O TALI mai Taitai o le Ekalesia
Auala e Fausia ai le Lotogatasi
Saunia e Peresitene Henry B. Eyring
Fesoasoani Muamua i le Au Peresitene Sili
Mai se lauga o le konafesi aoao o Oketopa 2008.
Ua tatou ola i le tele o tulaga eseese. O le a tatou o mai mai atunuu uma ma le tele o aganuu eseese i le malo o le Atua.
Ua tatou iloa mai aafiaga o le olioli e oo mai pe a faamanuiaina i tatou i le lotogatasi. E le mafai ona tuuina mai e le Tama Faalelagi ia i tatou o ni tagata taitoatasi. O le olioli o le lotogatasi ua Ia matuai finagalo e tuuina mai ia i tatou, e lē ‘au toatasi. E tatau ona tatou saili i ai ma agavaa mo le lotogatasi faatasi ma isi. E le o se tulaga la e faateia ai, le uunaia o i tatou e le Atua e faapotopoto faatasi ina ia Ona faamanuiaina i tatou. Ua Ia finagalo ia tatou faapotopoto i aiga. Ua Ia faatuina vasega, uarota, ma paranesi ma poloaiina i tatou ia faapotopoto faatasi e le aunoa. I na faapotopotoga, lea ua fuafuaina e le Atua mo i tatou, o loo taoto ai lo tatou avanoa sili. E mafai ona tatou tatalo ma galulue mo le lotogatasi lea o le a aumaia ia i tatou le olioli ma faateleina ai lo tatou malosi e auauna atu.
E faaopoopo atu i sauniga, o loo i ai mataupu faavae o loo tatou mulimuli i ai i le avea ai ma se tagata lea e tau atu i le lotogatasi sili atu.
1. Faaaliga. O Faaaliga ua na o le pau lea o le ala e mafai ona tatou iloa ai pe faapefea ona mulimuli faatasi i le finagalo o le Alii. E manaomia ai le malamalama mai luga. O le a molimau mai le Agaga Paia i o tatou loto, ma loto o i latou e faapotopoto faatasi ma i tatou, i le mea e finagalo o Ia ia i tatou e fai. Ma o le tausia o Ana poloaiga e mafai ai ona tatou fusia o tatou loto ia tasi.
2. Ia lotomaualalo. O le Faamaualuga o le fili sili lea o le lotogatasi. Ua e vaaia ma lagonaina ona aafiaga matautia. O le mea e sili ai, o loo ou vaaia le tele ma tele o tagata faatupu filemu atamamai, o e faatoafilemuina se vevesi a o le’i tupu se faalavelave. E mafai ona avea oe ma se faatupu filemu, pe o e i ai i le feeseeseaiga pe o e matamata atu foi i ai. O se tasi auala na ou vaai o faatinoina ai o le saili lea mo se mea tatou te au uma i ai.
3. Talanoa i mea lelei e uiga i le tasi ma le isi. Mafaufau i le taimi mulimuli na fesiligia ai oe, po o le a sou manatu pe o faapefea mai se isi tagata o lou aiga po o le Ekalesia. E mafai ona ou folafola ia te oe se lagona o le filemu ma le olioli pe a e tautala ma le agalelei e uiga i isi i le malamalama o Keriso.
Faatasi ai ma le lotogatasi ua ou vaaia ua faateleina, o le a faia e le Alii ia mea ia o le a manatu le lalolagi o ni vavega. E mafai ona faataunuuina e le Au Paia o soo se faamoemoega o le Alii pe a atoa i le lotogatasi i le amiotonu.