Savali a Faiaoga Asiasi
Foafoaina i le Faatusa o le Atua
Ia suesue ma le agaga tatalo lenei savali ma saili ia iloa mea e faasoa atu. O le a faapefea e le malamalama i le “O Le Aiga: O se Folafolaga i le Lalolagi” ona faateleina lou faatuatua i le Atua ma faamanuiaina ai i latou e te tausia i le faiaoga asiasi? Mo nisi faamatalaga, alu i le reliefsociety.lds.org.
Faatuatua, Aiga, Toomaga
“Ona fetalai ane lea o le Atua, Ina tatou faia ia o le tagata i lo tatou faatusa, ia foliga ia i tatou. …
“Ona faia lea e le Atua o le tagata i lona faatusa, o le faatusa o le Atua na ia faia ai o ia; na faia e ia o i laua o le tane ma le fafine” (Kenese 1:26–27).
O le Atua o lo tatou Tama Faalelagi, ma sa Ia faia i tatou i Lona faatusa. O lenei upu moni, na saunoa ai Peresitene Thomas S. Monson: “O loo i ai ni fofoga [taliga] o le Atua lo tatou Tama e faafofogaina ai a tatou talosaga. E i ai foi ni Ona fofoga [mata] e silasila mai ai i a tatou amio. E i ai foi Lona fofoga [gutu] e fetalai mai ai ia i tatou. E i ai Lona fatu na te lagonaina ai le agalelei ma le alofa. E moni o Ia. O loo soifua o Ia. O i tatou o Lana fanau na faia i Lona faatusa. Tatou te foliga ia te ia ma e foliga o ia e pei o i tatou.”1
“E vaai le Au Paia o Aso e Gata Ai i tagata uma o fanau a le Atua i se tulaga atoatoa; latou te mafaufau o tagata uma e paia i le amataga, natura, ma le gafatia.”2 O tagata taitoatasi o “se atalii po o se afafine agaga faapelepele a ni matua faalelagi.”3
“[O le Perofeta] o Iosefa Samita na aoaoina foi e finagalo le Atua i Ana fanau ia maua lea lava ituaiga o faaeaga o loo i ai o Ia.”4 E pei ona fetalai mai le Atua, “Aua faauta, o la‘u galuega ma lo’u mamalu lenei—ia aumaia le tino ola pea ma le ola e faavavau o le tagata” (Mose 1:39).
Mau Faaopoopo
Kenese 1:26–27; 1 Korinito 3:17; Mataupu Faavae ma Feagaiga 130:1
Mai Tusitusiga Paia
Na saili le uso o Iareto i le Tusi a Mamona mo se auala e faamalamalama ai vaa e valu ua mamanuina e aveina atu sa Iareto i luga o vai agai i le nuu folafolaina. Sa ia “gaosi mai se papa ni maa laiti e sefulu ma le ono” ma tatalo i le Atua ina ia “pai mai i nei maa” i Lona tamatamaiaao “ina ia susulu atu i le pogisa.” Ma o le Atua “sa faaloloa mai e le Alii lona aao ma sa pai i maa taitasi i lona tamatamaiaao.” Sa aveesea le veli mai mata o le uso o Iareto, ma “sa ia vaai i le tamatamaiaao o le Alii; ma sa pei o le tamatamailima o se tagata. …
“Ma sa fetalai mai le Alii ia te ia: E te talitonu ea i upu o le a ou tautala atu ai?
“Ma sa tali atu o ia: Ioe, le Alii e.”
Ma na “faaali mai e le Alii o ia lava ia te ia [le uso o Iareto]” ma faapea mai, “Pe ua e vaai ea ua foafoaina oe i lou lava faatusa? Ioe, e oo i tagata uma sa foafoaina i le amataga i lou lava faatusa.” (Tagai Eteru 3:1–17.)