O TALA OFOOFOGIA O LE TALALELEI
O Faatoaga e Tolu a le Atua
Mai le, “O Le Mana Faamama o Ketesemane,” Liahona, Iulai 1985, 9–11. Ua faalaugatasia faailoga ma mataitusi tetele.
O le molimau faaaposetolo mulimuli lenei a Elder McConkie i le olaga nei; na maliu o ia i le lua vaiaso mulimuli ane.
Ia tatou auai faatasi ma au i le mauaina o se malamalama lelei ma le mautinoa o le Togiola.
Agavale: O le Faatoaga o Etena, saunia e Jan Brueghel the Elder © Museo Thyssen-Bornemisza/Scala/Art Resource, NY; Parataiso, saunia e Jan Brueghel the Elder © bpk, Berlin/Gemaeldegalerie/Jörg P. Anders/Art Resource, NY; Ua Tuua le Faatoaga o Etena, saunia e Joseph Brickey; taumatau: Faamatalaga mai le Atamu ma Eva ua Tulia i Fafo o le Faatoaga o Etena, saunia e Gary L. Kapp; faamatalaga mai le Keriso i Ketesemane, saunia e Harry Anderson; O Le Toetu, saunia e Harry Anderson
Ou te lagona, ma e foliga mai ua ogatasi foi ma le Agaga, o le aoaoga faavae aupito taua e mafai ona ou folafola atu, ma o le molimau aupito mamana foi lea e mafai ona ou tuuina atu, o le taulaga togiola lea a le Alii o Iesu Keriso.
O Lana Togiola o le mea aupito sili lea ona faagaeetia ua tupu talu mai le gafoaga o le Foafoaga e oo atu i augatupulaga uma o se faavavau e le muta.
O le faatinoga maualuga lea o le lelei ma le alofa tunoa lea e na o se atua e mafai ona faatinoina. E ala mai i le Togiola, na aoga uma ai tuutuuga ma tulaga o le fuafuaga e faavavau o le faaolataga a le Tama. …
I le talanoa ai e uiga i nei mea matagofie, o le a ou faaaogaina ai a’u lava upu, e ui atonu o le a outou faapea o upu ia o tusitusiga paia, o upu na tautalagia e isi aposetolo ma perofeta.
E moni na folafolaina muamua lava e isi, ae ua avea nei ma a’u upu, aua ua molimau mai le Agaga Paia o le Atua ia te au ua moni ia, ma ua pei nei ua faaali mai e le Alii ia te au i le taimi muamua. Sa ou faapea ai ona ou faalogoina Lona siufofoga ma iloa Ana afioga. …
Ou te valaaulia outou ina ia tatou auai faatasi i le mauaina o se malamalama lelei ma le mautinoa i le Togiola.
E tatau ona tatou lafoai i filosofia o tagata ma le poto o e popoto, ae faalogo atu i lena Agaga lea ua tuuina mai ia i tatou e taiala i tatou i upu moni uma.
E tatau ona tatou suesue i tusitusiga paia, ma ia talia le mafaufau ma le finagalo ma le siufofoga o le Alii ma o le mana lava lea o le Atua i le faaolataga.
A o tatou faitau, mafaufau loloto, ma tatalo, o le a oo mai i o tatou mafaufau se vaaiga o faatoaga e tolu a le Atua—o le Faatoaga o Etena, o le Faatoaga o Ketesemane, ma le Faatoaga o le Tuugamau Avanoa, lea sa faaali mai ai Iesu ia Maria le Makatala.
I Etena, o le a tatou vaai ai i mea uma na foafoaina i se tulaga faaparataiso—e leai se oti, e leai se mana o le foafoaga, e leai ni aafiaga faataitai.
O le a tatou iloa o lena ituaiga o foafoaga, lea ua le iloa nei e tagata, sa na o le pau lea o le ala e aumai ai le Pau.
O le a tatou vaai ai ia Atamu ma Eva, o le uluai tane ma le uluai fafine, na o ifo mai lo laua tulaga e le oti ma le mamalu faaparataiso e avea ma uluai tagata faitino i luga o le fogaeleele.
O le olaga nei, e aofia ai le mana foafoa ma le oti, o le a oo mai i le lalolagi. Ma ona o le solitulafono, o le a amataina ai se olaga faataitai o le faaosoosoina ma le tofotofoina.
O Ketesemane o le a tatou vaai ai i le Alo o le Atua o faasaoina le tagata mai le oti faaletino ma le oti faaleagaga lea na oo mai ia i tatou ona o le Pau.
Ma le vaega mulimuli, i luma o se tuugamau avanoa, o le a tatou iloa ai o Keriso lo tatou Alii ua motusia nonoaga o le oti ae tulai manumalo ae e faavavau i le tuugamau.
O lea la, o le Foafoaga o le tamā lea i le Pau; ma o le Pau na oo mai ai le olaga nei ma le oti; ma o Keriso na oo mai ai le tino ola pea ma le ola e faavavau.
Ana faapea e leai se Pau o Atamu, lea na oo mai ai le oti, semanu e le i ai se Togiola a Keriso, lea ua oo mai ai le ola.
Ma o lenei, e faatatau i lenei Togiola atoatoa, na oo mai i le faamasaaina o le toto o le Atua—ou te molimau atu sa tupu i Ketesemane ma Kolokota, ma e faatatau ia Iesu Keriso, ou te molimau atu o Ia o le Alo o le Atua soifua, ma sa faasatauroina mo agasala a le lalolagi. O Ia o lo tatou Alii, lo tatou Atua, ma lo tatou Tupu. O lenei mea ua ou iloa mo a’u lava, ou te tutoatasi lava mai se isi lava tagata.
O a’u o se tasi o Ana molimau, ma i se aso o lumanai o le a ou tagotago i faailoga o fao i Ona lima ma i Ona vae, ma o le a susu Ona vae i o’u loimata.
Ae o le a le sili atu se isi mea ou te iloa i lena taimi nai lo le mea ua ou iloa nei, o Ia o le Alo o le Atua Silisili Ese, o Ia o lo tatou Faaola ma le Togiola, ma e oo mai ma ala mai le faaolataga i Lona toto togiola ae le o se isi lava ala.
Talosia i le alofa o le Atua ia mafai e i tatou uma ona savavali i le malamalama, e pei ona i ai le Atua lo tatou Tama i le malamalama, ina ia tusa ai ma folafolaga, ia faamamaina i tatou e le toto o Iesu Keriso, Lona Alo, mai agasala uma.