. Sa latou iloaina o le matamata i vitio o le Tusi Paia (tagai i le BibleVideos.org) ma a latou fanau e valaaulia ai le Agaga faapea ai ma fesili mai i tamaiti e uunaia ai talanoaga lelei faaleaiga.
“O le le matamata i le Televise i le Sapati na taitai atu i se siitia tele lava o le taulai atu mo au,” o le tala lea a Sister Lacey Olson. “E mafai ona lagonaina e pei ua matua tele naua tulafono e tusa ai ma le aso Sa, ae ou te mafaufau i le aso Sapati o se aso e le faatuaoia e tusa ai ma le auaunaga ma le alofa mama. Afai tatou te filifili ai, o le aso Sapati e mafai ona faaauupegaina i tatou i se faafouina e feagai ai ma le lalolagi i le vaiaso a sau.”
Ua aoaoina i tatou e le Alii i tusitusiga paia e tatau ona tatou “manatua le aso sapati, e te faapaiaina” (Esoto 20:8). Pe a tatou faamamaluina le Sapati o se avanoa taua e maua ai faamanuiaga faaleagaga, o na upu e avea ma se valaaulia mai ia te Ia. O le a faapefea ona tatou tali atu i ai? O a folafolaga ua faapolopolo mo i tatou lava ma o tatou aiga?