O Le Togiola a lo Tatou Faaola

Saunia e Elder M. Russell Ballard

O Le Korama a Aposetolo e Toasefululua

Mai se saunoaga i le konafesi aoao ia Aperila 2004.

Afai e mafai ona tatou malamalama moni i le Togiola a le Alii o Iesu Keriso, o le a tatou iloa le taua tele o le atalii po o se afafine e toatasi o le Atua.

Ia Ianuari o le 2004 na mafatia ai lo matou aiga ona o le maliu faafuasei o Nathan, le atalii o le ma atalii, i se vaalele na pa’u. Sa auauna atu ia Nathan i le Misiona a Baltic e faaaoga ai le gagana Rusia. Sa ia alofa i tagata ma na ia iloa o se faamanuiaga le auauna atu i le Alii. Ina ua mavae le tolu masina talu ona ou taitaia lana faaipoipoga e faavavau ma lana manamea, o Jennifer, o lenei faalavelave sa maliu ai o ia. O le faafuaseia ona aveesea o Nathan mai le matou mafutaga faalelalolagi na toe liliu uma atu ai o matou loto ma mafaufau i le Togiola a le Alii o Iesu Keriso. E ui e le mafai ona ou faamatalaina i upu le uiga atoatoa o le Togiola a Keriso, ou te tatalo o le a mafai ona ou faamalamalama atu le uiga o Lana Togiola ia te au ma lo matou aiga, ma o le a foi lona uiga ia te outou ma o outou aiga.

O le paia o le soifua mai o le Faaola, le soifuaga, le Togiola i le Togalaau o Ketesemane, le puapuagatia i luga o le satauro, o le tanumia i le tuugamau o Iosefa, ma le Toetu mamalu ua avea uma lava ma se mea moni faafouina mo i matou. O le Toetu mai o le Faaola ua faamautinoa mai ai ia i tatou uma e faapea, o le a i ai foi se aso, o le a tatou mulimuli ai ia te Ia ma tatou oo foi i lo tatou lava toetutu. E maeu le filemu, e maeu le mafanafana o lenei meaalofa silisili lea e oo mai i le alofa tunoa o Iesu Keriso, le Faaola ma le Togiola o tagata uma. Ona o Ia, ua matou iloa ai e mafai ona matou toe faatasi ma Nathan.

E leai se faailoga e sili atu o le alofa nai lo le lototoa na faatinoina ai le Togiola e le Alo o le Atua. Ana leai le fuafuaga a lo tatou Tama Faalelagi, na faatuina a o le‘i amataina le lalolagi, i se tulaga moni lava, o tagata uma—i taimi ua tuanai, taimi nei, ma le lumanai—semanu e tuua e aunoa ma le faamoemoe o le alualu i luma e faavavau. O se taunuuga o le solitulafono a Atamu, na vavae ese ai tagata mai le Atua (tagai i le Roma 6:23) semanu e faavavau ai lava sei vagana ua maua se auala e motusia ai noataga o le oti. O lenei mea e le faigofie, aua e manaomia le sui ositaulagaina o se tasi sa leai se agasala ma e mafai ona tauaveina i Ona luga agasala a tagata uma.

O le mea e faafetai ai, o Iesu Keriso na faataunuuina ma le lototele lenei taulaga i Ierusalema anamua. O iina i le filemu o le Faatoaga tuufua o Ketesemane, sa Ia tootuli ai i totonu o le lavelave o laau olive, ma i se auala ofoofogia e leai se tasi o i tatou e mafai ona malamalama atoatoa i ai, na tauave ai e le Faaola i Ona lava luga agasala a le lalolagi. E ui lava o Lona soifua na mama aiai ma saoloto mai le agasala, na Ia totogia le tau atoa mo agasala—a oe, o au, ma tagata uma o e na soifua mai. Sa matua maoae lava lona tiga faalemafaufau, faalelagona ma faaleagaga ia na mafua ai le puna mai o Lona toto mai pu afu uma (tagai i le Luka 22:44; MF&F 19:18). Ae na puapuagatia Iesu ma le naunautai ina ia mafai ona tatou maua uma le avanoa e faamamaina ai—e ala i le faatuatua ia te Ia, salamo i a tatou agasala, papatisoina e ala i le pule tatau o le perisitua, le mauaina o le meaalofa faamama o le Agaga Paia e ala i le faamauga, ma le taliaina o isi sauniga taua uma. A aunoa ma le Togiola a le Alii, e leai se tasi o nei faamanuiaga o le a mafai ona tatou maua, ma e le mafai ona tatou agavaa ma saunia e toe foi atu e mau faatasi i le afioaga o le Atua.

Ou te talitonu afai tatou te mafai ona malamalama moni i le Togiola a le Alii o Iesu Keriso, o le a tatou iloa le taua tele o le atalii po o le afafine e toatasi o le Atua. Ou te talitonu o le faamoemoega faavavau a lo tatou Tama Faalelagi mo Ana fanau e masani lava ona ausia e ala i mea laiti ma faatauvaa tatou te faia mo le tasi ma le isi. O le togiola a Iesu Keriso e mo tagata taitoatasi. Afai e malamalama tagata uma i lenei mea, o le a leai lava se tasi o le a tatou le popole i ai, e tusa lava po o le a le matua, ituaiga, itupa, tapuaiga, po o tulaga po o le tamaoaiga. O le a tatou taumafai e faataitai i le Faaola ma o le a tatou le agaleaga, le popole, le faaaloalo, po o le lē magafagafa i isi.

Afai tatou te malamalama atoatoa i le Togiola ma le taua e faavavau o agaga taitasi, o le a tatou saili atu le tamaitiiti ua se ese ma le teineitiiti ma isi fanau uma ua se a le Atua. O le a tatou fesoasoani ia i latou ia iloa le alofa o Keriso mo i latou. O le a tatou faia mea uma tatou te mafaia e fesoasoani e saunia ai i latou mo le mauaina o sauniga faaola o le talalelei.

Pe a ou manatu i le atalii o lou atalii o Nathan ma lona taua tele ia i matou, ua mafai ona sili atu le manino o lau vaai ma lagonaina le lagona atonu o loo i ai i le Tama Faalelagi mo i tatou uma o Ana fanau. Tatou te le mananao i le Atua ia tagi ona tatou te le i faia uma mea e mafai ona tatou faia e faasoa atu ai i Ana fanau upumoni ua faaalia mai o le talalelei. Ou te tatalo ina ia outou saili ia iloa faamanuiaga o le Togiola ma o le a outou taumafai ia agavaa e auauna atu i le Alii i le galuega faamisiona. O Iesu lava na fetalai, “Afai … lua te galulue i o oulua aso uma i le alagaina o le salamo i lenei nuu, ma aumai, nao se agaga e toatasi ia te au, e matua tele lava lo oulua olioli faatasi ma ia i le malo o loʼu Tamā!” (MF&F 18:15; faaopoopo le faamamafa). E le gata i lena, ae e sili lava le olioli o le Alii i le agaga ua salamo! Aua e taua ia te Ia le toatasi.

O lo tatou Tama Faalelagi ua aapa mai ia i tatou e ala i le Togiola a lo tatou Faaola. Ia valaaulia tagata uma ia “o mai ia Keriso, o le Paia e Toatasi o Isaraelu, ma taumamafa i lana olataga, ma le mana o lana togiola” (Ominae 1:26). Ua Ia aoao mai ia i tatou faapea e ala i lo tatou usiusitai ma le faamaoni i mataupu faavae o le talalelei, e ala i le mauaina o sauniga faaola ua toefuatai mai, e ala i auaunaga faifai pea, ma e ala i le tumau e oo i le iuga ina ia mafai ona tatou toe foi atu i Lona afioaga paia. Pe i ai se isi mea i le lalolagi atoa e taua e pei o le iloaina o lenei mea?

O le mea e faanoanoa ai, i le lalolagi o aso nei, o le taua o le tagata e tele lava ina faamasinoina i le toatele o le au maimoa a o faia lana faatinoga. O le ala lenei o loo fuaina ai polokalama o le ala o faasalalauga ma taaloga, o le auala ua fuaina ai le manuia o pisinisi, ma le ala e masani ona maua ai tofiga o le malo. Atonu o le mafuaaga lenei e seasea lava ona patipatia ai matafaioi e pei o se tama, tina, ma faifeautalai. O tama, tina, ma faifeautalai e “faatino” a latou galuega e na o nai tagata e toalaiti e maimoa i ai. Peitai, i le silafaga a le Alii, atonu e i ai na o le tasi le ituaiga au maimoa e tumau le taua—ma na o le tasi, taitoatasi, o oe ma au, ma tagata taitoatasi o fanau a le Atua. O le uiga lona lua o le Togiola e faapea e lē iu ma e faavavau, ae e faaaoga e le tagata lava ia, taitoatasi le tagata i le taimi.

Aua, aua lava nei manatu faatauvaa i le taua tele o le toatasi. Ia manatua pea le faigofie o le apoapoaiga a le Alii: “Afai tou te alolofa mai ia te au, ia outou tausi mai i a’u poloaiga” (Ioane 14:15). Taumafai pea e ola agavaa mo faamanuiaga paia atoatoa o le Togiola a le Alii o Iesu Keriso. I lo matou faanoanoa i le vavaeeseina lea mai la matou pele o Nathan ua oo mai ai le filemu lea e na o le Faaola ma le Togiola e mafai ona tuuina mai. Na liliu atu lo matou aiga ia te Ia, taitoatasi; ma ua matou pepese nei i le agaga talisapaia sili atu ma le malamalama:

E maeu le alofa ma lona maliu
Tiga mo au nei!
E maeu lava, maeu naua!

(“Ou te Tu ma Ofo,” Viiga, nu. 107.)

Tau ina ia mafai ona outou tuuina atu i isi ma maua mo outou lava faamanuiaga uma ua ofoina mai e le Togiola a le Alii o Iesu Keriso.