Pe I Ai se Mea e Mafai Ona Ou Faia?

Loralee Leavitt, Uosigitone, ISA

Sa ou nofo i lo‘u potu malolo ma tagi. Sa na o ni nai aso talu ona pau lau pepe, ma sa le mafai ona ou taofia le mafaufau e uiga i le oti o si a ma pepe. Sa faamanatu mai e le tele naua o mea le tulaga matautia, ae maise lava o lau kapoti e tumu i lavalava mo failele.

O taimi uma lava ou te alu ai i totonu o lo‘u potu, na foliga mai o loo faataupupula mai ia te au mai i o latou tautau lavalava. O le tele o na ofu sa fou ma e lei faaaogaina, ma na faamanatu mai ai ia te au ou te leo toe maitaga. Sa ou matuai le lava lava e tau tu i luga mo le sili atu nai lo na o ni nai sekone e teu ese.

Na faafuasei lava ona tuitui mai se tasi i lo‘u faitotoa. Ina ua ou tatalaina, sa ou vaaia lo‘u faiaoga asiasi o tu i luma o le faitotoa. O le faiaoga asiasi lava lea e tasi sa vaaia la‘u fanau ina ua faamautinoa mai e lo’u fomai ia i maua ma lo‘u toalua, ua pau lau pepe.

“Pe i ai se mea e mafai ona ou faia mo oe?” sa ia fesili ai.

“Ioe,” na ou fai atu ai. “Ou te manaomia lau fesoasoani i le tuueseina o o‘u lavalava mo failele.”

Sa ou taitai atu o ia i le potumoe, faagaogao pusatoso, ma aveese uma lavalava mai tautau lavalava. Ona ou taoto lea i le moega a o ia gaugau o‘u ofu ma teu faalelei i totonu o pusa. Ina ua uma ona ia faapipiiina pusa ma ave i le fogafale i lalo ina ia ou le toe vaai i ai, sa ou lagonaina lo‘u agaga ua siitia i luga.

Mulimuli ane sa alu o ia i le umukuka, faatumu le masini fuluipu, solo fata, ma faamama—mea na ou le mafai ona faia. Ina ua alu o ia, sa mama lo‘u fale, ua le toe iloa atu ou ofu, ma sa le toe popole tele lo‘u loto.

Na aoao mai le Aposetolo o Ioane, “E leai se fefe i le alofa; ae o le alofa atoatoa e faateaeseina ai le fefe” (1 Ioane 4:18). Pe a tatou aapa atu e faasoa atu le alofa o le Faaola, ua faamalolosia i tatou e ala i Lona lototoa. Talu ai sa faatumulia lo‘u faiaoga asiasi i le alofa o Keriso, na sau vave lava pe a musuia e le Agaga o ia e sau.

Sa matou maua le tele o le faailoaga o le alofa i lena taimi pagatia, e aofia ai fugalaau, kata, ipu keke, ma le tausia o tamaiti, o mea uma na matou talisapaia. Ae o le faailoaga na sili ona fesoasoani o lo‘u faiaoga asiasi, i le le iloaina sa ou matuai manaomia lava o ia, na tuitui mai i lo’u faitotoa, ma fesili mai, “Pe i ai se mea e mafai ona ou faia mo oe?”